परेरित 21
21
पावल यरुसलेममे गेलै
1एफिसस मन्डलीके अगुवासबसे बिदा भेलाके बाद हमसब पानी जहादसे सोझे कोस कहाइबला टपुमे पुगलियै। दोसर दिन रोदस टपु पुगलियै आ ओतेसे पटारा नगरमे एलियै। 2पटारासे फोनिके इलाकामे जाइबला एकटा पानी जहाद भेटल आ ओहैमे चहैरके हमसब गेलियै। 3जाइते जाइते साइपरस देखा परलै आ ओकर दछिन कातसे सिरिया परदेस हैत हमसब टुरोस सहरमे एलियै। ओतै जहादसे मालसमान उतारल्कै आ हम्हुसब उतरलियै। 4हमसब ओते बिस्बासीसबके भेटलियै आ ओकरासबसङे सात दिनतक ओतै रहलियै। पबितर आत्माके अगुवाइ पाइबके उसब पावलके यरुसलेममे नै जाइले बिन्ती करल्कै। 5जब जाइबला समय आइबगेलै तब हमसब बिदा भ्याके आपन रस्तामे अगा बरहलियै। चेलासब आपन घरबाली आ बाल-बच्चाकेसङे हमरासबके अरियातैले नगर बाहरतक एलै। हमसब समुन्दरके पखामे ठेङहुनिया द्याके परथना करलियै। 6ओकरबाद हमसब बिदा भ्याके पानी जहादमे चरहलियै आ उसब आपन घर दिसन घुइमके गेलै।
7टुरोससे लगातार समुन्दर घुम-फिर कैरके हमसब टोलेमाइस सहरमे एलियै। ओते बिस्बासी भाइ-बहिनसबके गोरलगी कैरके ओकरासबसङे एक दिन ओते रहलियै। 8दोसर दिन बिहान बिदा भ्याके कैसरिया सहरमे एलियै आ सुसमाचार परचारक फिलिपके घरमे रहलियै। खाना बटैबला काममे परेरितसब सेबा करैले छानल्हा सात गोरे मेसे एकगोरा फिलिपो छेलै। 9ओकरा चारटा कुमाइरे बेटिसब छेलै। उसब अगमबानी बोलै छेलै।
10हमसब कुछदिन फिलिपके परिबारसबसङे रहलाकेबाद ओतै यहुदियासे अगाबस नामके एक गोरा अगमबक्ता हमरासबलग एलै। 11उ हमरासबके लग आइबके पावलके डारमे बान्हल गम्छा ल्याके आपन हाथ आ टाङ बान्हके कहल्कै, “पबितर आत्मा अनङ कहैछै, जकर यि गम्छा चियै, तकरा अहिना यरुसलेममे यहुदीसब बान्हतै आ आनजातके हाथमे सोइप देतै।” 12यि बात सुइनके हमसब आ ओतेका भेल्हा सब लोकसब पावलके यरुसलेम नै जाइले बिन्ती करलियै। 13महज पावल कहल्कै, “तुसब कथिले काइनके हमर मनके तोरैचिही? हम त यरुसलेममे बन्हाइले मातर नै, महज हम त परभुके लेल मरैयोले तैयार चियै।” 14पावलके रोकैले नै सकलियै त यि बात कैहके छोइर देलियै कि, “परभुके इक्छा पुरा हेबे।”
15तकरबाद हमसब आपन-आपन सर-समानसब तैयार कैरके यरुसलेमके लेल परस्थान करलियै। 16कैसरियाके कुछ बिस्बासीसब सेहो हमरासबकेसङे एलै। उसब हमरासबके साइपरसके एक गोरा पुरान चेला मनासोनके घरमे ल्यागेलै।
पावल यरुसलेममे याकुबके भेटलै
17जब यरुसलेममे पुगलियै त ओतेका बिस्बासीसब बहौत खुसिसाथ हमरासबके स्वागत-सत्कार करल्कै। 18तकर बिहानके पावल हमरासबके ल्याके याकुबके भेटैले गेलै। ओते याकुब लग मन्डलीके रेखदेख करैबलासब जमा भेल छेलै। 19पाबल ओइसबके गोरलगी करलाके बाद ओकर सेबकाइसे गैर-यहुदीसबके बिचमे सुसमाचार परचार करैबखत परमेस्वर केहन-केहन काम करल्कै, से सब बात ओकरासबके कहल्कै। 20पावलके बात सुनलाके बाद उसब परमेस्वरके इस्तुती करल्कै। तकरबाद उसब पावलके कहल्कै, “हौ पाबल भाइ, अते हजारो-हजार यहुदीसब परभुमे बिस्बास कैरके मोसाके देल बेबस्थाके करा साथ पालन करैछै। 21उसब अहाँके बारेमे सुन्नेछै जे, गैर-यहुदीके बिचमे रहैबला यहुदीसबके अहाँ ‘मोसाके धरम नियमके आ ओकरासबके बाल-बच्चासबके खतना नै करैके आ रितिरिबाज पालन नै करैले’ कैहके सिखाइचियै। 22आब कथी करल जाय? अहाँ एलचियै से बात उसब अबस्य सुन्ने हेतै। 23अहै खातिर हमरासबके बात मानु, अते हमरासबसङे कौबला करैबला चार गोरा लोक छै। 24ओकरासबके लाइबके अहुँ ओकरेसबसङे सुध हेबु आ ओकरासबके लागैबला खरच अहि भैर दियौ आ उसब आपन केस कटाबे। अहिनङ अहाँके बेबस्था मानैत देखके अहाँमे लग्याल दोस सब झुठे चियै से कैहके सबकोइ थाह पाबतै। 25गैर-यहुदीसब जे येसु खिरिस्टमे बिस्बास करने छै, उसब मुरतिके चरह्याल चिज, लहु, घेच दाइबके मारल पसुके मौस नै खाइले आ अनैतिक देहके समबन्धमे अलग रहैले परतै कैहके हमसब आपन निरनय लिखके पठादेने चियै।”
