Netume 11

Mba nge' mbatte gham nsi se' là

1Tshùaben tshob Mosé ndù: M'a' lo' miagte nge' nse' yi num Faraon mba mum ngô Egipto. Yen nà nsi be tôg a faṅ zin bin tum nsen ni, a nsi be faṅ zin bin nèn yoṅ ntshù' ta' zin à neta'a. 2Ndùlala tshob ngô, mba we lo lon tshu nkàb boa tshu gol ze mèn ndùla'. 3Tshùaben ghù ngô ghù fen mbwe ba Egipto. Mba kua' Mosé na' mb'a mèn ndùb ntùm ngô Egipto, num miag ghafa' Faraon bo mi ngô.

4Mosé tshob Faraon ndù: Tshù mba Tshùaben tshob li: A nsi be nguan tshaṅ tèttswe' me tum ntùm ngô Egipto. 5Njoṅ tuswe bon fa ntùm ngô Egipto nsi kwùte, neto' num tuswe Faraon, z'a nsi tswe num diaṅkwa se là tà nèn nkum num tuswe ngafa' ze mènnzwi z'a be loṅ bàn nà boa njoṅ mbwe bon nyàm fa. 6Nekua' nsi be ntùm njoṅ ngô Egipto fa, lèn nekua' ze mèn ke' yoṅ nto' ju', mbe ndù lèn i zi ke bèn mbe là. 7Là la' nsi b'a tshaṅ ze bag bon Israél; mba nda' mbù ke nsi bàb mènntùn ke nyàm no, ndùlala bin lèn ndù Tshùaben num ngù tôte netèt ba Egipto boa ba Israél. 8Tshù, njoṅ ghafa' tsho li fa nsi swe' se' mbaṅ àm. Vù nsi mbwe àm tshob ndù: Tum bin à njoṅ benntùn bo be njam o là. Yen nà nsi be tôg me tume. Mosé ya ntù, ntum ndà Faraon.

9Tshùaben tshob Mosé ndù: Faraon ke tshwèt nkô neju' ntshu zine, k'a bwô ndù me ke ngù nsà nèn yi à be mbwe ntùm ngô Egipto. 10Mosé bo Aron lo ghù tshen nsà là mbwe Faraon, là Tshùaben kag sagntù ntù Faraon, a ke faṅ bon Israél tum ntùm ze ngô nène.

Currently Selected:

Netume 11: BMa

Highlight

Copy