मर्कूस 5
5
अशुद्ध आत्मा लक्डीस्च भर्मी गेप्च
(मत्ती ८:२८-३४; लुका ८:२६-३९)
1येशू मेखोल्हौ चेलाको खाटा गालील टालौ पारीपट्टी गेरासेनसौ मुलुकाङ टाहा। 2होसको डुङ्गा लकीङ पाखा ख्योछ बीट्टीकै चीहान घारीङ ख्योव्हार काट अशुद्ध आत्मा लक्डीस्च भर्मीये होसकोकी डुपा।#५:२ याङ्च चीहानको चहीँ बा-बाड्सो चट्टानौ ल्हुङाङ लेया। भर्मीकै चीहानकी डेम चट्टानाङ बाड्को ह्वाङ ख्वाक्ङन्या। याङ्च चीहान अरुये कोम्ह डाच र डुप्नन्या। 3होसे भर्मी चीहानघारीयाङ ङुमन्या। होसकी सुयेर छ्याकार डाकी माय्होक्न्या। 4होसकी वास्टै खेप मीहुट र मीखुट्या साङ्लीये छ्याक्नाङ र होचे साङ्लीकी टुक्रा-टुक्रा जाटार भाराक्ङन्या। सुयेर होसकी टहाङ राक्की माय्होक्नन्या। 5नाबीक नाम्सीन चीहानौ डाडाँकोवाङ चीघारीस्चै लहे लहाकी न ल्हुङै चेचै व्हामन्या।
6जब होचे लोसीङ न येशूकी डाङा टब खेर्न राहार होसकोकी झोरा। 7होटै होसे भर्मी बाड्को सोरै चीघारीसार डेया, “ए कर्हाङ्छ परमेश्वरौ मीजा येशू, नाकै ङाखाटा ही पाच? ङा परमेश्वरौ म्यार्मीनाङ नाकोकी बिन्ती जाट्ले, ङाकी डुख माय्हानी!” 8होचे इट डेया, हीजैडेनाङ येशूये होसकी डेमन्या, “ए अशुद्ध आत्मा, होसे भर्मी लकीङ ख्योम्ह रान्हा!” 9होटै येशूये होसकी गीना, “नुओ म्यार्मीन ही हो?” होचे डेया, “ङौ म्यार्मीन अशुद्ध आट्मौ हुड्डा हो, हीजैडेनाङ कानको वास्टै ले।” 10होसे भूतआत्मा कोलाक होसे इलाका लकीङ बाहीर माछ्युक्ङ यान्ही डेम होचे येशूकी बिन्ती जाटा।
11होला डाडौ पाखा लाक काट हुल वाक स्यास्न ङुमन्या।#५:११ वाक: यहुडी भर्मीकै वाककी असुड्ढ जनाबर डेम भाक्ले। होखुरीककै सेन्र वाककौ सेयाको माज्याले। 12होसे भूतआत्माकै इट डेयार बिन्ती जाटा, “कानकी वाक लेठाङ नुङ्की यान्ही र कान होखुरीक भीत्री पर्ले।” 13होटै येशूये होखुरीककी नुङ्की अनुमति याहा र अशुद्ध आत्माको बाहीर ख्योव्हार वाककुङ भीत्री पर्या। होटै नीस हजार वाकौ हुलको भीर लकीङ हुर्रडीसार टालाङ ठाहार सीया।
14याङ्च घटना डाङार वाक आर्छाचको भोक्डीसा, सहर र लाङ्घा लाङ्घाङ इसे कुरा सेटाका। होटै ही छान्च हो डेम ङोस्की भर्मीको होला राहा। 15होखुरीक येशू लेठाङ राहा र पहीला भूतको लग्डीस्च भर्मी गेपार बढीन बील्हार ङुम ङुच डाङा। इसे डाङार होखुरीक बीर्हीया। 16सुये इसे घटना डाङ्ङन्या, होखुरीकै भूतको लग्डीस्च भर्मी र वाककोलाक ही छान्नन्या डेम सेटाक्ङ याहा। 17याङ्च कुरा सेरखीङ भर्मीकै येशूकी लहो इलाका लकीङ नुङ्की क्योट्नी डेम बिन्ती जाटा।
18येशू डुङ्गाङ काल्खी पानाङ होसे गेप्च भर्मी होसको खाटा बिन्ती जाट्चै डेया “ङाकी र नाको खाटा न आल्न्ही!” 19टर येशूये होसे भर्मीकी अनुमति माय्हा र डेया, “नाको लहो इमाङ ल्हेस्नी र प्रभुये नाकोकी जाट्च कर्हाङ्छ दया र कामौ बारेयाङ पट्ट न भर्मीकोलाक सेटाक्नी।” 20होटै होसे भर्मी व्हाकी क्योटा र डस वटा सहर लेच डेकापोलीस डेच सहराङ नुङार येशूये जाट्च कर्हाङ्छ कामौ बारेयाङ पट्ट न भर्मीकोलाक सेटाका। होसे कुरा सेम भर्मीको अचम्म मन्डीया।
याइरसौ मास्टो मीजा र छाच मास्टो
(मत्ती ९:१८-२६; लुका ८:४०-५६)
21होटै येशू फेरी डुङ्गाङ काल्हार टाल पारी नुङा। होला भर्मीकुङ बाड्को भीड होसकुङ वरीपरी भेला छाना। होसको चहीँ टालौ छेवाङ लेया। 22सभा ङुच इमुङ शासकको मध्याङ याइरस म्यार्मीनुङ काट जना भर्मी येशू लेठाङ राहा र होसकोकी डाङ्च बीट्टीकै होसकुङ मीकुवाङ घोप्टो छाना, 23र बिन्ती जाट्चै डेया, “ङौ मार्जा मास्टो मीजा सीकी पामने। नाकै राहार होसे मीटाक नाकुङ मीहुट डाम यान्ही र होसे गेपार जीवाख्यो।”
