MATAYO 13

Slaqsoó dahaasusmo

(Marko 4:1-9; Luka 8:4-8)

1Looarka wake Yesu ina dír dó' wa tláy, iri iwiít afaá tlawi. 2Boo/oó yaariír iri dirósií burumburiít, tam Yesu iri gawaá miringamoó i tsa/án, iri iwiít gawaadí alé. Boo/ayduú muu sleémeero iri afaá tlawtí sihhiít. 3Yesu muruú yaariír guri dir'ín i axweés ar slaqsi'i, iri káh,

«Heeko wák ina dahaasíngw áy. 4Nee qoomár iwa dahaasin, bahh'alé ina paáhh afaá loohi. Tsir/o niri hardát, dahaasingwdá' guri /ák. 5Oo hatlá' ina paáhh gawaá tla/u, didaádá' hhapér yaariir iwa kahh. Nari ti'iít ar gaanslaay, as hhapér bu'uut iwa kahh gawaá daanduú tla/uudae. 6Nee tam tsee/amá iwa gwa/aát iri káh, asma dír dee/ár nguy sihhi i káhh. 7Oo hatlá' ina paáhh baraá laqaya', laqayaadá' niri uraarayé', dahaasingwdá' kuri tliíq. 8Nee dahaasíngw hatlá' iri paáhh dír hhapér hho', iri laqwaál, oo wák tsiiru, nee oo wák mibeeri lahhoó', nee oo hatlá' mibeeri tám.

9«Heé iaá axamis gi koóm, i axaasi.»

Gár slaqsi'i kisar intsaahhatimisi

(Marko 4:10-12; Luka 8:9-10)

10Eeharuuse nari hardát, Yesu guri beér, «Asma milá, mas axwés nee inooín ar slaqsi'i?»

11Yesu giri i ilawaáts, giri báy, «Kuungá' naaqór waawuti'iimár doori aga xue'. Ala inooín ka xuiiká. 12Asma umuúqo heewo oo gár koóm, ka dook. Slám kay tlahhasa hhe'ees. Ala umuúqo heewo oo gár koomaaká, tam tidá' niina i kon ka hayoh. 13Gawaá adoorihe aníng an dir'ínií axweés ar slaqsi'i. Asma inooín barta xumiis, gár ta ara'ari i káhh, nee barta axamiis, gár ta axamiisi i káhh, slám gár ta tsatsahhan i káhh sleeme. 14Nee /aymuú aarusmo Isaya aa boó/ dir'ine, kudá' iwa káh,

‹Axaasaro a axasá', ala a tsahha'aaká.

Qaytsitaro a qaytsitá', ala a aanda'aaká.

15Asma munér mukwí ka gawden,

nee iiaawo i ak axamiisiaaká,

nee ilaaín kaa gumamaá',

as makawa ár ilaaine, matawa axaás iaaine,

makawa tsaáhh ar muner'ín,

mindiwa warqayé', nee aníng ngiri hungu/uús.›

16«Ala kuungá' a múk amohhoó', asma ilaahúng ngi ga/ayá', nee iaahúng i axamiisiyá'. 17Án a kah, aaruusér yaariir nee múk hota ganaa'aá' kana slaá' arto tidá' kuungá' ta ga/eera', ala kaa ariiká. Nee kari slaá' axaasaro tidá' kuungá' ta axamisa', ala kaa axaasiiká.»

Gídaabár slaqsoó dahaasusmo

(Marko 4:13-20; Luka 8:11-15)

18«Ala kuungá' slaqsoó dahaasusmo iiárií qaasaak. 19Umuúqo heewo oo axweesantá waawuti'iima gaa axaas, nee gídaabárós birnga tsaahhiiká, kudá' tlaákw nin hardah, nee /aymuudá' taa baraá muunuú heéwi dahaás guri hingees. Kwí an kudá' aa paahh afaá loohi. 20Nee kudá' aa paahh gawaá tla/u, an slaqsoó mukdá' axweesani gaa axaas, nee axweesantadá' kari ilaóh ar qwala/. 21Ala dee/árú ta kon i kaahh, nee deelór tawa hooti ka ureeká. Slahh'ámu binda ti'iít as axweesantadá', laqaá gusiisiingw, axweesantadá' kari máy. 22Nee kudá' aa paahh baraá laqaya', an slaqsoó múk axweesantadá' gaa axaas, ala daawitimér yaamu nee al/aymár daqaari'iima axweesantadá' gari tlíq, axweesantadá' iri laqwaliká. 23Nee kudá' aa paahh baraá hhapér hho', an slaqsoó múk axweesantadá' gaa axaas, nee gár i kat gari tsaáhh. Axweesantadá' baraá muner'ine iri laqwál, oo wák mamu ay tsiiru, nee kuqá' mamu mibeeri lahhoó', nee oo hatlá' mamu mibeeri tám.»

