मर्कुस् 7
7
पेठीम्की बारेरी लोप्पल
(मत्ती १५:१-९)
1यरुसलेम सहर् ग्यम्से खबे फरीसीमातेङ् धर्म लोप्पोन्मा येसु मुबे ग्लारी गोर्ले र्हुब् तज्यी। 2ओसेम् थेङ्यीमाचे येसुइ डबमाचे या अख्रुनले चटीबल म्रङ्ज्यी। 3फरीसीमातेङ् यहुदीमा जम्मचे थेङ्यीमाकी म्हेमेमा य्हङ्सेइ पेठीम् अनुसार टोप्ले या अख्रुगदे चब अच। 4चोदेकीनो अय्हीन्, थेङ्यीमाचे बजार ग्यम्से खबतेङ् ख्रुइ अलगदे तेएनो अच। ओसेम् थेङ्यीमाचे म्हन्दीथोबे चोतेबे पेठीम्मा ल्होल्होएनो य्हक्को मुब। थेङ्यीमाचे थाल्मा, खोरेमा, तङ्लोमाएनो पेठीम् अनुसारनो म्यप्प।
5होत्तज्यीम् फरीसीमातेङ् धर्म लोप्पोन्माचे थेङ्त, “तले थेङ्की डबमाचे म्हेमेमाकी पेठीम् अनुसार थेङ्यीमाचे या अख्रुनले चब?” बी ङ्योत्ज्यी।
6येसुचे थेङ्यीमात सुङ्ज्यी, “यसैया अगम्बक्तचे ब्रीबे चु तम् एङ्यी कपटीमात टोप् तब। पर्मेस्वर्चे चोले सुङ्बल मुब-
‘चु म्हीमाचे ङत सुङ्चेकीनो स्हेस स्य्हेङ्ब
तर थेङ्यीमाकी सेम् ङ ग्यम्से य्हक्को थारीङ् मुब।
7थेङ्यीमाचे ङत भ्युले तेन्ब, तलेपङ्सम् थेङ्यीमाचे म्हीमाचे स्य्हेङ्बे नीयम्माकीनो लोप्प।’#यसैया २९:१३
8“एङ्यीमाचे पर्मेस्वर्चे कुल्जेत्पे तम् अङ्येन्नले म्हीमाकी पेठीम्त ङ्येन्ब।”
9येसुचे देबेएनो सुङ्ज्यी, “एङ्यीमाचे र्हङ्की पेठीम् म्हन्दीबरी पर्मेस्वर्चे कुल्जेत्पे तम् गत्ते चनाखोले पीत्लाब। 10तलेपङ्सम् मोसाचे पङ्बल मुब, ‘र्हङ्की अप-अमत स्हेस स्य्हेङो।’#प्रस्थान २०:१२; ब्यबस्था ५:१६ ओसेम्, ‘खल्चे र्हङ्की अप-अमत स्हेस अस्य्हेङ्नले अतबे तम् पङ्ब हुजुत सेत्नोथोब।’#प्रस्थान २१:१७; लेबी २०:९ 11तर एङ्यीमाचेमी म्हीमात र्हङ्की अप-अमत, ‘थेङ्माचे ङ ग्यम्से यङ्थोस्येकी स्हे कुर्बान य्हीन्ब’ (कुर्बान पङ्बलम् पर्मेस्वर्त पीन्बल य्हीन्ब) बी पङ्ज्यीम् लोप्ज्यी पङ्सम्, 12एङ्यीमाचे हुजु म्हीमात र्हङ्की अप-अममाइ लागीरी तेएनो स्य्हेङ् अबुङ्। 13चोले एङ्यीमाचे र्हङ्की पेठीम्मा म्हन्दीज्यीम् पर्मेस्वर्की फ्रोइत पीत्लाब। ओसेम् चोतेबे लक्मा ल्होल्होएनो य्हक्को स्य्हेङ्बल मुब।”
म्हीत नइनलबे तम्मा
(मत्ती १५:१०-२०)
14येसुचे देबेएनो य्हक्को म्हीमात र्हङ्ज ङ्होत्जेत्ज्यीम् सुङ्ज्यी, “एङ्यीमा जम्मचेनो ङइ तम् ङ्येन्ज्यीम् गोउ। 15तइ चबे स्हेचेएनो म्हीत नइनअल। तर म्हीइ सेम् ग्यम्से डोङ्बे अज्यबे तम्चेनो म्हीत नइनलब। 16[खल्ल न्हबीङ् मुब, हुजुचे थ्येःखइ।”]#७:१६ चु पद् य्हक्को बर्स ङोन्ग्यम्की बाइबल्मारी ब्रीबल अरे।
17येसु म्हीमात पीत्थेन्ज्यीम् दीम्न्हङ् स्येःजेत्ज्यी। ओसेम् थेङ्की डबमाचे चु तम्की अर्थ ङ्योत्ज्यी। 18येसुचे थेङ्यीमात सुङ्ज्यी, “देरेसम्म एङ्यीमाचेएनो गोबल अरे? एङ्यीमात था अरेउ? सुङ् ग्यम्से न्हङ्री वङ्बे स्हेचे म्हीत नइनअल। 19तलेपङ्सम् हुजु म्हीइ सेम्न्हङ् अय्हीन्, तर फोन्हङ् वङ्ब, ओसेम् हुजु ल्ही ग्यम्से डोङ्य्हर्ब” बी सुङ्ज्यी। (चोले येसुचे जम्म थोइ चबे स्हेमा सुद्द य्हीन्ब बी सुङ्जेत्ज्यी।)