24येशू याइरस खाटा नुङा। अनी काट बाड्को भर्मीकुङ भीड होसकुङ न्हुङ-न्हुङ नुङा, र भर्मीको होसकुङ वरीपरी ढुसाढुस जाट्की ठाला। 25होसे भीडाङ बार्ह वर्ष अगाडी लकीङ हीउ नुङार छाच काट मास्टो र लेया। 26कुडीक बैड्यको लैडीनाङ र गेप्की माय्होक्न्या। लाहा खाटा लेच पट्ट न धन सम्पत्तिको खर्च जाट्न भ्यानाङ र मागेप्म झन सार्हो छान्नन्या। 27अनी होचे येशूओ बारेयाङ सेमन्या होटबाटै भीडाङ न येशूओ बढीन न्हुङलकीङ राहार छुवा। 28हीजैडेनाङ “ङै येशूओ बढीन मट्टै छुकी डुपा डेनाङ र ङा गेप्ले” डेम होच्यौ मीमनाङ लेया। 29येशूओ बढीन छुच बीटीक्कै होच्यौ हीउ नुङ्की डासार लाहा गेप्च ठाहा छाना। 30लाहा लकीङ शक्ति ख्योव्हार नुङ्च झट्टै येशूये ठाहा डीन्हा र भीड्की न्हुङलाक ल्हेसार डेया, “ङौ बढीन सुये छुवा?” 31चेलाकै होसकोकी डेया, “भीडै ढुसाढुस जाट्च च नाकै डाङ्ङ न ले र पनी नाको डेले ‘सुये ङाकी छुवा?’” 32टर येशूये लाहाकी छुच सु आले डेम वार्लाक पार्लाक ङोसा। 33मास्टो भर्मी लाहाकी ही छान्नन्या होसे ठाहा डुपार बीर्हीयार बुरुक्चै राहार येशू अगाडी खुखुप छानार पट्ट न सत्य कुरा सेटाका।#५:३३ होसे मास्टौ बीमारीये जाट्नाङ होस्की असुड्ढ खास्नन्या। काट असुड्ढ भर्मी छान्चबाटे भीडाङ ङुकी होटै येशूकी छुचबाटै होचे यहुडीकुङ कानुङ र नीयमकी भङ्ग जाट्नन्या। लहे जाट्च कुरा सुये र ठाहा माछान्ख्यो डेम होसे मास्टोये बीचार जाट्नन्या टर अब होचे ही जाटा होसे येशूये ठाहा डुपा डेच कुरा होसे मास्टोये वार्हा। भर्मीको र येशू मीरीस ख्योले डेम होसे मास्टो बीरीम्हन्या। 34होटै येशूये होसकी डेया, “ए मास्टो मीजा, नुओ विश्वासै नाङ गेप्मने। शान्ति खाटा नुङ्ना। अब नाङ गेपा।”
35होटै येशू ङाक्ङ न लेनाङ याइरसौ इमीङ भर्मीको राहार डेया, “नाकुङ मीजा सीम भ्या, गुरुज्युकी अब अरु कष्ट हीजै याखी?” 36टर होखुरीकै जाट्च कुरा ही हो डेम सेयार येशूये सभा ङुच इमुङ याइरसकी डेया, “माबीर्हीनी, विश्वास मट्टै जाट्नी।” 37अनी होसकै पत्रुस, याकुब र होच्यौ भाइ युहन्नाकी बाहेक अरु सुकीर लाहा खाटा राखी माय्हा। 38होखुरीक याइरसौ इमाङ राहा। होला येशूये खैलाबैला जाट्चको, राप्चको र बाड्सो सोरै बीलौना जाट्चकोलाक डाङा। 39भीत्री पर्यार येशूये होखुरीककी डेया, “नाखुरीक हीजै खैलाबैला जाट्ले र राप्ले? इसे मास्टो जजा मीस्नने मट्टै मासीमने।” 40टर होखुरीक होसकुङ कुरा सेयार रेटा। होटै होसकै होखुरीककी बाहीर छ्युका र मास्टो जजौ बोइ-मोइ र मेखोल्हा खाटा लेच सोम चेलाको लार भीत्री मास्टो जजा लेठाङ नुङा। 41होटै मास्टो जजौ मीहुट घोवार येशूये डेया, “तालिता कूमी” इच्यो अर्थ चहीँ इसे हो, “ए नानी, ङा नाङ्की डेले, सोना।”#५:४१ टालीटा कुमी: इसे सब्डको अरामीक भासौ हो। येशूओ समायाङ इसे भासा चहीँ इस्राएलाङ ङाकन्या। 42अनी मास्टो जजा तुरुन्तै सोवा र व्हाकी ठाला। होसे बार्ह वर्षौ लेया। होटै भर्मीको इसे डाङार छक्क पर्या। 43येशूये होखुरीककी इसे कुरा सुये र ठाहा माडीन्ख्यो डेम कडा आज्ञा याहा र मास्टो जजाकी चहीँ हीर ज्याच ठोक ज्याकी यान्ही डेम होखुरीककी डेया।
Currently Selected:
मर्कूस 5: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
