मर्कूस 9
9
1होटै येशूये होखुरीककी डेया, “साँच्ची न ङा नाखुरीककी डेले, इला टोङ्छको मध्याङ कोइ-कोइ ले होखुरीक परमेश्वरौ राज्य बाड्को शक्तियाङ राछ माडाङ्ठर कुसेर हालटाङ मासीले।”
येशूओ रुप फेरीस्च
(मत्ती १७:१-१३; लुका ९:२८-३६)
2होच्यौ छ डीन न्हुइङ येशूये पत्रुस, याकुब र युहन्नाकी लार काट घाङ्च डाडाङ नुङा। होला होखुरीक मट्टै लेया। होखुरीकुङ म्याहासाङ न येशूओ रुप फेरीसा। 3होसकुङ बढीन इडीक चम्कीलो बोच छाना की सफा खाटा हुर्नाङ र संसाराङ कुचेर होङ्च बोच खास्की माय्होक्ले।
4होडीक न बेला मोशा र एलीया होला डाङा र होखुरीक येशू खाटा ङाक्की ठाला। 5इसे डाङार पत्रुसै येशूकी डेया, “गुरुज्यु, काल्हा इला लेच सेम्ह छाना। काल्हा इला सोम बास ङुच ठाउँ खासीङ, नाकुङ लागी, मोशौ लागी र एलीयौ लागी।” 6पत्रुस र अरु चेलाको बीर्हीयार आटडीस्च बाटै पत्रुसकी ही डेइङ ही डेइङ छाना। 7होडीक न बेला डेबु राहा र होखुरीक मीटाक छाया पर्या। होटै डेबु भीत्री लकीङ काट आवाज राहा, “इसे ङौ मीजा हो, इसकी ङा जाक्ले। इचे डेच नाखुरीकै सेनी।” 8इट डेच सेरखीङ चेलाकै इलाक आलाक ङोसा टर लाहा खाटा येशू बाहेक अरु सुकीर माडाङा।
9होखुरीक पहाड लकीङ लीट्टीम व्हाम रान्हाङ येशूये होखुरीककी डेया, “भर्मीयो मीजा सीच लकीङ जीवाम मासोठर नाखुरीकै इसे डाङ्च कुरा सुकीर मासेटाक्की।”
10होखुरीकै इसे कुरा मीमनाङ न डा टर “सीच लकीङ फेरी जीवाकी डेच चहीँ ही लेसा” डेम मेखुरीक-मेखुरीक कुरा जाट्की ठाला। 11होटै चेलाकै येशूकी गीना, “हीजै व्यवस्थुङ धर्मगुरुकै एलीया न पहीला राखी पर्ले डेले?”
12येशूये डेया, “साँच्ची न, पहीला एलीया राल्हे र पट्ट न कुराको तयार खास्ले। टर भर्मीयो मीजै वास्टै डुख भोग्डीले र अरुकै माजाक्ले डेम धर्मशास्त्राङ हीजै रीक्च औँला? 13टर ङा नाखुरीककी डेले, एलीया च राम्ह भ्यामने र होच्यो बारेयाङ धर्मशास्त्राङ रीक्च अनुसार भर्मीकै ही जाट-जाट सेया होसकी होट न जाटा।”
भूत लक्डीस्च लेन्जा जजा गेप्च
(मत्ती १७:१४-२१; लुका ९:३७-४३)
14येशू र सोम जना चेलाको अरु चेलाको लेठाङ ल्हेस्न राहा। होला वास्टै भर्मीको भेला छान्न ङुमन्या र चेलाको खाटा धर्मगुरुकै बहस जाट्न न लेया। 15पट्ट न भर्मीकै येशूकी डाङ्च बीटीक्कै छक्क पर्या र होसको लेठाङ खेर्न राहार होसकोकी झोरा। 16येशूये होखुरीककी डेया, “नाखुरीक इखुरीकखाटा हीयो बारेयाङ बहस जाट्नन ले?” 17भर्मीकुङ भीड लकीङ काट जनै डेया, “गुरुज्यु, ङौ मीजाकी नाको लेठाङ राक्ङने। भूत आत्मा लक्डीस्च बाटै होसे ङाक्की माय्होक्ले। 