Mk 14

Ba bu émo'o ya bi Yésus

(Mt 26:1-5; Lk 22:1-2; Yo 11:47, 49-53)

1Eyoñe te Pak baa abô'ô fembé é ne teke mvusan bi li'iya melu mebaé, ane Betuni a Beyeme-Bekalate be nga ke ba jeñ aval ane be ne bi Yésus a mefek a wôé nye. 2E nde be mbe be jô'ô na: Sake e *môs abôk, bôte be nlam be za bo éngôngôm.

Ba wo'o Yésus mbon e Bétani

(Mt 26:6-13; Yo 12:1-8; Lk 7:36-38)

3Valé Yésus a to e Bétani, e *nda be Simon nzezam, a to e si a ja'ak, e nde minga a nga ke soo nde'e albata, njalan a étua abeñ mbon ôlobinda, nkôman a élo'o naléda, ô to dia abui. Ane a nga bôé nde'e albata, a nga sôé Yésus mbon e nlô. 4Bôte bevo'o b'éziñ be nga wô'ô ôlun a jô na: Abim éndaman ôlobinda di da boban amu jé' 5Amu na ba to ve kuan ôlobinda nyuna tañ mintete mi moné mila, be nga kab nye bingôngole bi bôt! Be nga wô'ô ñhe minga te ôlun. 6Ve Yésus a nga jô na: Jôka'ane nye! Mia tya'a nye *nlem amu jé? A te bo mbamba jam asu dam. 7Amu na mia minzôzoé mi bôt mi too kom ése, a éyoñ ése mia kômbô, mi ne toñe mie; ve mfa'a wom, mi nji tabe a ma kom ése. 8A boya jam a te yiane bo. A maneya sôé ma ôlobinda e nyôl asu ngômesan éjamembime jam, te yene jame te e za bo'ok. 9Ma bele fo'o ane ma jô mia na, e vôm ase ba ye kañete Mbamba Foé e si ése nyuna, e jam minga nyô a te bo di, ba ye fe kañete de, be simesa'ane nye.

Yudas a koñe Yésus

(Mt 26:14-16; Lk 22:3-6)

10Ane Yudas Iskariôt, wua ya beyé'é awôm a bebaé, a nga ke yene Betuni Benen na a kuane nye e be be. 11Eyoñ be nga wô'ô nalé, be nga va'a fo'o, a ka'a nye na ba ye ve nye moné. Yudas a nga jeñe ñhe ve mbamba éyoñ a ne kee be nye.

Ngômesan ndiane Pak

(Mt 26:17-19; Lk 22:7-13)

12E *môs ôsu ya abô'ô fembé é ne teke mvusan, éyoñe ba tyi'i biyeme bi Pak, e nde beyé'é be Yésus ba sili nye na: Za vômô wo kômbô na bi ke kômesane ndiane Pak' 13Ane a nga lôme beyé'é bé bebaé a jô'ô be na: Kelane e tison, mia ye tôbane môt a be'e kobe mendim. Tôñane nye. 14E vôm a ye ke nyiin, mi kate miendaa na: Ñye'ele a lôme wo mbañete na: E *nda ma zu di Pak bia beyé'é bam é ne vé' 15Môt ate a ye liti mia beta étune *nda mfa'a ya yôp, é bili mam mese nkôman. Vôm ate e nye mi bo bia ngômesan. 16Ane beyé'é be nga téé dulu, ve ke kui e tison, be yene fe v'aval ane a nga mane kate be, be mane ñhe kômesane Pak.

Wua ya be mia a ye koñe ma

(Mt 26:20-25; Lk 22:1-5; Yo 13:21-31)

17Eyoñe ngô'é é nga bo, ane Yésus a nga ke, baa beyé'é awôm a bebaé. 18Valé be nto e si be ja'ak, e nde Yésus a zu jô na: Bebela fo'o, ma kate mia na: Môte wua ya be mia a ye koñe ma, e nyô a di fufulu a ma. 19Be tate ñhe na ba wô'ô ôlun, be nga ke fe ba sili nye wua wua na: Za, ye ma' 20Ane a nga jô be na: Wua ya beyé'é awôm a bebaé, e nyô a ye futi wo éso bia nye éyoñe jia. 21Mfa'a Mone Môt, nye a ke aval e ne ntilan ajô dé, ve ngo'é môte ate, e nyô a kuane Mone Môt. E nga ye bo mvaé mfa'a wé, nge môte ate a nga ye bo te bialé.

