يَحْيَى 19
19
1سَعَنً بِلَتُسْ يَسَا عَيِ وَ عِيسَىٰ بُلَلَ؞ 2سَيْ سُواْجُواْجِ سُكَيِ وَتَ هُولَرْ مُلْكِ تَرٜىٰشٜىٰنْ إِتَاثٜىٰنْ ڧَيَ سُكَسَاشِ عَكَنْ عِيسَىٰ، سَعَنً سُكَسَا مَسَ وَتَ رِغَا مَيْ كَلَرْ جَرْ غَرُورَا إِرِنْ تَسَرَاكُنَ؞ 3سُكَيِ تَظُوَ وُرِنْسَ، سُنَ تَمَرِنْسَ سُنَ ثٜىٰوَ «رَنْكَيَدَطٜىٰ، سَرْكِنْ يَهُودَاوَا!»
4سَيْ بِلَتُسْ يَسَاكٜىٰ ڢِتُواْوَ، يَثٜىٰ وَ يَهُودَاوَا «غَاشِ ڢَا ذَنْ ڢِتُواْ مُكُ دَ عِيسَىٰ، دُوانْ إِنَ سُواْكُسَنِ ثٜىٰوَ بَنْ سَامٜىٰشِ دَ وَنِ لَيْڢِے بَ؞» 5سَعَنً عِيسَىٰ يَڢِتُواْ دَ هُولَرْ مُلْكِ تَڧَيَ عَكَنْسَ دَ كُمَ رِغَا مَيْ كَلَرْ جَرْ غَرُورَا؞ سَيْ بِلَتُسْ يَثٜىٰ مُسُ «تُواْ، غَ مُتُمِنْ؞»
6دَ مَنْيَنْ ڢِرِسْتُواْثِے دَ مَاسُ غَادِنْ هَيْكَلِ سُكَغَ عِيسَىٰ، سَيْ سُكَيِ إِيهُ سُنَ ثٜىٰوَ «أَغِثِّيٜىٰشِ! أَغِثِّيٜىٰشِ!»
عَمَّا بِلَتُسْ يَثٜىٰ مُسُ «كُجٜىٰ كُغِثِّيٜىٰشِ دَ كَنْكُ، دُواْمِنْ نِے بَنْ سَامٜىٰشِ دَ وَنِ لَيْڢِے بَ؞»
7يَهُودَاوَنْ سُكَ أَمْسَ مَسَ سُكَثٜىٰ «أَيْ، مُنَدَ كُواْيَرْوَا، كُمَ بِسَغَ كُواْيَرْوَرْ يَا كَمَاتَ عَكَشٜىٰشِ، غَمَا يَا مَيْدَ كَنْسَ طَنْ اللَّهْ؞»
8دَ بِلَتُسْ يَجِ وَنَّنْ مَغَنَ سَيْ يَڧَارَ جِنْ ڟُواْرُواْ؞ 9سَيْ يَسَاكٜىٰ شِغَ ثِكِنْ ڢَادَرْ، يَتَمْبَيِ عِيسَىٰ ثٜىٰوَ «دَغَ إِنَا نٜىٰ كَڢِتُواْ؟» عَمَّا عِيسَىٰ بَيْ بَاشِ وَتَ أَمْسَبَ؞ 10سَبُواْدَ حَكَ بِلَتُسْ يَثٜىٰ مَسَ «كَڧِ كَيِ مَغَنَ دَنِے كُواْ؟ بَكَ سَنِ ثٜىٰوَ إِنَدَ إِيكُواْ إِنْ سَكٜىٰكَ، كُواْ إِنْ غِثِّيٜىٰكَبَ؟»
11 عِيسَىٰ يَأَمْسَ مَسَ يَثٜىٰ «أَيْ، إِيكُوانْ دَ كَكٜىٰ دَشِ عَكَيْنَ إِيكُواْ وَنْدَ اللَّهْ يَبَاكَ نٜىٰ كَوَيْ؞ مُتُمِنْدَ يَسَانِ أَ حَنُّنْكَ يَڢِيكَ ذُنُوبِ؞»
