मर्कुस् 6
6
नासारतरी येसुत बीस्वास् अस्य्हेङ्बल
(मत्ती १३:५३-५८; लुका ४:१६-३०)
1हुजु ग्ला पीत्थेन्ज्यीम् येसु र्हङकी नम्स नासारतरी स्येजेत्ज्यी। ओसेम् थेङ्की डबमाएनो थेङ्तेङ् ङ्यीज्यी। 2दुःब न्हबे दीन्री थेङ्चे यहुदीमा र्हुब् तबे दीम्री लोप्प तीप्जेत्ज्यी। थेङ्की फ्रोइ ङ्येन्बे म्हीमा तेङेन् तज्यीम् चोले पङ्ज्यी, “चु म्हीचे चोतेबे तम् खन ग्यम्से यङ्ज्यी? चुजे चु खतेबे लो यङ्बल? थेचे खले चोतेबे तेङेन्की लक्मा स्य्हेङ्ब खम्ब? 3चु म्ही मरीयमकी ज सीकर्मी अय्हीनो स्यीम्? ओसेम् थे याकुब, योसेफ, यहुदातेङ् सीमोनकी अज्यो अय्हीनो स्यीम्? थेइ अङमाएनो ङ्य्हङ्मातेङ्नो बक्च्य चुरी अरेउ स्यीम्?” चोले म्हीमाचे थेङ्त बीस्वास् अस्य्हेङ्। 4हुजु लीप्चे येसुचे सुङ्ज्यी, “अगम्बक्तमात खन पङ्लेनो स्हेस स्य्हेङ्ब। तर र्हङ्की नम्सइ म्हीमातेङ्, र्हङ्की म्हेम्यमाचेकीनो स्य्हेस अस्य्हेङ्।” #युहन्ना ४:४४ 5ओसेम् येसुचे हुजु ग्लारी ल्हो-ल्हो तेङेन्की लक्मा तेएनो स्य्हेङ् अखम्#६:५ ल्हो-ल्हो तेङेन्की लक्मा तेएनो स्य्हेङ् अखम्म्हीमाचे थेङ्त बीस्वास् अलबल तज्यीम् थेङ्चे ल्हो-ल्हो तेङेन्की लक्मा स्य्हेङ्अजेत्। । डेत्-डेत् नबे म्हीमातकीनो थेङ्की फ्याचे छुज्यीम् थेङ्यीमात फेन्न लजेत्ज्यी। 6थेङ्यीमाकी अबीस्वास् म्रङ्ज्यीम् येसु तेङेन् तजेत्ज्यी।
येसुचे चुङ् ङ्ही डबमात प्रचार स्य्हेङ्बरी पीत्जेत्पल
(मत्ती १०:५-१५; लुका ९:१-६)
ओसेम् थेङ् नम्स-नम्समारी लोप्ज्यीम् स्येःज्यी। 7थेङ्चे चुङ् ङ्ही डबमात ङ्होत्जेत्ज्यी। ओसेम् थेङ्यीमात म्हङ् ल्हप्पे अधीकार् न्हङ्ज्यीम् ङ्य्ही-ङ्य्हीले जुज्यीम् पीत्जेत्ज्यी। 8येसुचे थेङ्यीमात सुङ्ज्यी, “एङ्यीमाचे ग्यम्की लागीरी दाबे बेर्क बीम ल्हो-ल्हो चबे स्हे, झोल ओसेम् टङ थनागो। 9पनेइ येनो, तर ल्हो-ल्हो पोबे येन् थनागो। 10खजु दीम्री एङ्यीमा वङ्ब, हुजु नम्स अपीत्गदे हुजु दीम्रीनो टीउ। 11ओसेम् खजु ग्लारी एङ्यीमात स्वागत अस्य्हेङ्ज्यीम् एङ्यीमाकी तम् अङ्येन्ज्यी हुजु ग्ला ख्लेथेन्बे बेलोरी थेङ्यीमात चेतावनीकी लागीरी र्हङ्की कङ्की बुप्फ्र तथेनो।”#प्रेरीत् १३:५१; लुका १०:४-११