20येसुचे देबेएनो सुङ्ज्यी, “सेम्न्हङ्चे दोरी डोङ्बे तम्माचे म्हीत नइनलब। 21तलेपङ्सम् म्हीइ सेम्न्हङ्से नइबे तम्मा म्हेन्ब, बेस्या स्य्हेङ्ब, य्होलब, म्ही सेत्प ओसेम् ब्यभीचार् स्य्हेङ्ब, 22लोभ स्य्हेङ्ब, अज्यबे लक् स्य्हेङ्ब, ठग्तीब, छरा तब, स्हेर्ब, खीसइतीब, ‘ङ र्हङ्ब खलेएनो अरे’ पङ्ब ओसेम् अम्हेन्नले लक्मा स्य्हेङ्ब। 23म्हीइ सेम्न्हङ्चे डोङ्बे चोतेबे अज्यबे जम्म तम्माचे म्हीत नइन तनलब।”
यहुदी अय्हीन्बे अमकोलइ बीस्वास्
(मत्ती १५:२१-२८)
24येसु हुजु ग्ला ग्यम्चे टुरोसतेङ् सीदोन प्रदेस्की सहर्क्योर् स्येःज्यी। खल्चेएनो था अङ्खइ बी थेङ् दीम् गीःरी स्येःजेत्ज्यी। तर म्हीमाचे ग्योनेनो था यङ्ज्यी। 25हुजु बेलोरीनो अमकोल गीःचे थेङ्की बारेरी थ्येःज्यी। ओसेम् थ्येःब साच्चेनो थेङ्ज खज्यीम् थेङ्की स्य्हब्री पब्लु लज्यी। हुजु अमकोलइ जमेता म्हङ् स्यप्पल मुबल। 26हुजु अमकोलम् सीरीया य्हुल्की फोनीके प्रदेस्री न्हबे यहुदी अय्हीन्बे अमकोल मुबल। ओसेम् थेचे, “ङइ जमे ग्यम्से म्हङ्त ल्हब्लाजेतो” बी येसुत फ्या स्य्हु लज्यी। 27तर येसुचे सुङ्ज्यी, “ङोन्ग्यम् कोलमात म्रेन्नले चबुङो। तलेपङ्सम् कोलमाकी चब ब्येन्ज्यीम् नीकीमात पीन्ब ज्यब अय्हीन्।”
28तर हुजु अमकोलचे, “य्हीन्बनो प्रभु, तर नीकीमाचेएनो कोलमाचे चबे ग्लाचे तइबे चबइ डेःमा चब” बी पङ्ज्यी। 29चु थ्येःज्यीम् येसुचे अमकोलत, “एचे चोले पङ्बल तज्यीम् ए दीम्री ङ्यीउ। एइ जमे ग्यम्से म्हङ् डोङ्ज्यीम् य्हर्बल मुब” बी सुङ्ज्यी। 30थे दोःज्यीम् दीम्री ङ्यीमम् जमे ग्लारी न्हुटीबल म्रङ्ज्यी। ओसेम् जमेइ ल्ही ग्यम्से म्हङ् डोङ्य्हर्बल मुबल।
येसुचे लेम्ब म्हीत फेन्न लजेत्पल
31येसु टुरोस प्रदेस् ग्यम्से डोङ्ज्यीम् सीदोनकी सहर तज्यीम् गालील ग्येक्योर स्येज्यी, ओसेम् डेकापोलीस पङ्बे सहर च्यीरी स्येःजेत्ज्यी। 32हुजुरी म्हीमाचे न्हादीङ्तेङ् लेम्ब तबे म्ही गीःत थेङ्ज बज्यी। ओसेम् थेङ्यीमाचे हुजु म्हीत थेङ्की फ्याचे छुज्यीम् फेन्नलबीनो बी थेङ्त फ्या स्य्हु लज्यी। 33येसुचे हुजु म्हीत म्हीमान्हङ्चे थारीङ् बोर्ज्यीम् थेइ न्हबीङ्री थेङ्की फ्या जुमी जङ्ज्यी। ओसेम् येसुचे र्हङ्की फ्या जुमीरी थोः साज्यीम् हुजु म्हीइ ले छुजेत्ज्यी। 34ओसेम् येसुचे स्वर्गतोर् स्हीज्यीम् र्हीङ्बे सा डुत्ज्यीम् हुजु म्हीत, “इफ्फाता” बी सुङ्ज्यी। चु पङ्बलमी “ठोङो” पङ्बल य्हीन्ब। 35होले सुङ्ब साच्चेनो हुजु म्हीचे न्हबीङ् थ्येःज्यीम् तमएनो ज्येन्ले पङ्ब छ्येज्यी। 36येसुचे थेङ्यीमा जम्मतनो, “चु तम् खल्तेएनो थस्येतो” बी कुल्जेत्ज्यी। तर थेङ्चे गदे थस्येतो बी कुल्जेत्लेएनो म्हीमाचे झेन् य्हक्को स्येत्ज्यीम् ब्रज्यी। 37चु तम् थ्येःबमा जम्मनो तेङेन् तज्यीम्, “थेङ्चे स्य्हेङ्जेत्पे लक्मा जम्मनो ज्यबल मुब। थेङ्चे न्हादीङ्मातएनो थ्येःन लजेत्पल मुब। ओसेम् लेम्बमात तम् पङ्ब खम्नलजेत्प” बी पङ्ज्यी।
Currently Selected:
मर्कुस् 7: WTDG
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
