मर्कुस् 8
8
येसुचे हजार ब्ली म्हीत ख्वाजेत्पल
(मत्ती १५:३२-३९)
1हुजु बेलोरी देबेएनो ल्हो-ल्हो य्हक्को म्हीमा र्हुब् तज्यी। थेङ्यीमातेङ् चबे स्हे तेएनो अरेबल तज्यीम् येसुचे डबमात र्हङ् मुबे ग्लारी ङ्होत्जेत्ज्यीम् सुङ्ज्यी, 2“चु म्हीमात म्रङ्ज्यीम् ङत दय खज्यी। तलेपङ्सम् थेङ्यीमा ङतेङ् बक्च्य टीबल सोम्रेत् तज्यी। ओसेम् थेङ्यीमातेङ् चबे स्हे तेएनो अरे। 3ओसेम् थेङ्यीमात फोइतेन्नो दीम्री पीत्ज्यी पङ्सम् थेङ्यीमा ख्रेन्ज्यीम् ग्यम्रीनो गुर्स्ये मुब। तलेपङ्सम् थेङ्यीमान्हङ्री डेत्-डेत्मी य्हक्को थारीङ् ग्यम्से खबल मुब।” 4ओसेम् डबमाचे येसुत, “चु उजाड-ग्लारी चु म्हीमात खले चब बज्यीम् पीन्स्ये?” बी पङ्ज्यी। 5येसुचे थेङ्यीमात, “एङ्यीमातेङ् ग्येङ् गदे मुब?” बी ङ्योत्जेत्ज्यी। थेङ्यीमाचे, “ग्येङ् ङ्यीस् मुब” बी पङ्ज्यी।
6हुजु लीप्चे येसुचे म्हीमात पङ्गर्री टीउ बी सुङ्ज्यीम् ग्येङ् ङ्यीस् थोज्यीम् पर्मेस्वर्त होर्छ्ये न्हङ्न्ज्यी। ओसेम् म्हीमात ग्येङ् क्युत्ज्यीम् जुपीन्खइ बी डबमात न्हङ्न्ज्यी। ओसेम् डबमाचे म्हीमात जुपीन्ज्यी। 7थेङ्यीमातेङ् तर्ङ ज्यीदमाएनो चेक् मुबल। ओसेम् थेङ्चे हुजु तर्ङ थोज्यीम् पर्मेस्वर्त व्होर्छ्ये न्हङ्ज्यीम् म्हीमात जुबीनो बी डबमात न्हङ्जेत्ज्यी। 8म्हीमा जम्मचेनो म्रेन्नले चज्यी। थेङ्यीमाचे ल्हाबलमा डलो ङ्यीस् र्हुब् लज्यी। 9हुजुरी चबे म्हीमा हजार ब्लीइ था मुबल। ओसेम् येसुचे थेङ्यीमात दीम्री पीत्ज्यी। 10होले तब साच्चेनो येसु डबमातेङ् दोङ्गरी क्रेत्जेत्ज्यीम् दलमनुथा पङ्बे ग्लाक्योर् स्येःजेत्ज्यी।
फरीसीमाचे चीनो र्हीत्पल
(मत्ती १६:१-४)
11फरीसीमा येसु मुबे ग्लारी खज्यीम् तम् ज्योप्प तीप्ज्यी। थेङ्यीमाचे येसुत जाच्तीबरी, “ङ्यीमात स्वर्ग ग्यम्से चीनो गीः ङोनो” बी पङ्ज्यी।#मत्ती १२:३८; लुका ११:१६ 12येसुचे चु थ्येःब बीसेम् र्हीङ्बे बुः डुत्ज्यीम्, “तीन्हम्स्य्होकी चु म्हीमाचे तले चीनो म्हइबल? ङ एङ्यीमात देमेन्नो पङ्ब, चु पुस्तइ म्हीमात तइ चीनोएनो पीन्स्ये अरे” बी सुङ्ज्यी।#मत्ती १२:३९; लुका ११:२९ 13ओसेम् थेङ्यीमात ख्लेथेन्ज्यीम् थेङ् देबेएनो दोङ्गरी क्रेत्ज्यीम् डबमातेङ् बक्च्य ग्येइ क्योम्सङ् स्येःजेत्ज्यी।