12हुजु लीप्चे थेङ्यीमा य्हर्ज्यीम् म्हीमात, “पस्चताप् स्य्हेङो” बी प्रचार स्य्हेङ्ब तीप्ज्यी। 13ओसेम् थेङ्यीमाचे म्हङ् स्यप्पे म्हीमा ग्यम्से य्हक्को म्हङ्मा ल्हब्लाज्यी। ओसेम् नबे म्हीमा य्हक्कोत छ्युकु स्य्हुत्पीन्ज्यीम् फेन्न लज्यी। #याकुब ५:१४
बप्तीस्मा पीन्बे युहन्ना स्यीबल
(मत्ती १४:१-१२; लुका ९:७-९)
14येसुचे स्य्हेङ्जेत्पे तेङेन्की लक्की बारेरी ग्यल्बो हेरोदचेएनो थ्येःज्यी, तलेपङ्सम् खन बीबीनो ग्लामारी येसुइ बारेरी चर्च तबल मुबल। गदे म्हीमाचे, “बप्तीस्मा पीन्बे युहन्ना स्यीब ग्यम्से सोनेम्। होत्तज्यीम् थे ग्यम्से चोतेबे सक्तीसाली लक्मा स्य्हेङ्बल य्हीन्ब” बी पङ्टीब मुबल।#मत्ती १६:१४; मर्कुस् ८:२८; लुका ९:१९ 15तर ल्हो-ल्हो म्हीमाचेमी, “थे एलीया अगम्बक्त य्हीन्ब।” ओसेम् ल्हो-ल्होमाचेम्, “चुमी दङ्बोइ अगम्बक्तमा र्हङ्बे अगम्बक्त गीः य्हीन्ब” बी पङ्ज्यी। 16तर हेरोदचे चु थ्येःब बीसेम्, “चु बप्तीस्मा पीन्बे युहन्नानो य्हीन्ब। ङचे थेइ क्र थाबुङ्बल मुबल, देरेम् थे स्यीब ग्यम्से सोनेम्!” बी पङ्ज्यी।
17हेरोदचे र्हङ्चेनो युहन्नात चुङ्पुङ्ज्यीम् खीज्यीम् जेल्री युबल मुबल। तलेपङ्सम् हेरोदचे थेइ अले फीलीपकी म्रीङ् हेरोदीयासत भ्या स्य्हेङ्बल मुबल।#लुका ३:१९,२० 18ओसेम् बप्तीस्मा पीन्बे युहन्नाचे हेरोदत, “एचे र्हङ्की अलेइ म्रीङ्त भ्या स्य्हेङ्ब ठीक् अय्हीन्” बी पङ्बल मुबल।
19होत्तज्यीम् हेरोदीयासत य्हक्को बोमो खज्यीम् युहन्नात सेत्पे सेम् मुबल। तर हेरोद ग्यल्बो अङ्येन्बल तज्यीम् सेत्प अखम्। 20तलेपङ्सम् युहन्ना धर्मीतेङ् पबीत्र म्ही य्हीन्ब पङ्बे तम् हेरोदचे स्येःब मुबल। होत्तज्यीम् थेचे युहन्नात जोगइतीज्यीम् थेन्ज्यी। युहन्नाचे लोप्पे तम् थ्येःज्यीम् हेरोदकी सेम् तलइ-तलइ तब मुबल। होलेतलेनो थेचे युहन्नाइ तम् तङ्ज्यीम् ङ्येन्ब मुबल।