18जब भूत आत्मै होसकी घोले, होसकी झाङ पछारीले। होचे मेङेरीङ घोचोस छ्युक्ले र मीस्याक जीकार होसे अरट्ठ छान्ने। ङै नाकुङ चेलाकोलाक भूत आत्मा छ्युक्ङ यान्ही डेम बिन्ती जाटा टर होखुरीकै माय्होका।” 19होटै येशूये होखुरीककी डेया, “ए अविश्वासी पुस्टा, ङा सेन सम्म नाखुरीक खाटा ङुले र? नाखुरीककी कुडीक सहडीकी? होसकी ङा लेठाङ राक्नी।” 20होखुरीकै होसे लेन्जा जजाकी होसको लेठाङ राका। येशूकी डाङ्च बीटीक्कै भूत आत्मै लेन्जा जजाकी लछार पछार जाटा र होसे झाङ पछारीसार मेङगेरीङ घोचोस छ्युक्चै लडीबडी जाट्की ठाला। 21अनी होसकै होच्यो बोइकी गीना, “सेन लकीङ इसकी याङ्च छान्च?” बोये डेया, “जजा लकीङ न याङ्च छान्च हो। 22इसकी नास जाट्की डेम इसे भूत आत्मै घरी-घरी इसकी म्हे र डीयाङ लोम्ह काले। इडीक नाकै हीर जाट्की य्होक्ले डेनाङ दया जाटार कानकी मडट जाट्न यान्ही।” 23येशूये होसकी डेया, “‘नाकै य्होक्ले डेनाङ!’ डेम ही डेच? विश्वास जाट्चकुङ लागी च पट्ट न कुरा सम्भव ले।” 24इसे कुरा सेच बीटीक्कै लेन्जा जजौ बोये च्याकार डेया, “ङा विश्वास जाट्ले। ङौ अविश्वासाङ ङाकी सहायटा जाट्नी।”
25होटै पट्ट न भर्मीको येशू लेठाङ खेर्न राछ डाङार होसकै होसे भूत आत्माकी हक्कारीचै डेया, “ए लाटा खास्च र मेन्केप मासेच खास्च आत्मा, इसे जजा लकीङ ख्योव्हार रान्हा र फेरी ल्हेसार भीत्री मापर्यो!” 26होटै चीघारीसार होसे लेन्जा जजाकी लछार पछार जाटार होसे भूत आत्मा ख्योव्हा र होसे जजा सीच बराबर छाना। इलासम्म की कुडीक भर्मीकै च “होसे सीया” डेया। 27टर येशूये होच्यौ मीहुट घोवार होसकी जुरुक सोटा र होसे सोवा।
28येशू काट इमाङ नुङा र चेलाकै सुर मालेच बेलाङ येशूकी गीना, “कानै चहीँ होसे भूतकी हीजै डोन्की माय्होका?” 29होसकै होखुरीककी डेया, “इसे खालुङ भूत चहीँ प्रार्थना जाटार मट्टै डोन्की य्होक्ले।”
येशूये लाहा सीकी पर्च बारेयाङ फेरी सेटाक्च
(मत्ती १७:२२-२३; लुका ९:४३-४५)
30होटै होसे ठाउँ लकीङ ख्योव्हार येशू र मेकुङ चेलाको गालीलौ लाम छान्चै नुङा। होसको होला ले डेम सुयेर ठाहा माडीन्ख्यो डेच होसकुङ मीमन लेया, 31हीजैडेनाङ होसकै लहो चेलाकोलाक शिक्षा याम्हन लेया। होसकै होखुरीककी डेया, “भर्मीयो मीजा भर्मीकुङ मीहुटाङ पर्ले र होखुरीकै होसकी साट्ले होटै होसे सीच सोम याकाङ फेरी जीवार सोले।” 32टर होसकै डेच इसे कुरा होखुरीकै माबुझडीसा र होसको खाटा गीन्की बीर्हीया।
सु चहीँ बाड्को?