Nyoñan, mi di a nyu

(Mt 26:26-29; Lk 22:15-20; 1 Ko 11:23-26)

22Be ngenan be ja'a nalé, e nde a nga nyoñe fembé a botane je, a nga bek a ve be je, a jô'ô na: Nyoñan, nyôle jam nyô. 23Ane fe a nga nyoñe *élaé a mane ve akéva a ve be, ane be nga nyu je bese. 24E nde a nga jô be na: Metyi mame ya élat e me ma, metyi ma sôé e si asu jama bôt. 25Ma bele fo'o ane ma jô mia na, teke fe na ma ye beta nyu ébuma ya ndi'i woon ji, akekui e môse ma ye nyu je mfefé nyuan Ejôé Zambe été. 26Eyoñ be nga mane yia jia, ane be nga kôlô valé a ke e nkôle beôlivié.

Yésus a liti na Pierre a ye kate nye

(Mt 26:36-45; Lk 22:39-46)

27Ane Yésus a nga jô be na:

Mia bese, mia ye kolé ôbak,

amu e ne ntilane na:

Ma ye bibi mba'ale mintômba,

a mintômba mia ye mane tyamelan,

a bo ne miala-mialan.

28Ve da éyoñ me wômôya, ma ye taté ke mia ôsu e Galilé. 29Ane Pierre a nga jô na: Ja'a na ôba'a té wo mane kolé bôte bese, ve mfa'a wom, teke fo'o. 30E nde Yésus a nga jô nye na: Ma bele fo'o ane ma jô wo na, e wo nyô, alu ebien ya den di, nnôm kub a ngenane teke loñ biyoñ bibaé, wo ye kate ma biyoñ bilaa. 31Ane Pierre a nga beta dañe kobô na: Ja'a na bia wo bia ke wu awu da, teke fo'o na ma ye kate wo! Beyé'é bevo'o bese be nga jô fe v'avale da.

Yésus a ye'elan e Getsémané

(Mt 26:47-56; Lk 22:47-53; Yo 18:2-11)

32E nde ba zu ke afôla e ne jôé na Getsémané. Nyee beyé'é bé na: Lika'ane mi too vana, nté ma ke ye'elan. 33Ane a nga nyoñ Pierre, Yakob a Yôanes a kelee be. E nde metyi me nga ke nye fé, woñ ô mbili nye. 34Ane a nga jô be na: Olun ô bili ma, awu bebé. Lika'ane vana, mi mombô'ô. 35Ane a nga subu ôsu mone nté, a su'ulane si, a ye'ela'ane na, nge nalé a ne boban, awolo te e lôte nye ôyap. 36E nde a nga jô na: Abba, a Tat, ô ne ngule ya bo mam mese, bo'o na e kob nyuna é sa'ale ma ôyap. Ve da sake ane ma kômbô, ve ane womiene wo kômbô. 37Ane a nga zu, a koone be ôyo. E nde a jô Pierre na: A Simon, wo bele ke ôyo? Ye ô nji bi abime ngule ya bo évé ja'ane ve awolo dada' 38Momba'an, mi ye'elan, mi za ku *meve'ele été. Nsisim ô ne ôsesa; ve minsôn mi ne atek. 39Ane a nga beta ke ye'elan a kobô'ô ve avale nkobô dada. 40E nde a nga so, a zu koone be be to ôyo, amu mis me mbe be étua adit, be teke yem e jôm be yalane nye. 41Ane a nga zu éyoñe lale a jô be na: Eyoñe ji e nje kelane ôyo, mi wo'on! Abime te da yian. Awolo e kpwaaneya, ba zu ve Mone Môt e mo bebo *abé. 42Kôla'ane si, bi ke, mi lôô e môt a zu koñe ma a ntoo bebé.

Ba bi Yésus

(Mt 26:47-56; Lk 22:47-53; Yo 18:2-11)

43A ngenan a kobô'ô nalé, a teme na, Yudas, wua ya beyé'é awôm a bebaé, a vamé a nsamba bôt, be bili minkpwaté mekôn a mimbeñ. Betuni Benen, Beyeme-Bekalate, a Bemvendé e mbe be nga lôme be. 44Môt a nga koñe nye a nga mane ve be e ndeme nyuna na: E môte ma ye wubane nye a latane nye anyu, e nye ate le! Biane nye, mi kee nye, mi tuka'a ba'ale nye! 45Akui a nga zu kui, e nde fe a nga subu Yésus bebé été été, a jô na: A Rabbi! Ve wubane nye a latane nye anyu. 46Ane be nga futi nye mo nyôl, a bi nye. 47E nde môte wua ya ba be nga to valé a nga té nkpwaté mekôn a ba'é mbo ésaé Ntuni Nnen, ane a nga tyi'i nye alo. 48Ane Yésus a nga kobô a jô be na: Ye mia zu bi fanga, ane mia ke soo minkpwaté mekôn a mimbeñ na mia zu bi ma' 49E *môs ôse ya yôp, me mbe e Nda Zambe été va, bia be mia, me ye'ele'e bôt, ve mi nji bi ma. Ve da mintilan mia yiane tôéban. 50E nde beyé'é bese be nga li'i nye, be mane tup. 51Mone ndôman éziñ a nga zu a tôñe nye valé, a be'e fo'o sandé éyé koma'ane. E nde be nga bi nye. 52Ane a nga wua sandé éyé a tub nsoé nalé ne keñelé.

