IIMU/UUNGW 40

Tlataá múk taa tsegiít

1Alaá kaangwihe qoomaadae mukko tsár i deer. Oo wák a heé úr oo muruú wahángw waawutmoó yaamaá Misri, oo tsár a heé úr oo múk mikaátér waawutmo ga tlehhaahhiít. Kuká' aakooín nguna sadakuusiyé'. 2Farao ina ló' wa buúhh gawaá sagadiyuuseedá' tsare, heé úr oo wahángw waawutmo, nee heé úr oo mukdá' mikaátér tlehhaahhiít. 3Inooín tsaraawo gina dahaás baraá doó tseegmo, kuduú baraá doó xuumusmoodá' úr, didá' Yosefu kway tseék sleeme. 4Heé úr oo askaári mukdá' guri didár Yosefu i qaás. Yosefu inooín giri sagadiyuús, nee inooín tana hoót didá' wa alé deelór hhaawaakahe baraá doó tseegmuú wa alé.

5Looarka wake xweeraawo heedaádá' úr oo muruú wahángw waawutmo, nee kudá' úr oo múk mikaátér tlehhaahhiít, ar waawutmoó Misri, tana tlatiitín, umuú heewo tlataawós, tlataá gídaabár dimbadimbé. 6Yosefu gina i hardáh matlaatleero, ngiwa ár naxés inooín i ló' wa gurhaamutiyá'. 7Inós sagadiyuuseedár waawutmo Farao, tidár dinkwa nee inós baraá doó tseegmooro dír doó aakoowós, gari yaahaás, giri báy, «Kuungá' laarí gár naa eer a milá, mas gurhaamutá'?»

8Kuri báy, «Laarí xweeraawo ana tlatiitimaán, ala heé gídaabárós alki/ituwo ga aleesláw i kaahh.»

Yosefu giri báy, «Gadiyér tlata waagweera ar Mungúheéke? Gimsé', tlataahúng kwisingá' alki/iitare'.»

9Heedá' úr oo muruú wahángw waawutmo, tlataawós giri alki/iít dír Yosefu, iri oó', «Baraá tlataaeene gár naa ár a xa'anoó sabiíbu i dír geeraaeé' i dirii'. 10Nee gawaá sabiíbuwo haleemaá tám i dayá'. Nee haleemiidá' tamaawo nina harma/iyé', nay /ayuusiyé', nee /ayoodá' niri adaá mamaá dúx awa naa hamaariye'. 11Gawaá dakw'eene isaangír Farao a koóm, aníng mamaá sabiíbu ngiri tsoó/ baraá isaangidá'. Isaangidá' ngiri haniís dír waawutmo Farao.»

12Yosefu iri oó', «Gídaabárós a tí: Haleemaá tám a deelo tám. 13Alaá deelo tame waawutmo Farao kuúng u gweer baraá tseegmooro, uri ki/is baraá gadiyeérók i alé, nee kuúng isaangi a dabaawós i hanís, adoodá' aáng ta tlehhahhit, tawa heé úr oo muruú wahángw waawutmo.» 14Yosefu iri oó', «Na'ás, aníng inslawáng bar kuúng taa gweér, nee án alee/iisáng. Án kuúng u firiím, kangw'eé' ooeek dír Faraowo, as kahhó' án niwa ti'iit baraá do'wihe. 15Asma ar ló', án tina fiís baraá yaamaá múk Ebrania wa alé, slám baraá yaamukae gár tlaakw ar naa tleéhh i káhh, ar tiwa dahaasi baraá doó tseegmoórí ale.»

16Heedá' úr oo múk mikaátér tlehhaahhiít ngiwa ár adór alki/ituudá' kur hhó', Yosefu guri báy, «Án sleeme baraá tlataaeene gár naa ár a katatoó tám oo mikaátér koóm, i gawaá sagw'eé' i dirii'. 17Nee baraá katatidár gawa, muruú /aymár waawutmo Farao i baraadí dirii'. Nee tsir/o muruú /aymaadá' guna /ák.»

18Yosefu iri oó', «Gídaabárós a tí: Katatoó tám a deelo tám. 19Alaá deelo tame Farao sagók gu tsaat, nee slaqwtók kari tareree' gawaá xa'ano, nee gwares fu'unaywók giri /aay.»

20Bál tám iwa xeér, slám baalaarí a deelór ur ar waawutmo Farao kuwa laqwaál, waawutmo Farao sagadiyuuseerós sleémeero gari deelór qwal/uú úr i tleéhh. Nee sagadiyuuseedá' tsaraawo gari dír geeraawósií ateét. 21Heé úr oo muruú wahángw waawutmo guri ki/ís baraá gadiyeérós i alé, nee inós isaangír Farao gari haniís gawaá dakós i alé. 22Ala heedá' úr oo múk mikaáte ga tlehhaahhiít kuna tarereé', adoodá' Yosefu ngira alki/iít. 23Ala tam adoorihe heedá' úr oo muruú wahángw waawutmo Yosefu gwa inslayká, guna gunqareés.

Currently Selected:

IIMU/UUNGW 40: IRQW

Highlight

Copy