TLEHHMA'AÁ YA/ABUUSE 10

Petro nee Kornelio

1De'emadaádae heeko i deer oo baraá gixsár Kaisarea. Umuuwós a Kornelio, geeraharusmoó slawtá ta bay, «Askaárír Italia.» 2Inós nee múk do'ose sleémeero ta Munguú ilaiwa/a/aat. Slám muu gun qaaqáy ilahhooár yaariire, nee Mungú gun firaarín daqisleém. 3Looarka wake qoomár looár gwaleél ar tlaatla/aangw iigu'utu guna ár. Malaykamoó Mungú guna i daqáy, guri báy, «Kornelío.»

4Kornelio malaykamoodá' guri i qaytsita hhe'eés, iri da'ayuút, iri oó', «Gaa a milá, aáko?»

Malaykamo iri oó', «Firoorók nee ilahhooaro Mungú gaa ilaaóh, nee Mungú ga gunqareesiiká. 5Gimáy, muu na ya/aaweek ay Yopa, Simonuudá' ta bay Petro ateeteek. 6Inós a dahaaymoó heeko ta bay Simonú kadaá tlehhahhiít, do'ós i afaá tláwtí dirii'. Inós tidá' kuúng wa hariim tlehhmuuwo ngi oo'.» 7Qoomár malaykamoodá' iwa tláy, Kornelio lawaaleerós ar tsár ar do'ós gari ateét, nee askaarmoó wák oo Munguú ilaiwawaá/, baraá askaáridá' inós umuú daqto gu sagadiyuusa. 8Nee kaangwí sleémeero nguwa dir'ínií alki/iít, giri ya/aáw ay Yopa.

9Bál tsár tawa baraá aaí dirii'i, gixsa kari i tseewúy. Qoomaadae Petro iri tsa/án gawaá daanduú do', as iwa firór ay. Qoomaadá' a looár lahhoó' ar tlaatla/aangw. 10Petro iri qwariít, i /aymár slaa'. Qoomár tawa muruú /aymár amohhe'eemisi, iigu'utu guri ár. 11Doori giri ár naxés naa gweeriitiyé', nee gár adór inqwaarír ur ar pasleemo tsiyáhh kingi yaamií aweerimiis. 12Nee baraá inqwaaridae makaá da'awemo sleémeero awa ya'a' tsiyáhh i dayá', nee awa gur'ér ar hi'imiitá' sleeme, nee tsir/ooro. 13Afo gari axaás i kat, «Pétro, tláw, makaysíng tsu/eek, /ayeek.»

14Ala Petro iri oó', «Aasla'áy, Aáko, asma aníng gár ta waki aga baloó /ayiiká.»

15Afo guri i hardát sagaáwa tsár wa aleeró, guri beér, «Muruú Mungú aa hheehhe'eés, kuúng mu slasla/aruú babawaar.» 16Kaangwí ina tleehharuút sagaáwa tám wa ale. Naxés xooslmoodá' kuri adaá gawaá doorí wa ilaaóh.

17Qoomár Petro iwa adór i laqi aldakuuti daanduú iigu'utuudá' aa ari mukdá' taa ya/aáw nee Kornelio naxés naa hardáh ta doó Simonuú yaahamiis, taa afkú slúmtí sihhiít, 18tari ateét, tari oó', «Simonudá' ta bay Petro i baraá do'wíhe?»

19Petro qoomaadae i iigu'utudá' aldakuut. Qeeruú hhoohhoó' oo Mungú guri báy, «Mukko tám i kuúng leelehhiit. 20Tláw, aweér, nee inooín ti koondé'. Ma xuruutaar, asma heé mukwí ngwa ya/aaw a aníng.» 21Petro iri aweér amór mukdá', giri báy, «Heedá' ta leelehhita' a aníng. Ma katá'?»

22Tari oó', «Kornelio, geeraharusmoó askaári, atén tina ya/aáw. Inós a heé ganaá', slám a heé Munguú ilaiwawaá/, nee adór tar heé hhoó' múk Yahudi sleémeero ga xuu'. Inós kuna ádbáy nee malaykamoó hhoohhoó' muu nguwa ya/aawi amoorók, as kuúng tawa amór do'ós i daqeer, as axweesantók ngiwa axaasi.» 23Petro mukdá' guri baraádií dahaás ar qwala/, baalaadae giri deeliís.

Looaytleérós Petro iri tláy dinkwa nee mukdá', nee hhaeekaari gixsár Yopár hootá' tiri alkoné' sleémeero. 24Nee bál tsár malé alé iri hardáh Kaisarea. Amoodae Kornelio gina daamarán, nee múk do'ós gwa burumbuúr nee mulqeerose. 25Petro iwa dáh, Kornelio nina al'awín iri tumbarara'aát dír geeraawós i alé. 26Ala Petro guri tleés iri oó', «Sihhiít, asma aníng sleeme a hee.» 27Qoomár tawa axweesi, iri dáh baraá do'. Petro múk yaariír nguwa ár oo taa burumbuúr, 28iri oó', «Kuungá' a xuá' adór tar hariímarooká heé Yahudi iwa aldinku'uusi nee heé xoorór hatlá', tam nguwa i daqay. Ala Mungú nga dir'eénií laqán, án mawa gaa oó' daanduú heewo niwa oó' ‹ku harmeetín›, laqaá ‹ku slasla/aár›. 29Gaarí an gár aníng nisa amoorí hardáh qoomár tiwa ateet, mawa sií'. Ala hám daxta gár isa ateté' a milá?»

