Maku 1
1
Yowanu Njimiki hakuloŋesha njila
(Mat 3:1-11; Luk 3:2-16; Yow 1:6, 15-28)
1Mwatachikilili nsaŋu yayiwahi yaMwana kaNzambi Yesu Kristu.
2Mwomwasonekeluwu munyikanda yawatuprofwetu nawu,
#
Mal 3:1; Mat 11:10 Tiya, hinukutemesha ntemesha yami kuwukuya, wakaloŋesha njila yeyi.
3 #
Isa 40:3
Izu damuntu wukubidika muchinkalampata nindi,
Loŋeshenu njila yaMWANTA,
Ololenu njila jindi jatulolu.
4Yowanu wajimikilaŋa muchinkalampata, wenjili nakushimuna #Yil 13:24chijimikilu chakubalumuka mumuchima, kulonda kwanakena antu nshidi.
5Antu amwituŋa daYudeya dejima, niantu akuYerusalema ejima ayili kudi yena; chanetejuwu mwaputoleluwu, yena hakuyijimika mukaloŋa Yodana.
6Yowanu wavwelaŋa mahina amavuji aŋameli, nimuya wachitembi mumbunda yindi, wadiilaŋa tubola niwuchi wamwisaŋa.
7Hakushimuna nindi, Munyima yami mudi nakwinza wambadika ŋovu, ami hinateli kubandama nakusubula nyiya yankwabilu jinduku.
8Ami nayijimiki mumenji, ilaŋa yena wakayijimika mudi Spiritu Wajila.
Kujimika nikumutesha Yesu
(Mat 3:13-17; Luk 3:21-22; Yow 1:29-34)
9Hamafuku owu Yesu hakufuma #Mat 2:23kuNazareta wamuŊaliliya, hiyakumujimika kudi Yowanu muYodana.
10Henohu hadiŋi nakufumayi Yesu mumenji wamweni iwulu dinenzuluki, Spiritu wudi neyi katela hakuwila hadi yena.
11Mwiwulu himukufuma izu nindi, #Mas 2:7; Yow 1:29-34Yeyi Mwanami nakeŋa, natiyaŋa kuwaha nankashi mudeyi.
12Hohenohu #Mat 4:1-11; Luk 4:1-13Spiritu hakumutwala muchinkalampata.
13Hakwikala muchinkalampata nakumutesha kudi Satana mafuku makumi awana (40); wadiŋi hamu nawanyama amwisaŋa; aŋelu hiyakumukalakela.
Kutambikewa kwawatumbanji atachi
(Mat 4:12-17; Luk 4:14-15)
14Chanamukwatuwu Yowanu nakumusha mukaleya, Yesu hakuya muŊaliliya nakushimuna #Rom 1:16nsaŋu yayiwahi yaNzambi,
15nindi, #Ŋal 4:4Mwaka wunashiki dehi, wanta waNzambi wudi kwakwihi. Balumukenu munyichima, mukuhweleli nsaŋu yayiwahi.
16Chadiŋi nakuhitayi kwijiya daŊaliliya, #Mat 4:18-22; Luk 5:2-11; Yow 1:40-42hakumona Shimona nimanakwindi Anderi, adi nakuumba kaleŋi mwijiya, muloŋa adiŋi ayibinda yanshi.
17Yesu hakuyila nindi, Inzenu munlondaŋa niyisukuli wubinda wawantu.
18Hohenohu ashiya nituleŋi twawu amulonda nikumulondela.
19Chanayiyi kumbidi chanti, hakumona Yakoba mwana kaZebedewu, nimanakwindi Yowanu, niwena adi muwatu nakutuŋulula tuleŋi twawu.
20Hohenohu hakuyitambika. Hiyakushiya tata yawu Zebedewu muwatu, niaŋamba jawu afumbiluwu, hiyakuya nindi.
Yesu hakufumisha spiritu wazonda
(Luk 4:31-37)
21Hiyakuya kuKaperinamu; hohenohu hetaŋwa daSabata hakwiŋila mushikola nakuyitaŋisha.
