मर्कूस 14
14
येशूकी साट्की पाच
(मत्ती २६:१-५; लुका २२:१-२; युहन्ना ११:४५-५३)
1अब नीसयाक न्हुइङ छुट्कारौ चाड र अखमीरी रोटोओ चाड लेया। मुख्य पुजाहारीको र धर्मगुरुकै कुट जाट्न येशूकी सुटुक्कै घोवार साटीङ डेम डाउ ङोस्न न लेया। 2टर होखुरीकै डेमन्या, “चाडौ बेलाङ चहीँ होइन, नभा च भर्मीकोवाङ हुलडुङ्गा सोले।”
काट मास्टोये येशूकी अट्टर व्हाक्ङ याछ
(मत्ती २६:६-१३; युहन्ना १२:१-८)
3येशू बेथानियाङ सीमोन कुष्ठरोगीयो इमाङ नुङा। होसको ज्याकी ङुनाङ काट मास्टो सकली जटामसीयो महङ्गो अट्टर सीङ्गमरमरौ भुडुल्काङ लार राहा र होसे भुडुल्का भासार होसे बासना राछ जटामसीयो अट्टर होसकुङ मीटालुवाङ व्हाक्ङ याहा। 4टर कुडीक भर्मीकै चहीँ मीरीस जाटार मेखुरीक-मेखुरीक डेकी ठाला, “इसे बासना राछ अट्टर हीजै नोक्सानी जाट्च औँला? 5हीजैडेनाङ इसे अट्टर सोम सय चाँडीयो सीक्का डेनाङ ढेराङ आर्लार होसे पैसा गरीबकोलाक याखी य्होक्च लेया।” इटजाट्न होखुरीकै होसे मास्टोकी हक्कारीया।
6टर येशूये डेया, “होसकी डास्न यान्ही! हीजै नाखुरीकै होसकी हक्कारीच? इचे ङौ लागी सेछ काम जाट्नने। 7हीजैडेनाङ गरीबको च नाखुरीक खाटा सढैँ काठोव्हाङ छान्ले र मीमन जाट्च कुसेर समयाङ नाखुरीकै होखुरीकुङ भलाइ जाट्की य्होक्ले। टर ङा च सढैँ नाखुरीक खाटा काठोव्हाङ माछान्ले। 8इसे मास्टोये ही जाट्की य्होक्न्या होसे न जाट्नने। इचे ङौ शरीरौ डफनौ लागी अघीलकीङ न बासना राछ अट्टर मोल्हार तयार खास्न न ले।#१४:८होसे बेला, यहुडीकै सीच भर्मीकी ठाक्च बेला मानाम्ख्यो डेम लासाङ बास्ना राछ अट्टर र सीडीको म्होल्छ जाट्न्नया। 9साँच्ची न ङा नाखुरीककी डेले, पट्ट संसाराङ कुलाकुला इसे सेछ समाचार प्रचार जाट्ले, होला इसे मास्टोये ही काम जाट्नने होच्यौ बारेयाङ र आर्मीट्ले।”
यहूदास येशूकी घोवाक्की टयार छान्च
(मत्ती २६:१४-१६; लुका २२:३-६)
10होटै न्हुइङ बार्ह जना चेलाको मध्याङ यहूदास इस्करीयोट डेचये चहीँ मुख्य पुजाहारीको लेठाङ नुङार येशूकी घोवार नाखुरीकुङ मीहुटाङ याल्हे डेच कुरा जाटा। 11होखुरीक इसे कुरा सेयार मार्हाङा र होसकी पैसा याल्हे डेम कबुल जाटा। होटै न्हुइङ येशूकी कुटजाट्न घोकी डेम होचे डाउ ङोस्की ठाला।
येशूये चेलाको खाटा अन्टीम भोज ज्याच
(मत्ती २६:१७-३०; लुका २२:७-२३; युहन्ना १३:२१-३०; १ कोरिन्थी ११:२३-२५)
12अब अखमीरी रोटो ज्याच चाडौ पैहीलुङ डीनाङ होखुरीकै छुट्कारौ चाडौ ठुबा भोग याछ चलन लेया। येशूओ चेलाकै होसकोकी गीना, “नाकुङ इच्छा ही ले? कान कुला नुङार नाकुङ लागी छुट्कारौ चाडौ भोज तयार खास्की?”