30Kornelio iri oó', «Laarí ar tsiyáhh qoomár looár gwaleél, aníng a saaliím baraá dooeé' wa aleeró. Heeko inqwar qwiirií/ nina geeraaeé' wa adaá ti'iít, 31iri báy, ‹Kornelío, firoorók kaa axaás nee ilahhooarók Mungú ga gunqareesiiká. 32Ala kuúng muu na ya/aaweek ay Yopa. Simon ateeteek, kudá' ta bay Petro. Inós haandá' i dír doó Simoní dirii', kudá' kadaá tlehhaahhiít. Do'ós i afaá tlawi. Nee Simon birna hardáh, inós kuúng u intsaahhatis.› 33Nee hamtidár kilae án muu nguri ya/aáw ay amoorók. Nee kuúng adór hhoo' aga tléhh niwa hardát. Ala hám daxta atén sleémeero a dír geeraá Mungú i diriiaán, as tidá' sleémeero ar Aako naa kuúng i hara'ayín kawa axaasaan.»

Alki/ituú Petro dír doó Kornelio

34Aluuwo Petro axweesani gari iimu/ún, inooín giri báy, «Daxta aníng aga tsaáhh adór Mungú ir barqaantír konká. 35Umuúqo heewo oo Mungú gu ilaiwawaá/, nee tidá' ganaa' ar Mungú i slai ga tlehhiít, inós ku ya/án nee Mungú, tam oo xooro gaalá. 36Kuungá' Ya/abtoodá' Mungú aa huúw dír múk Israeli a xuá', Ya/abtoodá' hho' ar wayda ar loohír Yesu Kristo. Inós an Aakoó muu sleémeero. 37Muruudá' sleémeero aa tleehharuut baraá yaamaá Yudea sleémeero kuungá' u xuá'. Ina iimu/ún baraá yaamaá Galilayár wa ale, alaá baatiismooduú Yohane aa alki/iít. 38Kuungá' kángw Yesú Nasareti u xuá', adór Mungú ngura Qeeruuwós oo hhoohhoó' i haniís nee /uuru. Inós ina hi'iimiít umuúqo diiro, gadiyér hho' gari tlehhiít, nee muu sleémeero guri hungu/uumiís, kudá' Neetlaangw aa slahh'eemiís. Asma inós nee Mungú a dinkwa. 39Nee atén a lamabu'uusér muruudá' sleémeero aa tleéhh baraá yaamaá Yudea nee baraá Yerusalemuro. Inooín inós kuna kikií' gawaá msalaába, kuri gaás. 40Ala Mungú guri waasle/atís bál tame, guri aleesleemuú i haniís iwa geehhouy. 41Ala a dír muu sleémeerowooká, a dír ateédá' Mungú aa qaroó tsawaár lamabu'uusér wa ale. Atén ana /ayiimaán nee ana wahaamaán nee inós, alaá inós niwa waasleé/ baraá múk aa qaátl wa ale. 42Yesu hara'aya ngina oó' ar muu kuwa Ya/abtór hhó' i alki/iitaan nee kuwa lamabu'uumaan, adór kwí tar kudá' taa hara'ayár i haniís nee Mungú, múk slaáf nee múk aa qatli nguwa sakwasleemuuti. 43Kwí aaruuse sleémeero guna adoorír lamabu'uún, as kahhó' umuúqo heewo oo gwa haratlintii', tlakweemaawós kiwa gurtláy ar umuuwós.»

Múk xoordu Qeeruú hhoohhoó' oo Mungú gwa ilaaóh

44Qoomár Petro iwa axweesantadí kahhi, mukdá' sleémeero axweesantadá' gaa axamiis, Qeeruú hhoohhoó' oo Mungú giri i aweér. 45Ala múk Yahudi kudá' aa haratlintii', kudá' nee Petro naa al daqaye', tari waa/oó/, asma Mungú múk xoordaá hatlá' sleeme gwa tawó qáy Qeeruú hhoohhoó' oo Munguhe. 46Asma tawa axweesi ar tsifrír xuawaslen nee Mungú kuwa diidi'iimisi kina axamiís. Petro iri oó', 47«Heé ma'aay gi /itiím a heemá ar mukwí kus baatisiiká. Asma mukwí Qeeruú hhoohhoó' oo Mungú gwa ilaaóh adór atén wa ale.» 48Petro iri oó', «Mukwí ku baatimiisi ar umuú Yesu Kristo.» Nee inooín Petro kuri firín iwa ayaaín wa hooti deelór niinawe.

Currently Selected:

TLEHHMA'AÁ YA/ABUUSE 10: IRQW

Highlight

Copy