परेरित 18
18
कोरिन्थमे मन्डलीके अस्थापना
1तकरबाद पावल एथेन्स सहर छोइरके कोरिन्थ सहरमे गेलै। 2ओते उ अकिलास नामके एक गोरा यहुदीके भेटलै। ओकर जलम पोन्टस इलाकामे भेलरहै। उ हाल-साले आपन घरबाली पिरिस्किलासङे इटालिया देससे एल रहै। कथिलेत रोमके रजा क्लौडियस सब यहुदीसबके रोम सहरसे निक्लैके हुकुम देल्कै तब पावल ओइसबके भेटैले गेलै। 3उसब पाल बनाइबला काम कैरके जिबीका चलाबैतरहै। पावल ओकरेसबकेसङे रहलै कथिलेत ओहो ओहैसब जखा पाल बनाइनला काम कैरके जिबीका चलाबैतरहै। 4सब बिसराम दिनके पावल सभाघरमे ज्याके यहुदी आ गिरिक लोकसबसे बात-चित करै आ उसब सेहो परभु येसुके सुइकार करे कैहके ओकरासबके मनाइले चाहैत रहै।
5सिलास आ तिमोथी माकेडोनियाके इलाकासे एलाकेबाद पावल आपन पुरा समय सुसमाचार सुनाबैमे लाग्यादेल्कै। उ यहुदीसबके समझाइत रहलै, “येसुवे मुक्ती दैबला खिरिस्ट चियौ।” 6महज यि बात सुइनके उसब पावलके बिरोध आ अपमान करे लाग्लै, तखुन्ते पावल ओइसबके चेताबनीके खातिर आपन बस्तरसे गरदा झारैत कहल्कै, “यदी तोरासबमेसे कोइ नास हेब्ही त आपने दोसके कारन नास हेब्ही तकर दोसी हम नै हेबौ। आबसे हम दोसरे जातीसबके बिच सुसमाचार सुनाइले जाइचियौ।”
7तब पावल सभाघरसे निकललै आ तहियेसे यहुदीसबके सभाघरमे जाइले छोइरदेल्कै। ओहै सभाघरके कातमे परमेस्वरके भक्ति करैबला तितस युस्तस नामके लोकके घरमे गेलै। 8सभाघरके सासक किरिस्पस आ ओकर घरके सब लोकसब परभुमे बिस्बास करल्कै। कोरिन्थके औरो बहुतो लोकसब पावलके सुसमाचार सुइनके बिस्बास करल्कै आ बप्तिस्मा लेल्कै।
9एक रात परभु पावलके दरसन दैत कहल्कै, “ककरोसे नै डेरा, चुप-चाप नै रह, सुसमाचार परचार करैतरह। 10कथिलेत हम तोरे सङेचियौ। कोइ नै तोरा कोनो हानी करे सक्तौ कथिलेत अइ सहरमे हमर बहौत लोकसब छै।” 11अहिनङे पावल डेढ़ बरिसतक कोरिन्थमे रहलै आ परमेस्वरके बचन परचार करैत रहलै।
12जब अखैया इलाकाके गलियोन नामके लोक बडा-हाकिम रहै बखत यहुदीसब एकमत भ्याके पावलके बिरोध करैत ओकरा पकैरके बडा-हाकिम लग लज्याके कहल्कै, 13“यि लोक अपनासबके नियमके बिरोधमे परमेस्वरके आराधना करैले सिखाइछै आ लोकसबके बहकाइछै।”
14जब पावल बाजैले चाहल्कै तब गलियोन यहुदीसबके कहल्कै, “हे हौ यहुदीसब, यदी यि कोनो अपराध आ अन्यायके बात रहतियै त हम अहाँसबके बात सुननाइ उचित रहतियै। 15महज यि बात त खालि अहाँसबके धरमसास्तरके नियम समबन्धमे सब्द आ नाममे मातरे बिबाद छै। तै खातिर तुसब आपनेसे अकर नियाय कर। हमरा यि बातसे कोनो लेना-देना नै छै।” 16यि बात कैहके गलियोन ओइसबके कचहरीसे निकाइ देल्कै। 17तब यहुदीसब सभाघरके सासक सोस्थेनेसके पकैरके कचहरीयेके अगा मार-पिट करल्कै। महज गलियोन देखियोके कोनो वास्ता नै करल्कै।
