मर्कूस 6
6
नासरताङ येशूकी विश्वास माजाट्च
(मत्ती १३:५३-५८; लुका ४:१६-३०)
1होटै खेव्हार येशू लहो न सहर नासरताङ ल्हेसा। होसकुङ चेलाको र होसकोकी डुटा।#६:१ लोहो सहर: इसे सहरौ म्यार्मीन नासरट लेया, होला न येशू होर्नन्या। 2म्हुङ बाट्च डीनाङ होसकै यहूदीकुङ सभा ङुच इमाङ परमेश्वरौ शिक्षा याखी ठाला। होसकुङ शिक्षा सेच वास्टै भर्मीको छक्क पर्या र डेया, “इसे भर्मीये इसे पट्ट न कुटै वार्हा? इसकोकी याछ इसे ज्ञान कुङ्च हो? होसकै याङ्च शक्तिशाली कामको कुट जाट्न जाट्की य्होका? 3ही इसे होसे सीकर्मी काम जाट्च न होइन र? ही इसे मरीयमौ मीजा याकुब, योसेफ, यहूदा र सीमोनौ डाजे होइन र? ही होच्यो बहीनीको काल्हा खाटा न माले र?” होखुरीकै येशूकी इन्कार जाटा। 4होटै येशूये होखुरीककी डेया, “अगमवक्ताकी पट्ट न ठावाङ आदर जाट्ले, टर लहो न लाङ्घा र लहो न इमुङ भर्मीकै चहीँ आदर माजाट्ले।” 5हीजैडेनाङ भर्मीकै येशूकी विश्वास माजाट्च बाटै येशूये शक्तिशाली काम जाट्की माय्होका। होटबाटै होसकै होला काट नीस बीरामीको मीटाक मट्टै लहो मीहुट डार गेपाक्च काम जाट्की य्होका। 6होखुरीकुङ अविश्वास डाङार होसको छक्क पर्या।
चेलाकोलाक प्रचार जाट्की बीर्न्हकाच
(मत्ती १०:५-१५; लुका ९:१-६)
होटै होसको लाङ्घा लाङ्घाङ परमेश्वरौ शिक्षा पाहाक्चै व्हा। 7येशूये लहो बार्ह जना चेलाकोलाक लाहा लेठाङ आर्घा। होटै होखुरीककी अशुद्ध आत्मा खेट्डीच अधिकार याहा र नीस-नीस जना जाटार बीर्न्हका। 8येशूये चेलाकोलाक याङ्च आज्ञा याहा “लामाङ नुङ्नाङ ज्याच ठोक र पैसा हीर माबुकी, टर काट डाङ्गा मट्टै बुकी। 9जुट्टा बील्खी टर अरु फेर्म्या बढीनको माबुकी। 10होसे लाङ्घाङ टान्हाङ नाखुरीक कुसे इमाङ ङुले होसे लाङ्घा माडास्ठर नाखुरीक होसे न इमाङ ङुकी। 11इडीक कुसेर ठावाङ नाखुरीककी स्वागट माजाटा डेनाङ र भर्मीकै नाखुरीकुङ बचन सेकी मामन्डीया डेनाङ होसे ठाउँ लकीङ ख्योन्हाङ होखुरीकुङ विरुद्धाङ गबाहीयो लागी लहो पैटलुङ ढुलो खार्हाम्ह याखी।” #६:११ पाइटालुङ ढुलो खार्हाकी डेच अर्ठ चहीँ येशूकी बीस्वास माजाट्च सहरुङ भर्मीकोलाक इन्कार जाट्की हो। होटै होखुरीकुङ लागी नाकै हीरठोक जाट्की बाँकी मालेकी हो।
12होटै न्हुइङ चेलाको ख्योव्हार नुङा र भर्मीकै पापको डासार परमेश्वर पट्टी ल्हेस्ख्यो डेम प्रचार जाटा। 13होखुरीकै वास्टै भर्मीको लकीङ भूतको छ्युका र वास्टै बीरामी कोलाक सीडीये अभीसेक जाट्न गेपाका।
बप्तिस्मा याछ युहन्नाकी साट्च
(मत्ती १४:१-१२; लुका ९:७-९)
14येशूओ बारेयाङ पट्ट ठावाङ न कुरा क्योस्चबाटै हेरोद राजै र होसकुङ बारेयाङ सेया। कुडीक जनै डेया, “बप्तिस्मा याछ युहन्ना सीम र जीवालेसा, होटबाटै च होसे लकीङ याङ्च शक्तियो काम छान्नने।” 15टर अरुकै डेया, “इसको च एलीया हो।” अझै अरुकै डेया, “इसको च पहीलुङ समयुङ अगमवक्ताको ल्याक्च न काट अगमवक्ता हो।”#६:१५ एलीया: ढेरै लेखो यहुडीकै एलीया अगमवक्ता चहीँ मसीहौ लागी लाम टयार जाट्की राछ हो डेयार आसा जाट्नन्या। 16इसे पट्ट न कुरा सेरखीङ हेरोदै डेया, “होसे च युहन्ना न हो। होसकी च ङै मीघाटी छ्योलोकार साट्की लैडीच, होसे न टी बौर्हडीसार सोलेसा।”
