Yowanu 19

Kumuhiisha Yesu

1Pilatu hakumukwata Yesu, hakumuvupola nachikoti.

2 # Mat 27:26-30; Mak 15:16-19 Mashidika hiyakuyinda chibaaba chanyiŋa, hiyakumuvwikachu kumutu, amuvwika niihina dawusombu.

3Hiyakuya kudi yena, hiyakumwila nawu, Eyi Mwanta wawaYudeya, kalombu! Hiyakumweta namakasawu.

4 # Luk 23:4 Pilatu hakwidika cheŋi, hakuyila nindi, Talenu, hinukuyiidishilayi kulonda mwiluki nenu ami hinamumoni nachitelaku.

5Dichi Yesu hakwidika navwali chibaaba chanyiŋa ninodu ihina dawusombu. Pilatu hakuyila nindi, Talenu iwu muntu!

6Dichi akulumpi jawatupristu nianhembi chanamumonuwu, hiyakubidika nawu, Mupopelenu hakulusu, mupopelenu! Pilatu hakuyila nindi, Mutambulenu enu aweni, mumupopeli hakulusu; ami kwami hinamumoni nachitelaku.

7AYudeya hiyakumwakula nawu, Etu tukweti nshimbi, #Lev 24:16nshimbi oyu yelaŋa nawu nateli kufwa, muloŋa waditeneni nindi, niMwana kaNzambi.

8Dichi Pilatu chanatiyiyi mazu awa, yotiya niwoma wasweja.

9Hakwiŋila mwitala dakusompela, hakumwihula Yesu nindi, Eyi wafuma kudihi? Yesu kumwakula nehi.

10Dichi Pilatu hakumwila nindi, Eyi kuhosha nanami nehi? Eyi kwiluka neyi ami nikweti wanta wakukuumbaku, nikweti niwanta wakukupopela hakulusu, nehi?

11Yesu hakumwakula nindi, Neyi abula kukwinka wanta wakufuma mwiwulu, mutenowu wunakaŋanyi kuŋila chuma. Dichi iwu nanlubuli kudeyi diyi wukweti muloŋa wakubadika.

12Henohu Pilatu hakukeŋa nindi amuumbuku. Ilaŋa aYudeya hiyakubidika nawu, Neyi wukumuumbaku yeniwu, hiwukwikala ibwambu daKesaruku; muntu waditenaŋa nindi nimwanta, halemeshaŋa Kesaruku.

13Dichi Pilatu chanatiyiyi mazu awa, hakumwidisha Yesu, hakushakama hetanda dakusompela kwatenaŋawu nawu, Kuchisesa chamalola; muHeberu nawu, KuGabata.

14Denodu dadiŋi ifuku dakuloŋeshela ifuku dalema daChipandakenu; hadiŋi neyi kwiji mpinji yamuchitanu nayimu (12:00 hrs). Hakuyila aYudeya nindi, Talenu Mwanta wenu!

15Wena hiyakubidika nawu, Waadi! Waadi! Mupopelenu hakulusu! Pilatu hakuyila nindi, Nipopeli Mwanta wenu hakulusu? Akulumpi jawatupristu hiyakumwakula nawu, Mwanta wetu Kesari hohu; hitukweti mwanta wacheŋuku.

16Dichi hakuyinkayu wena kulonda amupopeli hakulusu.

Kumupopela Yesu haKulusu

(Mat 27:33-44; Mak 15:22-32; Luk 23:33-43)

17Dichi hiyakumukwata Yesu, hiyakumutwala. Yena hakwidika, iku nadisendeli kulusu yindi, hakuya kwatenaŋawu nawu, Kuchaŋu; muHeberu nawu, KuGologota.

18Hiyakumupopela hakulusu kwenoku, hamu nawamakwawu ayedi, wumu hambadi, wumu hambadi, Yesu mukachi.

19Pilatu hakusoneka ninsaŋu nawa, hakuyisha hakulusu. Asonekeluhu nawu,

YESU WAKUNAZARETA, MWANTA WAWAYUDEYA.

20Dichi nsaŋu iyi ayitaŋili kudi aYudeya amavulu; muloŋa oku kwamupopeleluwu Yesu hakulusu kwadiŋi kwakwihi naŋanda; ayisonekeli mwidimi daHeberu, nimwidimi daLatini, nimwidimi daGriki.

21Dichi akulumpi jawatupristu niaYudeya hiyakumwila Pilatu nawu, Bayi wusoneka neyi, Mwanta wawaYudeyaku; chiŋa neyi, Yena waditeneni nindi, Ami niMwanta wawaYudeya.

22Pilatu hakwakula nindi, Mwomu munasoneki mwomu.

