Yowanu 20
20
Kusaŋuka kwaYesu
(Mat 28:1-10; Mak 16:1-8; Luk 24:1-12)
1Hamulungu, dodifuku datachi, Mariya Mandaleni hakuya kwijamu habudidi kuchidi mwidima, hakumona ilola anadifumishi dehi kwijamu.
2Hakuya lufuchi kudi Shimona Petulu nikudi owu kambanji mukwawu akeŋeluwu kudi Yesu; hakuyila nindi, Anafumishi dehi Mwanta mwijamu, etu kwiluka kwanamukamikuwu nehi.
3Dichi Shimona Petulu hakwidika nayenowu kambanji mukwawu, hiyakuya kwijamu.
4Hiyakuyila hamu lufuchi; kambanji mukwawu hakumushiyamu Petulu, hakusambilaŋahu dehi kushika kwijamu.
5Hakubandama, hakutalamu, hakumona kwamahina atooka adi heseki awa, ilaŋa yena kwiŋilamu nehi.
6Shimona Petulu wadiŋi nakumulondela, ashika nikushika, eŋila nimwijamu. Hakumona nakushinshika kwamahina atooka adi heseki awa,
7niihina dadiŋi kumutu windi hididi hamu nanowu mahina atookaku, ilaŋa dakuvuŋa hakankawadu.
8Dichi owu kambanji mukwawu, wásambilili kushika kwijamu, hakwiŋilamu niyena, hakumona chalumbuluka, hakukuhwelela.
9Muloŋa henohu adiŋi kanda eluki mukanda wajila welili nawu chiŋa #Luk 24:46asaŋuka mudi afu.
10Atumbanji hiyakufunta cheŋi kwaawu.
Yesu hakumwekana kudi Mariya Mandaleni
11Hakwila Mariya chochemanayi hanzi yejamu nakudila. Chadiŋi nakudilayi hakubandama, hakutala mwijamu,
12hakumona #Mat 28:5; Mak 16:5; Luk 24:4aŋelu ayedi anavwali yitooka, anashakami wumu kunyitu mukwawu kunyendu, kwakamini mujimba waYesu.
13Hiyakumwihula nawu, Eyi mumbanda wudi nakudiladi? Hakuyila nindi, Muloŋa anatwali dehi Mwanta wami, ami kwiluka kwanamukamikuwu nehi.
14Chanahoshiyi ochu, hakutala munyima, hakumona Yesu nemani, kwiluka nindi diyi Yesu nehi.
15Yesu hakumwila nindi, Eyi mumbanda wudi nakudiladi? Wudi nakukeŋanyi? Yena hakutoŋojoka nindi kwiji hindimi yetempodu. Hakumwila nindi, Eyi mwanta, neyi yeyi wunamusendi, nleji kuwunamukamiki, nimufumishuku.
16Yesu hakumwila nindi, Mariya. Yena hakubalumuka, hakumwila muHeberu nindi, Raboni; daya mukwila nawu, Nkuluŋaŋa.
17Yesu hakumwila nindi, Bayi wunkakelaku, muloŋa nichidi kanda nikandami kudi Tata. Yaŋa kudi anakwami, wuyileji neyi hinukukandama kudi Tata yami ninenu Tata yenu, kudi Nzambi yami ninenu Nzambi yenu.
18Mariya Mandaleni hakwinza kudi atumbanji, hakuyileja nindi, Namumoni Mwanta. Hakuyileja nawa nimwanamulejiyi.
Yesu hakumwekana kudi atumbanji
19Hamulungu, dodifuku dodimu datachi, chikuneli melela, anapati dehi yenzelu yamwadiŋi atumbanji muloŋa atiyili aYudeya woma, Yesu hakwinza hakwimana mukachi; hakuyila nindi, Kuwunda kwikali nanenu.
20Chanahoshiyi ochu hakuyileja #19:34; Luk 24:39-40makasindi nikabavu kindi. Dichi atumbanji chanamumonuwu Mwanta, atiya nikuwaha.
21Yesu hakuyila cheŋi nindi, Kuwunda kwikali nanenu; chantemesheluwu kudi Tata, ninami nawa #17:18; Mat 28:19hinukuyitemeshenu.
22Chanahoshiyi ochu hakuyonena, hakuyila nindi, Tambulenu Spiritu Wajila.
23Antu mukwanakena nshidi jawu, anayanakeniju; antu mukulekela nshidi jawu, anayilekeliju.
Yesu hakumwekana kudi Tomasi
24Ilaŋa Tomasi wahekumi nayedi (12), átenaŋawu nawu Mpamba, chenjiliyi Yesu hadiŋi nawuku.
25Dichi akwawu atumbanji hiyakumwila nawu, Tunamumoni Mwanta. Ilaŋa yena hakuyila nindi, Chiŋa nimona yitu yambwambu mumakasindi, niiŋija nimunu wami muyitu yambwambu, nisha nichikasa chami mukabavu kindi; mukunkulwayi hinukukuhwelelaku.
26Chimunahiti mafuku atanu nasatu, atumbanji twindi adiŋi cheŋi mwitala, Tomasi wadiŋi hamu nawu niyena. Yesu hakwinza, kuyenzelu saŋa apatilaku; hakwimana mukachi, hakuyila nindi, Kuwunda kwikali nanenu.
27Hakumwila Tomasi nindi, Letaku munu weyi kunu, wushinshiki makasami; ololaku chikasa cheyi, wiŋiji mukabavu kami. Bayi wikala nantaduku, kuhwelelaku.
28Tomasi hakumwakula nindi, Mwanta wami! Nzambi yami!
29Yesu hakumwila nindi, Wunakuhweleli nanichi chiwunanmoni. Ánakuhweleli #1 Pet 1:8chakadi kumona anakooleki.
30Yesu welili yinjikijilu yikwawu yayivulu kumesu awatumbanji twindi, hiyanayisoneki mumukanda iwuku.
31Ilaŋa yeniyi anayisoneki kulonda mukuhweleli nenu Yesu diyi Kristu, Mwana kaNzambi, kulonda chimukukuhwelela mumoni wumi mwijina dindi.
Currently Selected:
Yowanu 20: MWW04
Highlight
Share
Copy
Want to have your highlights saved across all your devices? Sign up or sign in
The Holy Bible in Lunda Ndembu © United Bible Societies, 2003.
