يَحْيَى 20
20
تَاشِنْ عِيسَىٰ دَغَ مَتَتُّو
﴿مَتْ 28.1-10؛ مَرْ 16.1-8؛ لُكْ 24.1-12﴾
1تُنْدَ سَسَّڢٜىٰ أَ رَانَ تَڢَرْكُواْ، أَ لُواْكَثِنْ دَ غَرِ بَيْ غَمَ وَايٜىٰوَ بَ، مَرْيَمُ یَرْ غَرِنْ مَغَدَلَ تَجٜىٰ كَبَرِنْ عِيسَىٰ، تَغَ أَنْتُرٜىٰ دُوڟٜىٰنْدَ يَرُڢٜىٰ بَاكِنْ كَبَرِنْ؞ 2سَيْ تَرُوغَ دَ غُدُ ذُوَا وُرِنْ بِتْرُسْ دَ كُمَ أَلْمَجِرِنَّنْ دَ عِيسَىٰ يَكٜىٰ ڧَوْنَ، تَثٜىٰمُسُ «أَيْ، أَنْطَوْكِ عُبَنْغِجِ دَغَ كَبَرِنْ، بَمُ كُوَ سَنْ عِنْدَ عَكَ سَاشِيبَ؞» 3سَيْ بِتْرُسْ دَ أَلْمَجِرِنَّنْ سُكَ ڢِتَ سُكَ كَامَ حَنْيَ ذُوَا كَبَرِنْ؞ 4دُكَ بِيُنْ كُوَ سُكَ رُوغَ دَ غُدُ، عَمَّا أَلْمَجِرِنَّنْ يَوُثٜىٰ بِتْرُسْ، يَرِغَا بِتْرُسْ كَيْ وُرِنْ كَبَرِنْ؞ 5دَ يَسُنْكُيَ يَلٜىٰڧَ سَيْ يَغَ يَدِنْ لِيلِنْ عَ أَجِيٜىٰ، عَمَّا بَيْ شِغَ ثِكِنْ كَبَرِنْ بَ؞ 6سَعَنً بِتْرُسْ يَذُواْ عَبَايَنْسَ، يَكُوَ شِغَ ثِكِنْ كَبَرِنْ، يَغَ يَدِنْ لِيلِنْ عَ أَجِيٜىٰ؞ 7يَكُمَ غَ يَدِنْ دَ عَكَ نَطٜىٰ كٜىٰوَيٜىٰ دَ كَنْ عِيسَىٰ أَجِيٜىٰ أَوَنِ وُرِے دَبَمْ دَ يَدِنْ لِيلِنْ؞ 8سَيْ أَلْمَجِرِنَّنْ دَيَرِغَا بِتْرُسْ كَيْ وُرِنْ كَبَرِنْ شِے مَا يَشِغَ؞ دَيَغَنِ سَيْ يَبَادَ غَسْكِيَ؞ 9عَمَّا حَرْ يَنْذُ دَيْ بَسُ غَانٜىٰ أَبِنْدَ رُبُوتَثِّيَرْ مَغَنَرْ اللَّهْ تَڢَطَابَ ثٜىٰوَ دُواْلٜىٰنٜىٰ عِيسَىٰ يَسَاكٜىٰ تَاشِ دَغَ مَتَتُّو؞ 10سَيْ أَلْمَجِرَنْ سُكَ كُواْمَ غِدَا؞
عِيسَىٰ يَبَيَّنَ غَ مَرْيَمُ
﴿مَتْ 28.9-10؛ مَرْ 16.9-11﴾
11عَمَّا مَرْيَمُ تَڟَيَ عَبَاكِنْ كَبَرِنْ دَغَ وَجٜىٰ، تَنَ تَكُوكَا؞ تَنَ ثِكِنْ كُوكَا كٜىٰنَنْ، سَيْ تَسُنْكُيَ تَلٜىٰڧَ ثِكِنْ كَبَرِنْ، 12سَيْ تَغَ مَلاَىِٕكَ بِيُ دَ ڢَرَرٜىٰنْ تُڢَاڢِ سُنَ ظَوْنٜىٰ أَ عِنْدَ غَاوَرْ عِيسَىٰ تَكٜىٰ أَدَا؞ مَلاَىِٕكَ طَيَ يَنَ ظَوْنٜىٰ تَوَجٜىٰنْ كَيْ، طَيَنْ كُمَ تَوَجٜىٰنْ ڧَڢَاڢُ؞
