TLEHHMA'AÁ YA/ABUUSE 8

1Nee Saulo gaasadá' gari sa qwalalaá/.

Saulo iwa kríshaanoó slahh'eemisi

Baldá' gusisíngw úr oo múk kríshaanáy iri iimu/ún baraá Yerusalemuro, sleémeero tari diyaa/aát baraá yaamaá Yudearo nee Samariaro, ala aqo har ya/abuuse kilós ina mét. 2Múk Munguú ilaiwawaá/ Stefano guri foól, kuri sa tsuunqumiís ló'wa ale.

3Ala Saulo múk kríshaanáy guri gusiisín. Iri daráh baraá umuúqo do'o, hhawaate nee /ameenaaro giri duuruxún, giri dahamiís baraá doó tseegamo.

Alki/ituú Ya/abtór hho' baraá Samaria

4Ala eeharuuseedá' aa diyaa/at iri tleér umuúqo amooro, Ya/abtór hho' kari alki/iít. 5Filipo iri aweér ay baraá gixsár Samaria, kángw Kristo guri alki/iít dír múk i alé. 6Filipo axweesantá Mungú ngiwa alki/iít nee layu ngiwa tlehhiít, boo/oó muu axweesanayduú Filipo kuri ló'wa slaá' iiárií qamingo. 7Asma múk yaariír neetlaame aa eér, neetlaameedá' iri /aa/amiín ar afór ur, iri ti'imít. Nee múk yaariír oo tiqtír sol'omit nee taqooraay kuri hungu/umiís sleeme. 8Múk gixsadá' qwal/uú yaariír guri sláy.

9Heeko umuuwós ta bay Simon i deer baraá gixsadae. Inós a qwaslaarmo. Múk yaariír baraá gixsár Samariaro tana ló'wa waa/oó/, asma inós i kaahi, «Aníng a heé úr.» 10Heewí kuna slaá' kuwa iiárií qamin nee muu sleémeero, iimír na/áy wa tleemu ay heé úr, ta kaahi, «Heewí an aleesleemuuduú Mungú, kudá' ta bay aleesleemuudá' úr.» 11Heewí kun iiárií qamín asma de'emaá yaariire waa/oo/amo gana tlehhiít ar qwaslaari'iimarós. 12Ala daxta mukdaádá' axweesantá Filipo gari haratlintií', daanduú Ya/abtór hho' ar Mungú nee Yesu Kristo, hhawaate nee /ameenaaro kiri baatimiís. 13Simoni inósuú kilá' sleeme iri haratlintií', kuri baatiís, tiri alkoomakoné' nee Filipo. Slám iri waa/oo/amín qoomár layu nee muruú waa/oo/amo kudá' Filipo aa tlehhiít ngiwa ár.

14Ya/abuuseedá' Yerusalemúr i dirii' gari axás adór múk Samaria axweesantá Mungú ngira ilaaóh. Petro nee Yohane kiri amoodií ya/aáw. 15Ya/abuuseedá' tsár iwa amoodií hardát, mukdá' aa haratlintii' kuri aleefirín as Qeeruú hhoohhoó' oo Mungú kuwa ilaaoohi. 16Asma tam heé wák oo Qeeruú hhoohhoó' oo Mungú gwa ilaaoh i kaahh, aqo kina tawó baatimiís ar umuú Aako Yesu. 17Petro nee Yohane daber'ín kari qaás gawaaín i alé, nee Qeeruú hhoohhoó' oo Mungú kuri ilaaóh.

18Símonuduú qwaslaarmo adoodá' ngiwa ár, adór muu Qeeruú hhoohhoó' oo Mungú ngur slasláy ar dabér ya/abuuse, peésa gari haniisár wa slaá', 19iri oó', «Aleesleemuuwí aníng i haniisare' sleeme, as daqaní umuúqo heewo oo aníng ni dákwií qaas, masók Qeeruú hhoohhoó' oo Mungú gu sláy.»

20Ala Petro iri oó', «Kuúng nee peésaroge, tsarere'eét, asma kuúng kawa xu', qeemuú Mungú ku slasláy ar peésa! 21Dinku'uumár kuúng nee atén i káhh gawaá kaangwihe, asma muunaáwók ku hhoohhooeeká dír geeraá Munguhe. 22Gawaá adoorihe tlakweemaawók kwisingá' hhu'u'umeek, Aako na firiimeek, doóqa inslawaysuú baraá muunaáwók gu gurtláy. 23Asma án kuúng u ga/áw, da/tá baraá guruuwók i qarqát adór saaxí. Slám kuúng tlakweema ugwa oohiyé'.»

