Nk 9

Ebubua ôkone betit e mimbam biyem

(Sam 78:50; Yb 9:4; Mal 3:18)

1Ane Nti a nga jô na: Kele e be Faraoñ a jô nye na: Avale di Nti, e Zamba Beébre a jô na: Su'u e bôte bam be ke bo ma ésaé. 2Nge ô bo te suu be a nge wo beta bi be, 3ô lôô ayaa Nti da ye zu e be mimbam biyeme miôé mi ne e mefup; bikabela, bijakas, bekamel, mimbam mi ne menen a mi mi ne tyôtyoé, mbia bim a ye suan e be mie. 4Nti a ye ve nkandan e zañe mimbam ya Israél a mi ya Ejipte. Teke jôm éziñ ya biôm bise bôte ya Israél be bili ja ye jañ. 5Nti a teléya éyoñ a jô'ô na: A akiti, Nti a ye bo ane a jôya e si ya Ejipte. 6Tyé kpwaa, ane Nti e nga tôé njôane wé: ane mimbam mise ya Ejipte mi nga wu; ve teke wua ya mi bôte ya Israél ô nga wu. 7Ane Faraoñ a nga lôme bôt be ke yemelan: Ô lôô teke to'o ve éyeme jia ya mimbam mi Israél é nga wu. Ve nleme Faraoñ ô nga bo ntip, a nji ke suu bôt.

Beta môt

(Sam 78:50; Dt 28:27; Nl 16:2; Eza 47:13-15)

8Ane Nti a nga jô Môze ba Aron na: Jala'ane mo menan a ndub asub ôtita ya di, éyoñe te Môze a wua je e yôb asu Faraoñ. 9Ja ye veñesane mbuluk e si ya Ejipte ése a ve fe mot a meton njalan a avin e si ése ya Ejipte: e be bôt a e be betit. 10Ane be nga nyoñe ndub asub ôtita ya di a tebe asu Faraoñ; ane Môze a nga wua je yôp, ane é nga ve bôt a betit mot a meton njalan a avin e nyôl. 11Bebo mesimba be nji bo ngul ya beta tebe asu Môze amu mote mete: Amu mefôl me mot me mbe e nyôle bebo mesimba avale fe ane me mbe e be bôte bese ya Ejipte. 12Ane Nti a nga bo e nleme Faraoñ ntip, a nji vô'ôlô be avale ane Nti a nga kobô Môze.

Meta'a

(Sam 105:32; Nli 8:7; 16:21)

13Ane Nti a nga jô Môze na: Kôlô'ô si ndibe tyé a ke e be Faraoñ a jô nye na: Avale di nde Nti, Zamba Beébre a jô na: Su'u e bôte bam be ke bo ma ésaé. 14Amu éyoñ ji ma zu lôme bibubua biam bise bi wosane womien, bebo bisaé bôé a e bôte bôé, ndemben wo ye yeme na jôm éziñ éfe é nji bo ane ma e *si nyô ése. 15Eyoñe ji nge me nga ye same wo wom a bibi wo a bim, ôkone betit, womien a bôte bôé, ô nga ye jañ e *si nyô. 16Ve me nga jô'é wo ényiñ: Nalé ate me liti wo e ngule jam a na e jôé dam e katebane si ése. 17Nge wo beta bo jôm ja kolé e bôte bam ôbak, a nge wo bo te suu be be ke, 18avale awolo di a akiti, ma ye noo mveñ meta'a é ne teke ajibi: Avale mveñe te e ngenan te tame noñ Ejipte ataté éyoñ Ejipte é nga téban a kui éyoñe ji. 19Bo'o na, mimbame miôé a jôm ése é ne énjôé e mefub bi bi asoé ya buni, amu meta'a ma ye ku bôt a betite yôp; ba ba ye yené e mefub a ba ba ye bo te tabe menda été, ba ye wu. 20E ba ya bebo bisaé be Faraoñ be nga ko njôane Nti woñ be nga ji'a nyiñeli bebo bisaé bab a mimbame miab e menda été. 21Ve ba be nga biasé nkobô Nti, be nga li'i bebo bisaé bab a mimbame miab e mefup. 22Ane Nti a nga jô Môze na: Same wo wôé yôb a meta'a me kpwa'ak e si ése ya Ejipte yôp: Bôt, betit a élo'o ése ya mefub e si ya Ejipte été. 23Ane Môze a nga same ntume wé yôp, e nde Nti a nga lôme zo'oyañ a meta'a, a nduan é nga sise si. Ane Nti a nga noo meta'a e si ya Ejipte. 24Meta'a me nga yené a nduan é nga bundan a me; meta'a mete me mbe étua ngu avale e nji tame boban Ejipte ataté éyoñ Ejipte é nga bo ngume ayoñ. 25Ejipte ase été, meta'a me nga wôé jôm ése é mbe e mefup, ataté bôt a kui betit; me nga wôé fe bilo'o bise ya mefub, a kpwé fe bilé bise ya mefup. 26Meta'a me nga bo te ku ve Gôzen vôme bôte ya Israél be nga too.

27Ane Faraoñ a nga loone Môze ba Aron a jô be na: Éyoñe ji me boya *abé. Nti nye a kabe, ve ma a e bôte bam bia ku. 28Ajô te ye'elane Nti na zo'oyañ a meta'a bi man; ma ye suu mia mi ke a môt éziñ a ye bo te beta bi mia. 29Ane Môze a nga jô nye na: Éyoñ ma ye kôlô tison, ma ye same mo mam e yôp, zo'oyañ ja ye tebe a meta'a fe ma ye man, ndemben wo ye yeme na si é ne jôme Nti. 30Ve ma yeme na womien a bebo bisaé bôé, mi ngenan te ko Nti Zambe woñ. 31Elé sut a fôn bi nga ndaman, amu valé fôn é mbili mebam a sute ke sam. 32Ve nlisi a ne mefes anen a nyô a ne mefes tyôtyoé be nji ndaman amu be ne te ji'a faa. 33Ane Môze a nga kôlô e be Faraoñ a tison; ve same mo e be Nti, nde zo'oyañ a meta'a bi nga man, a mveñ é nji fe noñe si. 34Eyoñ Faraoñ a nga yeme na mveñ, meta'a a zo'oyañ bi maneya, a nga ke ôsu a bo *abé, a bo nleme wé ntip, émien a bebo bisaé bé. 35Ane nleme Faraoñ ô nga bo ntip, a nji suu bôte ya Israél be ke aval ane Nti a nga kobô a anyu Môze.

Currently Selected:

Nk 9: BDCB

Highlight

Copy