13होटै येशूये लहो नीस जना चेलाकोलाक इट डेयार बीर्न्हका, “सहराङ नुङ्नी र होला नाखुरीकै काट जना डीकुँडा बुवार नुङ्चै जाट्च भर्मीकी डुप्ले र होच्यौ न न्हुङ-न्हुङ नुङ्नी। 14होसे भर्मी कुसे इमाङ पर्ले होसे इमौ मीमुरुङ्की डेकी, ‘गुरुज्यु गीन्ले, ङौ चेलाकोखाटा छुट्कारौ चाडौ भोज ज्याकी पाहुना कोठा कुला ले?’ 15अनी होचे नाखुरीककी काट सजडीयार तयार खास्च ढेम्च टलुङ बाड्को कोठा टान्हाक्ले र होला न नाखुरीकै काल्हौ लागी भोज तयार जाट्की।” 16टब होसे नीस चेलाको नुङा र सहराङ पर्च बीटीकै येशूये होखुरीककी डेच लेखान डुपा र होखुरीकै छुट्कारौ चाडौ भोज तयार जाटा।
17नाबीलाङ येशू बार्ह जना चेलाको खाटा राहा। 18अनी होखुरीक ज्याचै जाट्नाङ येशूये डेया, “ङा नाखुरीककी साँच्ची न डेले, नाखुरीक मध्याङ ङाखाटा ज्याच काट जनै ङाकी ढोका याल्हे।” 19इसे कुरा सेयार चेलाकोलाक डुख लक्डीसा र पालैपालो येशूकी गीना, “ही होसे ङा हो?” डेम गीन्की ठाला।
20होसकै होखुरीककी डेया, “बार्ह जना मध्याङ काट जना हो, सुये ङाखाटा ठालाङ रोटो छोप्मन ले। 21भर्मीयो मीजाकी च धर्मशास्त्राङ मेन बारेयाङ रीक्च अनुसार सीकी न पर्ले, टर ढीक्कार होसे भर्मीकी सु लकीङ भर्मीयो मीजाकी ढोका याल्हे। होसे भर्मीयो च जन्म न माछान्च लेनाङ सेम्ह छान्च लेया!”
22ज्याचै जाट्नाङ येशूये रोटो लार परमेश्वरकी धन्यवाद याहा अनी ग्याका र चेलाकोलाक याछै डेया, “लानी, इसे ङौ शरीर हो।” 23होटै न्हुइङ कचौरा लार ढन्याबाड याम्हभ्याच न्हुइङ होसकै चेलाकोलाक याहा र होखुरीक पट्टकै होसे कचौरा लकीङ गा। 24अनी येशूये होखुरीककी डेया, “इसे ङौ हीउ परमेश्वर र भर्मीकुङ मीघ्यीयुङ करार हो, इसे वास्टै भर्मीकुङ पाप छमौ लागी जोकाक्ले। 25साँच्ची न ङा नाखुरीककी डेले, परमेश्वरौ राज्याङ नयाँ जाट्न मागाठर सम्म ङा फेरी अङ्गुरौ मड्य मागाले।” 26अनी काट भजन ल्हीङार होटै ख्योव्हार होखुरीक जैटुन डाँडालाक नुङा।#१४:२६नाबीलुङ भोजौ ज्यामा ज्यारखीङ यहुडीकै, भजन सङ्गरह ११५ लकीङ ११८ सम्म। ल्हीङको ल्हीङ्च जाट्न्या।
पत्रुसै येशूखाटा जाट्च बाचा
(मत्ती २६:३१-३५; लुका २२:३१-३४; युहन्ना १३:३६-३८)
27अनी येशूये चेलाकोलाक डेया, “नाखुरीक पट्ट न ङाकी डासार भोग्डीस्ले हीजैडेनाङ धर्मशास्त्राङ याङ्च रीक्ङने,
‘ङा गोठ्लाकी साट्ले र भेडाको टीटरबीटर छान्ले।’#जकरीया १३:७
28“टर ङा जीवाम सोरखीङ ङा नाखुरीक डेनाङ पहीला गालीलाङ नुङ्ले।” 29अनी पत्रुसै येशूकी डेया, “पट्ट जना भोग्डीस्नाङ र ङा चहीँ माभोग्डीस्ले।”
30टब येशूये होसकी डेया, “साँच्ची न, ङा नाकोकी डेले, छीनी नाबीक भाले नीस खेप राक्की डेनाङ अगाडी नाकै ङाकी सोम खेप माचीन्डीले डेयार इन्कार जाट्ले।” 31टर पत्रुसै झन जोड जाटार डेया, “नाकोखाटा ङा सीकी न पर्नाङ र ङा नाकोकी इन्कार माजाट्ले।” होटै अरु चेलाकै र होट न डेया।
गेतसमनी बगैँचाङ येशूओ प्रार्थना
(मत्ती २६:३६-४६; लुका २२:३९-४६)