24uduú qwaslaarmo iri oó', «Án aleefiriimaaré' dír Aakoowo as muruusíng sleémeero naa aníng i katé' iwa pa/i.»

25Petro nee Yohane Ya/abtór Aako kawa hhe'eés lamabu'uungo nee alki/ituuwo, tari kií/ ay Yerusalemu. Loohiro Ya/abtór hho' kari alki/iít baraá gixsadaá ninakw awa yaariir baraá yaamaá Samariaro.

Filipo nee heé yaamaá Kushi

26Malaykamoó Aako iri axweés dír Filipo, iri oó', «Sihhiít tláw bihhaá basa, ay amór loohidá' naa Yerusalémúr wa tleer ay Gasa.» Loohidá' a loohír xaanxaay. 27Filipo iri tláy, hamtidár kilae heeko taa karmúy oo Kushír daáhh guri ár. Inós a heé wák oo daqaari'iimár amohhe'eemiís ar waawuto'o Kandake ar yaamaá Kushi. Inós ina Yerusalémúr káy, as Mungú nguwa sluufmisuú ay. 28Nee niwa kií/, aa iwiít gawaá gaárirós, i kitaábuú aarusmo Isayá soomuus. 29Qeeruú hhoohhoó' oo Mungú Filipo guri báy, «Tseewúw dír bihhaá gaárirí, ti alkoonde'.» 30Filipo iri tláy ar ti'iingw, heedaádá' guri iiárií qaás, naxés i kitaábuú aarusmo Isayá soomuus. Guri báy, «Tisíng ta soomus a tsatsahhaánda?»

31Heedaádá' iri oó', «Aníng adór ngir tsaahh a adoomá, heé i geeraharahaár bir kaahh.» Filipo kuri firín iwa tsa/an gawaá gaáridá' nee iri dír bihhiwósí iwiít. 32Nee gooidá' i soomuusi a tí,

«Inós kuna huúw didár mura' kuwa tsu/aa/in

adór bee/ír wa ale.

Nee adoodár deelmoó bee/i ir xaslmaamiti

dír geeraá heedaádá' gu se'eengw tlaaqa,

nee inós sleeme ina xasliít adoodár alé,

afkós gwa waatleesiiká.

33Inós tiwa niinaweés,

sakwasleemarós kari hingeés.

Heé qartós alki/ituwo ga aleesláw a heemá?

Asma slafiingós kuna hingeés baraaká' yaamuwo.»

34Heedaáduú Kushi Filipo guri báy, «Aníng i ooang, aarusmoowí axweesanaywí i kaahi a daanduú heemá? A daanduuwósuú kiláe, laqaá a daanduú heé hatlá'?» 35Filipo Ya/abtór hho' ar Yesu gari iimu/ún dirósí alki/ituuwo. Dír ngiwa iimu/ún a dír axweesantadaádá' heedaádá' aa soomuús. 36Tari kumiít loohiro, tari hardáh dír ma'aay i dirii'iya'. Heedaádá' iri oó', «Qaytsiít, ma'aay diirihe i dayá'. Gár aníng i il/aam a milá, ar tis baatisiiká?»

[ 37Filipo iri oó', «Kuúng bar aga haratlintí' ar muunaáwók sleémeero, tu baatiis.»

Heé aáng iri oó', «Aníng aga haratlintií', adór Yesu Kristo tar Garmoó Mungú.»]

38Hara'aya gari oó' ar gaári iwa sihhit. Filipo nee heedaádá' tari al'aweér baraá ma'aay. Heedaádá' kuri baatiís. 39Qoomár tindiwa tsa/a/an baraá yaaér wa ale, Qeeruú Aako Filipo guri ar tláy. Filipo kwaa sangw malé ariiká nee heedaádá'. Heedaádá' iri kumiít aaiiwose, i hara qwalalaa/. 40Ala Filipo kuri malé ár baraá gixsár Asótór wa ale, qoomár iwa waaraahhi Ya/abtór hho' gari alki/iít baraá gixsadu sleémeerowo, tam garwa hardáh ay Kaisarea.

Currently Selected:

TLEHHMA'AÁ YA/ABUUSE 8: IRQW

Highlight

Copy