MATAYO 14

Gwa'arár Yohanedá' Baatimaamiís

(Marko 6:14-29; Luka 9:7-9)

1Qoomaadae waawutmo Herode kángw Yesu guri axaás, 2lawaaleerós gari báy, «Kwisíng an Yohanedá' Baatimaamiís nina waasleé/ baraá gi'i wa ale. Gawaá adoorihe /uuruuduú baraawós i dirií' in gadiyér tleehh.»

3Asma aáng Herode Yohane guna óh guri tseék, guri dahaás baraá doó tseegamo as Herodia, harér Filipo hhiyoó Herode. 4Asma Yohane Herode guna báy, «A hariímarooká kuúng harér hhiyaawók kawa dux.» 5Herode Yohane guri gaasár wa slaá', ala muu guna da'ayuút. Asma muu Yohane guna tsaáhh adór tar aarusmo.

6Ala deeloodá' ur ar Herode kuwa laqwaál niwa xeér, baalaadae dasír Herodia ina dír geeraá múk wa nét, nee Herode guri qwal/atís. 7Tam Herode al'axweesani gari oó' ar lo'o. Iri oó', «Umuúqo gaaro ar kiíng ta sla' firiimang.»

8As dasi kawa dukaakín nee aayoorós, Herode guri beér, «Gár ni slaa' a ságw Yohanedá' Baatimaamiís ngun baraá xooslmoowí qás.» Ala gár dasi adoorí ngisa ó', a aayír'ín ngina adoorí beér.

9Waawutmo Herode iri gurhaamuút, ala as lo'odá' aa huúw, nee as mukdá' didá' wa /ayiima, hara'aya gari haniís saga kuwa haniisi. 10Hee guri ya/aáw baraá doó tseegamo, as ságw Yohane nguwa tsati. 11Sagwdá' kunguri xooslmór huúw, kuri haniís dír dasiidá', nee dasiidá' guri húp amór aayoorós. 12Ala eeharuusér Yohane niri hardát, slaqwtá Yohane garir tleér, kari foól. Nee aluuwo tari tláy, kaangwí kuri xu'utisár áy dír Yesu.

/Aymisír múk kume kooán

(Marko 6:30-44; Luka 9:10-17; Yoh 6:1-14)

13Nee Yesu kangwdá' nguwa axaás, iri tláy ar miringamo ay dír inós tawa kilós. Nee boo/oó muu adoodá' ngiwa axaás, kuri eehár ar ya'a' amór gixsaduuín wa ale. 14Qoomár Yesu niwa baraá miringamoó wa ti'iít, boo/oó yaariír guri ár, guri gurtleemuú wa ár. Tiqtuuser'ín gari hungu/uumiís.

15Tsiindo niwa xayé', eeharuuseerós guri i daqeér, guri beér, «Diirí tay diriiaan a baraá darma, nee slám looa aa dát. Boo/aywí deeloórí ooeek i tlaye' baraá gixsadu muruú /aymar'ín ngu tlaxór aye'.»

16Yesu giri báy, «Gár tas tlay i káhh, kuungá' muruú /aymaárií hanisaak.»

17Kuri báy, «Gár ta koomaan i káhh, ala a har mikaáte kooán nee siyoó tsár.»

18Iri oó', «Diirí huwaare'.» 19Giri ádbáy, boo/aay iwa iwiiti gawaá gitso. Mikaáteedá' kooán nee siyoódá' tsár giri óh, iri gawaá doorí qaytsiít, iri sluufiís, gari eeharuuseerós i haniís. Eeharuuse gari dír boo/aydí hanmís. 20Sleémeero tari /ayín, tari aáx. Parhheemaá naa meetiye' kiri sleemiís, katatoó mibaá nee tsár iri haáts. 21Nee múk aa /ayin a hhawaate kume kooán, ala /ameena nee na/ii kaa harafaariiká.

Yesu iwa gawaá daanduú ma'áy wa hi'iimiít ar ya'a

(Marko 6:45-52; Yoh 6:15-21)

22Siiwadár kilae eeharuuseerós gari báy, «Tsa/amé' gawaá miringamo, ta geerií waarahhá' ay gayuuqá', dír án nir deelór kah dír boo/aay.» 23Deelo ooaro ngiwa hhe'eés, iri tsa/án gawaá tlooma, as iwa firór ay dír muu iwa kahhi. Qoomár axweesuwo i gawaadí dirii' inós kilós. 24Nee miringamoodá' i tla/ángw tláwtí dirii', ku daawitimiis kángw kilá' wa ale nee gwaanduú ma'aay. Asma fur'a gi ló'wa ila/aán.

25Qoomár dakiingo Yesu giri harahardáh, i gawaá daanduú ma'ár hi'iimiit. 26Eeharuuse nguwa aán i gawaá ma'ár hi'iimiit, tari da'ayuút, ta kaahi, «Gaa a hhaantamo.» Tari daeérár tseé'.

27Yesu gina adaá i ilawaáts, giri báy, «Gur'e gawdeesaak. Hee a aníng. Ma da'ayumitaara'.»

28Petro guri bay, «Aáko, hee bar kuúng, án ateetáng, ni hardáh amoorók i alé, ar gawaá daanduú ma'aay.»

29Yesu iri oó', «Qwaláng.» Petro iri aweér gawaá miringamoó wa ale, iri hi'iít ar gawaá daanduú ma'aay, as iwa amór Yesú kay. 30Ala Petro fur'aadá' ngiwa ár iri da'ayuút, naxés i /e/etín baraá ma'aay, iri tseé', «Aáko, aníng ba/amisáng.»

31Siiwadár kilae Yesu dakós guri gan'aás, dákw Petro guri óh, guri báy, «Kuúng haratlintaaoorók ka tsuwa niina. Asma milá masa xurút?»

32Qoomár inooín tawa gawaá miringamoó i tsa/án, fur'a iri xaslít. 33Nee kudá' baraá miringamoó i diriiá', Yesu nguri i tumbarara'atiyé', tari oó', «Ar ló', kuúng a Garmoó Mungú.»

Yesu tiqtuuse ngiwa Genesaretír wa hungu/uumiís

(Marko 6:53-56)

34Qoomár tlawi kawa waaraáhh, tari hardáh baraá yaamaá Genesareti. 35Múk yaamuudá' Yesu nguwa tsaáhh, muu kuri ya/aáw amór yaamaá iisaapaydá', tiqtuuse sleémeero kingiri huúw dír Yesu. 36Kuri firín tam pasltá inqwaarirós kilós ngiwa kwatiitiya'. Nee mukdá' sleémeero pasltá inqwaarirós gaa kwatiit, iri hungaguú/.

Currently Selected:

MATAYO 14: IRQW

Highlight

Copy