12عَكَنْ وَنَّنْ مَغَنَ بِلَتُسْ يَنٜىٰمَ يَسَكِ عِيسَىٰ، عَمَّا يَهُودَاوَا سُكَ طَغَ مُرْيَرْسُ سُكَيِ إِيهُ سُنَ ثٜىٰوَ «إِنْ دَيْ كَا سَكِ وَنَّنْ، تُواْ، كَيْ بَا أَبُواْكِنْ كَيْسَرْ بَنٜىٰ؞ أَيْ، دُكْ وَنْدَ يَمَيْدَ كَنْسَ سَرْكِے، يَنَيِ وَ كَيْسَرْ تَاوَيٜىٰ كٜىٰنَنْ؞»
13دَ بِلَتُسْ يَجِ وَنَّنْ أَبِنْدَ سُكَ ڢَطَا، يَڢِتُواْ دَ عِيسَىٰ؞ سَيْ شِ بِلَتُسْ يَذَوْنَ عَكُجٜىٰرَرْ شَرِيعَ أَوَنِ وُرِنْ دَ عَكَ كِرَا دَٻٜىٰنْ دُوَڟُو؞ دَيَرٜىٰنْ أَرَمَيَ كُوَ أَنَثٜىٰ دَشِ غَبَّتَ؞ 14رَانَرْ نَنْ كُوَ رَانَرْ شِرِنْ بِكٍ ڧٜىٰتَرٜىٰوَ ثٜىٰ، وَجٜىٰنْ ڟَكَرْ رَانَ؞ سَيْ شِے بِلَتُسْ يَثٜىٰ وَ يَهُودَاوَا «غَا سَرْكِنْكُ!»
15عَمَّا يَهُودَاوَا سُكَيِ إِيهُ سُنَ ثٜىٰوَ «عَكَشٜىٰشِ! عَكَشٜىٰشِ! أَغِثِّيٜىٰشِ!»
سَيْ بِلَتُسْ يَتَمْبَيٜىٰسُ يَثٜىٰ «كُنَسُواْ إِنْغِثِّيٜىٰ سَرْكِنْكُ نٜىٰ؟»
سَيْ مَنْيَنْ ڢِرِسْتُواْثِے سُكَ أَمْسَ سُكَثٜىٰ «أَيْ، مُو بَامُدَ وَنِ سَرْكِے سَيْ كَيْسَرْ؞» 16سَعَنً بِلَتُسْ يَطَوْكِ عِيسَىٰ يَبَا يَهُودَاوَا دُواْمِنْ سُغِثِّيٜىٰشِ؞
أَنْ غِثِّيٜىٰ عِيسَىٰ
﴿مَتْ 27.32-44؛ مَرْ 15.21-32؛ لُكْ 23.26-43﴾
17سَيْ سُواْجُواْجِ سُكَ تَڢِے دَ عِيسَىٰ؞ عِيسَىٰ يَكُوَ ڢِتَ دَغَ ثِكِنْ غَرِنْ يَنَ طَوْكٜىٰ دَ غِثِّيٜىٰنْسَ دَ كَنْسَ ذُوَا وَنِ وُرِنْ دَ عَكٜىٰثٜىٰ دَشِ وُرِنْ ڧُواْڧُوانْ كَيْ؞ دَيَرٜىٰنْ أَرَمَيَ كُوَ أَنَثٜىٰ دَ وَنَّنْ وُرِے غُوالْغُواْتَ؞ 18أَوُرِنْ نٜىٰ ڢَا عَكَ غِثِّيٜىٰ عِيسَىٰ، تَرٜىٰدَ وَطَنْسُ مُتَنٜىٰ بِيُ، طَيَ أَدَمَنْسَ، طَيَ كُمَ أَ هَغُنْسَ؞ 19بِلَتُسْ كُمَ يَرُبُوتَ وَتَ سَنَرْوَ، وَدَّ عَكَ مَنّٜىٰ عَكَنْ غِثِّيٜىٰنْ؞ أَبِنْدَ عَكَ رُبُوتَ كُوَ شِينٜىٰ، «عِيسَىٰ بَنَظَرٜىٰتْ، سَرْكِنْ يَهُودَاوَا؞» 20يَهُودَاوَا دَيَوَ سُنْ كَرَنْتَ وَنَّنْ سَنَرْوَ دُواْمِنْ وُرِنْ دَ عَكَ غِثِّيٜىٰ عِيسَىٰ كُسَدَ بِرْنِ نٜىٰ؞ وَنَّنْ رُبُوتُو كُوَ أَنْيِشِ دَ يَرٜىٰنْ أَرَمَيَ دَ رُواْمَنْثِ دَ كُمَ هٜىٰلٜىٰنَنْثِ؞ 21سَيْ مَنْيَنْ ڢِرِسْتُواْثِنْ يَهُودَاوَا سُكَثٜىٰ وَ بِلَتُسْ «كَدَ كَرُبُوتَ، ‹سَرْكِنْ يَهُودَاوَا›، عَمَّا كَرُبُوتَ، ‹وَنَّنْ مُتُمْ يَثٜىٰ وَيْ شِينٜىٰ سَرْكِنْ يَهُودَاوَا›؞» 22بِلَتُسْ يَأَمْسَ يَثٜىٰ «أَبِنْ دَ نَارِغَا نَا رُبُوتَ، نَا رُبُوتَ كٜىٰنَنْ؞»
23بَايَنْدَ سُواْجُواْجِنْ سُكَ غِثِّيٜىٰ عِيسَىٰ، سُكَ طِبِے تُڢَاڢِنْسَ، سُكَ رَبَ كَشِ حُطُ، كُواْوَنّٜىٰ سُواْجَ يَطَوْكِ كَشِ طَيَ؞ سُنْ كُمَ طَوْكِ دُواْغُوَرْ رِغَرْسَ وَدَّ بَعَطِنْكَ تَبَ، عَمَّا أَنْسَاڧَتَ نٜىٰ تُنْدَغَ سَمَ حَرْ ذُوَا ڧَسَا؞ 24سَيْ سُكَثٜىٰ وَجُونَ «كَدَ مُيَاغٜىٰ وَنَّنْ رِغَا، عَمَّا مُيِ ڧُرِعَ عَكَنْتَ، مُغَ وَنْدَ ذَيْثِ؞» وَنَّنْ يَڢَرُنٜىٰ دُواْمِنْ عَثِكَ أَبِنْدَ يَكٜىٰ عَثِكِنْ رُبُوتَثِّيَرْ مَغَنَرْ اللَّهْ ثٜىٰوَ
«سُكَ رَرَّبَ رِيغُنَنَ أَڟَكَانِنْسُ،
سُكَجٜىٰڢَ ڧُرِعَ عَكَنْ رِغَاتَ؞» #زَبُو 22.18
أَبِنْ دَ سُواْجُواْجِنْ سُكَيِ كٜىٰنَنْ؞
25تُواْ، وَطَنْدَ سُكَ ڟَيَ كُسَدَ غِثِّيٜىٰنْ عِيسَىٰ كُوَ سُونٜىٰ مَامَرْسَ تَرٜىٰدَ یَرْعُوَرْتَ دَ مَرْيَمُ مَاتَرْ كِلُواْبَسْ دَ كُمَ مَرْيَمُ دَغَ مَغَدَلَ؞ 26دَ عِيسَىٰ يَغَ مَامَرْسَ دَ أَلْمَجِرِنَّنْ دَيَكٜىٰ ڧَوْنَ ڟَيٜىٰ كُسَ، سَيْيَثٜىٰ وَ مَامَرْسَ «مَثٜىٰ، غَا طَنْكِ!» 27سَعَنً يَثٜىٰ وَ أَلْمَجِرِنْ «وَنَّنْ تَاذَمَ مَامَرْكَ؞» تُنْدَغَ لُواْكَثِنَّنْ ڢَا أَلْمَجِرِنْ يَكَيْ مَامَرْ عِيسَىٰ غِدَنْسَ تَذَوْنَ تَرٜىٰ دَشِ؞