32होटै न्हुइङ येशू चेलाको खाटा गेतसमनी डेच बगैँचाङ नुङा। अनी होसकै होखुरीककी डेया, “ङा प्रार्थना जाट्ठर नाखुरीक इला न ङुनी।” 33अनी होसकै पत्रुस, याकुब र युहन्नाकी लाहाखाटा न आल्हा। होसकुङ मीमन पीडै सार्है छट्पडीस्की ठाला। 34अनी होसकै चेलाकोलाक डेया, “ङौ मीमन पीडै छट्पडीसार सीकी पाम भ्यामने। नाखुरीक इला न मामीस्न ङुनी।” 35चेक पारी नुङार होसको झाङ घोप्टो छानार छान्की य्होक्ले डेनाङ होसे कष्टओ घडी ङा लकीङ हटडीस्ख्यौ डेयार प्रार्थना जाटा। 36अनी होसकै डेया, “ए अब्बा, ए बोइ, नाकै पट्ट कुरा जाट्की य्होक्ले। इसे कचौरा ङा लकीङ हटडीम यान्ही। टर ङै जाट्च इच्छाङ होइन, नाकै जाट्च इच्छा पुरा छान्ख्यो।”#१४:३६अरामी भासाङ “बोइ” की अब्बा र डेले।
37होसको सोम जना चेलाको लेठाङ ल्हेस्न रान्हाङ होखुरीक मीमीक झ्युक्ङ ङुच डुप्राहा। होसकै पत्रुसकी डेया, “सीमोन, ही नाको मीमीक झ्युक्ङ ङुमने? काट घन्ट मीमीक माझ्युक्ङ ङुकी माय्होका? 38मीमीक माझ्युक्नी र प्रार्थना जाट्नी, होटबाटै नाखुरीक परिक्षाङ मापर्ख्यो। मीमन च तयार ले टर शरीर कमजोर ले।”
39फेरी नुङार येशूये डोहरीयार होसे न प्रार्थना जाटा। 40फेरी रान्हाङ र होसकै होखुरीककी मीमीक झ्युक्ङ ङुच डुप्राहा, होखुरीक मीमीक झ्युकार लठ्ठै छान्च बाटै येशूकी ही जवाफ याखी पर्च होखुरीककी हीर माराहा।
41येशू फेरी सोम खेपाङ रान्हाङ होखुरीककी डेया, “ही नाखुरीक अझै र मीमीक झ्युक्ङन ले? अब सोनी बेला राहा। ङोस्नी, भर्मीयो मीजाकी पापीकुङ मीहुटाङ घोवाक्ङ याछ बेला छान्न ने। 42सोनी, अब नुइङ। ङोस्नी, ङाकी ढोका याछ भर्मी खेरेप्न ले।”
येशूकी घोच
(मत्ती २६:४७-५६; लुका २२:४७-५३; युहन्ना १८:३-१२)
43येशूये ङाक्नाङ-ङाक्नाङ न बार्हजना चेलाको मध्याङ काट जना यहूदास डेच चेला मोसोमायाङ होला राहा। मुख्य पुजाहारीको, धर्मगुरुको र अगुवाकै बीर्न्हकाच काट हुड्डा टरवार र लठ्ठी लार होसे खाटा होला राहा। 44होसकोकी घोवाक्च यहूदासै होसे भर्मीकोलाक इट डेमन्या, “सुकी ङा चुम्ल्हे, होसे येशू हो, होसकी न घोवार पहरा याहार आल्खी।” 45अनी येहुडास सरासर येशू लेठाङ नुङा, “ए गुरुज्यु” डेयार होसकोकी गालाङ चुम्हा। 46होडीक न बेला होखुरीकै येशूकी घोवा। 47होला येशू खेरेप टोङ्छ चेलाको मध्याङ काटै टरवार डोनार प्रधान पुजाहारीयो नोकरकी ङापा र होच्यौ मेन्केप च्वाट्टै चेम याहा।
48येशूये होखुरीककी डेया, “ही नाखुरीक काट डाकाकी लेखा टरवार र लठ्ठी लार ङाकी घोकी राछ? 49ङै डीनडीनै परमेश्वरौ मन्दिराङ शिक्षा पाहाक्नाङ ङा नाखुरीक खाटा काठोव्हाङ न लेया र पनी नाखुरीकै ङाकी माघोवा। टर धर्मशास्त्राङ रीक्च कुरा पुरा छान्ख्यो।” 50होडीक न बेला पट्ट चेलाको येशूकी डासार भोग्डीसा।
51जीवाङ काट मट्टै सुटी बढीन बील्छ काट जना रेन्जा भर्मी होसकुङ न्हुङ-न्हुङ नुङा। अनी होखुरीकै होसे रेन्जा भर्मीकी घोवा। 52टर बढीन डासार होसे नाङ्ग्या न भोग्डीसा।
महासभौ मीहासाङ येशू
(मत्ती २६:५७-६८; लुका २२:५४-५५,६३-७१; युहन्ना १८:१३-१४,१९-२४)
