MATAYO 7

Muu mu sakwasleemuutara'

(Luka 6:37-38, 41-42)

1«Muu mu sakwasleemuutara' as kuungá' mutunduwa sakwasleemuút. 2Asma sakwasleemadá' kuungá' muu kur sakwasleemuta', kingi kuungár sakwasleemuut. Harqoomaydá' tar qoomeemesa', kungu dirhúng i qoomeemees sleeme. 3Kuúng mas suwito'ór baraá iltá heewók an ara'aán, ala waaqaasír baraá iltók a tsatsahhaandaaká? 4Laqaá adór heewók kur beer, ‹Xáda, suwito'oosír baraá iltók án ngi hingeés›, bar waaqaasi i baraá iltók i dirí'. 5Kuúng adoosinge a hhaahhafusmo. Waaqaasír baraá iltók ala geerií hingeeseek, daqaní suwito'oodár baraá iltá heewók i dirii' a tsaahha hhe'és nee kawa hinges.

6«Gár hhoohhoo' ma seeaawérií haniisara', asma inooín kuungá' nun harawarqayá' nuri kikiihhiyá'. Slám miisli ma baynuú i kwakwaahhara', asma inooín mingiwa yaamií adaraahiyé'.»

Firo

(Luka 11:9-13)

7«Firiiriimé', kuungá' tundu qáy, leelehhiitaak kuungá' a sleerá', ateetimé' afkú dó' wa ale, piindo ka qo duux. 8Asma umuúqo heé firiiriím ku qáy, nee kudá' leelehhiít ga sláy, nee kudá' afkú doó wa ateetiím, piindo ka qo duux. 9Baraá tla/angwhunge hee i deéro oo na/aywós gu tlaa/anoó i haniís mukatmo burngwa firín? 10Laqaá siyó burngwa firín, dayshamo gu haniísi? 11Ala bar kuungaásingá' tlakw muruú hhó' u xuá' kuwa na/iihúng i hanmisa'. Xáy, Baabuúhúng oo gawaá doorí dirií' i ak waaraáhhiíke muruú hhó' nguwa haniisi dír kudá' inós ngu firiiriima'a.

12«Gawaá adoorihe umuúqo gaaro ar kuungá' ta sla'a' muu ni kuungií tleehhi, kuungá' adoodá' tleehhaak sleeme dir'ine. Asma hara'ayár Mose nee gooír aaruuse adoorí gan kát.»

Afkú iiraákw

(Luka 13:24)

13«Daraahé', afkú iiraákw ar oohaak, asma afkú iintlaáxw nee loohír iintlaaxw in baraá qwanoó kayá'. Nee múk loohidá' ga óh ku úr. 14Ala afkú iiraákw nee loohír iiraakw in baraá slafíngw kayá'. Nee múk loohidá' ga sláw ku niiná.»

Xa'ano nee mamuuwós

(Luka 6:43-44)

15«Ti harmagahhe' dír aaruusér lamuuseero, inooín birni amorhúng kayá' tlabaá bee/aangw nga tsiitiyé', ala laatí baraaine a taweruú xaraásl. 16Múk adoorí uqo tsahhá' ar tlehhmi'ii'ín. Xáy, muu sabiíbu gu gawaá xaa'aá laqayaá wa buaaína? Laqaá /aantsí ka gawaá xaa'aá laqayaá wa buaaína? 17Gawaá adoorihe umuúqo xa'anoó hhoó' mamaá hho' gin laqwaal. Nee xa'anoó tlaákw mamaá tlakw gin laqwaal. 18Xa'anoó hhoó' mamaá tlakw gi laqwaaliiká. Slám xa'anoó tlaákw mamaá hho' gi laqwaaliiká. 19Umuú xa'anoó mamaá hhó' gi laqwaliimaaká, kun tsaat, kway baraá ásltí kwaahh. 20Gawaá adoorihe kuungá' mukdaádá' u tsahhá' ar tlehhmi'ii'ín kudá' ta tlehhiiti.»

Án kuungá' nu baloó xuaaká

(Luka 13:25-27)

21«Heé aní tawó babáw, ‹Aáko, Aáko,› i dahiiká baraá waawuti'iimár dooriiwo. Heé dáh a kudá' sla'aarír Baabuúeé' oo gawaá doorí dirií' ga tlehhiít. 22Baldá' múk yaariír aníng i bay, ‹Aáko, Aáko, atén aga ariirimániíke ar umuuwók, nee neetlaame aga gusisimániíke ar umuuwók, tam muruú yaariír oo waa/oo/amo ugwa tlehhiitániíke ar umuuwók, kudá' naa aténií hanís.› 23Aluuwo án ngiri baw ar gwa/aateema, ‹Án kuungá' nu baloó xuaaká. Quutlé' dir'eene, kuungaásingá' muruú tlákw tlehhahhitá'.› »

Maraá tsár

(Luka 6:47-49)

24«Umuúqo heé axweesanay'eé' kwí gwa axaas nee adoodá' i kaahi gay tleéhh, a slaqás nee heé fuqurángw koóm, oo do'ós gwa tleehh gawaá daanduú tlaa/a. 25Tluwaay iri tluúw, yau niri wa/iyé' amór dó' i alé, nee fur'a guri i fukuukú', ala do'dá' aa huuiiká, asma koo/irós kaa tleéhh gawaá daanduú tlaa/a.

26«Nee heé axweesanay'eé' kwí gwa axaas, ala adoodá' i kaahi gay tleehhiiká, a slaqás nee heé daktani, oo do'ós gwa tleehh gawaá daanduú hhasaangw. 27Tluwaay iri tluúw, yau nay wa/iyé' amór dó' i alé, nee fur'a guri i fukuukú', do'dá' guri diingís iri huú'. Nee adór do'dá' ira huú' ka ló'wa slasla/aar.»

Aleesleemuú Yesu

28Qoomár Yesu muruuwí kaahaango nguwa hhe'eés, boo/oó yaariír oo muu ina waa/oó/ ló'wa aleeró asma intsaahhatimisuuwós. 29Asma gina intsaahhatimís adór heé aleesleemuú koóm, tam a adór intsaahhatuusér hara'ayár Mosewooká.

Currently Selected:

MATAYO 7: IRQW

Highlight

Copy