मर्कूस 8
8
येशूये बुली हजार भर्मीकी कास्च
(मत्ती १५:३२-३९)
1कायाक फेरी भर्मीकुङ बाड्को भीड जम्मा छाना। टर होसे भर्मीको खाटा ज्याच ठोक हीर मालेचबाटै येशूये चेलाकोलाक लाहा लेठाङ आर्घार डेया, 2“इसे भीडकोलाक डाङार ङाकी सार्है रोम सेया। हीजैडेनाङ इखुरीक ङा खाटा ङुच सोम याक छान्न भ्या, र इखुरीक खाटा ज्याच ठोक हीर माले। 3इखुरीककी मुलीन्न इमाङ बीर्न्हका डेनाङ इखुरीक लामाङ न मुर्छा पर्ले। हीजैडेनाङ इखुरीक मध्याङ कुडीक जना च लोसीङ र राम्हने।” 4होटै होसकुङ चेलाकै होसकोकी डेया, “इसे हीर मालेच ठावाङ इखुरीककी कुटै ज्याच ठोक कास्की?” 5अनी येशूये होखुरीककी गीना, “नाखुरीक खाटा कुडीक ओटा रोटो ले?” होखुरीकै डेया, “साटओटा ले।”
6येशूये भर्मीकोलाक चउराङ ङुकी डेया। अनी होसकै साट ओटा रोटो मीहुटाङ लार परमेश्वरकी धन्यवाद याहा। रोटो ग्याकार चेलाकोलाक याछै पुङ्की लैडीयार चेलाकै भर्मीकोलाक पुङ्ङ याहा। 7होखुरीक खाटा चेक्जा मसीनो डीस्याको र लेया। येशूये डीस्यौ लागी परमेश्वरकी धन्यवाद याहार चेलाकोलाक पुङ्ङ याखी लैडीया। 8होटै भर्मीकै रोटो र डीस्या र्हास्ठर ज्याम र ओबारीस्च टुकुराको चेलाकै साट डालो न्हेप-न्हेप सोटा। 9होला जम्मा बुली हजार टडीक ज्याच भर्मीको लेया। होटै येशूये होसे भर्मीकोलाक लाहा लहो इमाङ बीर्न्हका। 10होटै न्हुइङ येशू तुरुन्तै लहो चेलाको खाटा डुङ्गाङ काल्हार दलमनुथा डेच ठाउँ पट्टी नुङा।
फरीसीकै चीन्ह ङेछ
(मत्ती १६:१-४)
11फरीसीको येशूलेठाङ राहार होसको खाटा बहस जाट्की ठाला। होखुरीकै होसकोकी अन्ट ङोस्की डेम स्वर्ग लकीङ काट चीन्ह टान्हाक्नी डेम ङेहा। 12अनी येशूये लोट्च सास फेरीयार डेया, “इसे पुस्टै हीजै चीन्ह पाले? साँच्ची न ङा नाखुरीककी डेले, इसे पुस्टाकी कुसेर चीन्ह माय्हाले।” 13होसे न्हुइङ होखुरीककी डासार येशू फेरी डुङ्गाङ काल्हार टालौ पारी पट्टी नुङा।
फरीसीको र हेरोदौ बारेयाङ शिक्षा
(मत्ती १६:५-१२)
14होसकुङ चेलाकै ज्याच ठोक बुकी म्य्हाका। डुङ्गाङ होखुरीक खाटा काट मट्टै रोटो लेया। 15येशूये चेलाकोलाक इट डेयार चेटावनी याहा, “नाखुरीक फरीसीकुङ खमीर र हेरोद राजा लकीङ होसीयार छानार ङुनी।” 16होखुरीक लाहालाहाङ छलफल जाट्की ठाला, “हीजैडेनाङ कान खाटा रोटो मालेचबाटै येशूये इट डेच हो।” 17होटै येशूये ठाहा डुपार होखुरीककी डेया, “नाखुरीक खाटा रोटो माले डेयार हीजै नाखुरीक छलफल जाट्ले? ही नाखुरीकै अझै र माबुझडीस्न ने? ही नाखुरीकुङ मीमन चाहाँसम्म र कठोर छान्नने? 18मीमीक लेनाङ र ही नाखुरीकै माडाङ्ले? मेन्केप लेनाङ र ही नाखुरीकै मासेले? ही नाखुरीकै माआरमीट्ने? 19जब ङै बाङा रोटो ग्याकार बाङा हजार भर्मीकी कास्च ही नाखुरीकै म्य्हाका? नाखुरीकै ओबारीस्च टुकुराको कुडीक डालो सोट्नन्या?” चेलाकै येशूकी जबाफ याहा, “बार्ह डालो।” 20येशूये फेरी डेया, “जब साट ओटा रोटो ग्याकार बुलीहजार भर्मीकोलाक कास्नाङ नाखुरीकै ओबारीस्च टुकुराको कुडीक डालो सोट्नन्या?” होखुरीकै डेया, “साट डालो।” 21अनी येशूये होखुरीककी डेया, “ही नाखुरीकै अझै र माबुझडीस्ने?”