(मत्ती १८:१-५; १०:४२; लुका ९:४६-५०)
33होखुरीक कफर्नहुम सहराङ टाराहा र इम भीत्री पर्रखीङ येशूये चेलाकोलाक गीना, “लामाङ रान्हाङ नाखुरीकै हीयो बारेयाङ बहस जाट्नन्या?” 34टर होखुरीक माच्याक्ङ ङुवा हीजैडेनाङ होखुरीकै “काल्हा मध्याङ सु बाड्को हो” डेम बहस जाट्चै राम्हन्या। 35होटै येशू ङुवा र बार्ह जना न चेलाकोलाक आर्घार डेया, “पट्ट डेनाङ बाड्को छान्की पाचये पट्ट डेनाङ मार्जा छानार पट्टओ सेवा जाट्की पर्ले।” 36होटै न्हुइङ काट मार्जा बालखकी लार येशूये होसकी होखुरीकुङ मीघ्याङ राका र मीकुव्हाङ ला, अनी होसकै चेलाकोलाक डेया, 37“सुये ङौ म्यार्मीनाङ याङ्च मार्जा जजाकी ग्रहण जाट्ले होखुरीकै ङाकी र ग्रहण जाट्ले। ङाकी ग्रहण जाट्चकै ङाकी मट्टै होइन टर ङाकी बीर्न्हकाच बोइकी र ग्रहण जाट्ले।”
38युहन्नै येशूकी डेया, “गुरुज्यु, काट जना भर्मी नाकुङ म्यार्मीनाङ भूतको छ्युक्ङ न लेच कानै डाङा। टर कानै होसकी होट जाट्की माय्हा हीजैडेनाङ होसे काल्हाकी डुट्च भर्मी होइन।” 39टर येशूये डेया, “होसकी मारोक्डीनी, हीजैडेनाङ ङौ म्यार्मीनाङ शक्तियो काम जाट्चये तुरुन्तै ङौ विरुद्धाङ मास्च माङाक्ले। 40हीजैडेनाङ सुये काल्हौ विरोध माजाट्ले, होसे काल्हा पट्टी न छान्ने। 41साँच्ची न ङा नाखुरीककी डेले, सुयेर नाखुरीककी मुक्ति याछ ख्रीष्ट हो डेयार ङौ म्यार्मीनाङ काट गीलास डी मट्टै याहा डेनाङ र होचे इनाम डुप्ले।”
पाप लकीङ कुटजाट्न जीवाकी
(मत्ती १८:६-९; लुका १७:१-२)
42येशूये फेरी डेया, “ङा मीटाक विश्वास जाट्च इसे मार्जा नानीको मध्याङ इडीक सुयेर काट जनाकी मट्टै पाप जाट्की लैडीले डेनाङ होसकी च बरु मीघाटीयाङ झाटा च्योलोकार होसकी टालाङ लोम्ह काकी सेम्ह छान्ले। 43इडीक नुओ मीहुटै नाङ्की पाप जाट्की लैडीले डेनाङ होसकी चेमकौ। नीस मीहुट खाटा न नरकौ सेन्र मासीच म्हेयाङ नुङ्की डेनाङ च काट मट्टै मीहुट लार सेन्र मासीच जीवन डुप्की न नुओ लागी सेछ हो। 44[नरकाङ च न डुको सीले न म्हे न सीले।]#९:४४ कुसै-कुसै सोरोट बाइबलाङ इसे पड माले 45नुओ मीखुट्टै नाङ्की पापाङ पार्ले डेनाङ होसकी चेमकौ। नीस मीकु खाटा नरकाङ नुङ्की डेनाङ बरु काट मट्टै मीकु खाटा सेन्र मासीच जीवन डुप्की नुओ लागी सेछ हो। 46[नरकाङ च न डुको सीले न म्हे न सीले।]#९:४६ कुसै-कुसै सोरोट बाइबलाङ इसे पड माले 47इडीक नुओ मीमीकै नाङ्की पापाङ पार्ले डेनाङ होसकी डोनार लोम्हकौ। नीस मीमीक खाटा नरकाङ नुङ्की डेनाङ च काट मट्टै मीमीक खाटा परमेश्वरौ राज्याङ नुङ्की सेछ हो। 48नरकाङ च न डुको सीले न म्हे न सीले।”
49“हीजैडेनाङ काट-काट जनाकी म्हेये न छा सेस्च खास्ले।#९:४९ म्हे: इला म्हेओ चीन्ह चहीँ भर्मीकै डुख कस्टौ अनुभब लाले डेम टान्हाक्की पाच हो। 50छा सेछ ठोक हो टर इडीक छओ स्वाद व्हा डेनाङ हीये फेरी होसकी सेस्च खास्की? नाखुरीक पट्ट न छा लेखा न छान्नी र नाखुरीक शान्ति खाटा ङुनी।” #९:५० छा: इडीक स्याङ छा ले डेनाङ माघेरेल्ले। चेलाको चहीँ पीरीठीबीयुङ छा छान्की पर्ले। #मत्ती ५:३४; लुका १४:३४-३५
Currently Selected:
मर्कूस 9: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
