MATAYO 27
27
Yesu kuwa huúw dír geeraá Pilato
(Marko 15:1; Luka 23:1-2; Yoh 18:28-32)
1Looa niwa tleér kaahamuusér uren sleémeero ar Mungú nee bariisér múk Yahudi tari al'axweés adór ta laqi daanduú Yesuwo as kuwa gaasi. 2Yesu kuri tseék, kuri huúw ay amór Pilato, ga/aawusmoó taa qaás nee múk Roma.
Gwa'arár Yuda
(Tlehh 1:18-19)
3Qoomár Yuda, kudá' Yesu gwa sakii/, ngiwa ár adór Yesu kura qaroó sakwasleemuút, iri gurhaamuút. Shilingidá' mibeeraá tám gari ki/ís dír kaahamuusér uren ar Mungú nee dír bariise, 4giri báy, «Aga dakuús, asma heé tlakweemaá koomaaká nguwa sakií/.»
Inooín tari oó', «Gár atén ti huuw gawaá tisinge a milá? Kangwsíng a kók.»
5Peésaadá' gari kwaáhh baraá Doó Mungú, iri tláy, tiri tareereé'.
6Kaahamuusér uren ar Mungú peésaadá' gari léhh, iri ó', «A hariímarooká peésaarí kawa qaasaan baraá sandakmoó ilahhooa, asma a peésár tseere.» 7Tari al'axweés, Qaymór tleeusmo kari tlaáxw ar peésaadá', tawa dír folituú dahaaye. 8Gawaá adoorihe qaymoodá' kari báy «Qaymór tseere» tam ay laarí.
9Gawaá adoorihe /aymuudá' aarusmo Yeremia aa oó' iri boó/, kudá' iwa káh, «Shilingidá' mibeeri tám kari taataáhh. Qoomaywí a kudá' taa axweés nee múk Israeli tawa tlaxór heedaádá'. 10Qaymór tleeusmo kari tlaáxw ar peésaadá', ar adór Aako ngira hara'ayín.»
Pilato i Yésú yaahamiis
(Marko 15:2-5; Luka 23:3-5; Yoh 18:33-38)
11Yesu iri sihhiít dír geeraá ga/aawusmo. Ga/aawusmo Yesu guri yaahaás iri oó', «Kuúng a waawutmoó múk Yahudíro?»
Yesu iri oó', «A adoosíng kuúng ta kat.» 12Ala qoomár kuwa sakwasleemuút nee kaahamuusér uren ar Mungú, gár aa oó' i káhh.
13Pilato iri oó', «Kuúng a axamisakáhe mura' a magá' oo tindi daanduuwók i kaahi?»
14Ala Yesu tam /aymuú wák gwa tlaxwiiká. Tam ga/aawusmo iri ló'wa waa/oó/.
Kwasleemár Yesu kuwa gaasi
(Marko 15:6-15; Luka 23:13-25; Yoh 18:39—19:16)
15Umuúqo deelór Pasaákuwo ga/aawusmo heé wák gun gweer baraá múk taa tsegiiti, heedá' muu i gweerár wa slai. 16Deeloodae heeko taa tseék i deer, inós a heé taa xuú' nee muu, umuuwós ku babay Baraba. 17Boo/aydá' iwa burumburiít, Pilato iri oó', «Heé ta sla'a' a gaalá, Barabáwo laqaá Yesu, kudá' ta babay Kristo?» 18Asma inós gaa xuú' adór gár Yesu kungu sa duúx tar da/i.
19Nee Pilato iwa iwiít gawaá kitaangós kuduú kwasleema, hareerós hee nguri ya/áp, guri beér, «Kángw heesíng gan'amuú koóm mu i dahaar. Asma laarí xweeraawo aníng tina slahh'eemaamiís ar baraá tlata as inós.»
20Kaahamuusér uren ar Mungú nee bariise boo/aay kuri harakeemiís as Baraba kunguwa duuxi, nee Yesu kuwa gaasi. 21Ga/aawusmo iri oó', «Heé ni gweer baraá mukwí tsare a heemá?»
Tari oó', «A Baraba.»
22Pilato iri oó', «Ala Yésuuwí ta babay Kristo án adór ngu laaq a adoomá?»
