परेरित 22
22
1“हौ भाइ-भैयारी आ बाबुसब, अहाँसबके अगा हम आपन तरफमे जे कहैले चाहैचियै से सुनु।” 2ओकरा हिबरु भसामे बाजैत सुइनके सब लोकसब चुपचाप रैह गेलै।
3तब पावल कहल्कै, “हम किलिकियाके टारसस सहरमे जलमल यहुदी चियै, महज हमर अहै यहुदी सहरमे गुरु जी गमलिएलके चरनमे सिक्छा-दिक्छा भेलै। हमसब पिते-पुरखासे मानैत ऐल धरमसास्तरके सिक्छा हम असलसे सिख्ने चियै। आइ अहाँसब परमेस्वरिय सेबा परति जतहेक उत्साह देखेने चियै, हम्हु ओतबेहेक उत्साह देखेने रहियै। 4परभुके बाटमे लागल लोकसबके सताइत-सताइत जानसे माइर दैछेलियै। हम्ही मरद आ जनी सबके पकैर-पकैरके ढोकैले लगाइ छेलियै। 5हमर कहल बातके मुल पुजारी आ अपनासबके महासभाके सदससब गबाही दैले सक्तौ। ओह्यासब हमरा दमस्कसमे रहैबला यहुदी भाइ-भैयारीसबके नामसे चिठी देल्कै आ ओइ चिठीमे हमरा परभु येसुमे बिस्बास करैबला सब लोकसबके पकरैके अधिकार मिलल छेलै। अहै खातिर ओइसबके झिझिरसे बान्हके यरुसलेममे आइनके सजाइ दियाइबै से सोइचके हम दमस्कस दिसन गेलियै।
परिबरतन समबन्धमे पावलके गबाही
(परेरित ९:१-१९, २६:१२-१८)
6“हम ओते जाइत जाइत दिनके दुपहर भेल छेलै, हम दमस्कस लग आइब गेलछेलियै तहै बखत अकाससे अचानक एकटा बरका इजोत हमर चारुकात चम्कलै। 7हम भुइयामे खैस परलियै। तहै बखत हम एकटा एहेन अबाज सुनलियै, ‘साउल, ऐ साउल तोहे हमरा कथिले सताबैचिही?’ 8तब हम कहलियै, ‘परभु! अहाँ के चियै?’ उ कहल्कै, ‘हम नासरतके येसु चियै, जकरा तु सतारहल चिही।’ 9हमर सङिसब इजोत त देखल्कै महज जे हमरसे बात करैतरहै तकर बात नै बुझ्लै। 10हम कहलियै, ‘आब हम कथी करबै, परभु?’ परभु जबाब देल्कै, ‘उइठके दमस्कस सहरमे जो, ओतै तोरा परमेस्वरके खटेल्हा कामसबके बारेमे कहतौ।’ 11ओहै चम्कैबला इजोतके कारन हम आन्हर भेल रहियै तब ओतेका सङिसब हमर हाथ पकैरके दमस्कस पुगादेल्कै।
12“दमस्कसमे हननिया नामके एक गोरे हमरसे भेटघाट करैले एलै। उ मोसाके नियमके पालन करैबला धरमी लोक रहै आ दमस्कसमे रहैबला सब यहुदीसब ओकरा बहुत आदर करैतरहै। 13उ लोक हमर कातमे ठार भ्याके कहल्कै, ‘भाइ साउल, तोहे फेनोसे देखैबला भ्याजो।’ उ अतहेक कहैत मातर हम देखे लागलियै। 14तकरबाद उ हमरा कहल्कै, ‘अपनासबके पुरखाके परमेस्वर आपन इक्छा अहाँके बुझहाइले, आपन धारमिक सेबकके देखाबैले आ आपन मुहके बात सुनाबैले पहिनेसे अहाँके चुन्नेछै। 15कथिलेत तु आपन आँखसे देखल आ कानसे सुनल सब बात लोकसबके अगा ओकर गबाही हेबे परतौ। 16तै खातिर आब कथिले ढिला-सुस्ती करैचिही? उठ आ बप्तिस्मा ले आ येसुके नाम ल्याके आपन पापसे सुध हो।’