फरीसीतेङ् हेरोदकी खमीर्
(मत्ती १६:५-१२)
14डबमाचे ग्येङ् बोर्ब म्लेत्पल मुबल। ओसेम् दोङ्गरी थेङ्यीमातेङ् ग्येङ् गीःकीनो मुबल। 15येसुचे थेङ्यीमात चेतावनी न्हङ्ज्यीम्, “एङ्यीमा फरीसीमातेङ् ग्यल्बो हेरोदकी खमीर् ग्यम्से जोगइतीज्यीम् टीउ” बी सुङ्ज्यी।#लुका १२:१ 16ओसेम् डबमाचे, “ङ्य्हङ्मातेङ् ग्येङ् अरेबल तज्यीम् थेङ्चे चोले सुङ्बल तल” बी थेङ्यीमान्हङ् तम् पङ्ब छ्येज्यी। 17येसुचे चु तम् था यङ्ज्यीम् थेङ्यीमात ङ्योत्जेत्ज्यी, “एङ्यीमातेङ् ग्येङ् अरे बी तले पङ्ब? एङ्यीमाचे स्येःबल अरे? एङ्यीमाचे गोबल अरे? एङ्यीमाकी सेम् दवम् सम्मनो कोङ्बलनो मुब? 18एङ्यीमाल मीः मुज्यीमएनो म्रङ्अखमो? न्हबीङ् मुज्यीमएनो थ्येःअखमो? एङ्यीमात व्हल् अरे?#यर्मीया ५:२१; इजकीएल १२:२; मर्कुस् ४:१२ 19ङचे हजार ङ्ह म्हीमात ग्येङ् ङ्हचे ख्वाबल एङ्यीमाचे म्लेत्ज्यी? एङ्यीमाचे ल्हाबे ग्येङ्मा डलो गदे र्हुब्ज्यी?” ओसेम् थेङ्यीमाचे “डलो चुङ् ङ्ही” बी पङ्ज्यी। 20येसुचे देबेएनो, “ओसेम् ङचे हजार ब्ली म्हीमात ग्येङ् ङ्यीस् ग्यम्से ख्वाबे बेलोरी एङ्यीमाचे ल्हाबे ग्येङ्मा गदे डलो र्हुब्ज्यी?” बी ङ्योत्जेत्ज्यी। ओसेम् थेङ्यीमाचे पङ्ज्यी, “डलो ङ्यीस्।” 21थेङ्चे थेङ्यीमात, “एङ्यीमाचे देरेसम्मनो गोबल अरे?” बी सुङ्ज्यी।
येसुचे कन म्हीत फेन्न लजेत्पल
22हुजु लीप्चे येसुतेङ् थेङ्की डबमा बेथसेदारी ब्योन्खजेत्ज्यी। ओसेम् म्हीमाचे कन म्ही गीःत थेङ्ज बज्यीम्, “चु म्हीत छुपीन्ज्यतो” बी फ्या स्य्हु लज्यी। 23येसुचे हुजु कन म्हीत ब्रेत्ज्यीम् नम्स न्हङ्चे फीर्च्योर् बोर्जेत्ज्यी। ओसेम् थेइ मीः ङ्य्हीरीनो थो साज्यीम् थेइ जोरी र्हङ्की फ्या थेन्जेत्ज्यीम्, “एचे तेए म्रङ्ब?” बी ङ्योत्जेत्ज्यी। 24ओसेम् हुजु म्हीचे खनबीबीनो च्याज्यीम्, “ङचे म्हीमात दोङ्बोमा र्हङ्ले म्रङ्टीब ओसेम् थेङ्यीमा ब्रटीबल मुब” बी पङ्ज्यी। 25ओसेम् येसुचे देबेएनो थेइ मीः ङ्य्हीरीनो फ्या थेन्जेत्ज्यी। ओसेम् थेचे ज्यनले च्यामम् जम्मनो स्हेमा ज्यनले म्रङ्ज्यी। 26हुजु लीप्चे येसुचे थेत, “चु नम्सरी अवङ्नले सर्-सर् दीम्री ङ्यीउ” बी सुङ्ज्यी।
येसु खल य्हीन्ब?