Sleémeero tari oó', «Kikieek gawaá msalaába.»
23Pilato iri oó', «Asma milá? Gár aa tlakweés?»
Boo/aydá' tsimaahhiro iri ak buúhh, tari oó', «Kikieek gawaá msalaába.»
24Qoomár Pilato ngiwa ár gár i bui i káhh, ala a tsimaahhi in tlahhaatláhh, ma'aay giri taataáhh, dabaawós giri hamaátl dír geeraá múk wa ale, iri oó', «Aníng tlakweemaá ni koom i kahhiyá' gawaá daanduú heewí gan'amuú kooma. Ala kangwsíng a koohúng.»
25Muu sleémeero iri oó', «Tseereerós atén nee na/iirene ti i ki/.»
26Pilato Baraba guri gweér. Nee Yesu muxtár qaw'iwo nguwa hhe'eés, guri dabaaín i qaás as kuwa kikii'i gawaá msalaába.
Askaári Yesu nguwa niqiín
(Marko 15:16-20; Yoh 19:2-3)
27Yesu kuri huúw baraá boómár ur nee askaárír Pilato. Nee askaárír yaariir guri i burumburít. 28Inqwaruuwós kuri duúx, kuri tsiitiís ar inqwaarír sirdaa/aat. 29Slamángw laqaya' kuri tlaatlaáw, kuri dahaás gawaá sagós. Daai kari haniís dákw doó /iyáy i alé. Tari tseeamín geeraawós wa aleeró kuwa niqimisi, tari káh, «Waawutmoó múk Yahudi, laawaay.» 30Kuri i nitsimiít, daaidá' kari gawaá dakós wa taataáhh, kuri saga muúx. 31Niqimisuuwo kuwa hhe'eés, inqwaaridá' kari hingeés, kuri inqwaruuwósuú kilá' i dahaás. Kurir tláy, kuri kikiiár áy gawaá msalaába.
Yesu kuwa kikií' gawaá msalaába
(Marko 15:21-32; Luka 23:26-43; Yoh 19:17-27)
32Qoomár tawa ti'imiiti, heeko kuri ár oo yaamaá Kirenér daáhh, umuuwós a Simon. Heewí kuri harakeés as msalaábár Yesu ngiwa gagaari. 33Tawa hardáh dír ta babay Golgota, gídaabárós a «Fartá saga», 34difaáír taa garka qarqaárár aleedoók kari haniís. Ala ngiwa tsaáq, gay sií' wahto.
35Kikiiaro kuwa hhe'eés, inqwaruuwós kuri qasmiís ar loohír tsawdo. 36Tari iwiít yaamií alé as kuwa xun. 37Nee gawaá ságw msalaábarose gadá' kusa sakwasleemuút kari gooín tidá' kah, «Heewí a Yesu, waawutmoó múk Yahudi.» 38Qoomaadae mukko tsár oo fisuuse kuri al kiki'ín nee inós, oo wák dákw doó /iyáy, nee kuqá' dákw doó basáy.
39Múk loohidae waraáhh Yesu kuri tloqmiís ta hara sager'ín muumukuumiis, 40ta kaahi, «Kuúnguudá' Doó Mungú gu feé/, nee kuri tléhh deelo tame, ti kilók alee/is, kuúng barnaxes aqo Garmoó Mungú, aweeráng gawaá msalaábaro.»
41Slám kaahamuusér Mungú guri niqimís, nee intsaahhatuusér hara'ayár Mose, nee bariise, kuri babáy, 42«Múk hatlá' guna alee/iimiís, ala inós kilós alee/iisaro ti aleeslayká. Inós a waawutmoó múk Israeli. Axáy, i aweeri gawaá msalaábár wa ale hamír kilá', daqaní atén u haratlintiaán. 43Inós Mungú gu haratlintatii'. Barnaxes Mungú inós ngu slaa', ngu ba/amisi hamí. Asma inós ina aaín, ‹Aníng a Garmoó Mungú.› »
44Slám mukduú fisuuse oo nee Yesu taa al kiki'ín, nguna adoodár /ooslisliné' sleeme.