17“हम ओतेसे यरुसलेम गेलियै तब मन्दिरमे परथना करैत परभुमे धियानमग्न भेलियै 18आ परभुके दरसन पाबलियै तब दरसनमे परभु हमरा कहल्कै, ‘हबर-हबर यरुसलेमसे जल्दीए चैल जो कथिलेत लोकसब हमर बारेमे देल तोहर गबाही नै सुइकारतौ।’ 19तब हम परभुके जबाब देलियै, ‘यि बात अकरौरके थाहेछै जे हमसब सभाघरसबमे ज्या-ज्याके तोरा बिस्बास करैबलासबके पकैरके पिटै छेलियै आ जहलमे ढोइकके राखै छेलियौ। 20तोहर गबाही दैबला स्तिफनसके लहु-लहुवान कैरके मारैत खिना हम ओतै लगमे ठारभेल रहियौ। ओकरा मारैबलासब सङे मिलके ओकरौरके बस्तरके रखबारी कैरके बैठल रहियै।’ 21महज परभु हमरा कहल्कै, ‘तु जो, कथिलेत हम तोरा दुर-दुर गैर-यहुदीसबके बिचमे पठाइबौ।’”
22लोकसब पावलके यि बात “हम तोरा दुर-दुर गैर-यहुदीसबके बिचमे पठाइबौ, सुनते मातर” उसब जोर-जोरसे हल्ला करैत कहेलाग्लै, “दुनियासे अकर नाम निसान मेटा दहै। कथिलेत यि जिबित रहैके योग्यके नै छै।” 23उसब जोसमे आइबके आपन-आपन बस्तर हबामे उराइत रहै आ उपर अकासमे गरदा उराइत हल्ला करैछेलै। 24तब यि देखके सेनापती पावलके भितर लगेलै आ कोरासे मारैके आदेस दैत कहल्कै, “अकरा कोरासे माइर-माइरके पुछ तब यहुदीसब कथिले खिस्याल छेलै से पता लागतौ।” 25जब सिपाहीसब कोरासे मारैले पावलके बान्हने छेलै तब लगेमे ठारभेल कप्तानके पावल पुछल्कै, “कि रोमी कानुन अनुसार रोमी नागरिक अपराधी नै छै तैयो कोरासे मारैले मिलैछै?” 26कप्तान यि बात सुइनके सेनापती लग ज्याके कहल्कै, “अहाँ यि कथी करैचियै? यि लोक त रोमी नागरिक चियै!”
27यि बात सुइनके सेनापती गढ़ भितर ढुक्लै आ पावलके पुछल्कै, “कि साँचोके तु रोमी लोक चिही?” पावल जबाब देल्कै, “जी, हम रोमी नागरिक चियै!” 28तब सेनापती पावलके कहल्कै, “हमरा त रोमी नागरिक हैले बहौत खरच करे परलछै।” पावल जबाब देल्कै, “महज, हम जलमेसे रोमी नागरिक चियै।” 29यि बात सुनैत मातर पावलके पुछ-ताछ करैबला लोकसब पछा हैट गेलै। पावल रोमी नागरिक हैतोपरभी अनङ घुरीसे बान्हैले लगेलाके कारन सेनोपती डेरागेलै।
यहुदी महासभाके अगा पावल
30तकर बिहानके यहुदीसब पावलके कथिले दोस लगारहलछै, से बातके पता लगाइले सेनापती चाहैछेलै। तै खातिर उ मुल पुजारी आ महासभाके सब सदससबके बोल्याके जम्मा हैले आदेस देल्कै आ पावलके लज्याके सबके अगा ठार करल्कै।
Currently Selected:
परेरित 22: MTH
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
