Netume 12
12
Njùa Pasa
1Tshùaben #Lev. 23.5; Nes. 9.1-5; 28.16; Neb. 16.1-2tshob Mosé bo Aron ntùm ngô Egipto ndù: 2Yen maṅwù li nsi b'a mbwe maṅwù netèt tsemo' maṅwù fa. Bin nsi ke lo' à yi ghù mbwe maṅwù yi ntùm ngu'njù. 3Bin tshob njoṅ nzwit Israél fa ndù: A mbe lé'njù gham ntùm yen maṅwù li, bo lo' ta' mén mbwe ntùm mba zit tunndà lo, ndo' ta' mén mbwe mba ntùm zit ndà lo. 4A be ze tunndà kag num ta' mén mbwe là, mb'a bwô netamte bin mèn mbaṅ ndà, num njoṅ benntùn tse bo nsi là. Bin nsi lo' mén mbwe njoṅ ze be mba we lo fèt là. 5Bin lo' mén mbwe z'a ke' ghù lo' là, fot mbwe z'a ghù tamngu' là. Bin nsi lo' yen mén mbwe l'a netèt njùmbwe ke netèt mbwe ntùn no. 6Bin nsi lé' yen mén mbwe là tà kum lé'njù ntshob kuà gham ntùm yen maṅwù li.
Njoṅ mbumte bon Israél wat yen mén mbwe là ndùse njù à ke ntamte là. 7Bo nsi lo' lem tse, lo' se' mbatndà yi bo tu nzendà mba' mi bo nsi fèt mén mbwe bwe là yi.
8Bo nsi fèt mbàb yen tèttswe' là. Bo nsi ton à netone, bo bàn ke te ywibte se, boa nenà ts'a zwe là. 9Kà bin jù sàm ju mbag, ke ze bo lo' ntse na yi là lo, là nda' ze bo ton a netone, nton bo tu i, boa tshu bam tse là. 10Kà bin faṅ sàm ju kum nkebnjù; a be ze ju kum nkebnjù là, bin ton. 11Bin fèt ntaṅ kob tun bin, nso nsilibat nku bin, ntshùb kôg bu bin. Bin be fèt nke nànte. A b'a Pasa Tshùaben.
Njùa bàn keko'
12Me nsi ya' ntùm ngô Egipto yen tèttswe' là. Me nsi lab njoṅ tuswe bon fa ntùm ngô Egipto, neto' num mènntùn nèn nkum num nyàm. Me nsi tsho'te tse nsi ngô Egipto. A b'a me Tshùaben. 13Lem nsi be keki num bin, num mba' mi bin be bwe là. Me nsi yen lem, ya' zin tôge. Bu àm ze me nsi sate Egipto yi là ke nsi kwag zine. 14Bin #Netu. 23.15; 34.18; Lev. 23.6-8; Nes. 28.17-25; Neb. 16.3-8nsi ke kwimte sen lé'njù là. Bin nsi ke jù jùa là ghamte Tshùaben yi. Bin ke ngù ndùlala ngu'ngu'. A be kàn s'a ghô matmat là. Bin ke ngù sen jùa là.
15Bin nsi jù bàn ke te ywibte se num lé'njù sammbàa. Bin sô ntsha' bàn ntùm ndà tsin fe num mbwe lé'njù. Mba we lo z'a nsi jù bàn bo te ywibte se netèt tshen lé'njù sammbàa là là, mba bo nsi sô ng'é netèt ba Israél.
16Bin nsi ghù mbumte nelàn num mbwe lé'njù bo miagt'é. Bin ke nsi fa' sàm ju num tshen lé'njù sammbàa là, kà ntag nda' nenabte ju ze mba we lo jù là.
17Bin nsi ke ze jùa bàn ke te ywibte se, nummb'a kua' sen lé'njù là se me na' nsô tsin ntshu ntsho ntùm ngô Egipto là. Bin ke nze sen lé'njù li ngu'ngu'. A kàn s'a ghô matmat là.
18A nsi be num mbwe maṅwù, neto' lé'njù ntshob kuà gham nèn nkum mfetnjù lé'njù ntshob ntshù' ṅam mbàa, bin ke njù bàn ze bo ke' te ywibte se là.
19Bo ke nsi tèt ntsha' bàn ntùm ndà tsin num lé'njù sammbàa. Mba we lo z'a nsi jù bàn bo te ywibte se là là, mba bo nsi sô i netèt mbumte ba Israél, ke bo bwe i à njù ke ntùm ngô lo.
20Kà bin jù sàm ju ze bo ma' ntsha' bwe là, ke bin nke ntswe be yà lo, mb'a ke' bwô ndù bin jù bàn ze bo te ywibte se là.
Nena jujù Pasa
21Mosé tsiaṅ njoṅ ghakwé mbwe ba Israél fa ntshob bo ndù: Bin nèn ndo' mén mbwe num tunndà zine, nzwi i, njù Pasa. 22Bin nsi lo' tswe' nzenyi tshù' ntùm kab lem se' num tu nzendà boa mbatndà. Kà sàm mèn netèt bin dut ze nkù'ndà tà nkum nkebnjù. 23Tshùaben #Héb. 11.28nsi ya' ntùm ngô Egipto num nelab i. A nsi yen lem num tu nzendà boa mbatndà tsine. A nsi tshùa ndùlala Tshùaben tôg nzendà tsin ntshùa, ke faṅ ngasate tsho ntùm ndà tsin ndab zine. 24Bin nsi ke ze yen nà. A b'a ta' ntshù' wù mba bon tsho num ngu'ngu'.
