Netume 13

Ntshob num mbwe bon Israél

1Tshùaben tshob Mosé ndù: 2Yab #Nes. 3.13; Luk. 2.23mba zit tuswe mén, z'a tum bam mènnzwi là me netèt bon Israél, ndùlala netèt benntùn mba netèt ba nyàm. Yen nà nsi b'a yàm ju.

3Mosé tshob ngô ndù: A bwô neke nkwimte sen lé'njù li se bin tum Egipto, ndà kuan nà. Nummbe Tshùaben lo' à bu i ze neta nsô zin yi bwe. A ke' bwô bin jù bàn ze bo te ywibte se là. 4Bin tum Egipto à sènni, ntùm maṅwù nefag tshu. 5A ndùlala, ndùse Tshùaben nsi tshag o ntùm ngô ba Kanaan, ba Hétia, ba Amor, ba Hévia bo ba Yébusia, ts'a na' nsaṅlaṅ bwe tà tsho ndù a nsi fà wù là, o nsi ke ze yen nu li be num maṅwù mbile. Mbùn nyàm bo ṅwa' be nké nswe' ntùm yen ngô là. 6O nsi ke jù bàn ke te ywibte se num lé'njù sammbàa, a be num mbatte lé'njù sammbàa a be jùa nelo' ngamte Tshùaben yi.

7Bo nsi jù bàn ke te ywibte se num lé'njù sammbàa. Kà bo tèt bàn bo te ywibte se là ke ntsha' lo ntùm ndà o, ke ntùm yu ngô fa lo.

8O nsi tote yen nu là nshum o, tshob ndù: Yen ni b'a nelo' nkwimte ju ze Tshùaben na' ngù me, ndùs'a sô àm Egipto là.

9A nsi be wù à mba keki là bu o, be ju nekwimte num miag mu, ndùlala ndù o ghù kàn Tshùaben ntshu o. Nummb'a na' ndo' à bu i ze neta nsô o yi Egipto.

10O nsi ke ze yen nu là mba zit ngu'njù lo, kua' num ngelaṅ i.

11Ndùse Tshùaben nsi tshag o ntùm ngô Kanaan, mb'a na' nsaṅlaṅ wù num bwe mba tà tsho, fà kua' yen ngô là wù là, 12mb'a #Netu. 34.19-20; Luk. 2.23bwô ndù o ke njab mba zit tuswe mén no Tshùaben; mba mbwe bon nyàm tsho, tse bandum, b'a ze ju Tshùaben. 13Mba tà ndùlala o nsi ke lo' mén njùmbwe tshu' mbwe mén kekwèn yi; ntag ndùlala mb'a bwô ndù o dù' kekol i. O nsi ke tshu' mba tuswe tsho nshum.

14A be ze nshum o be mo' lé'njù mbètte tote yen nu li là, mb'o nsi bùnte yi ndù: Tshùaben lo tshùa njam bu i ze neta nsô yag Egipto, ndà kuan. 15Ndùlala mba Faraon ke ntshètte yag ndù kà bag tum nà, Tshùaben zwite njoṅ tuswe bon fa Egipto, neto' num mènntùn nèn nkum num nyàm. A ndùlala ze me be njab mba zit mén mandum no Tshùaben, mén mandum z'a bwôg tum bam mènnzwi là, là mbe se' mba tuswe bon tshàm nshum nà, me nsi tshu' yube.

16Tshùaben na' ntshùa njam bu i ze neta kà nsô yag Egipto. A nsi be wù a mba keki là bu o, be ju nekwimte num miag mu.

Nsi tshagte zin ben tse

17A be ndùse Faraon faṅ Israél ndù bo tum nà, Nsi ke lo' i ntshùa yi nze z'a be ntshùa ngô Filistia là, mba mb'a na' mbe nze ndaṅndaṅ nà. Nsi lo tshob tu wul i ndù: A be ze bo kum mo' dù' nke nde' ntsho là, mba nu nsi bag yub mba bo tum Egipto là, bo bèn mbèn bwe. 18Ndùlala Nsi ghù Israél lam ntshùa kônkwa, nze bag dibantse meba. Ba Israél tse bo tum Egipto lo tsin nka.

19Mosé #Net. 50.25; Yosh. 24.32lo' mvôg Yosèf ntum yi Egipto, nummbe Yosèf lo ghù bon Israél kàn mfe ntshob ndù: Ngelaṅ ze Nsi nsi se' lôte yag là, mba bag nsi lo' mvôg mu tum yi nsen ni.

20Bo lo Sukkot nèn nte mbàn Etam, tôg kônkwa. 21Tu wut Tshùaben lo ke nzin mbwe bo; mbwoṅ ndot be mbwôgtshù, nke nda'te manze bo, mbwoṅ mbwôg be tèttswe' nke nké' mbwe bo. Ndùlala ba Israél ghù nezin mbwôgtshù mba tèttswe'. 22A lo ke mbe mbwôgtshù mbwoṅ ndot ke lo mbwe ba Israél, a be tèttswe' mbwoṅ mbwôg be bwe.

Currently Selected:

Netume 13: BMa

Highlight

Copy