Netume 14
14
Faraon yoṅ ba Israél
1Tshùaben tshob Mosé ndù: 2Tshob bon Israél ndù bo bate nze, nse' nte mbàn yub mbwe Piahirot, netèt Megiddo bo dibantse, mbwe Baal-Séfon. Bin nsi te mbàn zin mbwe yen dù' là, mbaṅ dibantse. 3Faraon nsi tshob ndù: Ba Israél bi ntùm ngô, kônkwa tshèt yube. 4Me Tshùaben nsi so sagntù ntù Faraon, a lo njab njam bin. Nda' ndù me nsi lo' ka'te tshùa Faraon yi bo ntshu ntsho i. A nsi tshùa ndùlala ba Egipto lèn ndù me b'a Tshùaben, bon Israél ju' ntshu àm.
5Ngelaṅ bo se' ntshob mfen Egipto ndù ba Israél kù là, ntù Faraon bo ze ben tse kam num ba Israél. Bo tshob bo bo ndù: Ke z'a tsho tu be be faṅ Israél nèn, ndù be bi fa' se bo ke mfa' be à? 6Ndùlala Faraon tshob bo nabte kalig se, a lo' tse ntshu ntsho ntam nze. 7A lo' nkalig nkù ntôg mi a tsho'te là boa njoṅ nkalig fa mi a be Egipto boa ba soyé mba tse benntùn. 8Tshùaben kag sagntù ntù Faraon mfen Egipto, a yab njam bon Israél, tshen bon Israél là tse bo be tum ntshag bu yub tù là. 9Ba Egipto yab njam bo, nkote yub ndùse bo ke nte mbàn mbaṅ dibantse là, boa njoṅ tshu ntsho Faraon, tse ghako' nyàm, boa tse ntshu ntsho fa; bo kote yub mbaṅ Piahirot mbwe Baal-Séfon.
10Ndùse Faraon ke ngebte là, ba Israél lôte nesà, njen ba Egipto tse bo yab njam bo là, bwôg ghom yube, bo tsiaṅ lén Tshùaben kua' neta. 11Bo tshob Mosé ndù: A na' nsag à mfi Egipto ké k'o ndo' yag nse' yi kônkwa ndù bag kwùte nsen ni à? Ke z'o ghù bag ndù à? O na' nsô yag Egipto numke? 12Bag lo ke tshob wù ndù o faṅ yag ndùlala ké? Bag lo ke tshob wù ndù o faṅ yag bag mfa' ba Egipto ké? Mebwô na' mbe bag à nebe kuan ba Egipto ntshùa nese' kwùte num kônkwa nsen ni. 13Mosé bùnte ngô ndù: Kà bin bwôg. Bin tswe ndù kam. Bin nsi yen mba Tshùaben nsi tshu' zin nà sènni. Tshen ba Egipto li tse bin tshwèt njen yub sènni là, bin ke nsi zi bèn yen yube. 14Tshùaben bèn ma' ntsho num zin tu, tu wut tsin bin tswe fite.
Nsi keb ntse nkam mbàa
15Tshùaben tshob Mosé ndù: O ke nkua' ntsiaṅ àm à numke? Tshob bon Israél ndù bo lo ntam manze. 16Tu wul o, lo' kôg su nyit bu num dibantse, mbèl i bag bag. A bwô ndù bon Israél dut netèt bwe à num tsha' njum, ndul à nku. 17Tu wul àm, m'a' kag sagntù ntù ba Egipto, ngù bo tsho njam bo, tu wul àm so nkuni num àm num Faraon boa njoṅ tse ntshu ntsho fa, mi nkalig boa tse ghako' nyàm. 18A nsi tshùa ndùlala ba Egipto lèn ndù me bèn mbe Tshùaben, ndùse me nsi so nkuni num àm num Faraon, nkalig mi boa tse ghako' nyàm nà.
19Angél Nsi z'a ke nzin mbwe ntshu ntsho ba Israél là diaṅ ntsin njam bo, mbwoṅ ndot z'a ke nzin mbwe bo diaṅ ntsin njam bo, 20netèt ze mbàn ba Egipto bo ze mbàn ba Israél. Ndot lo be, mba njam bèn mbe; ndùlala ndot nke nké' tèttswe'. Bo ke ku'ni mb'a be mèn kù' nèn mbaṅ mo', ndùlala num yen tèttswe' là fa.
21Mosé nyit bu i num dibantse. Tshùaben lo' mo' neta fetmbaṅ z'a fe ntumnyam nà nta' dibantse yi tèttswe', ngù tèt dibantse jum. Ntse bèt bag bag. 22Bon #1 Korin. 10.1-2; Héb. 11.29Israél tsho ntùm tèt dibantse, ndul à nku, ndù ntse ko' ntsin bag bag mba nkumba' là, bu zwim bo bu kwéb. 23Ba Egipto yab njam bo, ntsho ntùm dibantse njam bo boa njoṅ tse nyàmdiaṅ Faraon fa, mi nkalig boa tse ghako' nyàm, nzin tà nkum netèt dibantse. 24A be nguan nkebnjù, Tshùaben tsin ntùm mbwoṅ mbwôg ndot nkag va' ntùm ze mbàn ba Egipto. 25A kag nyu' num nku ghatshagte nkalig mube, kà bo nke mbe zin njen ngùtni. Ndùlala ba Egipto tshob ndù: Be kù nèn nesà mbaṅ Israél, nummbe Tshùaben bèn nke ma' Egipto ntsho num yub tu.
26Tshùaben tshob mosé ndù: Nyit bu o num dibantse. A bwô ndù ntse tamte num ba Egipto, num nkalig mub boa ghako' nyàm tshobe. 27Mosé nyit bu num dibantse ndùse njù ke ndàn nà, ntse bèn mbèn dù' i. Ba Egipto tse bo ke nkù là bumte boa ntse, Tshùaben naṅ yub ntùm dibantse. 28Ntse bèn mbèn dù' i, nkabte nkalig boa ghako' nyàm ntshu ntsho Faraon fa tse bo yab njam Israél, ntsho ntùm dibantse là. Sàm mèn netèt bo ke tum. 29Mbe se' mba bon Israél là, bo lo ke nzin à nku num tsha' njum tèt dibantse, ndù ntse kut nkumba' mbaṅ bo bag bag, bu zwim bo bu kwéb.
30Tshùaben tshu' ba Israél bu ba Egipto sen lé'njù là. Israél yen fe ba Egipto tse bo kwùte là nkaṅ dibantse. 31Israél be yen lèn neta mba' ze Tshùaben lo yi nsi num Egipto là, ngô bwôg Tshùaben. Bo bam Tshùaben, mbam mba ngafa' i Mosé.
Currently Selected:
Netume 14: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
