Met 34

Sikem a samele Dina #34:1 Ngone Léa (fombô'ô Met 30:21). Bendôme béé ba kune nye

(1 Ko 15:33; Dt 22:28-29; Mink 26:24-26; Met 49:5-7)

1Dina, ngone minga Léa a nga biaé Yakob, a nga kui atane na a yene bengone ya Kanaan. 2Sikem, monafame mone Hévieñ ba loone Hamor, évete ya si éte, a nga yene nye, ve bi nye a bômbô nye a samele nye. 3A nga kabetane Dina, ngone Yakob, a nsisime wé ôse; a nga nye'e ésoé ngone minga a a nga yeme kobô nleme wé. 4Sikem a nga jô ésaa wé Hamor na: Luku'u ma ngone minga nyô a bo minga wom. 5Eyoñe Yakob a wô'ôya na Sikem a nga samele ngo jé Dina, ve mbôlô bobefame bé be mbe mefup baa be mbame biyeme wé, a nga tabe évô a kui e nsoone wop.

6Hamor ésaa Sikem, a nga ke be Yakob na a kobô nye. 7Bobefame be Yakob be so'o mefup, e nde ba nyoñe foé ya mam mete. Befame bete be nga biban e minsisime miap été, ane be nga dañe yaa, amu Sikem a nga bo jam e nji yiane boban Israél été, mbômban a nga bômbô ngone Yakob, jam be nji bo nguleya kañese. 8Hamor a nga kobô be na: Monafame wom Sikem a nga nye'e ngo jenan a nleme wé ôse; va'ane nye nye a bo minga wé, ma ye'elane mia. 9Bi ne bo élat a mia a zene ya aluk; mia ye ve bia bengo benan, a mia ke mia ye luk ébangan. 10Bia be mia bia ye tabe, a si ja ye wô'ô a mia; taba'ane na mi bo makit été a bi mesi me ne émenan.

11Sikem a nga jô ésaa a bendôme be Dina na: Asu ya bi nkañesane wônan, ma ye ve biôme mia ye sili ma. 12Yemeta'ane ma ngule nsuba a abui memvaka, a ma ye ve biôme mia ye sili ma; ve va'ane ma ngone minga me lu'u je. 13Bobefam be Yakob be nga yalane Sikem a ésaa wé Hamor a atyeñ ese, amu Sikem a nga samele kale jabe Dina. 14Be nga jô na: Mfa'a wongan, e ne jam e se nguleya bobane na bi lu'u kale jangan e be môt a ne teke ntyi'iban atyel, amu da ye bo ôsone jame be bia. 15Bia ye kañese nkômbane wôé vengevenge ve mia bo ane bia, nalé a ne na fam ése ya be mia é tyi'iban atyel. 16Eyoñe te bia ye ve mia bengone bangan a bia ke bia ye lu'u bengone benan; bia be mia bia ye tabe vôme wua, a bia ye bo ayoñe bôte da. 17Ve nge mi nji kômbô wô'ô bia a bo teke tyi'ibane metyel, bia ye nyoñe ngo jangan a bia ye ke. 18Hamor a Sikem be nga kañese nkobô wop. 19Esoé ndôman môt é nji fe yañge na a tyi'iban atyel amu a nga dañe nye'e ngone Yakob; e nye a nga dañe bi ésemé e be bôte bese ya ndaa ésaa wé.

20Hamor a Sikem be nga ke e *mbé (vôme ba kobô mejô) e tisone jap a kobô bôte ya tisone jabe na: 21E bôte bana be ne évôvoé mfa'a wongan, be tabe'e si jangan a bo makit été, si é ne ndam abime da yiane be. Bia ye lu'u bengone bap, a bia ye ve be bengone bangan. 22Ve bôte bana ba ye kañese tabe bia be be vengevenge ve fam ése ya be bia ja tyi'iban atyel, avale bebien be né. 23Ye mimbame biyeme miap, akume dap a betite babe bese bia ye bo te bo ébiangan? E ñyeba'ane fo'o ve jam ba sili asu ya na bia be be bi tabe. 24Ba bese be mbe be kuik atan a ke e *mbé aka'a ya tisone jap, be nga vô'ôlô Hamor a mone wé Sikem, a befam bese be nga zu e *mbé aka'a ya tison be nga tyi'ibane metyel.

25E môse lale, valé be ngenan ba wô'ô mintaé, e bobefame be Yakob, Siméon a Lévi, bendôme be Dina, be nga nyoñ, môt ase nkpwaté mekône wé, be nga kui e tison, nje é mbe é buni'i na mam mese me ne *mvo'é, a be nga wôé befame bese. 26Be nga wôé fe Hamor a mone wé Sikem; be nga bulane nyoñe Dina e ndaa Sikem a kui atan. 27Bone be Yakob be nga kubu mimbime nyô a sa tison amu be nga samele kale jap. 28Be nga nyoñe mbame beta biyeme wop a wu bone biyeme wop, bijakase biap, e biôme bi mbe e tison été a bi bi mbe atan; 29be nga bi minkôm a sa akume dab ése, bone bap a binga bap, a biôme bise bi mbe e menda été.

30Yakob a nga jô Siméoñ a Lévi na: Mia bo na *nlem ô tyebe ma yôp, éyoñ mia bo na me yené mbia môt e be bôte ya si bi too nyô: Bekananééñ, Beféréziñ. Ma me bili ve *abé a bôt; ba ye sulan a wosane ma, ba ye wôé ma, a ba ye jiane ma, a *nda bôte jam. 31Be nga yalane na: Ye ba ye bo kale jangan ane minga ébamba.

Currently Selected:

Met 34: BDCB

Highlight

Copy