مُتُوَرْ عِيسَىٰ
﴿مَتْ 27.45-56؛ مَرْ 15.33-41؛ لُكْ 23.44-49﴾
28 عِيسَىٰ يَسَنْ ثٜىٰوَ أَوَنَّنْ لُواْكَثِ يَغَمَ دُكَنْ كُواْمٜىٰ، كُمَ دُواْمِنْ عَثِكَ أَبِنْدَ يَكٜىٰ عَثِكِنْ رُبُوتَثِّيَرْ مَغَنَرْ اللَّهْ سَيْيَثٜىٰ «إِنَجِنْ ڧِشِنْ ضُوَ؞» #زَبُو 69.21 29تُواْ، أَݣَويْ وَنِ غُواْرَ ثِكٜىٰ دَ ضُوً إِنَبِے مَيْ ڟَامِ عَ أَجِيٜىٰ أَوُرِنْ؞ سَيْ سُكَ جِڧَ سُواْسُواْ دَ ضُوً إِنَبِے مَيْ ڟَامِنْ، سُكَ سُواْكَ سُواْسُوانْ أَ سَنْدَنْ إِظُوابْ سُكَ طَغَ سُكَ كَيْ بَاكِنْ عِيسَىٰ؞ 30دَ عِيسَىٰ يَكَرْٻِ ضُوً ڟَامِنَّنْ سَيْيَثٜىٰ «أَنْغَمَ!» سَعَنً يَسُنْكُيَرْدَ كَنْسَ يَسَكِ رَنْسَ؞
أَنْ سُواْكِ عِيسَىٰ دَ مَاشِ
31سَعَنً شُوغَبَنِّنْ يَهُودَاوَا سُكَ ضُواْڧِ بِلَتُسْ يَبَادَ إِظْنِ عَكَكَّرْيَ ڧَڢَاڢُنْ مُتَنٜىٰنْ دَ عَكَ غِثِّيٜىٰ، عَكُمَ سَوْكُواْ دَ جِكُنَنْسُ دَغَ غِثِّيٜىٰ؞ سُنْيِ وَنَّنْ ضُواْڧُواْ نٜىٰ دُواْمِنْ رَانَرْ شِرِ#19.31 رَانَرْ شِرِ: دُوبِے مَعَنَرْ وَطَنْسُ كَلْمُواْمِ؞ ثٜىٰ، كُمَ بَاسَسُواْ جِكُنَنْ سُكَسَنْثٜىٰ عَكَنْ غِثِّيٜىٰ أَ رَانَرْ هُوتُ تَمَكُواْ؞ رَانَرْ هُوتُنَّنْ مَيْ ذُوَا كُوَ هُوتُ نٜىٰ نَمُسَمَّنْ؞ 32سَيْ سُواْجُواْجِنْ سُكَذُواْ وُرِنْ مُتَنٜىٰنْ دَ عَكَ غِثِّيٜىٰ تَرٜىٰدَ عِيسَىٰ سُكَ كَكَّرْيَ ڧَڢَاڢُنْ مُتُمْ نَڢَرْكُواْ، سَعَنً سُكَجٜىٰ سُكَ كَكَّرْيَ ڧَڢَاڢُنْ مُتُمْ نَبِيُنْ؞ 33عَمَّا دَ سُكَذُواْ وُرِنْ عِيسَىٰ، بَسُ كَكَّرْيَ ڧَڢَاڢُنْسَبَ دُواْمِنْ سُنْ غَ يَارِغَا يَمُتُ؞ 34سَيْ دَيْ طَيَ دَغَ ثِكِنْ سُواْجُواْجِنْ يَسُواْكِ عِيسَىٰ دَ مَاشِ أَغٜىٰڢٜىٰ، وَجٜىٰنْ هَڧَرْڧَرِنْسَ، سَيْ نَنْ دَنَنْ جِنِ دَ ضُوَ سُكَ ڢِتُواْ؞ 35شِے وَنْدَ يَغَ أَبِنْدَ يَڢَرُ نٜىٰ يَڢَطِ وَنَّنْ، كُمَ دُكْ أَبِنْدَ يَڢَطِ غَسْكِيَ نٜىٰ؞ كُمَ شِے مَا دَ كَنْسَ يَسَنْ غَسْكِيَ يَكٜىٰ ڢَطِ، كُمَ يَنَ ڢَطِنْسَ نٜىٰ دُواْمِنْ كُو مَا كُبَادَ غَسْكِيَ؞ 36وَنَّنْ يَڢَرُ نٜىٰ دُواْمِنْ أَبِنْدَ يَكٜىٰ عَثِكِنْ رُبُوتَثِّيَرْ مَغَنَرْ اللَّهْ يَثِكَ، وَتُواْ «بَ كُواْ ڧَشِنْسَ طَيَ دَ ذَاعَ كَرْيَ؞» #ڢِتْ 12.46؛ لِـ ڧِدْ 9.12؛ زَبُو 34.20 37وَتَ رُبُوتَثِّيَرْ مَغَنَرْ اللَّهْ كُمَ تَثٜىٰ «ذَاسُ دُوبِے وَنْدَ سُكَ سُواْكَ؞» #زَكْ 12.10
بِنّٜىٰوَرْ عِيسَىٰ
﴿مَتْ 27.57-61؛ مَرْ 15.42-47؛ لُكْ 23.50-56﴾
38بَايَنْ حَكَ يُوسُڢَ مُتُمِنْ أَرِمَتِيَ، وَنْدَ يَكٜىٰ أَلْمَجِرِنْ عِيسَىٰ نٜىٰ، عَمَّا عَٻُواْيٜىٰ دُواْمِنْ ڟُواْرُوانْ يَهُودَاوَا، يَضُواْڧِ بِلَتُسْ إِظْنِ دُواْمِنْ يَطَوْكِ جِكِنْ عِيسَىٰ؞ بِلَتُسْ كُوَ يَيَرْدَ مَسَ، يَكُوَجٜىٰ يَطَوْكِ جِكِنْ عِيسَىٰ؞ 39نِكُواْدِمُسْ مُتُمِنْدَ يَتَٻَ ذُوَا وُرِنْ عِيسَىٰ دَ دَرٜىٰ، يَتَڢِے تَرٜىٰدَ يُوسُڢَ، يَنَ كُمَ رِڧٜىٰ دَ كَايَنْ ڧَنْشِ، وَتُواْ مُرْ دَ أَلُواسْ أَغَوْرَايٜىٰ، وَجٜىٰنْ كِلُواْ تَلَاتِنْ؞ 40سَيْ مُتَنٜىٰنَّنْ بِيُ سُكَ طَوْكِ جِكِنْ عِيسَىٰ سُكَ نَنَّطٜىٰ دَ يَدِنْ لِيلِنْ تَرٜىٰدَ كَايَنْ ڧَنْشِنَّنْ بِسَغَ أَلْعَادَرْ يَهُودَاوَا تَبِنّٜىٰوَ؞ 41أَوُرِنْ دَ عَكَ غِثِّيٜىٰشِ كُوَ أَݣَويْ وَتَ غُواْنَ، عَثِكِنْ غُواْنَرْ كُمَ أَݣَويْ وَنِ سَابُوانْ كَبَرِ وَنْدَ بَعَتَٻَسَا كُواْوَ عَثِكِيبَ؞ 42دَيَكٜىٰ رَانَرْ شِرِ ثٜىٰ تَ يَهُودَاوَا، كُمَ كَبَرِنْ يأَنَانً كُسَ سَيْ مُتَنٜىٰنَّنْ سُكَسَا جِكِنْ عِيسَىٰ أَنَنْ وُرِنْ؞
Currently Selected:
يَحْيَى 19: hauAS
Highlight
Share
Copy
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020