युहन्ना 19
19
1तब पिलातस येसुके लज्याके ओकरा कोरा से मारैले सिपाहीसबके हुकुम देल्कै। 2सिपाहीसब काँटके मुकुट बनाके ओकर मुरीमे लग्यादेल्कै आ ओकरा रजाके पिन्हैबला बैजनी रङके बस्तर पिन्हादेल्कै। 3तब ओकरलग आइबके “यहुदीसबके रजा, गोर लागैची!” कहैत ओकरा थपराइले लाग्लै।
4पिलातस फेनो बाहर निकैलके भिर लागल लोकसबके कहल्कै, “देख! हम अकरा बाहर आनैचियौ, जै से तुसब जाइन लेब्ही जे अकरामे कोनो दोस हमरा नै भेटलै।” 5तकरबाद येसु काँटके मुकुट आ बैजनी रङके बस्तर पिन्हके बाहर एलै, तब पिलातस कहल्कै, “ले देख, उ लोक यह्या चियौ!”
6तब मुख पुजारी आ सिपाहीसब येसुके देखैत मातर हल्ला करैत कहेलाग्लै, “अकरा लटका, अकरा कुरूसमे लटका!”
पिलातस ओइसबके कहल्कै, “तुहिसब अकरा ल्याजो आ कुरूसमे लटका। हमरा त अकरमे दन्ड दैबला कोनो दोस नै भेटलै।”
7यहुदी अगुवासब ओकरा जबाफ देल्कै, “हमरासबके बेबस्थाके नियम अनुसार अकरा मिरतुदन्ड दैलेपरतै कथिलेत यि आपनके हम परमेस्वरके बेटा चियौ कैहके दाबी करैछै।”#लेबी २४:१६
8यि बात सुइनके पिलातस औरो डेरागेलै। 9उ फेनो दरबार भितर ज्याके येसुके पुछल्कै, “तु कतेके चिही?” महज येसु ओकरा कोनो जबाफ नै देल्कै। 10पिलातस ओकरा पुछल्कै, “कि तु हमरसङे नै बाजबिही? तोरा कुरूसमे लटकाइयोके आ बचाइयोके अधिकार हमरा छै। कि तु नै जानैचिही?”
11येसु जबाब देल्कै, “यदी परमेस्वर अहाँके कोनो अधिकार नै देने रहतियौ त हमर उपर अहाँके कोनो अधिकार नै रहतियै। तै खातिर हमरा तोहर हाथमे सोपै बलासब औरो बेसीसे पापके भागिदार हेतै।”
12यि बात सुइनके पिलातस फेनो येसुके छोरैले चाहल्कै। महज यहुदीसब किलोल करैत कहल्कै, “जब ओकरा छोरबै त अहाँ समराट कैसरके सङी नै भेलियै! जे कोइ आपनके रजा चियै कहैछै उ कैसरके बिरोधी चियै!”
13यि बात सुइनके पिलातस येसुके दरबारसे बाहर आनल्कै। उ नियाइ करैबला ठाममे बैठलै। ओइ ठामके “पथलके चबुतरा” कहैछै, जकरा हिबरु भसामे “गब्बथा” कहैछै। 14तै बखत निस्तार पाबैनके तैयारीके दिन छेलै आ लगभग दुपहर भेल छेलै। नियाइ आसनमे बैठल पिलातस यहुदीसबके कहल्कै, “देख, तोरासबके रजा!”
15तब उसब जोर-जोरसे कहेलाग्लै। “ओकरा मार! ओकरा मार! ओकरा कुरूसमे लटका!”
पिलातस ओइसबके पुछल्कै, “कि हम साच्चे तोरासबके रजाके कुरूसमे लटकेबौ?”
मुल पुजारीसब जबाब देल्कै, “कैसर छोइरके दोसर कोइ नै हमरासबके रजा छै।”
16तब पिलातस येसुके कुरूसमे लटकाइले ओइसबके हाथमे सोइप देल्कै। ओहैसे सिपाहीसब येसुके ल्याके गेलै।
येसुके कुरूसमे टाङल्कै
(मती २७:२३-४४, मरकुस १५:२१-३२, लुका २३:२६-४३)
17तब येसु आपन कुरूस आपनेसे बोइकके खप्पर कहाइबला पहारमे गेलै, जकरा हिबरु भसामे गलगथा कहैछै। 18उ ठाममे उसब येसुके कुरूसमे लटकेल्कै आ ओकरसङे औरो दुइ गोरेके लटकेल्कै, एकटाके देहना कातमे आ दोसरके बमा कातमे। तब येसुके ओइसबके बिचमे लटकेल्कै। 19पिलातस एकटा दोस-पतरो लिखैले आ कुरूसमे टाङैले लगाइल्कै। उ दोस पतरमे एहेन लिखल छेलै, “नासरतके येसु, यहुदीसबके रजा।”
20बहुतो यहुदीसब उ दोस-पतर परहल्कै, कथिलेत येसुके कुरूसमे टाङलाहा ठाम सहरके लगेमे छेलै आ उ हिबरु, ल्याटिन आ गिरिक भसामे लिखल छेलै। 21तब यहुदीसबके मुल पुजारीसब पिलातसके कहल्कै, “‘यहुदीसबके रजा’ नै, महज ‘यि लोक हम यहुदीसबके रजा चियै कैहके कहने छेलै’ से लिखु।” 22तब पिलातस जबाफ देल्कै, “हम जे लिख्नेचियै, लिख्नेचियै।”