पावल एन्टिओखिया सहरमे घुम्लै
18बहौत दिनतक पावल कोरिन्थके परभुमे बिस्बास करैबला बिस्बासीसब सङे रहलै। तकरबाद उ पिरिस्किला आ अकिलास सङे समुन्दरके रस्ता हैत सिरिया इलाका दिसन जाइले लाग्लै। कुछ समय पैहनिये कौबला करलाके कारन पावल किङकिरिया सहरमे पानी जहाद चरहैसे पैहने आपन केस कटाइल्कै। 19जब उसब एफिसस सहरमे पहुचलै तब पावल पिरिस्किला आ अकिलासके ओते रहैले छोइरदेल्कै। तकरबाद पावल एफिससके सभाघरमे ढुइकके यहुदीसबसङे बात-चित करे लाग्लै। 20यहुदीसब पावलके औरो कुछदिन तक एफिससेमे रहैले बिन्ती करल्कै, महज उ नै मानल्कै आ 21ओइसबसे बिदा लैत पावल कहल्कै, “यदी परमेस्वरके इक्छा हेतै त हम फेनो अहाँ सब लग एबै।” तकरबाद उ एफिसससे पानी जहाद चहैरके चैलगेलै।
22कैसरिया सहरमे आइबके पावल यरुसलेम गेलै तब ओतेका मन्डलीके बिस्बासीसबसङे भेटघाट करल्कै। तकरबाद फेनो एन्टिओखिया सहर ज्याके 23कुछदिन तक ओतै रहलै। तकरबाद फेनो उ गलातिया आ फिरिगिया इलाकाके ठामसब हैत, सब ठाममे रहल परभुके बिस्बासीसबके बिस्बासमे बलगर बनाइत गेलै।
अपोलस एफिसस सहरमे
24तकरबाद अपोल्लोस नामके एकटा यहुदी लोक एफिसस सहरमे एलै जे अलेकजेन्डरिया सहरमे जलमल रहै। उ बाजैले सकैबला आ धरमसास्तरके ग्याता छेलै। 25अते ओकरा एफिससमे मुक्ती दैबला परभु येसुके बारेमे सिक्छा मिलल रहै। उ बहौत जोसके साथ येसुके बारेमे असलसे सिखाबैत रहै तैयो ओकर ग्यान बप्तिस्मा दैबला युहन्ना तकमे सिमीत छेलै। 26उ यहुदीसबके सभाघरमे निरधकसाथ सुसमाचार सुनाबे लाग्लै। ओकर सुसमाचार सुइनके पिरिस्किला आ अकिलास ओकरा आपन घरमे ल्यागेलै। ओते उसब परमेस्वरके मुक्तीके उपायके असलसे बखान कैरके बुझ्हा देल्कै।
27तकरबाद अपोलस अखैया इलाकामे जाइके बिचार करल्कै। एफिससमे रहल परभुके बिस्बासीसब ओकरा जाइले उत्साह देल्कै तब अपोलसके स्वागत करिहे कैहके ओते रहैबला चेलासबके एकटा चिठी लिखके पठाइल्कै। अखैया पुगलाके बाद अपोलस ओते परभुके अनुगरहके कारन बिस्बास करैबलासबके बहौत सहायता करल्कै। 28कथिलेत ओते भेल्हा यहुदीसबसङे लोकसबके अगा तरक-बितरक करैतखिना उ धरमसास्तरके बातसब ल्याके परभु येसुवे मुक्ती दैबला खिरिस्ट चियै तकर परमान द्याके ओकरासबके चुप लगादेल्कै।
Currently Selected:
परेरित 18: MTH
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
