Zekariya 14
14
Yehova hakwinza nakuyuula
1Tiya, ifuku daYehova hidikwinza
Diwakanjaŋana mukachi keyi yuma yeyi yakupuupa.
2Muloŋa ami nakapompesha nyunza yejima
Kulonda kulwa njita naYerusalema.
Mukala akawutambula, matala akayibuwa,
Ambanda akayishimba.
Chibalu chamukala chakaya muwunkoli
Antu akashalahu hiyakayikisaŋana mumukalaku.
3Henohu Yehova wakedika nakulwa nanyunzoyu,
Neyi chalwiliyi hefuku danjita.
4Dena ifuku odu nyendu yindi yakemana hampidi yaOliveta,
Yekala kumesu aYerusalema kumusela,
Mpidi yaOliveta yakabaluka hakachi kayu
Chakutala kumusela nikumujika,
Kwikala nichinekineki cheneni nankashi;
Chibalu champidi chakaya kukabeta kakuchimunswa,
Chibalu nawa kukabeta kakuchidiilu.
5Enu mwakatemukila kuchinekineki champidi jami,
Muloŋa chinekineki champidi chakashika nikuAzeli.
Eŋa, mwakatemuka neyi chimwatemukili mutentanshi
Mumafuku amwanta wawaYuda Uziya.
Yehova Nzambi yami #Mas 96:13; Mat 16:27; 25:31wakenza,
Niakwakujila ejima akenza nindi.
6Dena ifuku odu
Hikwakekala #Isa 13:10kutooka hela kwiyilaku;
7Ilaŋa dakekala ifuku dimu delukawu kudi Yehova;
Himwaanaku, hiwufukuku.
Ilaŋa kumelela kwakacha to-o.
8Dena ifuku odu #Ezek 47:1-12; Chim 22:1-2menji amomi akafuma muYerusalema;
Chibalu chawu chakaya kukaluŋalwiji kakumusela,
Chibalu chawu nawa chakaya kukaluŋalwiji kakumujika.
Chakekala chochenochu, nihamwaka wankanza, nihamwaka wachishika.
9Yehova wakekala #Isa 2:2-4Mwanta weseki dejima.
Dena ifuku odu Yehova wakekala wumu,
Niijina dindi dimu.
10Ituŋa dejima akadibalumuna neyi chaana, kufumisha kuGeba nikuRimoni kukabeta kaYerusalema kakuchidiilu; Yerusalema wakanyamuka kwiwulu, wakashakama kuchipela chindi, kufumisha kuChisu chaBenjamini ndo-o nikuChisu chakuSambila, nikuChisu chaIwombu, kufumisha nawa kuKaposhi kaHananeli kushika nikumakamwinu avinyu yamwanta.
11Mwakashakama antu,
Himwakekala nawa cheŋi ishiŋuku,
Yerusalema wakashakama chakadi kwakama.
12Tiyenu chipupu chaketayi Yehova nyunza yejima yalwili naYerusalema.
Nyijimba yawu yakanoŋa iku saŋa emenawu zululu,
Mesu awu akanoŋela muŋoma jamesu awu,
Madimi awu akanoŋela mutunwa twawu.
13Dena ifuku odu mukachi kawu mwakekala ipumba
Dadeni dakufuma kudi Yehova;
Wejima wawu akela iwu akwata chikasa chamukwawu,
Iwu akwata chikasa chamukwawu,
Chikasa chaniwu hichikunyamukila chikasa chamukwawu.
14Hela Yuda nawa wakalwa kuYerusalema;
Akapompesha hamu maheta anyunza yejima yanyeŋumukaku,
Niwuru, nisiliva, niyuma yakuvwala, yakasweja kuvula nankashi.
15Chipupu chakawana atuwalu, nawayingongavalu,
Nawaŋameli, nawayimbulu,
Nawanyama ejima akekala muyimba oyu
Chakekala neyi chipupu ichi.
16Nyunza yejima yakashala hanyunzoyu yenjili nakulwa naYerusalema, yakakandukaŋa hamwaka hamwaka #Lev 23:34-44nakudifukula kudi Mwanta, Yehova Wamazaza, nakudya chawija chamuyisolu.
17Chisaka chahayisaka yahamaseki chakabula kukanduka kuYerusalema nakudifukula kudi Mwanta, Yehova Wamazaza, hiyakamona nvulaku.
18Neyi chisaka chawaEjipitu chabula kwikala nanvula, chakaleka kukanduka nakushikaku, niwena nawa akamona chipupu chakababeshayi nachu Yehova nyunza yabulaŋa kukanduka nakudya chawija chamuyisolu.
19Mwenimu dimu mwakababeshelawu aEjipitu, dimu nawa mwakababeshelawu ninyunza yejima yabulaŋa kukanduka nakudya chawija chamuyisolu.
20Dena ifuku odu hampwambu jawatuwalu akasonekahu nawu, #Kwi 28:36WAJILA WAYEHOVA; jinuŋu jamwitala daYehova jakekala neyi yeŋa yakunama yakumesu akameŋa kakulambwila.
21Eŋa, jinuŋu jamuYerusalema namuYuda jejima, #1 Kor 10:31jakekala jajila jaYehova Wamazaza. Antu ejima akaketulaŋa yimuna akenzaŋa nakuyinona nakutelekamu. Dena ifuku odu himwakekala nawa cheŋi kaKenani mwitala daYehova Wamazazaku.
Currently Selected:
Zekariya 14: MWW04
Highlight
Share
Copy
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
