मर्कूस 7
7
शुद्ध र अशुद्ध
(मत्ती १५:१-९)
1यरूशलेम लकीङ राछ फरीसीको र धर्मगुरुको येशूओ वरीपरी भेला छाना। 2अनी येशूओ चेलाकै मीहुट माहुर्न न ज्याच होखुरीकै डाङा। इस्राएलीकुङ चलन अनुसार मीहुट माहुर्न ज्याचकोलाक अशुद्ध मन्डीमन्या। 3फरीसी र अरु पट्ट न यहूदीकै होखुरीकुङ बोइ बाज्युकै जाट्न राछ चलन अनुसार मीहुट माहुर्न माज्याम्या। 4बजार लकीङ इमाङ राहार माचोखडीस्न हीर माज्याम्या। होखुरीकै याङ्च वास्टै अरु चलनको र मन्डीम्या। बेला, भाँडा र काँसौ भाँडाको चोखडीच चलन लेया र माचोखडीम माक्योट्न्या।
5फरीसी र धर्मगुरुकै येशूकी गीना, “नाकुङ चेलाकै बोइ-बाज्युकै जाट्न राछ चलन अनुसार हीजै माजाट्ले र मीहुट माहुर्न न ज्याले?” 6टब येशूये होखुरीककी डेया, “यशैया अगमवक्तै नाखुरीक कपटी मीमन लेचकुङ बारेयाङ ठीक खाटा इजाट्न अगमवाणी जाटा। परमेश्वरै इटजाट्न डेले
‘इसे जाटीये ङाकी मेङेरै मट्टै आदर जाट्ले टर होखुरीकुङ मीमन ङा लकीङ लोस ले।
7होखुरीकै बीनासीट्टाङ न ङौ सेवा जाट्ले हीजैडेनाङ होखुरीकुङ शिक्षा चहीँ भर्मीकै पाहाक्च बीढी मट्टै हो।’#यशैया २९:१३
8“नाखुरीक परमेश्वरौ आज्ञाकी मामन्डीयार भर्मीकै खास्च बीढीको मन्डीले।”
9फेरी येशूये होखुरीककी डेया, “नाखुरीक लहो चलन मन्डीकी कुडीक सीपालु छान्न परमेश्वरौ आज्ञाकी टारीले। 10हीजैडेनाङ मोशै डेमने, ‘लहो बोइ मोइकी आदर जाट्नी’#प्रस्थान २०:१२; व्यवस्था ५:१६ र ‘सुये बोइ मोयो विरुद्धाङ मास्च कुरा ङाक्ले होसकी साट्की न पर्ले।’#प्रस्थान २१:१७; लेवी २०:९
11“टर नाको डेले इडीक होसे भर्मी लहो बोइ मोइकी डेले, ‘ङा लकीङ नाखुरीककी चहडीस्च सहायता ङै परमेश्वरकी चढडीमे डेले डेनाङ’ 12नाखुरीक होसकी लहो बोइ मोयो लागी फेरी हीर जाट्की माय्हाले। 13इटजाट्न नाखुरीक लहो क्योस्न राछ चलनकी मन्डीचै परमेश्वरौ बचनकी चहीँ रद्द जाट्ले। याङ्च न अरु वास्टै कामको नाखुरीकै जाट्ले।”
भर्मीकी अशुद्ध खास्च कुराको
(मत्ती १५:१०-२०)
14होटै येशूये भर्मीकोलाक फेरी लाहा लेठाङ आर्घार डेया, “नाखुरीक पट्टये न ङौ कुरा सेनी र वार्न्ही। 15याङ्च हीर कुरा माले, की बाहीरलकीङ भर्मी भीत्री पर्यार होसकी अशुद्ध खास्की य्होक्ले टर भर्मीयो मीमन लकीङ बाहीर ख्योछ कुराकै चहीँ भर्मीकी अशुद्ध खास्ले। 16[सुओ सेच मेन्केप ले, होचे सेख्यौ।]#७:१६ कुनै-कुनै सोरोट बाइबलमा यो पड छैन”
17जब येशूये भर्मीकोलाक डासार इम भीत्री पर्या, टब होसकुङ चेलाकै इसे उदाहरणौ बारेयाङ गीना। 18येशूये होखुरीककी डेया, “ही नाखुरीक र अझै अबुझ न ले? भर्मीयो मेङेरीङ ही भीत्री पर्ले होचे होसकी अशुद्ध खास्की माय्होक्ले डेयार नाखुरीकै माव्हार्नने? 19हीजैडेनाङ होसे होच्यौ मीमनाङ होइन टर मीटुक भीत्री पर्ले र बाहीर ख्योखी क्योट्ले इटजाट्न येशूये पट्ट न ज्याच ठोकको शुद्ध ले डेयार बुझडीम याहा।”