23जब सिपाहीसब येसुके कुरूसमे टाङल्कै, तब ओकर बस्तर ल्याके चार भाग करल्कै आ आपसमे बाटल्कै। ओकर एकटा लाम उपरसे निचा तक बुनल बस्तर छेलै। 24यि देखके उसब आपसमे कहल्कै, “एकरा नै फारु, महज यि ककर भागमे परतै से चिठा लगबु।”
पबितर धरमसास्तरमे लिखल बात अनङके पुरा भेलै, “उसब हमर बस्तरसब आपसमे बाटल्कै आ हमर बस्तरके लेल चिठा लगेल्कै।”
तैल्याके सिपाहीसब ओहिनङे करल्कै।#भजनसङगरह २२:१८
25येसुके कुरूसके लगमे आपन माँ, आपन मौसी, क्लोपासके घरबाली मरियम आ मरियम मग्दलिनी ठारभेल छेलै। 26जब येसु आपन माँ आ उ चेलाके, जकरा उ परेम करैछेलै, कातमे ठारभेल देखके आपन माँ के कहल्कै, “माँ गै, देख, तोहर बेटा!” 27तब उ चेलोके कहल्कै, “देख, तोहर माँ!” ओइ दिनसे उ चेला ओकरा आपन घरमे ल्यागेलै।
येसुके मिरतु
(मती २७:४५-५६, मरकुस १५:३३-४१, लुका २३:४४-४९)
28जब येसु सबकाम पुरा भेलै कैहके थाह भेलै से जाइनके पबितर धरमसास्तर पुरा हैके उदेस्यसे “हमरा पियास लाग्लै” कहल्कै।#भजनसङगरह ६९:२१, २२:१५ 29ओते खट्टा अङगुरके मधसे भरल एकटा भरिया राखल छेलै। उसब एकटा पानी सोकैबला रुइयामे बोइरके लाठीमे बान्हके येसुके मुहलग देल्कै। 30तब येसु उ पिके कहल्कै, “आब पुरा भेलै।” तकरबाद उ आपन मुरी तर कैरके परान तियाइग देल्कै।
येसुके कोइखमे भला भोकल्कै
31उ दिन बिसराम दिनके तयारीके दिन छेलै। तैल्याके बिसरामके दिनमे (दोसर दिन बिसराम दिनके बिसेस दिन छेलै) लहास कुरूसमे नै रहे कैहके यहुदी अगुवासब पिलातसलग गेलै आ कुरूसमे लटकाल लोकसबके टाङ तोइरके उसबके लहास निचा उतारैके लेल बिन्ती करल्कै। 32तब सिपाहीसब एलै आ येसुसङे लटक्याल दुइ लोकसबके टाङ तोइरदेल्कै। 33जब उसब येसु लग एलै त ओकरा मरल देखल्कै तब ओकर टाङ नै तोरल्कै। 34महज सिपाहीसबमेसे एक गोरे ओकर कोइखमे भला भोकल्कै आ तखुन्ते लहु आ पानी निकल्लै।
35जे कोइ यि घटना देखल्कै से कोइ ओकर गबाही देनेछै आ ओकर गबाही सत छै। उ जानैछै कि उ सत बोलैछै ताकि तुसब बिस्बास कर। 36“ओकर एकोटा हडी नै टुटतै” से धरमसास्तरमे लिखल बात पुरा हेबे कैहके यि भेल छै।#परस्थान १२:४६, गन्ती ९:१२, भजनसङगरह ३४:२० 37आ फेनो दोसर ठाममे धरमसास्तर कहैछै, “जकरा उसब भोकल्कै, तकरा उसब देख्तै।”#परस्थान १२:४६, गन्ती ९:१२, भजनसङगरह ३४:२०
चिहानमे येसु
(मती २७:५७-६१, मरकुस १५:४२-४५, लुका २३:५०-५६)
38तकरबाद अरिमाथिया नगरके योसेफ, जे यहुदीसबके डरके कारन गुप्तमे उ येसुके चेला रहै। उ येसुके लहास लजाइले दिय कैहके बिन्ती करल्कै। तब पिलातस अनुमति देल्कै आ ओकर लहास कुरूससे निचा उताइरके ल्यागेलै। 39तब रात-रातके येसु लग आबैबला निकोदेमस ओहो योसेफसङे रहै। उ तेतिस किलो मुर्र आ एलवाके गाछसे फेटके बन्याल मगमग गम्कौवा अतर ल्याके एलै।#युहन्ना ३:१-२ 40उ दुनुगोरा यहुदी चलन अनुसार येसुके लहासमे गमगम करैबला अतर लगेल्कै आ गारैले लहासके कफनमे लपेटके चिहानमे राखैले तैयार करल्कै। 41जै ठाम येसुके कुरूसमे लटकाइने रहै, ओइठाम एकटा फुलबारी छेलै। ओइ फुलबारीमे कहियो नै कोनो लहास राखल एकटा चिहान छेलै। 42यहुदीसबके तैयारीके दिन भेलाके कारन आ चिहान लगमे भेलासे उसब येसुके लहास ओहैमे राखल्कै।
Currently Selected:
युहन्ना 19: MTH
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
