IIMU/UUNGW 39

Yosefu nee harér Potifa

1Yosefu kuna huúw ay bará yaamaá Misri nee múk Ishmaeli, kudá' gwaa tlaaxw. Potifa, geeraharusmoó úr oo askaárír waawutmo Farao, guri tlaáxw dir'ín wa alé. 2Ala AAKOÓ MUNGÚ a dinkwa nee Yosefu, nee guri harmagagaáhh, tam Yosefu aa waasla'amuutiiká. Yosefu ina hoót baraá doó aakoowós Potifa, kuduú Misri. 3Potifa gari tsaáhh adór AAKOÓ MUNGÚ tar dinkwa nee Yosefu, nee adór gadiyér dabaawós sleémeero ngira tsuúq. 4Yosefu Potifa guri sla'atisa hhe'eés, Potifa guri heewós oo hhoó' tleéhh, tari sageesihhtusmoó do'ós, nee guri qaás tawa harmagahhatusmoó daqaari'iimarós sleémeero. 5Iimír Yosefu nguwa qaás tawa sageesihhtusmoó umuúqo gaaro baraá do'ose, AAKOÓ MUNGÚ doó Potifa guri tsuúq as Yosefu. Umuúqo gár i kona baraá do'o tam baraá qaymooro gari tsuúq. 6Potifa umuúqo gaaro gari baraá dabaá Yosefu i qaás, tam inós gár tiwa sa daawitimiís i káhh, aqo har muruú /aymár i /ayi kilós.

Yosefu a heé ló'wa hhoohhoó'. 7Alaá deelór niinawe harér Potifa Yosefu guri waatlakwés, guri beér, «Qwaláng a alqaataán.» 8Ala Yosefu iri sií', harér aakoowós gari báy, «Ga/aaweek, aakooeé' gár iwa daawimiti i káhh diirír do'o, inós daqaari'iimarós sleémeero ngaa aníng i saayín. 9Baraá do'wihe inós ku ureeká ta aninge, asma umuú gaaro ar aníng iwa /itín i káhh, aqo har kiíng as tawa hareerós. Gawaá adoorihe dakuúsár ur ar adór tisíng adór ngir tleehh dír geeraá Munguhe a adoomá?» 10Tam /ameenidá' Yosefu mihaayooro a kumti umuúqo deélooro, Yosefu aa ya/aniká nee inós tawa alqaati.

11Looarka wake Yosefu iwa gadiyér áy adór /iisí i tlehhaahhiti, sagadiyuusér hatlá' baalaarihe i káhh dír do'o. 12Harér Potifa guri inqwaari ót, guri beér, «Qwaláng a alqaataán.» Ala Yosefu inqwaarirós gari geemáy gawaá dabaá harér Potifa, iri tsee/ií goów. 13Ngiwa aán adór Yosefu inqwaarirós ngira geemáy gawaá dabaawós i alé, slám aa goów tsee/a i alé, 14sagadiyuusér do'ós gari atét, gari beér, «Qaytsité', heewú xoorór Ebrania kunguna huúw nee hhawaatuueé' as atén tiwa mureekeesi. Ina i hardáh as iwa oohi ar /uuru, ala aníng niri tseé'. 15Ngiwa axaás án niwa tseeamiim, inqwaarirós ngina geexáy, iri goów tsee/a.»

16Ala harér Potifa inqwaaridá' gari didií geexeér tam tay qoomár hhawaatuuwós ni watli. 17Inós kangwdá' tleehharuut guri alki/ít, iwa kat, «Sagadiyusmooduú xoorór Ebrania naa doorén i húp, ina i daqáy as aníng iwa mureekeesi. 18Ala ngiwa axaás án niwa tseé', inqwaarirós ngiri dir'eéní geexáy, iri goów tsee/a i alé.»

19Potifa kangwduú hareerós nguwa axaás iwa kat, «Adoorí an adór sagadiyusmoodá' naa aníng i tleéhh.» Inós iri ló' wa buúhh. 20Potifa Yosefu guri óh, guri huúw baraá doó tseegmo, didá' waawutmo i mukós i tsegaagiti. Inós iri baraá doó tseegmór wa hoót. 21Ala tam baraá doó tseegmuuwo AAKOÓ MUNGÚ i dinkwa nee Yosefu, AAKOÓ MUNGÚ Yosefu guri tsuúq, tam geeraharusmooduú doó tsegma guri gurií baá/. 22Xuumusmoó doó tseegmo Yosefu guri slaá', guri qaás heé úr wa ale, oo muu sleémeero oo baraá doó tseegmór i dirií', gu ga/áw. 23Heedaádá' úr oo doó tsegma umuúqo gár baraá dabaá Yosefu i diriia ga alqaytsimiitiiká, asma AAKOÓ MUNGÚ nee Yosefu a dinkwa, nee AAKOÓ MUNGÚ umuúqo gár Yosefu aa tleéhh gana tsuúq.

Currently Selected:

IIMU/UUNGW 39: IRQW

Highlight

Copy