युहन्ना 18
18
येसु पकराइलै
(मती २६:४७-५६, मरकुस १४:४३-५०, लुका २२:४७-५३)
1येसु यि बात कैहलेलाके बाद आपन चेलासबसङे किदरोन कहैबला खोल्साके ओइपार गेलै। ओते एकटा फुलबारी छेलै। तब येसु आपन चेलासबसङे ओते गेलै। 2ओकरा पकराबैबला यहुदा उ ठामके बारेमे जानैछेलै, कथिलेत येसु आपन चेलासबसङे ओते बेला-बखत जाइछेलै। 3तैबखत यहुदा सिपाहीसबके एकटा दल, मुल पुजारीसब आ फरिसीसबसे पठ्याल पहरेदारसबके ल्याके ओते एलै। उसब आपन साथमे लालटेम, उँकासब आ हाथ-हथियारसब बोक्ने छेलै।
4आपन उपर आबैबला सब बात येसुके थाह छेलै, तैल्याके अगा ज्याके उसबके पुछल्कै, “तुसब ककरा ताकैचिही?” 5तब उसब जबाफ देल्कै, “नासरतके येसुके।” येसु कहल्कै, “हम ओह्या चियौ।” (ओकरा पकरा दैबला यहुदो ओकरासबसङे ठारभेल छेलै।) 6जब येसु उसबके “हम ओह्या चियौ” कहल्कै तब उसब पछा हटलै आ भुइयामे खैसपरलै। 7तब येसु फेनो उसबके पुछल्कै, “तुसब ककरा ताकैचिही?” उसब कहल्कै, “नासरतके येसुके।” 8येसु कहल्कै, “हम त तोरासबके कैहदेने चियौ कि, उ हम्ही चियौ। यदी तुसब हमरा ताकैचिही त अकरासबके जाइले दहै।” 9(अहिनङे “अहाँ हमरा जतहेक लोकसब देलियै, उसबमेसे ककरो हम नै हरेलियै” से ओकर कहल बचन पुरा हेबे कैहके एहेन भेलै।)
10ओतबेहेकमे सिमोन पतरुस आपन तलबार निकाइलके मुल पुजारीके नोकरके देहना कान चटसिना काइटदेल्कै, जकर नाम माल्खस छेलै। 11महज येसु पतरुसके कहल्कै, “आपन तलबार मियानमे राख। पिता हमरा देल यि दुखके बाटीसे#१८:११ दुखके बाटीसे- जब येसु कहल्कै “दुखके बाटीसे” उ बास्तबिक बाटीके बारेमे नै कहल्कै महज दिस्टान्तमे बाजल्कै। उ लोकसबके पापके खातिर कुरूसमे मरे मरतै तै कस्टके बारेमे बत्यारहलछै। कि हम नै पिबै?”#मती २६:३९, मरकुस १४:३६, लुका २२:४२
हन्नासके अगामे येसु
12तकरबाद सिपाहीसब आ ओकर कप्तान यहुदीसबके पहरेदारसब येसुके पकैरके उल्टा बान्ह बानहल्कै। 13तकरबाद उसब पहिने येसुके हन्नासके लग ल्यागेलै, जे ओइ बरिसके परधान पुजारी कैयाफाके ससुर छेलै। 14उ ओह्या कैयाफा छेलै, जे “जनताके लेल एकटा लोक मरनाइ उचित छै” कैहके यहुदीसबके सल्लाह देनेछेलै।#युहन्ना ११:४९-५०
पतरुसके इन्कार
(मती २६:६९-७०, मरकुस १४:६६-६८, लुका २२:५५-५७)
15तब सिमोन पतरुस आ औरो एक गोरे चेला येसुके पछा-पछा गेलै। दोसर चेला परधान पुजारीके चिन्हलाके कारन येसुसङे परधान पुजारीके अङनामे गेलै। 16महज पतरुस देहरीके केबारे लग ठार भेलै। तब उ दोसर चेला, जे परधान पुजारीके चिन्हैछेलै, उ बाहर निकैलके केबारमे पहरा करैबाली छौरीसङे बात कैरके पतरुसके भितर आनल्कै। 17तब देहरीमे पहरा दैबाली छौरी पतरुसके कहल्कै, “कि तुहु ओइ लोकके चेलासबमेसे एक गोरे त नै चिही?”
पतरुस जबाफ देल्कै, “हम नै चियै!”
18जार भेलाके कारन नोकरसब आ मन्दिरके पहरेदारसब ठार भ्याके आइग ताइपरहल छेलै। तैबखत पतरुसो उसबसङे आइग तापैछेलै।
परधान पुजारीसे येसुके पुछताछ
(मती २६:५९-६६, मरकुस १४:५५-६४, लुका २२:६६-७१)
19तकरबाद परधान पुजारी येसुसे ओकर चेलासब आ ओकर सिक्छाके बारेमे पुछताछ करल्कै। 20तब येसु ओकरा जबाफ देल्कै, “हम त सबकोइ सुने कैहके खुलमखुला कहनेचियौ। हम हरदम सभाघरसब आ मन्दिरमे आपन सिक्छा देलियै, जते यहुदीसब जमा हैछै। हम आपन सिक्छा गुप्तमे नै देने चियै। 21अहाँ हमरा कथिले पुछैचियै? ओकरासबसे पुछु, जे हमर कहल बातसब सुन्नेछै। ओकरासबके हमर कहल बातसब थाहछै।” 22येसु यि बात बोलैतखिना लगमे ठारभेल पहरेदासबमेसे एक गोरा एहेन कहैत ओकरा थापर मारल्कै, “कि तु परधान पुजारीसे मुहेमुहे लगैचिही?” 23तब येसु ओकरा जबाफ देल्कै, “हम कोनो गल्ती बोल्नेचियै त, तकर गल्ती देख्यादियौ, महज हम ठिक बोल्नेचियै त, कथिले हमरा पिटैचियै?” 24तकरबाद हन्नास येसुके बान्हल अबस्थामे परधान पुजारी कैयाफा लग पठाइल्कै।
फेनो पतरुस येसुके इन्कार करल्कै
(मती २६:७१-७५, मरकुस १४:६९-७२, लुका २२:५८-६२)
25ओइ बखत सिमोन पतरुस ठार भ्याके आइग ताइपरहल छेलै। उसब ओकरा कहल्कै, “कि ओकर चेलासबमेसे तुहु एक गोरे त नै चिही?” पतरुस इन्कार करैत कहल्कै, “हम नै चियौ!”
26पतरुस कान काइट देल नोकरके नातेदार ओतै छेलै आ नातेदार परैबला सेहो परधान पुजारीके नोकर छेलै। उ पतरुसके कहल्कै, “कि हम तोरा ओकरसङे फुलबारीमे नै देखलियौ?” 27तब पतरुस फेनो इन्कार करल्कै, तखुन्ते मुरगा डाँक देल्कै।
पिलातसके अगामे येसु
(मती २७:१-२, ११-१८, २१, मरकुस १५:१-१०, लुका २३:१-५, १३-२५)
28तकरबाद उसब येसुके कैयाफाके घरसे रोमी सासकके दरबारमे ल्यागेलै। ओइ बखत अनगुत भेल छेलै। असुध नै हेबे महज निस्तार पाबैनके भोज खाइले सकि कैहके उसब दरबार भितर नै गेलै। 29तैल्याके बडा हाकिम पिलातस उसब लग बाहर आइबके पुछल्कै, “यि लोकके तुसब कथी दोस लगाबैचिही?”
30तब उसब जबाफ देल्कै, “यदि यि लोक दोसी नै रहतियै त कथिले हमसब अहाँ लग आनतियै।”
31पिलातस ओइसबके कहल्कै, “अकरा तुसब ल्याजो आ तोरासबके आपन बेबस्था अनुसार नियाइ कर।” तब यहुदीसब पिलातसके कहल्कै, “ककरो मिरतुदन्ड दैके अधिकार हमरासबके नै छै।”
32आपन मिरतु कनङके हेतै कैहके येसुके कहल बात पुरा हैकेलेल ऐहेन भेल छेलै।#युहन्ना ३:१४, १२:३२
33तब पिलातस फेनो दरबार भितर गेलै आ येसुके बोल्याके कहल्कै, “कि तु यहुदीसबके रजा चिही?”
34येसु जबाफ देल्कै, “अहाँ आपने मनसे यि बात कहैचियै कि दोसर कोइ हमर बारेमे अहाँके कहलक?”
35तकरबाद पिलातस जबाफ देल्कै, “कि हम यहुदी चियै से? तोहर आपने जातीके लोकसब आ मुल पुजारीसब तोरा हमर हाथमे सोइपदेने छौ। तु कथी करनेचिही से?”
36तब येसु जबाफ देल्कै, “हमर राज यि सन्सारके नै चियै। हमर राज यि सन्सारके रहतियै त हमरा पछुवाइबला हमर लेल लराइ करतियै आ हम यहुदीसबके हाथमे नै परतियै। महज हमर राज यि सन्सारके नै चियै।”
37पिलातस ओकरा पुछल्कै, “कि तु रजे चिही त?”
तब येसु जबाफ देल्कै, “हम रजा चियै कैहके अहै त कहैचियै। हम अहै खातिर यि सन्सारमे जलम लेलियै आ सतके बारेमे गबाही दैले सन्सारमे एलियै। जे सतके पक्छमेछै, से हमर बात सुनैछै।”
38पिलातस ओकरा कहल्कै, “सत कथी चियै?”
अतबेहेक कैहके उ बाहर निकैलके यहुदीसब लग गेलै आ कहल्कै, “हमरा एकरमे कोनो दोस नै भेटलै। 39निस्तार पाबैनमे तोरासबके चलन अनुसार हमरा तोरासबके खातिर एक गोरे कैदीके छोइरदैके छै। तैखातिर हम ‘यहुदीसबके रजाके’ छोइरदेबौ से चाहैचिही?”
40महज उसब जोरसे किलोल करैत एहेन कहल्कै, “एकरा नै! बारब्बाके छोइरदियौ।” (बारब्बा करान्तिकारी छेलै।)
Currently Selected:
युहन्ना 18: MTH
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