25Ndùse bin nsi tsho ntùm ngô ze Tshùaben nsi fà bin mb'a na' ntshob là, bin nke nze yen nu là. 26Ndùse bon tsin nsi bètte tun yen nu là là, 27Bin nsi tshob bo ndù: A b'a jule'te num Pasa Tshùaben nummb'a lo tôg mba' bon Israél ntshùa, ndùs'a ke ndab ngô Egipto là, nkabte mag mba'. Ndùlala ngô vù nsi mbu' mbu mbwe Tshùaben. 28Bon Israél lo mbèn njam ngù ndaṅndaṅ mba Tshùaben na' ntshob Mosé bo Aron nà. Bo ghù ndùlala.
Nge' mbatte gham: Vù mbwe bon Egipto
29A #Netu. 4.22-23be tshaṅ tèttswe' Tshùaben zwite njoṅ tuswe bon fa Egipto, neto' num tuswe Faraon z'a nsi tswe diaṅkwa se là, nèn nkum num tuswe ngandàtsha, boa njoṅ mbwe bon nyàm fa. 30Faraon lo nsi tèttswe' mba ghafa' tse boa njoṅ ba Egipto fa. Mo' tshu'te ndùb be Egipto, nummbe sàm ndà mba ntshù' lo ke be ze fe mén ke' be bwe là. 31Be kua' tèttswe' mbit Faraon tsiaṅ Mosé bo Aron ntshob bo ndù: Bin nène, bin tum ntùm ngô àm bin à ba Israél. Bin nèn ngamte Tshùaben mba bin na' ntshob là. 32Bin lo' mbwe tsin boa nyàmna' tsin mba bin na' mbètte là nène. Bin lé't'àm nène. 33Ba Egipto nànte ba Israél, mfaṅ yub bo tum ntùm ngô nène, nummbe bo lo ke ntshob ndù: Be nsi kwùte njoṅ be fa. 34Ngô lo nsi nène, nket ze tag ndù a tébte, a ke yoṅ nko'o, ntume; bo kut tshu netébte tag yi ntùm nkummbaṅ, njab nkembe' bo. 35Bon #Netu. 3.21-22Israél ghù mba Mosé tshob bo là, ndon tshu nkàb, tshu gol boa nkummbaṅ ba Egipto. 36Tshùaben ghù bon Israél ghù fen mbwe ba Egipto, ba Egipto fà tshu tse bo lon nà bo. Ndùlala bo sô tshu bu ba Egipto fa.
37Ba Israél lo Ramsès nèn Sukkot; bo na' mb'a benntùn nguan 600 000, ke siaṅ bènnzwi boa bônke'. 38Mo' mà bwoṅ benntùn nèn tshag yube boa bo, mba bwoṅ nyàm yàme, njùmbwe boa nyàmna'.
39Bo na tag ze bo tum yi Egipto là; a fà makela' ze ntsha' be bwe là bo, nummb'a lo ke ko', nummbe bo lo ta' yub Egipto kà ngelaṅ nenabte jujù manze ke be bo.
40Ba #Net. 15.13; Gal. 3.17Israél lo tswe Egipto ngu'njù 430. 41Tshen ngu'njù 430 là lo be tôg njoṅ ntshu ntsho Tshùaben fa tum Egipto. 42Yen nà na' mb'a tèttswe' Tshùaben zi tshùalo, nsô yub Egipto là. Yen tèttswe' là b'a ze tshùalo z'a bwô ndù ba Israél ke nkwimte ngu'ngu', ndo' nke ngamte Tshùaben yi ngu'ngu' là.
43Tshùaben tshob Mosé bo Aron ndù: Tshù mb'a bwô Pasa ke ntôg li: Kà sàm ngùn jù Pasa. 44Njoṅ kuan fa tse bin jun yub mbùm, nsi ket sub là ghù nejù Pasa. 45L'a ke' bwô ndù ngùn ke ngafa' lo jù Pasa. 46Bo #Nes. 9.12; Yoha. 19.36nsi fèt njùmbwe à ntùm ndà ntshù'; o ke nsi lo' kam i tum yi yen ndà là, ke bèn mbe' lèn vôg se mba ntshù'. 47A bwô ndù njoṅ mbumte ba Israél fa nèn njù Pasa. 48A be ze ngùn z'a ndà o kô nejù Pasa neghamte Tshùaben yi là, mb'a bwô ndù a si ket mba zit nshum i lo, kà nku'ni neghù ndùlala, bo lo' i mba ménla' là. Kà sàm kesiket mba ntshù' jù Pasa. 49Mat neghù nsi b'a ntshù' num ménla' bo ngùn z'a be netèt bin nà.
50Njoṅ bon Israél fa bam ju ze Tshùaben na' ntshob Mosé bo Aron nà. Bo ju' ntshu yube. 51Tshùaben sô bon Israél Egipto be kua' sen lé'njù là, njab yub nka mba ntshu ntsho là.
Currently Selected:
Netume 12: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
