TLEHHMA'AÁ YA/ABUUSE 9

Hhu'u'úngw Saulo

(Tlehh 22:6-16; 26:12-18)

1Qoomaadae Saulo iri kumiít eeharuusér Aako ngiwa dae tlaaqi, nee adór ngir tsu/i gari leelehhiít. Iri daqáy dír kaahamusmoó úr oo Mungú. 2Barwadaá i huwi baraá gixsár Damasko, awa taa gooín amór maraá saaliingw, giri firín, as múk loohír Mungú gaa eehar oo aa sláy nguwa tsegiiti, nee nguwa huwi baraá Yerusalemu, ta hhawaate laqaá /ameena.

3Qoomár iwa aa'aá kay, iwa nakaá/ Damasko, naxes gwa/aateemaá gawaá dooraá dahhá' nguri adaá i gwa/aatiyé' bihhe sleémeerowo. 4Saulo iri yaamií huú', afo gari axaás ar inós gwa beer, «Saúlo, Saúlo, ahaá waáy, án mis slahh'eemís?»

5Saulo iri oó', «Kuúng a heemá, Aáko?»

Heedaádá' iri oó', «Aníng an Yésuudá' kuúng ta slahh'eemis. 6Ala kuúng na sihhiít, baraá gixsa i daheek, nee adór kuúng wa hariim tleehhamooro kingi kuúng i oó'.»

7Nee mukdá' nee Saulo ti alkoomá' tana sihhtanoórí xosl'omiít, asma afo ka axamiis, ala hee ku ga/ayká. 8Saulo niwa yaamuú wa tláy, iwa qaytsiít, naxés ilaawós i xumiisiaaká. Mukdá' nee inós ti alkoomá' guri dawa óh, guri huúw ay Damasko. 9Iri iwiwiít deelo tám, i xumaamisiiká, slám i /ayayinká laqaá i wahahanká.

10Ala baraá Damaskowo eeharusmoko i deer, umuuwós a Anania. Aako iri oó' dír Anania ar baraá iigu'utu, «Ananía.»

Anania iri oó', «Aníng a diirí, Aáko.»

11Aako guri báy, «Sihhiít, tláw ay dír loohidá' ta bay Loohír aa gana'. Heé ta bay Saulo, oo yaamaá Tarso, na yaahaaseek dír doó Yudá wa ale. Inós haandá' hamí i firiirín. 12Inós heé umuuwós ta bay Anania gwa ár ar baraá iigu'utu, iwa baraadií darahi as nguwa dabií qaasi, ilaawós iwa malé xumsór i ki/iya'.»

13Ala Anania iri oó', «Aáko, kángw heesíng aníng ugwa axmamiís dír múk yaariire, adór heewí muruú tlákw ngura tlehhahhiít dír mukók oo hhohhó' oo baraá Yerusalemuro. 14Slám ayaawihe hara'aya ga kón ar amór kaahamusér uren ar Mungú daahh, ar mukdá' sleémeero umuuwók ateetimá' nguwa tsegiiti.»

15Ala Aako iri oó', «Kuúng tláw, asma heesíng a xooslmoó aníng naa tsawaár as umuueé' nguwa alki/iiti dír xoorduuwo nee dír waawitá nee dír múk Israeliwo. 16Aníng adór slahha'amaayér yaariir ir inós wa hariín sleemuuwo as aníng a dirósí laqaám.»

17Anania iri tláy, iri baraá do'dí dáh. Saulo guri dabií qaás, iri oó', «Hhiyaaeé' Saúlo, Aako Yesu, kudá' taa dirógí geehhooees baraá loohidá' nira hardati aníng iga ya/aáw, as ilaawók niwa male qaytsitiya', nee tuwa hatsisi Qeeruú hhoohhoó' oo Munguhe.» 18Hamtidár kilae muruú adór qafo ina baraá ilaawós wa paáhh, iri qaytsiít, iri sihhiít, kuri baatiís. 19Alaá iwa /ayín, /uuru guri sláy.

Saulo iwa baraá Damaskór wa alki/iít

Saulo iri Damaskór wa hoót deelór hhaawaakahe dinkwa nee eeharuuseedár amoodá'. 20Kángw Yesu guri alki/iít baraá maraá saaliingo iwa kaahi, «Inós a Garmoó Mungú.»

21Nee múk kaangwí gwa axaas sleémeero tari waa/oo/amín tari káh, «Heewí a kudá' mukduú Mungú oo umuuwí gu ateetiím gwa slahh'emiísiíke baraá Yerusalemuro. Nee gár nisa diirí hardáh aqo kaangwí, ngiwa tsegiiti nee ngiwa huwi amór kaahamuusér uren ar Mungú.»