13سَيْ مَلاَىِٕكُنْ سُكَ تَمْبَيٜىٰتَ سُكَثٜىٰ «عُوَرْغِدَا، مٜىٰيَسَا كِكٜىٰ كُوكَا؟»
تَا ثٜىٰ مُسُ «أَيْ، أَنْطَوْكِ عُبَنْغِجِنَ، بَنْ كُوَ سَنْ عِنْدَ عَكَسَا شِيبَ؞» 14دَ تَغَمَ ڢَطِنْ وَنَّنْ مَغَنَ سَيْ تَجُويَا تَغَ عِيسَىٰ أَڟَيٜىٰ، عَمَّا بَتَغَانٜىٰ ثٜىٰوَ شِينٜىٰبَ؞
15سَيْ عِيسَىٰ يَتَمْبَيٜىٰتَ يَثٜىٰ «عُوَرْغِدَا، مٜىٰيَسَا كِكٜىٰ كُوكَا؟ وَ كِكٜىٰ نٜىٰمَ؟»
تَنَ ڟَمَّنِ كُواْ شِينٜىٰ مَيْ عَيْكِ أَغُواْنَرْ، شِے يَسَا تَثٜىٰمَسَ «مَيْغِدَا، إِنْ كَيْنٜىٰ كَطَوْكٜىٰشِ، غَيَ مِنِ عِنْدَ كَسَا شِ مَنَ دُوانْ إِنْ طَوْكٜىٰشِ؞»
16 عِيسَىٰ يَكِرَتَ يَثٜىٰ «مَرْيَمُ!»
سَيْ تَجُويَا ذُوَا وَجٜىٰنْ عِيسَىٰ تَثٜىٰمَسَ دَ يَرٜىٰنْ يَهُودَاوَا «رَبُّواْنِ!» وَتُواْ مَلَمْ؞
17 عِيسَىٰ يَثٜىٰ مَتَ «كَدَ كِرِڧٜىٰنِ، دُواْمِنْ بَنْ هَوْ وُرِنْ عُبَا بَ تُكُنَ؞ عَمَّا كِتَڢِے وُرِنْ یَنْعُوَنَ كِثٜىٰمُسُ ذَنْ كُواْمَ وُرِنْ عُبَانَ كُمَ عُبَنْكُ، اللَّهْ نَا كُمَ اللَّهْ نْكُ؞» 18سَيْ مَرْيَمُ یَرْ غَرِنْ مَغَدَلَ تَجٜىٰ تَثٜىٰ وَ أَلْمَجِرَنْ «أَيْ، نَا غَا عُبَنْغِجِ؞» تَا كُمَ غَيَ مُسُ أَبِنْدَ عِيسَىٰ يَڢَطَا مَتَ؞
عِيسَىٰ يَبَيَّنَ غَ أَلْمَجِرَنْسَ
﴿مَتْ 28.16-20؛ مَرْ 16.14-18؛ لُكْ 24.36-49﴾
19دَ يَمَّ تَيِ أَ رَانَرْ ڢَرْكُواْ تَمَكُواْ، أَلْمَجِرَنْ عِيسَىٰ سُنَ وُرِے طَيَ؞ سُنْ كُمَ كُكُّلّٜىٰ ڧُواْڢُواْڢِ دُواْمِنْ سُنَ ڟُواْرُوانْ شُوغَبَنِّنْ يَهُودَاوَا؞ سَيْغَا عِيسَىٰ يَا ذُواْ يَڟَيَ أَڟَكِيَرْسُ، يَثٜىٰ مُسُ «سَلَمَ تَكَسَنْثٜىٰ تَرٜىٰدَكُو؞» 20بَايَنْدَ يَڢَطِ وَنَّنْ مَغَنَ، يَنُونَ مُسُ حَنُّوَنْسَ دَ وَجٜىٰنْ هَڧَرْڧَرِنْسَ؞ سَيْ أَلْمَجِرَنْسَ سُكَيِ ڢَضٍ ثِكِ دَ غَنِنْ عُبَنْغِجِ؞