17होसे डेनाङ चेक अगाडी हेरोद राजै युहन्नाकी घोकी लैडीयार झ्यालखानाङ कामन्या। हीजैडेनाङ हेरोदै लहो न भाइ फीलीपौ मास्टो हेरोदीयासकी बीहा जाटार डामन्या। 18होटबाटै बप्तिस्मा याछ युहन्नै डेमन्या, “भायो मास्टो इटजाट्न डाकी ठीक होइन।”
19होट डेच बाटै हेरोदीयासकी युहन्नाखाटा झोक ख्योमन्या र साट्की मीमन जाट्नन्या टर हेरोदै जाट्न माय्होक्न्या। 20हीजैडेनाङ युहन्ना धर्मी र पवित्र भर्मी हो डेम हेरोदकी ठाहा लेया, होटबाटै होचे युहन्नाकी हीर माजाटा, र होसकी सुरक्छीट डा। हेरोदै युहन्नौ कुरा सेयार मीमन बीगारीस्नाङ र होचे युहन्नौ कुरा खुसी छानार सेमन्या। 21टर हेरोदीयासै युहन्नाकी बदला लाच मौका डुपा, जब हेरोदै लाहा डीन्छ डीननीक लहो बाड्सो भर्मीको, सीपाहीको र गालीलुङ मुख्य-मुख्य भर्मीकोलाक आर्घार बाड्को भोज कासा। 22होला हेरोदीयासौ मास्टो मीजा राहार स्याहा। होचे स्याछ डाङार हेरोद र पट्ट न पाहुनाको मार्हाङा। होटै हेरोद राजै होसे मास्टो जजाकी डेया, “नाङ्की ङा ही डेले होसे न याल्हे, ङेहो।” 23फेरी हेरोद राजै शपथ ज्याचै होसकी डेया, “नाङ ङा खाटा ही ङेल्हे ङा ङौ आधा राज्य सम्म र नाङ्की याल्हे।”
24टब होसे बाहीर ख्योव्हार डेया, “मोइ, ङा ही ङेहीङ?” मोये डेया, “बप्तिस्मा याछ युहन्नौ मीटालु ङेहो।”
25होडीक न बेला भीत्री राजा लेठाङ नुङा र इट डेयार ङेहा, “हजुर ङाकी चाहाँ न बप्तिस्मा याछ युहन्नौ मीटालु ठालाङ डार यान्ही।”
26इसे कुरा सेयार राजा साप्फी डुखी छाना टर लहे पट्ट न पाहुनाकुङ अगाडी शपथ ज्यार याल्हे डेच बाटै होसे बचन टोडीकी माय्होका। 27राजै तुरुन्तै काट जना सीपाहीकी बीर्न्हका र युहन्नौ मीटालु छ्योलोकार राको डेम हुकुम याहा। होटै होचे झ्यालखानाङ नुङार युहन्नौ मीटालु छ्योलोका, 28र ठालाङ डार मास्टो जजाकी याहा होटै जजै मेन मोइकी याहा।
29युहन्नौ चेलाकै जब इसे कुरा सेया होटै होखुरीक राहार होच्यौ लास आल्हार चीहानाङ ठाका।
येशूये बाङा हजार भर्मीकोलाक कास्च
(मत्ती १४:१३-२१; लुका ९:१०-१७; युहन्ना ६:१-१४)
30होसे न्हुइङ प्रेरितको ल्हेसा र येशू लेठाङ भेला छानार मेखुरीकै ही-ही जाटा र पाहाका होसे पट्ट न होसकोकी सेटाका।#६:३० येशूये पहीला बीर्नकाच ठाँउलकीङ होखुरीक ल्हेसार राहा। 31होसकै होखुरीककी डेया, “काल्हा सुर मालेच ठावाङ नुङार म्हुङ बाटीङ।” हीजैडेनाङ होला राम्ह नुङ्ङ जाट्च भर्मीको वास्टै लेया र होखुरीककी ज्याकी सम्म र फुर्सट माछान्नन्या। 32होटबाटै येशू र मेखोल्हौ चेलाको डुङ्गाङ काल्हार काट पट्टी सुर मालेच ठावाङ नुङा। 33टर वास्टै भर्मीकै होखुरीककी नुङ्चै जाट्च डाङा र होखुरीककी चीन्डीया। होटै पट्ट न भर्मीको सहरको लकीङ खेर्न नुङार होखुरीक डेनाङ अगाडी टाहा। 34जब येशू डुङ्गा लकीङ बाहीर ख्योव्हा होसकै भर्मीकुङ भीड डाङा र होसे भीडकी डाङ्रखीङ रोम सेया, हीजैडेनाङ होखुरीक गोठ्ला मालेच भेडाको लेखान छान्न ङुम्या। अनी होसकै होखुरीककी वास्टै कुराको पाहाक्की ठाला।