21ओसेम् हेरोद न्हबे दीन्की डोन्री हेरोदीयासचे मौक यङ्ज्यी। हेरोदचे र्हङ् न्हबे दीन्री ङ्हच्छ्यङ्-ङ्हच्छ्यङ् पदरी मुबे थेइ म्हीमा, स्यीपाइमा ओसेम् गालीलकी ल्हो-ल्हो ङ्हच्छ्यङ्-ङ्हच्छ्यङ् म्हीमात डोन् पीन्ज्यी। 22हुजु डोन्री हेरोदीयासकी जमे खज्यीम् स्यज्यी। ओसेम् हेरोद ग्यल्बोतेङ् थेइ डोम्बोमात तङ्न लज्यी। होत्तज्यीम् ग्यल्बोचे, “एत त तोब ङत र्हीतो, ङ हुजु एत पीन्स्ये मुब” बी पङ्ज्यी। 23ओसेम् ग्यल्बोचे देबेएनो सपथ चज्यीम्, “एचे त र्हीत्ज्यी हुजु ङ एत पीन्स्ये मुब। ङइ य्हुल् डेत् र्हीत्लेएनो पीन्स्ये मुब” बी पङ्ज्यी।
24ओसेम् अमकोल दोरी डोङ्ज्यीम् र्हङ्की अमत, “ङ ता र्हीत्प?” बी ङ्योत्ज्यी। थेइ अमचे, “बप्तीस्मा पीन्बे युहन्नाइ क्र र्हीतो” बी पङ्ज्यी।
25ओसेम् हुजु अमकोल ग्योन्-ग्योन्नो न्हङ्री खज्यीम् ग्यल्बो मुबे ग्लारी ङ्यीज्यीम्, “थेङ्चे ङत देरेनो बप्तीस्मा पीन्बे युहन्नाइ क्र थाल्री युज्यीम् न्हङो पङ्बे सेम् ङल मुब” बी पङ्ज्यी।
26चु थ्येःज्यीम् ग्यल्बोत य्हक्को दुख लग्तीज्यी। तर हुजुरी मुबे डोम्बोमाकी ङ्होन्सङ् र्हङ्चे पीन्ब पङ्ज्यीम् सपथ चबल तज्यीम् अबीन् पङ्अखम्। 27होत्तज्यीम् ग्यल्बोचे र्हङ्की स्यीपाइ गीःत ग्योन्नो, “युहन्नाइ क्र थाज्यीम् बोउ” बी कुल्ज्यी। ओसेम् हुजु स्यीपाइचे जेल्री ङ्यीज्यीम् युहन्नाइ क्र थाज्यी। 28ओसेम् युहन्नाइ क्र थाल्री बज्यीम् हुजु अमकोलत पीन्ज्यी। अमकोलचे हुजु बोर्ज्यीम् थेइ अमत पीन्ज्यी।
29चु तम् युहन्नाइ डबमाचे थ्येःब बीसेम् थेङ्यीमा खज्यीम् थेइ स्यीबे ल्हीःत बोर्ज्यीम् दुर्सरी थेन्ज्यी।
येसुचे हजार ङ्ह म्हीमात ख्वाजेत्पल
(मत्ती १४:१३-२१; लुका ९:१०-१७; युहन्ना ६:१-१४)
30चुङ् ङ्ही प्रेरीतमा येसु मुबे ग्लारी दोःज्यीम् खज्यी। ओसेम् थेङ्यीमाचे लोप्पलतेङ् स्य्हेङ्बे लक्मा जम्मनो थेङ्त स्येत्ज्यी। 31हुजु लीप्चे, येसुचे थेङ्यीमात, “ङ्य्हङ्मा सुन्सान् ग्लारी ङ्यीज्यीम् दुःब न्हइ” बी सुङ्ज्यी, तलेपङ्सम् हुजुरी य्हक्को म्हीमा खबतेङ् य्हर्ब स्य्हेङ्ब मुबल। होत्तज्यीम् थेङ्यीमाचे चब चबे ल्होङ्गोम् अयङ्बल मुबल। 32ओसेम् येसुतेङ् थेङ्की डबमा दोङ्गरी क्रेत्ज्यीम् थङ् तबे ग्लारी स्येज्यी। 