26तब पावल उ चारुगोरेके लज्याके बिहान भेने आपनके सुध करल्कै, तकरबाद सुधहैबला दिन कहिया पुरा हेतै आ उ सबके लेल चरहाइले जाइबला भेटीके जानकारी दैले उ मन्दिरमे गेलै।
पावल मन्दिरमे पकराउ परलै
27जब सतमा दिन पुरा हेबे लागल रहै। तब एसिया परदेससे एल कुछ यहुदीसब पावलके मन्दिरमे देखल्कै तखुन्ते उसब लोकसबके भिरके भरकाइल्कै आ पावलके पकरल्कै। 28चिच्याके कहेलाग्लै, “आबु, आबु इजराएली बाबु-भैयासब, मदत करु! एह्या लोक चियै जे, जते-तते ज्याके अपनासब इजराएलीसबके बिरोधमे बोलैबला! मोसाके नियमके नै मान आ मन्दिरमे पुजो नै कर कैहके सिखाइबला एह्या चियौ। अतबेहेकरा नै यि औरो जातीके लोकसबके मन्दिरमे ढुक्याके पबितरो जगहके अपबितर कैरदेनेछै।” 29कथिलेत उसबके एफिसससे एल तरोफिमसके पावलेसङे बजारमे देखनेरहै आ पावले ओकरा मन्दिरमे आन्नेरहै से कैहके समझने रहै।
30एह्या बातसे बजार भैर होहल्ला मैचगेलै आ लोकसब चारुदिसनसे दौरते एलै। उसब पावलके पकैरके मन्दिर भितरसे घिसयाइते बाहर निकालल्कै तब मन्दिरके केबार लग्यादेल्कै।
31उसब पावलके जानेसे माइर दैके बिचारमे छेलै, महज तखुन्ते यि बातके खबर रोमी सेनापतीके कानमे पुग्लै जे, सौसे यरुसलेम सहरमे हुलदङा हेबे लाग्लै। 32तब उ सेनापती तुरन्ते आपन कुछ सिपाही आ कप्तानसबके आपन सङमे लेल्कै आ दौरते लोकसबके भिर दिसन गेलै। लोकसब जब सेनापती आ ओकर सैनिक आ कप्तानसबके देखल्कै तब देखैत मातर पावलके मारपिट करैले छोइरदेल्कै। 33सेनापती पावलके पकरल्कै आ दुइटा घुरीसे बान्हैले लगाइल्कै आ लोकसबके पुछल्कै, “यि लोक कथी करल्कै? यि लोक के चियै?” 34महज भिरमे भेल्हा लोकसब ककरो कहै एकटा बात त दोसरके दोसर बात। अहै कारन सेनापती झगराके खास बात थाहे नै पाबे सक्लै। तै खातिर पावलके सिपाहीसब रहैबला गढ़मे लजाइके आग्या देल्कै। 35सिपाहीसब पावलके लजाइत खिना लोकके भिर ओइसबके पछा लाइगगेलै। सिरहीसे उपर जाइत खिना लोकसब पावलके मारैले दौरलै तब पावलके बचाइले बोइकके ल्यागेलै।
36तबो तक लोकसब पावलके “ओकरा खतम कर।” कैहके हल्ला करैत पछा पछा गेलै।
भिरके अगा पावलके आपन बिचार
37जब सिपाहीसब पावलके गढ़के भितर लजाइत खिना सेनापतीके गिरिक भसामे कहल्कै, “यदी अहाँ आग्या देबै त कुछ बात राखु।” सेनापती कहल्कै, 38“तु गिरिकियो भसा जानैचिही? कि तुही चिही नै बिदरोह करैबला चार हजार हतियाराके मिसरी नेता?” 39पावल कहल्कै, “जी नै, हजुर! हम त किलिकिया टारसस सहरमे जलमल्हा एकटा यहुदी चियै। हम ओहै नाम चलल सहरके एकटा नागरिक चियै। दया कैरके हमरा यि लोकसबके अगा कुछ बात बोलैले दिय।” 40सेनापती अनुमति देल्कै तब पावल सिरहीमे ठार भ्याके हाथसे सान्त हैले इसरा करल्कै। जब लोकसब सान्त भेलै तब पावल हिबरु भसामे बोलैले लाग्लै।
Currently Selected:
परेरित 21: MTH
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