(मत्ती १६:१३-२०; लुका ९:१८-२१)
27हुजु लीप्चे येसु डबमातेङ् कैसरीया फीलीप्पी पङ्बे सहरकी रेइकी नम्समारी स्येःज्यी। ग्यम्री स्येःटीमम् येसुचे र्हङ्की डबमात चोले ङ्योत्जेत्ज्यी, “म्हीमाचे ङत खल पङ्ब?” 28थेङ्यीमाचे पङ्ज्यी, “थेङ्त डेत्चे बप्तीस्मा पीन्बे युहन्ना पङ्ब, कोइचे एलीया पङ्ब। ल्हो-ल्हो डेत्-डेत्चेम् अगम्बक्तमा न्हङ्री गीः पङ्ब।”#मर्कुस् ६:१४,१५; लुका ९:७,८ 29ओसेम् येसुचे, “तर एङ्यीमाचेम् ङत खल पङ्ब स्यीम्?” बी थेङ्यीमात ङ्योत्जेत्ज्यी। पत्रुसचे, “थेङ् मुक्ती न्हङ्हबे ख्रीस्ट् य्हीन्ब” बी पङ्ज्यी। #युहन्ना ६:६८,६९ 30ओसेम् येसुचे थेङ्यीमात, “चु तम् खल्तेएनो थस्येतो” बी कुल्जेत्ज्यी।
येसुचे र्हङ् स्यीस्येकी बारेरी सुङ्बल
(मत्ती १६:२१-२३; लुका ९:२२)
31हुजु लीप्चे येसुचे डबमात र्हङ्की बारेरी चोले सुङ्ज्यी, “म्हीइ जचे य्हक्को दुख नाथोस्ये मुब। ओसेम् थेत अगुवामा, ङ्हच्छ्यङ् लम्बुमा ओसेम् धर्म लोप्पोन्माचे बीरोद् लज्यीम् सेत्स्ये मुब। तर थे सोम्रेत् लीप्चे दोज्यीम् सोस्ये मुब।” 32चोले थेङ्चे डबमात चु तम् गोनलजेत्ज्यी। ओसेम् पत्रुसचे थेङ्त ग्ला गीरी बोर्ज्यीम्, “चोले थसुङो” बी बराज्यी। 33तर येसुचे डबमा पट्टी दोज्यीम् स्हीःज्यी। ओसेम् पत्रुसत बराज्यीम्, “सैतान्, ए ङ ग्यम्से थारीङ् य्हरो! एइ तम् पर्मेस्वर् ग्यम्से अय्हीन्, तर म्ही ग्यम्से य्हीन्ब” बी सुङज्यी।
डबमाचे नाथोबे दुख
(मत्ती १६:२४-२८; लुका ९:२३-२७)
34हुजु लीप्चे येसुचे र्हङ्की डबमातेङ् हुजुरी मुबे म्हीमात ङ्होत्ज्यीम् सुङ्ज्यी, “खल म्ही पङ्लेनो ङइ लीप्चे ब्रबे सेम् लज्यी पङ्सम् थेचे र्हङ्तनो म्लेत्थोब। ओसेम् थेचे र्हङ्की क्रुस् नाज्यीम् ङइ लीप्चे ब्रथोब। #मत्ती १०:३८; लुका १४:२७ 35तलेपङ्सम् खल्चे र्हङ्की जीवन थर्नलब म्हइज्यी, थेइ जीवन म्हस्ये मुब। तर खल्चे र्हङ्की जीवन् ङतेङ् ङइ ज्यबे सम्तर्की लागीरी पीन्ज्यी हुजुचे जीवन यङ्स्ये मुब।#मत्ती १०:३९; लुका १७:३३; युहन्ना १२:२५ 36म्हीचे जम्बुलीङ्नो र्हङकी यारी कीन्लेएनो र्हङ्की जीवन् म्हज्यी पङ्सम् थेत त ज्यब तल? 37म्हीचे खेमेनो अबेबे जीवन् यङ्बे लागीरी पर्मेस्वर्त पीन्खम्बल तेएनो अरे। 38चु ब्यभीचारीमातेङ् पापी पुस्ताइ म्हीमा ङतेङ् ङइ वचनत पेत्ज्यी पङ्सम् म्हीइ जएनो र्हङ्की अपइ महीमातेङ् पबीत्र स्वर्गदुत्मातेङ् युबे बेलोरी हुजुत र्हङ्ल पङ्बरी थेङ् पेत्स्ये मुब।”
Currently Selected:
मर्कुस् 8: WTDG
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
