मर्कूस 4
4
छोयो भेरेट्चओ उदाहरण
(मत्ती १३:१-२३; लुका ८:४-१५)
1येशूये फेरी टालौ छेवाङ शिक्षा याखी ठाला। होसकुङ वरीपरी वास्टै भर्मीकुङ भीड छान्च बाटै होसको डुङ्गाङ काल्हार ङुवा। भर्मीको चहीँ टालौ छेवाङ न टोङ्हा। 2होटै येशूये होखुरीककी उदाहरण याछै वास्टै कुराको पाहाका र होसकै इट डेया, 3“सेनी, काट जना भर्मी छोयो भेरेट्की नुङा। 4छोयो भेरेट्नाङ कोइ छोयोको लामाङ पर्या र ग्वाजाको राहार ज्याम याहा। 5कोइ छोयोको चहीँ ल्हुङ्घारीयाङ पर्या। होला झा ढेर मालेचबाटै होसे छीटो गीटा। 6टर लुप्म जरा मानुङ्च बाटै नाखान खान्र्हखीङ झीम्र्याक छानार छोका। 7कुडीक छोयोको चहीँ जुघारीयाङ पर्या र जुको ल्होङ्ङ राहा गीट्च बीरुवा कोलाक हुपार मीस्या स्याकी न माय्हा। 8टर कुडीक छोयोको चहीँ सेछ झाङ पर्या र गीटार ल्होङ्चै नुङा होटै टीस गुना, साठी गुना र सय गुना मीस्या स्याटाका।” 9होटै येशूये डेया, “सुओ सेच मेन्केप ले, होचे सेख्यो।”
10जब येशू लाहा काट न छाना, टब बार्ह जना चेलाको र अरु वरीपरी लेचकै होसकोकी उदाहरणौ बारेयाङ गीना। 11येशूये होखुरीककी डेया, “परमेश्वरौ राज्यौ रहस्य नाखुरीककी याम्हने, टर ङा विश्वास माजाट्च भर्मीकोलाक च पट्ट न कुरा उदाहरणाङ न डेले।
12अनी होखुरीकै ङोस्की च ङोस्ले टर माडाङ्ले,
सेकी च सेले टर माबुझडीस्ले।
नभा च होखुरीकै लहो पाप पश्चात्ताप जाट्च लेया
र होखुरीकुङ पाप क्षमा छान्च लेया।#यशैया ६:९,१०”
13होटै येशूये होखुरीककी गीना, “ही नाखुरीकै इसे उदाहरणौ अर्थ माबुझडीसा? होट डेनाङ अरु पट्ट न उदाहरणौ अर्थ कुटजाट्न बुझडीस्ले? 14छोयो भेरेट्चये परमेश्वरौ बचन भेरेट्ले। 15कुडीक भर्मीको लामाङ भेरेटच छोयो ल्याक्च न ले। जब होखुरीकै परमेश्वरौ बचन सेले, टब तुरुन्तै शैतान राल्हे र होखुरीकै सेच बचन आल्खी क्योट्ले। 16होटजाट्न न कुडीक भर्मीको ल्हुङ्घारीयाङ पर्च छोयोको लेखा न ले। होखुरीकै बचन सेच बीटीक्कै मार्हाङछै होसे मीमनाङ लाले। 17टर होखुरीकै जरा माकाच बाटै ठोरै डीन सम्म मट्टै ङुले। जब परमेश्वरौ बचनौ कारनै सङ्कष्ट वा सतावट राल्हे, होखुरीक तुरुन्तै विश्वास जाट्की डास्ले।”
18“कुडीक भर्मीको चहीँ जुघारीयाङ पर्च छोयो ल्याक्च न ले। होखुरीकै परमेश्वरौ बचन सेले, 19अनी इसे संसाराङ कुटजाट्न जीवाकी डेम चीन्टा, धन सम्पत्तियो लोभ होटै अरु ठोकुङ लालचा जाटार परमेश्वरौ बचनकी म्य्हाक्ले र काट हीर मीस्या मास्याटाक्ले। 20टर कुडीक भर्मीको चहीँ मज्जुङ झाङ पर्च छोयो लेखा न हो। होखुरीकै परमेश्वरौ बचन सेले र मीमनाङ लाले अनी टीस गुना, साठी गुना र सय गुना मीस्या स्याटाक्ले।”
सामडान मीटाक डाच बट्टीयो उदाहरण
(लुका ८:१६-१८)