20होटै येशूये डेया, “भर्मीयो मीमन लकीङ ही बाहीर ख्योल्हे होचे न भर्मीकी अशुद्ध खास्ले। 21हीजैडेनाङ भर्मीयो मीमनीङ मास्च बीचार, व्यभिचार, खुसकी, साट्की, बेस्याको लेठाङ नुङ्च, 22लोभ जाट्च, दुष्टता, छल जाट्च, छाडापन, मीरीस जाट्च, निन्दा जाट्च, घमन्ड र मुर्खटा। 23इसे पट्ट न दुष्ट कुराको भर्मीकुङ भीत्री मीमन लकीङ न ख्योल्हे र इसे कुराकै न भर्मीकी अशुद्ध खास्ले।”
अन्यजाति मास्टौ विश्वास
(मत्ती १५:२१-२८)
24होटै येशू टुरोसौ क्षेत्र पट्टी नुङा र काट इम भीत्री पर्या। इसे कुरा सुयेर ठाहा माडीन्ख्यौ डेच होसकुङ मीमन लेया टर होसको आर्च्युम्ह ङुकी माय्होका। 25होडीक न बेला काट मास्टोये होसकुङ बारेयाङ सेयार राहा अनी तुरुन्तै होसकुङ मीकुवाङ खुखुप छाना। होच्यौ मास्टो मीजाकी दुष्ट आत्मा लग्डीस्न्या। 26होसे मास्टो सीरीयुङ फोनीकेयाङ जन्मडीस्च काट ग्रीक मास्टो लेया। होसे मास्टोये लहो मास्टो मीजालकीङ भूत छ्युक्ङ यान्ही डेयार येशूकी बिन्ती जाटा। 27टर होसकै होसे मास्टोकी डेया, “पहीला मीजाकोलाक ज्याकी यान्ही, हीजैडेनाङ मीजाकुङ ज्याच ठोक चीउकोलाक लोम्ह याखी ठीक माछान्ले।”#७:२७ जजाको: इला जजाको डेच चहीँ यहुडी कोलाक डेकी पाच हो। चीउको: होसे बेला यहुडीकै यहुडी बाहेक अरुकी चीउको डेयार डेमन्या। टर इला येशूये चहीँ होसे मास्टोकी पहीला होसे यहुडीकोलाक सघडीकी पर्ले डेम डेमन्या। 28टर होसे मास्टोये येशूकी डेया, “हो प्रभु, टर चीउकै र मीजाकै टेबल म्होकी झालाक्च ज्याच ठोकौ टुकुराको च ज्याले।” 29होटै येशूये होसे मास्टोकी डेया, “नाकै इसे कुरा डेचबाटै ढुक्क छानार नाको इमाङ नुङ्नी। नाकुङ मास्टो मीजालकीङ भूत खेव्हार नुङ्ङ भ्यामे।” 30अनी होसे इमाङ नुङा, र मास्टो मीजाकी खाटाङ मीस्न ङुच डुपा। साँच्ची न होसे लकीङ भूत ख्योम्ह भ्यामन्या।
येशूये मेन्केप मासेच र ङाक्की माय्होक्च काट भर्मीकी गेपाक्च
31होटै टुरोसौ क्षेत्र लकीङ ख्योव्हार होसको सीदोन छान्चै डस वटा सहर लेच डेकापोलीसौ क्षेत्र लकीङ गालीलुङ टालाङ नुङा। 32होला भर्मीकै मेन्केप मासेच र सेम्ह ङाक्की माय्होक्च काट भर्मीकी येशू लेठाङ राका। अनी होसे मीटाक मीहुट डाम यान्ही डेयार होसकोकी बिन्ती जाटा। 33होसे भर्मीकी येशूये भीड लकीङ चेक पारी सुर मालेच ठावाङ आल्हा। अनी लहो औलाको होच्यौ मेन्केपाङ सुलुका र औलाङ न मेठोक ठोकार होच्यौ मेलेट्की छुवा। 34अनी येशूये स्वर्गलाक ङोसार लोट्च सास लाचै होसेकी डेया, “इफ्फाटा” होच्यौ अर्थ हो “खोलीसो।”#७:३४ इफ्फाटा: इसे सब्ड चहीँ अरामीकाङ हो, येशूओ पालाङ इस्राएलाङ ङाक्च काट खाल्या भासा हो। 35होडीक न बेला होच्यौ मेन्केप सेच छानार ङाक्की य्होक्च छानार होसे सेम्हजा ङाक्की ठाला। 36“इसे कुरा सुकीर माडेकी” डेयार होसकै होखुरीककी आज्ञा याहा टर सु-सु भर्मीकोलाक होसकै आज्ञा याहा, होडीक न होखुरीकै र भर्मीकोलाक सेटाक्चै नुङा। 37इसे कुरा सेच भर्मीको अचम्म मन्डीचै छक्क पर्या र डेकी ठाला, “होसकै पट्ट न कुरा सेम्ह जाट्नने, मेन्केप मासेचकी र सेच र ङाक्की माय्होक्चकी र ङाक्च खास्नने।”
Currently Selected:
मर्कूस 7: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
