Popular Bible Verses from Nk 10

Share

Ane Nti a nga jô Môze na: Kele e be Faraoñ amu ma me maneya bo nleme wé ntip, nalé fe e mi bebo bisaé bé, nde te ma ye liti mendeme mam ma ézezañ jap. Nalé a ye volô fe wo na ô kañete mon a ndaé jôé avale avé me nga yaa bôte ya Ejipte, a avale mendem avé me nga bo ézezañ jap.

Ane Nti a nga jô Môze na: Same wo wôé yôp, dibi e bo si ya Ejipte ne zi'ili, e dibi môt a ne nambe. Ane Môze a nga same wo wé yôp, nde afibe dibi e nga yiane si ése ya Ejipte melu mela. Nté melu mela môt a nji yene nyô mbok nge kôlô éto jé a tebe tetele. Ve bôte ya Israél bese be nga bili éfufub e mevôme map.

Ane Môze a nga same ntume wé e si ya Ejipte. E nde Nti a nga soo évuñulu ya jôp da tôô, é vuñ ngume *môs a ngum alu. A mametyé be nga koone na évuñulu te é mane ya soo bitandak. Bitandak bi nga bet a bebe e si ése ya Ejipte. E mbe mbia jam avale di na aso melu mvus a kui melu ya ôsu, be nji tame yene abime abui bitandak te.