23Mashidika chanamupopeluwu Yesu hakulusu, hiyakunona yuma yindi yakuvwala, hiyakwambula muwana, mashidika ejima hiyakuwanina iwu nachibalu chindi, iwu nachibalu chindi. Ilaŋa mupila windi wadiŋi wakutuŋa kufumisha kwiwulu, wejima wakadi muchiminu.

24Dichi hiyakudila wumu namukwawu nawu, Bayi tuwutabulaku, tuditondeli nachinjikijilu chakusakula nachu, tumoni muntu wukuwutambula; kulonda nyikanda yajila yilumbuluki, yasonekeluwu nawu,

# Mas 22:18 Yuma yami yakuvwala anadanjaŋeni mukachi kawu,

Mupila wami hiyakusakula nachinjikijilu chakusakula nachu.

Dihu hafumini mashidika kwila yumiyi.

25Kwakwihi nakulusu yaYesu #Mat 27:55-56; Mak 15:40-41kwemeni mama yindi namanakwamama yindi wamumbanda, Mariya iŋodaKilopasi naMariya Mandaleni.

26Dichi Yesu chanamoniyi mama yindi #13:23nikambanji kindi ákeŋeliyi anemani hamu kwakwihi, hakumwila mama yindi nindi, Eyi mumbanda, talaku mwaneyi owu.

27Hakumwila owu kambanji kindi nindi, Talaku mama yeyi owu. Kufumisha kumpinji oyu, owu kambanji hakumutwala kwiindi.

Kufwa kwaYesu

(Mat 27:45-50; Mak 15:33-37; Luk 23:44-46)

28Kulondela henohu, Yesu chanelukiyi nindi yuma yejima yinamani dehi, hakwila nindi, #Mas 69:21Natiyi mpwila; kulonda nyikanda yajila yilumbuluki.

29Kwenoku kwadiŋi nsaba yakutenteka, yenzala navinyu yabatuka; hiyakunona sponji yenzala navinyoyu yabatuka, hiyakuyisha kwiteti hiyakumushayi kukanwa.

30Dichi Yesu chanatambuliyi oyu vinyu yabatuka, hakwila nindi, Chinamani. Yonoŋeka nimutu windi, yotula niwumi windi.

31Chidadiŋi ifuku dakuloŋesha Chipandakenu, aYudeya hiyakeŋeli #Kuhit 21:23nyijimba yishali hamakulusu haSabatoyuku, muloŋa yenoyu Sabata yadiŋi yalema, hiyakumulomba Pilatu nawu ayiteji kukotola nyendu yawu, ayifumishuku.

32Dichi mashidika hiyakwinza, hiyakukotola nyendu yanowu wakusambila, niyamukwawu apopeleluwu hamakulusu hamu nindi.

33Ilaŋa chanashikuwu hadi Yesu, kumumona nafwi dehi, hiyamukotweli nyenduku;

34ilaŋa ishidika wumu hakumupwika iyoŋa kukabavu, henohu hikukwidika #1 Yow 5:6-8nimashi nimenji.

35Owu wamweni yumiyi nekali #21:24chinsahu, niwunsahu windi walala, yena neluki nindi nahoshi mwalala, kulonda ninenu nawa mukuhweleli.

36Yumiyi ayilili kulonda nyikanda yajila yilumbuluki, yeliluwu nawu,

# Kwi 12:46; Mas 34:20 Hiyakakotola hoku ifwaha dindi nidimuku.

37Nicheŋi mukanda wajila wukwawu nawu,

# Zek 12:10 Akatala hadi yena alokweluwu.

Kumujiika Yesu

(Mat 27:57-61; Mak 15:42-47; Luk 23:50-56)

38Kulondela hayumiyi Yosefu wakuAramateya, wadiŋi kambanji kaYesu, ilaŋa chakujinda nawoma wawaYudeya, hakumulomba Pilatu amwiteji kufumisha mujimba waYesu. Pilatu hakumwiteja. Dichi hakwinza, hakufumisha mujimba windi.

39Hikukwinza nawa #3:1niNikodemu, owu wenjili hatachi kudi Yesu nawufuku. Hakuleta yihemba yakubomba nimora nialowe, chesekelu chayu chashika mu 34 kg.

40Hiyakunona mujimba waYesu, hiyakuwujiŋajiŋa mumahina atooka hamu nanyitondu yamavumba amawahi, mwomuchaaku chajiikaŋawu nachu aYudeya.

41Oku kwamupopeleluwu hakulusu kwadiŋi itempa; omu mwitempa mwadiŋi ijamu dadiha dakupokola mwilola kanda akamikaŋamu dehi muntuku.

42Ochu chadiŋi ijamu kwakwihi, hiyakumukamikamu, muloŋa dadiŋi Ifuku daKuloŋesha dawaYudeya.

Currently Selected:

Yowanu 19: MWW04

Highlight

Copy