22Saulo ina kumiít ar pihh'uuma axweesantá Mungú alki/ituuwo, múk Yahudi oo Damaskórí dirií', gurir baá/, ngiwa laqaqan adór, ‹Yesu tar Kristo.›

23Deelór yaariir iwa waaráhh, múk Yahudi tari al'axweés kuwa gaasi. 24Ala Saulo ador'ín tidá' gari tsaáhh. Inós kuri gigidín dír afér gixsár wa ale xweera nee tlaatla/aango, as kuwa gaasi. 25Ala eeharuuseerós xweeraawo guri dúx guri qás baraá lakwaanti, guri aweerís ar pa/ángw gawaá koo/ír taa harweér ar gixsa.

Saulo iwa baraá Yerusalemu

26Qoomár Saulo iwa hardáh Yerusalemu, iri haragwaá' dír eeharuuse, ala eeharuuseedá' sleémeero inós guri da'ayumít, asma kwa haratlinti'iiká adór inós tar eeharusmo. 27Ala Barnaba Saulo guri huúw amór ya/abuuse. Kaangwí guri dir'ín i alki/iít adór Saulo Aako ngura ár loohiro, nee adór Aako ira axweés nee Saulo, nee Saulo Ya/abtór hho' adór ngira alki/iít ar pihh'uuma baraá Damaskoro ar umuú Aako. 28Saulo nee inooín tari alhoót baraá Yerusalemuro Ya/abtór hho' gari alki/iít ar umuú Aako, ar pihh'uuma. 29Iri axweés nee tiri tlaampa'amisiyé' nee múk Yahudi, kudá' tsifrír Yunanír ar axweesá'. Ala inooín adór kur gaasi kari axweés. 30Qoomár hhae lama ngiwa slayé', Saulo kurir tláy, kuri haydohiís ay Kaisarea, as iwa kumiiti ay gixsár Tarso.

31Múk kríshaanáy amohhooa gari sláy baraá yaamaá Yudeawo nee Galilayaro, nee yaamaá Samaria. Tari gawdúy gawaá loohír Aakoowo, Aako kuri ilaiwawaá/, Qeeruú hhoohhoó' oo Mungú gina gurkwa/amís, nee faaror'ín iri doogigiín.

Enea kuwa hungu/uús

32Petro haratlintauuse gari alhi'iimiít, iri aweér ay amór múk hhohhó' oo Mungú kuduú baraá yaamaá Lida. 33Baraá yaamuudae heeko guna ár, umuuwós a Enea. Heewí a heé aa sol'omiit, i gawaá faltá hotaatín kureeri dakaát. 34Petro guri báy, «Enéa, Yesu Kristo kuúng u hungu/uus. Tláw, faltók amohhe'eeseek.» Qoomaadár kilae iri tláy. 35Nee muu sleémeero oo baraá yaamaá Lidárí dirií' nee Saroni, Enea kuwa ár, Aako kuri haratlintií'.

Dorkasi kawa waaslee/atís

36Nee eeharuso'orka wák i deer baraá gixsár Yopa, umuuwós a Tabita, tsifrír grikiro a Dorkasi (gídaabárós a tlaaqati). /Ameenirí tlehhma'aá hho' awa yaariir gaa tlehhaahhít, nee ilahhooa ga hanmaamís dír múk i alé. 37/Ameenirí deeloodae tiqti gana ót, iri gwá'. Nee hamaatlaro kawa hhe'eés, kari qaás gawaá qoroófa.#9:37 Qoroófa: A doó gawaá kuqá'. 38Gixsár Lida ka tseew dír Yoparo. Eeharuuse gari axás adór Petro ir amoodií dirií'. Múk tsár guna amoorósí ya/áp. Petro kuri harhheehhe'eés, kuri báy, «Qwaláng ar gaanslaay.» 39Petro iri tláy, nee inooín tiri koné'. Iwa hardáh, kuna tsa/aás gawaá qoroófa. /Ameenár kwaeeli sleémeero ina bihhiiwós i sihhít, ta /aa/amín, kuri inqwaruú i laqaqán, nee hiyi'i, kudá' Dorkasi aa hirít qoomár iwa slaf. 40Petro muu sleémeero guna tsee/ií duúx. Iri tumbarara'aát, iri firín. Iri amór tuuaárí warqáy iri oó', «Tabita, tlawáng.» Iri qaytsít, nee Petro nguwa aán iri tleér, iri iwít. 41Gari dawa óh, gari sihhitís. Múk Mungú nee /ameenár kwaeeli giri ateét, /ameenidá' gana geeraaín i qaás ka saxamaar. 42Kaangwí ina xu'utiít baraá gixsár Yopa sleémeero. Múk yaariír Aako guri haratlintií'. 43Petro deelór hhaawaaká gana hhe'eés baraá Yopár wa ale dír doó heeko ta bay Simonú kadaá tlehhahhiít.

Currently Selected:

TLEHHMA'AÁ YA/ABUUSE 9: IRQW

Highlight

Copy