Slaqsoó sla/atá taa dahaás baraá qaymór angaáno

24Yesu gina slaqsoó hatlá' báy, iri oó', «Waawuti'iimár doori a slaqás nee heé dahaasíngw hhó' gwa baraá qaymoorós i dahaas. 25Qoomár xweeraawo sleémeero tawa guú', wakusmo ina hardáh, sla/a gari dahaás baraá tla/ángw angaáno, iri quútl. 26Qoomár angaáno iwa hapapaa'amiít nee iwa /uuntluumisi, sla/a sleeme iri geehhoouúr. 27Heedaáduú qaymo loó' lawaaleerós guri i daqeér, guri yaahás, guri beér, ‹Ahaá, baré kuúng dahaasíngw hhó' una dahás, ala sla/atadá' i dáhh?› 28Inós giri báy, ‹Wakusmo adoosíng gana tleéhh.› Inooín nguri bayé', ‹A slá'a sla/atadá' ngiwa burumburtá awaan?› 29Inós iri oó', ‹Aasla'áy, mawaak, asma aluuwo dahaasingwdá' hhó' u sla/atá altu/uundá'. 30Mawaagáy sleémeero ay dír i uraaraya' nee dír qoomár bu'uungw ni xeer. Daqaní qoomár bu'uungo aníng mukdá' bu'uúm un baw, «Sla/a ala tu/aak, daqaní ka dinkwárií tsegá', nee ka kwahhá' baraá asla. Daqaní angaáno ku baraá meewér'eéní burumbudá'.› »

Slaqsoó ilmoó haradaáli

(Marko 4:30-32; Luka 13:18-19)

31Yesu slaqsoó hatlá' guri dir'ín i káh, iri oó', «Waawuti'iimár doori a slaqás nee ilmoó xa'anooko ta bay haradaáli, oo hee aa baraá qaymoorósí dahaás. 32Nee ilmoodá' ku ló'wa niiná ta dahaasíngw hatlá' sleémeerowo. Ala binda ti'iít, ku ló'wa úr xaa'aá mamu sleémeero ba/a, iri xa'aanoó úr tleehhiit. Tam tsir/o iri hardát, maray'ín giri gawaá haleemiidí tlehhít.»

Slaqsoó gár ta mikaátér sluuftimisi

(Luka 13:20-21)

33Yesu slaqsoó hatlá' guri dir'ín i káh, iri oó', «Waawuti'iimár doori a slaqás nee gár mikaáte ir sluufaasluf, ar /ameeni aa qás baraá puuruú, oo har afi qoomoó deebadaá tsár, tam puuruúdá' sleémeero iri sluúf.»

Yesu adór ira axweés ar slaqsi'i

(Marko 4:33-34)

34Muruuwí sleémeero Yesu guna dír boo/áy axweés ar slaqsi'i. Umuúqo gaaro gana dir'íní axweesi ar slaqsi'i, 35as /aymuuduú aarusmo aa oó' iwa boo/i, kudá' iwa káh,

«Aníng an axweés ar slaqsi'i,

Muruudá' taa luú/ iimír tlehhmuú yaamuwo un alki/iít.»

Gídaabár slaqsoó sla/atá baraá angaáno

36Yesu boo/aay guri deelór i oó', iri dáh baraá dó' i i alé. Eeharuuseerós guri i daqeér, guri beér, «Slaqsaywú sla/atadá' baraá qaymo, gídaabárós atén i ooang.»