35होटै नामबीक्की पारखीङ चेलाकै येशूकी डेया, “इसे ठाउँ एकान्त ले अब नाम्बीक्च बेला र छाना। 36इसे भर्मीकोलाक लाङ्घालाक नुङ्की यान्ही र होखुरीकै लहो लागी ज्याच ठोक लोख्यौ।” 37येशूये होखुरीककी डेया, “नाखुरीकै न इखुरीककी ज्याच ठोकको ज्याकी यान्ही।” टर होखुरीकै येशूकी डेया, “ही कानै नीस सय चाँडीयो सीक्का#६:३७ चाँडीयो सीक्का काट सीक्का चाँडी चहीँ काट जना भर्मीयो कायाकौ कमाइ बराबर हो। खर्च जाटार इखुरीककी रोटो लोवार ज्याकी याखी र?” 38होसकै होखुरीककी डेया, “नाखुरीक खाटा कुडीक रोटो ले? ङोस्नी ट!” होखुरीकै ङोसा र होसकोकी डेया, “बाङा रोटो र नीस डीस्या ले।”
39होटै न्हुइङ येशूये लहो चेलाकोलाक डेया, भर्मीकोलाक झुरुम-झुरुम पार्चै फीच चउराङ ङुकी लैडीनी। 40होखुरीक सय-सय र पचास-पचास जनाकी भाकार ङुकी लैडीया। 41येशूये बाङा रोटो र नीस डीस्या लार स्वर्गलाक ङोसार परमेश्वरकी धन्यवाद याहा। रोटो ग्याकार भर्मीकोलाक पुङ्ङ यान्ही डेयार चेलाकोलाक अर्हडीया। होटजाट्न होसकै होसे नीस डीस्याकी र ग्याकार चेलाकोलाक पुङ्की लैडीया। 42होटै पट्टये न र्हास्ठर ज्या। 43चेलाकै ओबारीस्च रोटो र डीस्यौ टुक्राको बटुलीनाङ बार्ह डालो छाना। 44होला ज्याचको लेन्जा भर्मीको मट्टै बाङा हजार जना लेया।
येशू डी मीटाक व्हाच
(मत्ती १४:२२-३३; युहन्ना ६:१५-२१)
45येशूये चेलाकोलाक तुरुन्तै डुङ्गाङ काल्हाकार मेखोल्हा डेनाङ अगाडी न होखुरीककी पारी टाल छेउङ बेथसेदा डेच ठावाङ बीर्न्हका। टर होसको चहीँ भर्मीको खाटा बीडा लाकी डेम होला न ङुवा। 46होखुरीक खाटा बीडा लाम भ्यारखीङ होसको चहीँ डाडाँङ प्रार्थना जाट्की नुङा। 47नाम्बीक्च बेलाङ डुङ्गा टालौ मीघ्याङ लेया र येशू चहीँ लाहा काट न टाल बाहीर लेया। 48नाम्सु क्योस्चबाटै चेलाकै डुङ्गा क्योट्की गार्हो छान्च येशूये डाङा। गोराकुङ सोम बजे पट्टी होसको टालौ मीटाक व्हाचै चेलाको पट्टी राहा, अनी होखुरीककी रीटार नुङ्की पा।
49टर चेलाकै होसकोकी टाल मीटाक व्हामन लेच डाङार भूत डेम आर्मीटा र होखुरीक चीघारीस्की ठाला। 50हीजैडेनाङ होसकोकी डाङार होखुरीक पट्ट न बीर्हीमन्या टर तुरुन्तै येशूये होखुरीककी डेया, “माबीर्हीनी, ङा न हो, साहस जाट्नी!” 51होटै होसको डुङ्गाङ काल्हा र नाम्सु बाहा। इसे डाङार चेलाको छक्क पर्या। 52येशूये बाङा हजार जनाकी रोटो र डीस्या कास्च डाङ्नाङ र होखुरीकै होच्यौ पुरा अर्थ वार्खी माय्होक्नन्या हीजैडेनाङ होखुरीकुङ मीमन सार्है कठोर लेया।
53होटै टालीङ टरीस्न भ्यारखीङ होखुरीक गनेसरेत ठावाङ टाहा र होखुरीकै डुङ्गाकी छेउ लैडीया। 54जब होखुरीक डुङ्गा लकीङ ख्योव्हा होडीक न बेला भर्मीकै येशूकी चीन्डीया। 55होखुरीक छेउछाउङ पट्ट न लाङ्घालाक खेर्न नुङा र येशू राम्हने डेयार सेटाका। होटै भर्मीकै छाचकोलाक टाङ्माखाटा न बुवार येशू लेठाङ राक्की ठाला। 56लाङ्घा, सहर र बस्टी, कुला-कुला येशू नुङ्न्या होला-होला भर्मीकै छाचकोलाक बुवार राक्ङन्या र बजार बजाराङ डाम याम्हन्या। होखुरीकै छाचकोलाक येशूओ बढीनौ छेउ मट्टै लेनाङ र छुकी यान्ही डेयार बिन्ती जाट्नन्या र होसकुङ बढीन छुच जटी पट्ट न गेप्मन्या।
Currently Selected:
मर्कूस 6: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