33तर य्हक्को म्हीमाचे थेङ्तेङ् थेङ्की डबमा य्हर्टीबल म्रङ्ज्यीम् स्येज्यी। ओसेम् म्हीमा सहर्मा ग्यम्से छ्योङ्य्हर्ज्यीम् थेङ्यीमा बीम ङोन्ग्यम्नो थेङ्यीमा ङ्यीटीबे ग्लारी दोःज्यी। 34येसु दोङ्गचे फप्जेत्मम् थेङ्चे य्हक्को म्हीमात म्रङ्जेत्ज्यी। ओसेम् हुजु म्हीमात स्हीज्यीम् थेङ्की सेम्री दय खज्यी, तलेपङ्सम् थेङ्यीमा गोर्तेन् अरेबे ग्युमा र्हङ्ब मुबल। ओसेम् येसुचे थेङ्यीमात य्हक्को तम्मा लोप्प तीप्जेत्ज्यी। #गन्ती २७:१७; १ ग्यल्बो २२:१७; २ इतीहास् १८:१६; इजकीएल ३४:५; मत्ती ९:३६
35ओसेम् ङ्येस्ये तयम्बल तज्यीम् थेङ्की डबमा खज्यीम् येसुत, “देरेम् ङ्येस्ये तज्यी, ओसेम् चु थङ् तबे ग्ला मुब। 36म्हीमात पीत्जेतो, ओसेम् थेङ्यीमाचे रेइ-रेइकी नम्समारी ङ्यीज्यीम् र्हङ्की लागीरी चबे स्हे ग्लुखइ” बी पङ्ज्यी। 37तर येसुचे थेङ्यीमात, “एङ्यीमाचेनो थेङ्यीमात चब पीनो” बी सुङ्ज्यी। तर डबमाचे, “ङ्यीमाचे मन ङ्ही म्हुइकी टङ#६:३७ मन ङ्ही म्हुइकी टङ चोदे टङम् म्ही गीःकी ल ब्रेत्की म्हेला य्हीन्ब। खर्च स्य्हेङ्ज्यीम् थेङ्यीमात चबे ग्येङ् ग्लुज्यीम् पीनो बी थेङ्चे सुङ्बल?” बी पङ्ज्यी। 38येसुचे थेङ्यीमात, “एङ्यीमातेङ् ग्येङ् गदे मुब? च्यागो स्यीम्” बी सुङ्ज्यी। ओसेम् थेङ्यीमाचे च्याज्यीम्, “ग्येङ् ङ्हतेङ् तर्ङ ङ्ही मुब” बी पङ्ज्यी।
39हुजु लीप्चे येसुचे डबमात म्हीमात पीङ् पङ्गर्री दरी-दरीले टीबुङो बी कुल्जेत्ज्यी। 40होत्तज्यीम् म्हीमा खल् ङ्ह-ङ्हतेङ् खल् ङ्ही स्यी च्यी-च्यीले टीज्यी। 41ओसेम् येसुचे गेङ् ङ्हतेङ् तर्ङ ङ्य्ही कीन्जेत्ज्यीम् स्वर्गतोर् स्हीज्यीम् पर्मेस्वर्त व्होर्छ्ये न्हङज्यी। ओसेम् गेङ्त स्योइज्यीम् म्हीमात जुपीनो पङ्ज्यीम् डबमात न्हङ्ज्यी। थेङ्चे तर्ङ ङ्य्हीएनो जम्मा म्हीमात जुज्यीम् न्हङ्ज्यी। 42थेङ्यीमा जम्मचेनो म्रेन्नले चज्यी। 43ओसेम् डबमाचे ल्हाबे गेङ्तेङ् तर्ङ र्हुब लमम् डलो चुङ् ङ्ही प्लीङ्ज्यी। 44हुजुरी गेङ् चबे अपकोलमाकीनो हजार ङ्ह मुबल।
येसु यीइ जोरी ब्रजेत्पल