21سَعَنً عِيسَىٰ يَسَاكٜىٰثٜىٰ مُسُ «سَلَمَ تَكَسَنْثٜىٰ تَرٜىٰدَكُو! كَمَرْ يَدَّ عُبَا يَعَيْكُواْ نِے حَكَ نِے مَا نَ عَيْكٜىٰكُ؞» 22دَ يَڢَطِ حَكَ سَيْ يَهُورَ مُسُ نُمْڢَشِنْسَ، يَثٜىٰ مُسُ «كُكَرْٻِ رُوحُ مَيْ ڟَرْكِے؞ 23دُكْ وَنْدَ كُكَ غَاڢَرْتَا مَسَ ذُنُبَيْ، تُواْ، أَنْغَاڢَرْتَا مَسَ كٜىٰنَنْ، كُمَ دُكْ وَنْدَ بَكُ غَاڢَرْتَبَ، تُواْ، بَعَغَاڢَرْتَا مَسَبَ كٜىٰنَنْ؞»
شَيْدَرْ بَنْغَسْكِيَرْ تُواْمَ
24تُواْمَ كُوَ، طَيَ دَغَ ثِكِنْ شَا بِيُنَّنْ، وَنْدَ عَكٜىٰثٜىٰ دَشِ یَنْ بِيُ، بَايَ نَنْ تَرٜىٰدَسُو أَ لُواْكَثِنْ دَ عِيسَىٰ يَذُواْ؞ 25سَيْ سَوْرَنْ أَلْمَجِرَنْ سُكَثٜىٰ مَسَ «أَيْ، مُنْغَ عُبَنْغِجِ؞»
عَمَّا تُواْمَ يَثٜىٰمُسُ «إِنْ بَنْغَا رَامِنْ ڧُسُواْشِنْ أَ حَنُّوَنْسَبَ، إِنْسَا يَڟَاتَ أَ رَامِنْ ڧُسُواْشِنْ، إِنْكُمَ سَا هَنُّونَ أَغٜىٰڢٜىٰنْ هَڧَرْڧَرِنْسَبَ، بَذَنْ بَادَ غَسْكِيَابَ؞»
26بَايَنْ ݣُونَ تَݣُوسْ أَلْمَجِرَنْ سُنَ تَرٜىٰ أَغِدَنْ، كُمَ تُواْمَ يَنَ تَرٜىٰدَسُو؞ ڧُواْڢُواْڢِ سُنَ كُلّٜىٰ، عَمَّا عِيسَىٰ يَا ذُواْ يَڟَيَ أَڟَكِيَرْسُ يَثٜىٰ «سَلَمَ تَكَسَنْثٜىٰ تَرٜىٰدَكُو؞» 27سَعَنً يَثٜىٰ وَ تُواْمَ «سَا يَڟَرْكَ نَنْ، كَدُوبِے حَنُّوَنَ؞ مِيڧُواْ حَنُّوَنْكَ كَسَا أَغٜىٰڢٜىٰنْ هَڧَرْڧَرِنَ؞ كَدَيْنَ شَكَّ، كَبَادَ غَسْكِيَ؞»
28سَيْ تُواْمَ يَثٜىٰ مَسَ «يَا عُبَنْغِجِنَ دَ اللَّهْ نَا كُمَ!» 29عِيسَىٰ يَثٜىٰ مَسَ «أَيْ، دُوانْ كَغَنِّ نٜىٰ شِے يَسَا كَبَادَ غَسْكِيَ؞ مَاسُ أَلْبَرْكَ نٜىٰ وَطَنْدَ سُكَ بَادَ غَسْكِيَ بَاتَرٜىٰدَ سُنْ غَنِّبَ؞»
مَنُڢَرْ لِتَّڢِنَّنْ
30 عِيسَىٰ يَيِ عَلَمُنْ بَنْ مَامَاكِ دَيَوَ أَعِدَانُنْ أَلْمَجِرَنْسَ وَطَنْدَ بَعَرُبُوتَ أَوَنَّنْ لِتَّڢِبَ؞ 31عَمَّا أَنْرُبُوتَ وَطَنَّنْ نٜىٰ، دُواْمِنْ كُبَادَ غَسْكِيَ ثٜىٰوَ عِيسَىٰ شِينٜىٰ أَلْمَسِيحُ، طَنْ اللَّهْ؞ سَعَنً كُمَ، تَوُرِنْ بَادَ غَسْكِيَ كُسَامِ رَيْ عَثِكِنْ سُونَنْسَ؞
Currently Selected:
يَحْيَى 20: hauAS
Highlight
Share
Copy
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020