37Yesu iri oó', «Heedaádá' dahaasíngw hhó' gwa dahaas a Garmoó Hee. 38Qaymoodá' a yaamu. Dahaasingwdá' hhó' a mukdá' baraá waawuti'iimár Mungú i dirií'. Nee sla/atadár baraá qaymo a múk kudá' tlaákw. 39Wakusmoodá' aa dahaasin a Neetlaangw. Bu'uungw a alhhe'eesoó yaamu. Nee mukdá' bu'uúm a malayke. 40Ala adoodá' sla/a kar burumburaarin nee kari daa/ baraá asla, an adór bál deelór alhhe'eesoó yaamuwo tleehharuut. 41Garmoó Hee malaykeerós ngi ya/aaw, nee malaykeedá' mukdá' sleémeero oo múk gee/asliím baraá tlakweema nee mukdá' tlakweemaá tlehhiít, guri burumbút, guri hingés baraá waawuti'iimár Garmoó Heewo. 42Kuri kwaahh baraá asltá ur. Didaádá' an dír /aa/e nee sihhina' kiwa qirirtlimiisi. 43Mukdá' hota ganaá' qoomaadae baraá waawuti'iimár Baabuúine tan gwa/aat adór tsee/amá. Heé iaá axamis gi koóm, i axaasi.»

Slaqsoó daqaari'iimár taa luú/

44«Slám waawuti'iimár doori a slaqás nee daqaari'iimár taa foól baraá qaymorka. Nee hee ngiwa ár, gari luú/, iri tláy ar qwala/, muruuwós kudá' sleémeero i kon dír do'o guri weeriís, qaymoodá' gari tlaáxw.»

Slaqsoó miisli

45«Slám waawuti'iimár doori a slaqás nee heé halaanu'uumár tlehhahhiít, oo miislír hhoohhoo' ga leelehhiít. 46Nee inós miislirka wák ngiwa ár, ar tlaxo ur, iri tláy, muruuwós kudá' i kon sleémeero guri weeriís, miislidá' gari tlaáxw.»

Slaqsoó baratsufaay

47«Slám waawuti'iimár doori a slaqás nee baratsufoó taa kwaáhh baraá tlawi. Baratsufaydá' siyoó umuúqo daa'awto ngway ohín. 48Iwa haáts, kuri uuruúx afaá tlawi. Tari yaamií iwiít, siyoódá' kuri partliít, oo hhó' kuri amohhe'eés. Ala kudá' tlákw kuri kwaáhh. 49Adoorí an adór tleehharuut bál deelór alhhe'eesoó yaamuwo. Malayke nin hardát, mukdá' tlákw guri amór saáwí parátl dír kudá' hota ganaa'a. 50Nee kudá' tlákw kuri kwaahh baraá asltá ur. Didaádá' an dír /aa/e nee sihhina' kiwa qirirtlimiisi.»

Slaqsoó daqaari'iimár /aben nee ar qaren

51Yesu giri yaahaás iri oó', «Tí sleémeero aga tsahhí'i?»

Tari oó', «Eeít.»

52Yesu giri báy, «Gawaá adoorihe umuúqo intsaahhatusmoó hara'ayár Mosewo, oo sagalooár waawuti'iimár doori ga koóm, a slaqás nee heé do' loó', oo baraá daqaari'iimarose muruú /abén nee oo qarene gu hanmiís.»

Yesu kuwa Nasaretír wa sií'

(Marko 6:1-6; Luka 4:16-30)

53Yesu slaqsi'iiká' axweesanto ngiwa hhe'eés, iri ti'iít iri tláy. 54Nee iwa amór ayaawós i hardáh, muu guri intsaahhatimís baraá doó saalingw'ín wa ale, tam mukdá' iri waa/oó/, tari káh, «Kwí dír sagalooarí ngiwa sláy a diimá, nee muruuwí oo waa/oo/amo i tlehhiiti. 55Kwí a garmoó heedá' maraá tlehhahhítaáke? Nee aayoorós a tidá' ta babáyke Maria? Hhaeewós awa daaqaay a Yakobo nee Yosefúwoóke, nee Simon nee Yuda? 56Nee hhaeewós awa dasu i ayaarén i dirii'iíaáke? Ala kwí tí sleémeero amór ngiwa sláy a amá?» 57Yesu kuri insareéhh.

Yesu giri báy, «Aarusmo dír kuwa ilaiwawa/iiká i káhh, aqo har dír yaamuuwós nee dír do'ósuú kilá'.» 58Ala inós muruú waa/oo/amo oo yaariír gwa tleehhiiká amoodae, asma inooín kuwa haratlinti'iiká.

Currently Selected:

MATAYO 13: IRQW

Highlight

Copy