22Hiyakuhayama #Mat 7:28-29chayitaŋishiliyi, muloŋa wayitaŋishili neyi wukweti wanta, bayi neyi ansonekuku.
23Henohu mushikola yawu mwadiŋi muntu wukweti spiritu wazonda;
24hakubilela nindi, Aka! #Mat 8:29; Luk 4:34; Yow 6:69Tukweti nsaŋwinyi naneyi Yesu wakuNazareta? Wunenzi nakutukisaŋana tahindi? Nakwiluki, yeyi Mukwakujila wambala waNzambi.
25Yesu hakumuhoshola nindi, Mwenaku, fumaku mudi yena.
26Spiritu wazonda hakumukonyesha, hakubilela nezu daŋovu, amufuma nikumufuma.
27Hiyakuhayama wejima wawu, kuhayama kwakudihula nawu, Chenichi chika? Kutaŋisha kwakwiha tahindi? Hela aspiritu azonda hakuyihosha nawanta, hiyakumwovwahila.
28Hohenohu mpuhu yindi yitiyakana nikutiyakana mwejima mwahita ituŋa daŊaliliya dejima kwi-ndo.
Yesu hakuuka amavulu
(Mat 8:14-15; Luk 4:38-39)
29Chedikiluwu mushikola hohenohu eŋila nimwitala daShimona naAnderi, hamu nawaYakoba naYowanu.
30MukuwaShimona wadiŋi wakama nakukata mashika; hohenohu amulejamu niYesu.
31Hakwinza, hakumukwata kuchikasa, hakumuhindwisha; mashika amufuma nikumufuma, hakuyikalakela.
32 #
Mat 8:16-17; Luk 4:40-41 Melela hahumini itaŋwa amuleteleli akata ejima, niakweti andemoni.
33Mukala wejima wupompa nikuchisu fwi-i.
34Hakuuka amavulu adiŋi akata nyisoŋu yeŋi nayeŋi, hakufumisha andemoni amavulu; hetejeli andemoni kuhoshaku, muloŋa wena amwilukili.
Yesu hakulombela kwakankawindi
(Luk 4:42-43; 5:16)
35Hakuhinduka hankunku yakucha, hakwidika, hakuya kwakankawindi nakulombela.
36Shimona niwena adiŋiyi nawu hiyakumulondela.
37Chanamuwanuwu hiyakumwila nawu, Antu ejima adi nakukukeŋakeŋa.
38Hakuyila nindi, Tuyenu kunyikala yacheŋi yidi kwakwihi, nishimuni nikwenoku nawa; muloŋa dichi chinenjilili.
39 #
Mat 4:23-25; Luk 4:44 Hakwiŋila mumashikolawu mwahita Ŋaliliya yejima, nakutaŋisha nikufumisha andemoni.
Mukwambumba
(Mat 8:2-4; Luk 5:12-14)
40Kudi yena kwenjili mukwambumba, hakumulembelela, hakumufukamina, hakumwila nindi, Neyi wuneteji, wunatweshi kuntookesha.
41Watiyili wushona, wolweli chikasa chindi wamukunkili; hakumwila nindi, Neteji, tookaku.
42Hohenohu mbumba yimufuma nikumufuma, yotooka nikutooka.
43Hakumuhosha naŋovu hohenohu nindi, Yaŋa kweyi.
44Hakumwila nindi, #Mat 8:4Babalaku, bayi wulejamu muntuku; yaŋa kweyi wakadimwekeshi kudi kapristu, wakamwinki mulambu wakuditookesha nachu #Lev 13:49; 14:2-32wayilejeluwu kudi Mosi, kulonda kuyilila wunsahu.
45Ilaŋa yena hakufumaku, hakutachika kuchishimununa nankashi, hakutiyakesha nsaŋu oyu kwejima; dichi Yesu hakwikala muchinkalampata mwakadi antu, hatwesheli kwidika cheŋi hamukala hatookaku; antu hiyakufumaŋa kumbadi jejima, hiyakuyaŋa kudi yena.
Currently Selected:
Maku 1: MWW04
Highlight
Share
Copy
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
