Netume 15

Kwi Mosé boa ba Israél

1Ndùlala #Apok. 15.3Mosé boa bon Israél yob

sen kwi li Tshùaben ntshob ndù:

Me nsi yob kwi fà Tshùaben,

nummb'a ghù nkuni mi tswite wul i.

A tèn nyàmdiaṅ boa ghako' nyàm

naṅ ntùm dibantse.

2Tshùaben #Yobk. 118.14; Es. 12.2bèn mbe yàm neta,

me ke njob kwi fà à yi.

A yi bèn ntshu' àm.

A b'a Nsi àm, me nsi nyàmt'é.

Me nsi ghamte ze Nsi tàa.

3Tshùaben b'a sa'nde' num ntsho.

Lén se b'a Tshùaben.

4A lo tèn nkalig Faraon

bo ntshu ntsho naṅ dibantse.

Tse ghama' ntsho tse neta

vù ntùm dibantse meba.

5Ghem lo kabte yube,

bo swe' nèn tun ntse mba loṅ nà.

6Tshùaben àm, bu o ze zwim lo la'te ze neta,

bu o ze zwim lo be'te ngakeban

7O be ntshùa njam nkuni fen so,

ntèn ghamaṅt'o ma' nsi,

yantù o lo nsi num bo,

yantù o kù yub mba mbwôg be nkù mbèn nà.

8Ywèt ntshu tsho

lo ghù ntse bù' ntete,

fetntse tsin tù mba nkumba' là,

koṅntse jumte netèt dibantse.

9Ngakeban lo ke ntshob ndù:

M'a' yab njam bo, m'a' kote yube,

m'a' ghabte ntsha' ntsho.

M'a' ghù tshu yàme,

m'a' tsho' ṅwi,

bu àm nsi sate njoṅ i fa.

10Là ywèt ntshu tsho tshwèt

ma' yub ntùm dibantse,

bo nèn tun ntse mba tu' tùn nà,

netèt mà dibantse ndùb.

11Tshùaben,

we z'a be mba wù, netèt ba nsi à?

We z'a be mba wù,

mbe mèn nelàn à?

O be nkuni nenyàmt'o,

O bèn nke ngù nsà.

12O lo nyit bu o ze zwim,

tsha' kabte yube.

13O lo lo' à kondèn

ntshagte yen nzwit mèn o li

z'o na' ntshu' i là.

O lo tshùa njam neta o

ntshagt'é tà nkum dù'ntswe ze nelàne.

14Ngôngô lo be ju' yen tshô là mvètte.

Bwôg lo ghom ben

tse bo be Palèstina là;

15fenfen Edom

lo vètte,

nge' mem sa'nde'

tse bo be Moab là;

ntàma' lo ghom njoṅ ba Kanaan fa.

16Bwôg bo nge'

lo kab mbu num bo.

Neta bu o lo ghom yub bwôg,

tà nkum ndùse yu nzwit mèn tshùa là me Tshùaben,

tà nkum ndùse nzwit z'o na' ntshu' yub tshùa là.

17O lo ghù bo tsho,

o te yub num mbat z'a be ntsi' mu là.

Tshùaben, o lo nabte

yen dù' là num netswe bwe.

Tshùaben, a b'a dù'ntswe nelàn

ze mbu mu na' nabte là.

18Tshùaben b'a mfen njoṅ ndù fa!

19Nyàmdiaṅ Faraon lo tsho ntùm dibantse boa nkalig mi mba tse ghako' nyàm, Tshùaben ghù ntse tamte num bo. Là bon Israél dut dibantse a nku, num tsha' njum.

20Ndùlala, ngatshob ntshob Nsi Miriam, ngon mà Aron lo' lammbé ntshùb bu i, njoṅ bènnzwi fa tam njam i, nke nyiaṅe, nke mbu' lammbé.

21Miriam yob kwi boa bo.

Be yob kwi mfà Tshùaben,

nummb'a la'te nkuni mi,

tèn nyàmdiaṅ boa ghako' nyàm

naṅ dibantse.

ZIN BON ISRAEL NUM KÔNKWA

Ntse mi a be Mara là

22Mosé ghù ba Israél lo kaṅ dibantse meba nèn nze kônkwa Shur. Bo zin num kônkwa lé'njù tat ke fon ntse. 23Bo zin nkum Mara, là ke ku'ni ne nu ntse Mara, nummb'a lo ke nzwe. Yen nà b'a ndù Mara b'a nezwe. 24Ngô tshobte ntun ntô num Mosé ntshob ndù: Bag nsi nu à ke? 25Mosé bu' mbu Tshùaben, Tshùaben la'te mo' tù yi. A keb ma' ntùm ntse, ntse dùmte nenu. A bwe là ze Tshùaben fà ntshù' bo mba nkàn nà. A bwe là z'a na' ndaṅte yub là. 26Tshùaben tshob yi ndù: A be z'o ju' nze Tshùaben Nsi o, nzin num miag mi ndaṅndaṅ nà, a be z'o kù' ntoṅ num ntag mi, a be z'o ze njoṅ ntshù' mi fa là, mba me ke nsi tam o sàm ngokèt netèt tse me na' ntam Egipto yi là, nummb'a b'a me Tshùaben bèn nke njat'o.

27Bo zin nkum Elim: Ntôntse be bwe ntshob bàa gham boa nten ṅam sammbàa. Bo te mbàn yub bwe, mbaṅ ntse.

Currently Selected:

Netume 15: BMa

Highlight

Copy