येशूये मीमीक माडाङ्चकी गेपाक्च
22येशू बेथसेदाङ राहा र होला भर्मीकै होसको लेठाङ काट मीमीक माडाङ्च भर्मीकी राका। अनी होखुरीकै इसकी छुम यान्ही डेयार येशू खाटा बिन्ती जाटा। 23येशूये होसे मीमीक माडाङ्च भर्मीयो मीहुट घोवार होसकी लाङ्घीङ बाहीर आल्हा। होसकै लहो मेठोक होच्यौ मीमीकाङ मोल्न्ह याहा र होसे मीटाक मीहुट डार होसकी गीना, “नाकै हीर डाङ्ङन ने?” 24होचे वार्लाक पार्लाक ङोसार डेया, “भर्मीकोलाक च सीङौ म्यार्टुङ लेखा न डाङ्ने, र होखुरीक च व्हाम ङुमने।” 25फेरी येशूये होसे भर्मीयो मीमीकाङ मीहुट डा र होचे एकोहोरो खाटा ङोसा। होटै होसे भर्मीये छ्याङ्गै पट्ट ठोक डाङ्की य्होका। 26येशूये होसे भर्मी लाङ्घाङ मान्न न लहो इमाङ नुङ्की डेम बीर्न्हका।
येशू सु आले?
(मत्ती १६:१३-२०; लुका ९:१८-२१)
27होटै न्हुइङ येशू र मेकुङ चेलाको कैसरीया फीलीप्पीयुङ खेरेपुङ लाङ्घाकोवाङ नुङा। लामाङ नुङ्चै जाट्नाङ होसकै लहो चेलाकोलाक इट डेयार गीना, “ङाकी भर्मीकै ही डेले र ङा सु हो?” 28होखुरीकै होसकोकी डेया, “कुडीकै डेले, बप्तिस्मा याछ युहन्ना हो, कुडीकै डेले एलीया हो र कुडीकै चहीँ अगमवक्ताको मध्याङ काट जना हो डेले।” 29टब येशूये होखुरीककी गीना, “टर नाखुरीक चहीँ ही डेले, ङा सु हो?” पत्रुसै उट्टर याहा, “नाको मुक्ति याछ ख्रीष्ट हो।” 30होटै येशूये होखुरीककी लहो बारेयाङ सुकीर माडेकी डेम डेया।
येशूये लाहा सीकी पर्च बारेयाङ जाट्च भविष्यवाणी
(मत्ती १६:२१-२३; लुका ९:२२)
31येशूये मेखोल्हौ बारेयाङ चेलाकोलाक इटजाट्न डेया, “भर्मीयो मीजै साप्फी डुख भोग्डीकी पर्ले। अगुवा, मुख्य पुजाहारीको र धर्मगुरुकै इन्कार जाट्ले र साट्ले टर सोम याकाङ जीवाम सोले।” 32इटजाट्न होसकै इसे कुरा प्रष्ट जाटार डेया। टर इसे कुरा सेरखीङ पत्रुसै येशूकी काट पट्टी आल्हार च्याका। 33टर येशूये न्हुङ्लाक ल्हेसार लहो चेलाकोलाक ङोसा र पत्रुसकी होसकै इट डेयार हक्कारीया, “ए शैतान, ङा लकीङ नुङ्की क्योटो! हीजैडेनाङ नुओ मीमन परमेश्वर पट्टी माले, टर भर्मी पट्टी ले।”
चेलाकै जाट्की पर्च ट्यागौ बारेयाङ
(मत्ती १६:२४-२८; लुका ९:२३-२७)
34येशूये लहो चेलाकोलाक र होला लेच भर्मीकुङ भीडकी लाहा लेठाङ आर्घार डेया, “सुर भर्मी ङा न्हुङ-न्हुङ व्हाकी मीमन जाट्ले डेनाङ होचे लाहाकी इन्कार जाट्ख्यौ र लहो क्रूस बुवार ङाकी डुट्ख्यौ।#८:३४ क्रुस बुकीओ अर्ठ चहीँ येशूओ कारनै डुख भोग्डीकी टयार छान्की अठबा सीकी र टयार छान्की हो। 35हीजैडेनाङ सुये लहो जीवन जीवाक्च मीमन जाट्ले, होचे होसे गुमडीले, टर ङौ र सेछ समाचारौ लागी लहो जीवन गुमडीचये चहीँ होसे जीवाक्ले। 36इडीक भर्मीये पट्ट संसार न मीहुटाङ पार्नाङ र लहो जीवन चहीँ गुमडीया डेनाङ होसकी ही फाइडा छान्ले र?#८:३६ जीवन: इसे चहीँ सेन्र मासीच जीवनौ बारेयाङ हो। 37सेन्र मासीच जीवन चहीँ सुयेर परमेश्वर खाटा लोकी माय्होक्ले। 38इसे व्यभिचारी र पापी पुस्टाङ सु ङा र ङौ बचन खाटा काराले, भर्मीयो मीजा र लहो बोयो महीमाङ पवित्र स्वर्ग दूतकोखाटा रान्हाङ होसे खाटा काराले।”
Currently Selected:
मर्कूस 8: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