Gwa'arár Yesu
(Marko 15:33-41; Luka 23:44-49; Yoh 19:28-30)
45Looár lahhoó' iwa xeér, iimi iri gíp yaamu sleémeero ay looár gwaleél. 46Looár gwaleele Yesu iri tseé' ar afór ur, iri oó', «Eloi, Eloi, laama sabaktani.» Gídaabárós a «Munguúeé', Munguúeé', án misa geexeér.»
47Múk didaádí dirií' bahh'alé adoodá' ngiwa axaás, tari oó', «Heewí i Eliyá ateetín.» 48Hamtidár kilae heeko wák dir'ine iri ta'aaín, warqamooko guri tikiís maraá difaáír qarqaar gari siíhh gawaá afkú daai, Yesu guri wahaás ar warqamoodá'.
49Ala múk hatlá' iri oó', «Lakiité' u araán, axáy Eliya ngu aweeriisár áya?»
50Yesu iri malé tseé' ar afór ur, iri tsatiít.
51Inqwaarír baraá Doó Mungú, ar do' gwa qasis, iri tla/a feehhít gáwtá wa ale ay baraay. Yaamu nay daaraxaatiyé' as kunseeli, tla/u nay feehhamitiyé', 52/aantu nay kisiitiyé' nee múk yaariír oo hhohhó' oo aa qaatl nari waasleé/, 53baraá /aantu ngay geexáy. Nee alaá Yesu niwa waasleé/ niri dahiyé' baraá Gixsadá' Hhoohhoo' nee múk yaariír giri araa'ár.
54Geeraharusmooduú askaári nee mukdá' Yesu xuuma, kunseelidá' kawa axaás, nee muruudá' aa tleehharuuti, tari ló'wa da'ayuút, tari oó', «Ar ló', heewí a tsuwá Garmoó Mungú.»
55Nee /ameenarka yaariir i amorqá' saáw wa xumís. Inooín an kudá' Yesu ngwa eehariye' amór Galilayár wa ale, nee nguri sagadiyusiyé'. 56Baraaine heé dáw a Maria Magdalene, nee Maria aayór Yakobo nee Yosefu, nee aayór doó Sebedayo.
Foolár Yesu
(Marko 15:42-47; Luka 23:50-56; Yoh 19:38-42)
57Qoomár tsiindo niwa xayé', heeko daqaarmo nay hardáh. Inós a heé yaamaá Arimataya. Umuuwós a Yosefu. Nee slám inós a eeharusmoó Yesu. 58Heewí ina dír Pilato káy as slaqwtá Yesu ngiwa firin. Pilato iri ya/án. 59Yosefu slaqwtá Yesu gari aweeriís, gari untsuús ar inqwaarír /awaak. 60Gari qaás baraá baa'aarós ar /aben, tidá' aa foól gawaá tlaa/a as inós. Tlaa/ár yangaariir gari gwangwaraá' gawaá afkú /aantaadá' i aleeró, iri quútl. 61Ín Maria Magdalene nee Maria tidár tsár i didá' wa iwiwiitiyá', ta amór /aantaadá' ga/áy.
Askaári i /aantár Yésú xuún
62Tam bál tsár, baalaadár alaá deelór amohhe'eemisuú deelór ur ar Pasaákuwo kaahamuusér uren ar Mungú nee múk Farisayo Pilato kuri i burumburiít, 63tari oó', «Aáko, aga inslawaán adór heedaáduú al/aymusmo qoomár iwa slafi ira oó', ‹Deelo tám bira waaráhh án ni waasleé/.› 64Gawaá adoorihe hara'aya haniseek /aanta ka xun ay bál tám. Aluuwo eeharuuseerós munguwa fiisór eér, nee muu guri beer, ‹Aa waasleé/ baraá múk aa qaátl wa ale.› Al/aymár alhhe'eesaay tidár geera gari bá/.»
65Pilato iri oó', «Askaári a koondá'. Tlawsé', /aanta xuumaak adoodá' kar xua'.»
66Tari tláy, duguno kuri qaás gawaá tlaa/adá'. Askaári kari qaás as /aantadá' ngiwa xuun.
Currently Selected:
MATAYO 27: IRQW
Highlight
Share
Copy
Want to have your highlights saved across all your devices? Sign up or sign in
The Bible in Iraqw © Bible Society of Tanzania, 2004.