53टब येशूकी होखुरीकै प्रधान पुजाहारी लेठाङ आल्हा, होला पट्ट न मुख्य पुजाहारीको, अगुवाको र धर्मगुरुको जम्मा छानन्या। 54पत्रुस चहीँ चेक लोसीङ प्रधान पुजाहारीयो आर्भा भीत्री येशूओ न्हुङ-न्हुङ नुङा, अनी होला सीपाहीको खाटा ङुवार होसे म्हे गुप्की ठाला।
55मुख्य पुजाहारीको र महासभाङ ङुच पट्टकै येशूकी साट्कीयो लागी होसकुङ विरुद्धाङ साक्षी पा टर हीर माडुपा। 56र ढेरै जनै येशूओ विरुद्धाङ झुटो साक्षी याहा। टर सुओर साक्षी माखाटा। 57अनी कुडीक भर्मीकै सोवार होसकुङ विरुद्धाङ इट डेचै साक्षी याहा, 58“इचे इट डेच कानै सेया, ‘भर्मीयो मीहुटै खास्च इसे मन्दिरकी ङा भट्कडीले र भर्मी बीना न अर्को मन्दिर ङा सोम याकाङ न खास्ले।’” 59टर इला र होखुरीकुङ साक्षी माखाटा।
60प्रधान पुजाहारी भर्मीकुङ अगाडी सोवार येशूकी गीना, “ही नाङखाटा हीर जवाफ माले? इसे भर्मीकै नुओ विरुद्धाङ साक्षी याछ ही हो?” 61टर येशू माच्याक्ङ न ङुवा, हीर जवाफ माय्हा। फेरी प्रधान पुजाहारीये होसकोकी गीना, “ही नाङ परमढन्यौ मीजा मुक्ति याछ खीरीस्ट हो?” 62येशूये डेया, “ङा न हो, अनी नाखुरीकै भर्मीयो मीजाकी सर्वशक्तिमानौ डोर मीहुट पट्टी ङुमङुच र सर्घाङ डेबुखाटा राछै जाट्च डाङ्ले।” 63होटै प्रधान पुजाहारीये मीरीसै लहो बढीन च्याट्चै डेया, “अब कानकी अरु साक्षीको हीजै चहडीसा र? 64इचे परमेश्वरौ निन्दा जाट्च नाखुरीकै सेकी क्योटा। नाखुरीकुङ बीचार चहीँ ही ले?” अनी होखुरीक पट्टकै होसकोकी ज्यान सजाय छान्की पर्ले डेया। 65अनी कुडीकै चहीँ येशूकी मेठोक ठोका र होसकुङ मीमीक हुपार ठप्पड ङाप्चै डेया, “लु अगमवाणी ङाको ट, नाङ्की सुये डुङा?” होटै न्हुइङ सीपाहीकै होसकोकी जीम्मा ला अनी होखुरीकै र येशूकी डुङा।
पत्रुसै येशूकी माचीन्डीले डेच
(मत्ती २६:६९-७५; लुका २२:५६-६२; युहन्ना १८:१५-१८,२५-२७)
66पत्रुस म्हाका आर्भाङ ङुमङुनाङ प्रधान पुजाहारीयो काट नोकरनी होला राहा। 67होचे पत्रुसकी म्हे गुप्मङुच डाङार होसकी सेम्हजा ङोसार डेया, “नाको र नासरतुङ येशू खाटा न लेया।”
68टर पत्रुसै इट डेचै इन्कार जाटा, “नाकै ही डेच होसकोकी ङा माचीन्डीले।” होटै न्हुइङ होसे बाहीरुङ मुल गालाम पट्टी नुङा र होडीक बेला न भाल्यै राका।
69होसे नोकरनीये होसकी होला डाङा र फेरी होला लेच भर्मीकोलाक डेया, “इसे च होखुरीक मध्युङ न हो।”
70टर पत्रुसै फेरी माचीन्डीले डेयार इन्कार जाटा। टर काटछीन न्हुइङ वार्लाक पार्लाक टोङ्छ भर्मीकै फेरी पत्रुसकी डेया, “पक्कै, नाको होखुरीक मध्युङ काट हो, हीजैडेनाङ नाको गालीली हो।”
71टर पत्रुसै सफट ज्यार डेकी ठाला, “इडीक ङै ढाट्डीच हो डेनाङ परमेश्वरौ साराप ङा मीटाक पर्ख्यो। सुओ बारेयाङ नाखुरीक डेमन ले होसे भर्मीकी ङा माचीन्डीले।”
72होटै न्हुइङ तुरुन्तै नीस पहर भाल्यै राका, अनी पत्रुसकी येशूये इट डेच कुरा आर्मीटा, “भाल्यै नीस खेप राक्की डेनाङ अगाडी नाकै ङाकी सोम खेप माचीन्डीले डेयार इन्कार जाट्ले।” अनी होसे कुराकी आर्मीटार होसे ढुरुढुरु रापा।
Currently Selected:
मर्कूस 14: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
