Nk 10

Bitandak

(Sam 105:34-35; Yas 1:2-12; 2:1-11)

1Ane Nti a nga jô Môze na: Kele e be Faraoñ amu ma me maneya bo nleme wé ntip, nalé fe e mi bebo bisaé bé, nde te ma ye liti mendeme mam ma ézezañ jap. 2Nalé a ye volô fe wo na ô kañete mon a ndaé jôé avale avé me nga yaa bôte ya Ejipte, a avale mendem avé me nga bo ézezañ jap. 3Nde Môze ba Aron be nga ke e be Faraoñ a jô nye na: Avale di nde Nti, e Zambe Beébre a jô na: Wo ye bene sili womiene si asu dam a kui éyoñ évé? Su'u bôte bam be ke a bo ma ésaé. 4Amu nge ô bene suu bôte bam, ô lôô a akiti, ma ye zuu bitandak e si jôé. 5Bia ye yiane si, môt te fe ngule ya yene je; bia ye mane di *mebuka'a ya si, nalé a ne na e biôm bi nga nyiñ e mvuse meta'a; bia ye mane di bilé bia faa mia e mefup. 6Bitanda'a bite bia ye jaé e menda môé été, e ma bebo bisaé bôé a e ma bôte ya Ejipte mese. Ja'ana b'ésoo nge bimvame biôé be nji tame yene avale jame te, ataté e *môs be nga tabe e *si nyô a kui den. Ane Môze a nga kôlô be Faraoñ a kui atan. 7Ane bebo bisaé be Faraoñ be nga jô nye na: E môte nyô a ye bo ôlam mfa'a wongan a kui éyoñ évé? Su'u bôte ba be ke a bo Nti, e Zambe wob ésaé. Ye ô ngenan te yeme na si ya Ejipte é nga mane jañ' 8Ane be nga zu Môze ba Aron e be Faraoñ. E nde a nga jô be na: Kelane boon Nti e Zambe wônan ésaé. Ve beza ba ye ke' 9Ane Môze a nga yalane na: Bia ye ke a minkeñelé, minnôm befam miangan, bendôman a bengone bangan, mimbam miangan, mi mi ne anen a mi mi ne tyôtyoé: amu e mfa'a wongan a ne bia abô'ô Nti. 10Ane Faraoñ a nga jô be na: Nti a tabe'e be mia amu ma zu suu mia, mia a bone benan! Ve taba'an ntyel amu mesu menan ma liti na mi bili mbia be asimesan. 11Faraoñ nyee be na: Saa ke nalé! Kelan, mia, befam, a bo Nti ésaé, amu ma simesane na jam mia te sili e nde le. Ane be nga titane be be kôlô asu be Faraoñ. 12Ane Nti a nga jô Môze na: Same wo e si ya Ejipte a bo na bitandak bi bet été. Bi mane di bilo'o bise ya si, jôm ése meta'a me nga lik. 13Ane Môze a nga same ntume wé e si ya Ejipte. E nde Nti a nga soo évuñulu ya jôp da tôô, é vuñ ngume *môs a ngum alu. A mametyé be nga koone na évuñulu te é mane ya soo bitandak. 14Bitandak bi nga bet a bebe e si ése ya Ejipte. E mbe mbia jam avale di na aso melu mvus a kui melu ya ôsu, be nji tame yene abime abui bitandak te. 15Bi nga yiane si ése, a si é nga bo dibi; ane bi nga di bilo'o bise ya si a bibuma bilé, a jôm ése meta'a me nga lik; mekaé bilé, a bilo'o ya mefub bi nga dimili nyôle jab e si ése ya Ejipte. 16Ane Faraoñ a nga ji'a loone Môze ba Aron a jô be na: Me boya *abé mfa'a Nti e Zambe wônan a e mfa'a wongan. 17Ve su'ulané jamé *abé dam éyoñ ji. Ye'elane Nti e Zambe wônan, nalé a ye vaa ébubua ya awu ji e be ma. 18Ane Môze a nga kôlô be Faraoñ a ye'elane Nti. 19Ane Nti a nga soo ngul évuñulu ya e jôb da dim; je ve mane wundi bitandak a wua bie e mañ été. Teke étanda'a jia é nga li'i e si ya Ejipte. 20Ane Nti a nga bo nleme Faraoñ ntip, a nji ke suu bôte ya Israél.

Beta dibi

(Sam 105:28; Nli 16:10-11; Yb. 18:18)

21Ane Nti a nga jô Môze na: Same wo wôé yôp, dibi e bo si ya Ejipte ne zi'ili, e dibi môt a ne nambe. 22Ane Môze a nga same wo wé yôp, nde afibe dibi e nga yiane si ése ya Ejipte melu mela. 23Nté melu mela môt a nji yene nyô mbok nge kôlô éto jé a tebe tetele. Ve bôte ya Israél bese be nga bili éfufub e mevôme map.

24Ane Faraoñ a nga loone Môze a jô nye na: Kelan a bo Nti ésaé. Mia ye lik ve mimbame mienan, mi mi ne anen a mi mi ne tyôtyoé. Mia be bone benan mi ne ke. 25Ane Môze a nga yalane na: Womien wo ye ve bia e jôm bia ye tyik a mimvean mi ne ngumba bia ye ve Nti e Zambe wongan. 26Bia ye ke a mimbame miangan, teke mbiaé wua wo ye li'i, amu bia yiane nyoñe bie mfa'a ya bo Nti e Zambe wongan ésaé. A bi se ngule ya yem avale avé bia ye kañe Nti, v'akekui bi kuiya e vôm bia ke. 27Ve *nti a nga bo nleme Faraoñ ntip: A nji ke kômbô suu be be ke.

28Ane Faraoñ a nga jô Môze na: Kui atan *nda jam! A tabe'e ntyel ya beta yene asu dam, amu e *môs wo ye yene asu dam, wo ye wu. 29Ane Môze a nga yalane na: Womien ô jôya nalé na ma ye bo te beta yene asu dôé.

Currently Selected:

Nk 10: BDCB

Highlight

Copy