(मत्ती १४:२२-३३; युहन्ना ६:१५-२१)
45हुजु साच्चेनो येसुचे डबमात दोङ्गरी क्रेत्ज्यीम् ग्येइ क्योम्सङ्की बेथसेदा नम्सरी ङ्यीउ बी कुल्जेत्ज्यी। थेङ्मी म्हीमात बीद स्य्हेङ्बरी स्य्हुजेत्ज्यी। 46ओसेम् म्हीमात पीत्जेत्प बीसेम् थेङ् प्रार्थना स्य्हेङ्बरी गङ्री स्येःजेत्ज्यी। 47ङ्येस्ये तम दोङ्ग ग्येइ गुङ्री मुबल। ओसेम् ग्येइ यरी थेङ् गीःकीनो मुबल। 48थेङ्चे डबमात दोङ्ग चल्तीबरी गारो तटीबल स्हीजेत्ज्यी, तलेपङ्सम् लाब तीङङ् पट्टीचे स्यङ्टीब मुबल। ओसेम् स्य्होरी तीन् बजेक्योर् येसु ग्येइ जोचे ब्रज्यीम् डबमाज ब्योन्खज्यी। ओसेम् थेङ् दोङ्ग ख्लेथेन्ज्यीम् ङोन्ग्यम् स्येःब म्हइजेत्ज्यी।
49थेङ् ग्ये जोरी ब्रजेत्टीबल म्रङ्ज्यीम् डबमाचे, “म्हङ् खज्यी!” बी क्रीङ्ब तीप्ज्यी। 50तलेपङ्सम् थेङ्त म्रङ्ज्यीम् थेङ्यीमा जम्मनो लोङ्बल मुबल। तर थेङ्चे थेङ्यीमात ग्योन्-ग्योन्नो, “थलोङो, ङ य्हीन्ब, आर् लउ” बी सुङ्ज्यी। 51ओसेम् थेङ् थेङ्यीमातेङ् दोङ्गरी क्रेत्जेत्ज्यी, ओसेम् लाब स्यङ्ब पीत्ज्यी। चु म्रङ्ज्यीम् डबमा झेन् य्हक्को तेङेन् तज्यी। 52तलेपङ्सम् येसुचे हजार ङ्हत ख्वाजेत्पल म्रङ्ज्यीमएनो हुजुइ अर्थ म्हीमाचे गोबल अरेबल। थेङ्यीमाकी सेम् य्हक्को कोङ्ब मुबल।
53समुन्द्रइ क्योम्सङ् दोःब बीसेम् येसुतेङ् थेङ्की डबमा गनेसरेत् पङ्बे ग्लारी दोःज्यी, ओसेम् थेङ्यीमाचे दोङ्ग यरी थेन्ज्यी। 54दोङ्गसे फप्जेत्प साच्चेनो म्हीमाचे थेङ् येसुनो टीम् बी स्येःज्यी। 55होत्तज्यीम् थेङ्यीमा खन बीबी छ्योङ्य्हर्ज्यीम् येसु ब्योन्खजेत्ज्यी पङ्बे तम् स्येत्ज्यी। ओसेम् म्हीमाचे नबमात तीत्प न्हेन्बतेङ् बक्च्यनो नाज्यीम् येसु मुबे ग्लारी बब तीप्ज्यी। 56ओसेम् येसु नम्समातेङ् सहर्री खन-खन स्येःजेत्ज्यी हुजु ग्लामाकी बजारमारी म्हीमाचे नबे म्हीमात बज्यी। ओसेम् नबमात येसुइ न्हम्जइ न छुबुङ्जेतो बी नब बबे म्हीमाचे थेङ्त फ्या स्य्हु लज्यी। ओसेम् थेङ्त छुबलमा जम्मनो फेन्ज्यी।
Currently Selected:
मर्कुस् 6: WTDG
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
