परेरित 14
14
पावल आ बरनाबास आइकोनियन सहरमे
1एन्टिओखिया सहरमे भेल घटना जखा आइकोनियन सहरमे सेहो भेलै। पावल आ बरनाबास यहुदीसबके सभाघरमे ढुइकके एहेन उपदेस देल्कै, कि ओतेका बहुतो यहुदी आ गिरिक लोकसब परभु येसु खिरिस्टमे बिस्बास करल्कै। 2महज बिस्बास नै करैबला यहुदीसब गैर-यहुदीसबके उस्काके परभुमे बिस्बास करैबला लोकसबके बिरोध करैले लगाइल्कै। 3पावल आ बरनाबास ओते बहौत दिनतक रहलै। उसब निडर भ्याके परभु येसुके खातिर परचार करैत रहलै। परभु ओकरासबके हाथसे चेन्हासब आ अच्चमके कामसब कैरके आपन किरपाके बिसयमे ओकरासबके परचारके सत ठहराइल्कै। 4महज सहरके लोकसब दुइटा गुटमे बाँटल गेलै। कुछ लोक यहुदी दिसन त कुछ लोक परेरितसब दिसन भेलै। 5तब गैर-यहुदीके लोक आ यहुदी लोकसब ओकरासबके आपने सासकसब सङे मिलके पावल आ बरनाबासके अपमान करैले आ पथलसे मारैके मन करल्कै। 6महज यि बात पावल आ बरनाबास बुझ लेल्कै, तब तुरन्त लुकोनिया इलाकाके लुस्तरा आ डरबीके सहर दिसन भाइगके गेलै, 7आ उसब ओतै निरन्तर सुसमाचार परचार करैत रहलै।
लुस्तरा आ डरबी सहरमे
8लुस्तरा सहरमे एकटा जलमेसे नेङर लोक रहै छेलै। उ कहियो नै चल-फिर करने रहै। 9पावल जे बोलैत रहै से उ सुनैछेलै। पावल उ लोकके निक हेबे सक्बै से बिस्बास देखके सिधा ओकर दिसन ताकल्कै। 10आ जोरसे अबाज निकाइलके कहल्कै, “तोहर टाङके भरमे ठार हो!” तब उ लोक सुनैत मातर उइठके चलेलाग्लै।
11जब लोकसब पावलके करल यि काम देखल्कै, तब उसब लुकोनियाके भसामे बरका जोरसे कहल्कै, “देबतासब लोकके भेसमे हमरौरके लग एलछै।” 12उसब बरनाबासके “जिउस देबता” आ पावलके “हिरमेस देबता” कहेलाग्लै, कथिलेत यि सब बाजैबलासबके मुख लोक छेलै। 13जिउस देवताके मन्दिर सहरके कातमे छेलै। उ मन्दिरके पुजारी बरका भिर सङे बरनाबास आ पावल लग बैलभोग चरहाइले चरहौवा आ फुलाके मलासब ल्याके सहर ढुकैबला देहरी लग एलै।
14महज जब परेरितसब, बरनाबास आ पावल यि बात सुनल्कै, तब उसब आपन बस्तर फाइरके दौरते लोकसबके बिचमे गेलै आ कहल्कै, 15“यौ साथीसब, अहाँसब कथिले एहेन काम करैचियै? हम्हुसब त अहैसब जखा दुख-सुख भोगैबला लोकसब चियै आ अहाँसब यि मुरुतके पुजा-पाठ करैले छोइरके जिबित परमेस्वर जे अकास, पिरथिबी, समुन्दर आ ओइमे जे कुछो छै, ओइसबके बनाइनेछै तैमे बिस्बास करु कैहके सुसमाचार सुनाबैले एलचियै। 16बितलहा पुस्तामे सब जातीसबके अपने-आपके रितमे चलैले देल्कै। 17तैयो उ आपन भलाइके असल कामसब दुवारा लोकसबके आपन बारेमे गबाही दैत रहलै। कथिलेत उ अकाससे पानी बरसाइछै आ ठिक समय पिरथिबीमे उब्जा दैछै। अहाँसबके भोजन जुटाबैछै आ अहाँसबके मन आनन्दित करैछै।” 18यि सब बात कैहके उसब मुस्किलसे लोकसबके बैलभोग चरहाइले रोकल्कै।
19तकरबाद कुछ यहुदीसब एन्टिओखिया आ आइकोनियनसे ओते एलै आ लोकसबके आपन पक्छमे कैरके पावल उपर पथलबाही कराइल्कै। उ मरगेल हेतै कैहके ओकरा घिस्याइत लज्याके सहरसे बाहर फेकदेल्कै। 20महज जब ओते बिस्बासीसब ओकर कात-करौतमे जम्मा भेलै तब उ उइठके सहर दिसन गेलै। तकर बिहानके उ आ बरनाबास सङे निकैलके डरबी चैलगेलै।
सिरियाके एन्टिओखियामे बरनाबास आ पावल घुइमके एलै
21बरनाबास आ पावल डरबी सहरमे परचार कैरके बहौतके परभु येसुके चेला बनाइल्कै। तकरबाद उसब लुस्तरा, आइकोनियन आ पिसिदिया इलाकाके एन्टिओखियामे घुइमके एलै। 22उसब ओइठाम परभुके बिस्बासीसबके हिम्मत बरहाइत ओइसबके बिस्बासमे अस्थिर रहैले हौसला दैत रहलै आ कहैत रहलै, “परमेस्वरके राजमे पुगैसे पैहने अपनासबके बहौत दुख सहे परत।” 23जब उसब ओइसबके सब मन्डलीमे रेखदेख करैबलासब नियुक्त करल्कै, तब परथना आ उपासे रैहके आपन बिस्बास करल परभुमे ओइसबके सोइप देल्कै।
24तकरबाद उसब पिसिदिया इलाका हैत पामफिलिया इलाकामे घुइमके एलै। 25ओहै परदेसके परगा सहरमे सुसमाचार सुन्याके उसब अटालिया सहरमे गेलै। 26तब ओतेसे उसब पानी जहादमे चहैरके एन्टिओखिया सहरमे गेलै, जते परभुमे बिस्बास करैबला लोकसब बरनाबास आ पावलके परमेस्वरके किरपामे सौपके परचारके काममे पठाइने छेलै, से काम पुरा कैरके एलै।
27बरनाबास आ पावल एन्टिओखियामे पुग्लै तब ओते मन्डलीके सब बिस्बासीके बोलाइल्कै। तब ओइसबके सुनाइल्कै जे परमेस्वर ओकरासबसङे केहन-केहन काम करल्कै आ कनङके उ गैर-यहुदीसबके खातिर बिस्बासके केबार खोइलदेल्कै। 28तब उसब एन्टिओखिया मन्डलीके बिस्बासीसब सङे बहौत दिनतक रहलै।
Currently Selected:
परेरित 14: MTH
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