21येशूये होखुरीककी डेया, “सुयेर बट्टी ढाकार डालो म्होकी वा खाट म्होकी डाले र? बट्टी ढाकार च सामदानाङ डाकी पर्च होइन र? 22होटजाट्न न आर्च्युकार डाच कुरा ही-ही ले, होसे पट्ट न टान्हाक्ले र वार्खी माय्होक्च ही-ही कुरा ले होसे पट्ट न वार्खी य्होक्ले। 23सुओ सेच मेन्केप ले, होचे सेख्यौ।”
24येशूये होखुरीककी फेरी डेया, “नाखुरीकै ही सेमन ले होसे कुराङ ढ्यान यान्ही। हीजैडेनाङ नाखुरीकै अरुकी कुसे मानै जापार याल्हे होसे न मानै नाखुरीककी र याल्हे अनी नाखुरीककी झन वास्टै याल्हे। 25हीजैडेनाङ सुखाटा ले होसकी वास्टै याल्हे टर सुखाटा ही ले होसे र स्याट्ले।”
मौलडीस्च छोयौ उडारहन
26येशूये फेरी डेया, “परमेश्वरौ राज्य काट भर्मी य्हाङ छोयो भेरेटच ल्याक्च न हो। 27होसे भर्मी मीस्नाङ र सोनाङ र नाबीक नाम्सीन होसे छोयो चहीँ गीट्ले र ल्होङ्ले, टर होसे कुटजाट्न ल्होङ्ले, होसे कुरा होचे मावार्ल्हे। 28झये मेल्है न छोयो गीटाक्ले, पहीला टुसा, बाला होटै पुरा मीस्या स्याटाक्ले। 29होटै मीस्या म्हीनरखीङ य्हामीकै कच्या लार टुरुन्ट चेले, हीजैडेनाङ अन्न, बाली सोट्च बेला छान्न भ्याले।”
राइगानौ छोयौ उडारहन
(मत्ती १३:३१-३२,३४; लुका १३:१८-१९)
30येशूये फेरी डेया, “कानै परमेश्वरौ राज्यौ टुलना ही खाटा जाटीङ? अठबा कानै कुसे उडारहन याहार इसे बारेयाङ पाहाक्की? 31इसे च राइगान छोयौ डाना ल्याक्च न हो, पृथ्वीयुङ पट्ट डेनाङ मार्जा ले। 32जब होसकी रोप्डीले, टब होसे ल्होङ्ले र पट्ट न सागपाटौ बीरुवा डेनाङ बाड्को छान्ले। होचे बा-बाड्सो हाँगा बीगाको काले र ग्वाजाकै होच्यौ छहारीयाङ मीम खास्की य्होक्ले।”
33भर्मीकै परमेश्वरौ बचन बुझडीस्की य्होक्ख्यौ डेम येशूये याङ्च न वास्टै उडारहनको डेया। 34उदाहरण बीना येशूये होखुरीक खाटा माङाका, टर लहो चेलाकोलाक चहीँ अरु सुर भर्मी मालेच बेलाङ पट्ट न उदाहरणौ अर्थ खोलीम याम्हन्या।
येशूये आँधीकी सान्ट पार्च
(मत्ती ८:२३-२७; लुका ८:२२-२५)
35होसनीक नाबीलाङ येशूये लहो चेलाकोलाक डेया, “रान्ही काल्हा टाल पारी नुइङ।” 36भर्मीकुङ भीडकी डासार चेलाको येशू लेच डुङ्गाङ काल्हा र होसको खाटा न पारी पट्टी नुङा। अरु डुङ्गाको र होखुरीक खाट-खाट न लेया। 37टर मोसोमायाङ होला बाड्को आँधी क्योसा र डीयौ छालकै डुङ्गा न्हेप्की पा। 38येशू चहीँ डुङ्गौ न्हुङ्लाक पटी सीरानी कार मीस्न ङुमन्या। चेलाकै होसकोकी इट डेचै सोटा, “गुरुज्यु, काल्हाको ठाम्ह सीकी पाम भ्यामे डेम नाकोकी ठाहा माले?” 39होटै होसको सोवार आँधी र टालौ छालकी हक्कारीचै डेया, “सान्ट छानो! बहो!” होटै आँधी बाहा र सान्ट छाना। 40येशूये होखुरीककी डेया, “नाखुरीक हीजै इटजाट्न बीर्हीछ? नाखुरीककी अझै विश्वास माले?” 41चेलाको साफ्फी बीर्हीया र छक्क पर्या अनी मेखुरीक-मेखुरीक गफ जाट्की ठाला, “इसको सु आले? आँधी र टालै र इसकुङ कुरा मन्डीले!”
Currently Selected:
मर्कूस 4: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