Yésus a ne aba mejô

(Mt 26:57-68; Lk 22:66-71; Yo 18:12-24)

53Ane be nga kee Yésus e be Ntuni Nnen. E nde Betuni Benen, a Bemvendé a Beyeme-Bekalate, be bese be nga mane sulan. 54Pierre a nga zu a tôñe nye ôyab mvus akekui nseñe be Ntuni Nnen, a nto si valé baa bebo bisaé, be woba'ane nduan. 55Betuni Benen a nsamba bekobô mejô ôse be nga ke ba jeñe mam ya bo'olô Yésus na be wôé nye, ve be teke yene jam éziñ. 56Abui bôt e nga zu fo'o bo'olô nye a bibôta mejô, ve viane ke kui na be nto metyiñe metyiñ. 57E nde bôte b'éziñ be nga tebe, a bo bengaa ba ke ba laane minsos, be jô'ô na: 58Ke bi nga wô'ô nye a jô'ô na: E ma nyô, ma ye tyame Nda Zambe é ne nlôñan a mo me bôte nyô, a mvuse melu mela, ma ye beta mane lôñe Nda fe, teke é to ésaé ya mo me bôt. 59Ve bebo'olô bebiene fe teke kui tyiñe jia. 60E nde Ntuni Nnen a kôlô si a tebe e zañe bôt, a sili Yésus na: Ye wô teke yalane jam éziñ e mame bôte bana ba bo'olô wo' 61Nye va, a to v'évô, teke yalan to'o jam éziñ. Eyoñe baa, Ntuni Nnen a sili nye na: Ye wo ô ne Mesie, Mone Zambe' 62Ane Yésus a nga jô na: Ma fo'o me ne nye: A mia ye yene Mone Môt a too si e mbo nnôme be Nyô a dañ ngu, a za'ak a minkute ya yôp. 63Ane Ntuni Nnen a nga mane nyab mengômesane mé a jô'ô na: Jé éfe fo'o bia beta jeñe bebo'olô' 64Ke mi wô'ôya ane a ta Zambe. Mi lôô aya? E nde bese be nga yalane na: A yiane wu. 65Bôte bevok be taté ñhe na ba tuii nye menden, a ba ba buti nye mis, be bibi'i nye minkasa a jô na: Kobô'ô ñhe, a *nkulu mejô! Bebo bisaé be nga bibi fe nye mebaé.

Pierre a kate Yésus

(Mt 26:69-75; Lk 22:56-62; Yo 18:17, 25-27)

66Mbôle Pierre a nga to e si mfa'a ya nseñ, e nde mbo ésaé minga wua ya be Ntuni Nnen a nga suan. 67Eyoñ a yeneya Pierre a woba'ane nduan, ane a nga fombô nye ne tooññ a jô na: Ke wo fe ô mbe a môte ya Nazarét a ne Yésus! 68E nde Pierre a nga kat, nye na: Me ne teke yem nge wô'ô ki e jôm ébien wo jô! Ane a nga kôlô valé a ke nseñ mfa'a y'atan. E nde nnôme kub a nga loñ. 69Ane mbo ésaé minga a nga yene nye, a nga beta fe kat e bôte be nga too valé na: E môte nyô a ne wua ya été. 70E nde Pierre a nga ba'alane kat. Mon étun a lôté, ane bôte be nga tele valé be fe ba zu jô Pierre na: Bebela émien, ô ne môte wua ya été, amu ô ne fe môt ya Galilé. 71Ane a nga taté na a kane ngana a kalane minkale na: Me nji yeme môte mia jôô nye le! 72Eté été, ane nnôme kub a nga loñ, éyoñe baa. E nde Pierre a zu simesan ajô Yésus a nga jô nye na: Valé nnôme kub a ngenan teke loñ biyoñe bibaé, wo ye kate ma biyoñe bilaa. Ane a nga taté na a yi du.

Currently Selected:

Mk 14: BDCB

Highlight

Copy