मर्कूस 13
13
अन्त्यौ डीनौ चीन्हको
(मत्ती २४:१-१४; लुका २१:५-१९)
1जब येशू परमेश्वरौ मन्दिर लकीङ बाहीर ख्योम्हन लेनाङ होसकुङ चेलाको मध्याङ काट चेलै डेया, “ङोस्नी गुरुज्यु, कुडीक बा-बाड्सो ल्हुङ्को र कुडीक भब्य भवनको।” 2येशूये होसकी डेया, “नाकै इसे भवनको डाङ्ङ न ले नी, टर इसे भवनकुङ काट ल्हुङ मीटाक अर्को ल्हुङ माडास्च जाट्न पट्ट न भट्कडीले।”
3होटै येशू परमेश्वरौ मन्दिर सामु जैटुन डाँडाङ ङुमङुनाङ पत्रुस, याकुब, युहन्ना र अन्द्रियासै होसकोकी सुटुक्क गीना, 4“कानकोलाक डेनी, इसे कुराको सेन छान्ले? अनी इसे पुरा छान्की अगाडी ही-ही चीन्ह छान्ले?” 5होटै येशूये होखुरीककी डेया, “होसीयार छान्नी, सुयेर नाखुरीककी ढाट्डीकी माडीन्ख्यौ। 6वास्टै जना ङौ म्यार्मीनाङ ‘ङा न मुक्ति याछ ख्रीष्ट हो’ डेम राल्हे र होखुरीकै वास्टै भर्मीकोलाक ढाट्डीले। 7जब नाखुरीकै लडाइको छान्च र लडाइयो हल्लाको सेले, होसबेला माबीर्हीखी। याङ्च कुराको छान्की न पर्ले, टर अन्त्यौ डीन राखी चहीँ अझै बाँकी न ले। 8हीजैडेनाङ जाटीयो विरुद्धाङ जाटी र राज्यौ विरुद्धाङ राज्य सोले। ठाउँ-ठावाङ भुकम्पको नुङ्ले र अनीकालको छान्ले। इसे चहीँ मास्टो भर्मीकी मीजा डीन्छ ब्याठा सुरु छान्नाङ लेखा न कष्टकुङ सुरु मट्टै हो।
9“नाखुरीक लहो बारेयाङ होसीयार छानार ङुनी। भर्मीकै घोवार नाखुरीककी अडालटाङ आल्हे। नाखुरीककी सभाङुच इमकोवाङ आल्हार डुङ्ले। हीजैडेनाङ नाखुरीकै ङाकी डुट्चबाटै हाकीमको र राजाकुङ म्याहासाङ ङौ बारेयाङ गबाही याखी डेम नाखुरीक खडा छान्ले।
10“र अन्त्यौ डीन राखी डेनाङ अगाडी चहीँ पट्ट न जाटीकुङ भर्मीकोलाक सेछ समाचार सेटाक्की न पर्ले। 11र भर्मीकै नाखुरीककी घोम आल्हार मुड्डा काले, टब नाखुरीक ही ङाक्की डेयार अघीलकीङ न चीन्टा माजाट्नी। टर होडीक न बेला ही नाखुरीककी याल्हे होसे न ङाक्नी। हीजैडेनाङ ङाक्च नाखुरीक होइन टर पवित्र आत्मा छान्ले।
12“होडीक बेला लहो न भाये डाजेकी साट्की अरुकुङ मीहुटाङ जीम्मा याल्हे। होटजाट्न न बोये मीजाकोलाक र मीजाको मोइ बोयो विरुद्धाङ सोले अनी होखुरीककी साट्की लैडीले। 13र ङाकी विश्वास जाट्च बाटै नाखुरीककी पट्टकै माजाक्ले। टर सु अन्टीम डीन सम्म स्थिर ङुले होच्यौ न उद्धार छान्ले।
बीर्हीमसेच सङ्कष्टओ समयो बारेयाङ
(मत्ती २४:१५-२८; लुका २१:२०-२४)
14“नाखुरीकै नास जाट्च झीर्न सेच कुराकी कुला मालेकी पर्च होला न टोङ्छ डाङ्ले।” (परेस्चये बुझडीस्ख्यौ।) “होडीक बेला यहूदियाङ लेचको पहाड पट्टी भोग्डीस्ख्यौ। #१३:१४ अपवित्र कुराकै परमेश्वरौ मन्दिरकी मास्च खासाक्ले, होसबाटै भर्मीको परमेश्वरकी परसङ्सा जाट्की नुङ्की माय्होक्ख्यो। (ङोस्नी) #दानिएल ९:२७; ११:३१; १२:११ 15इम बाहीर लेच भर्मीको सामानको लाकी इम भीत्री मापर्न न बाहीर लकीङ न भोक्डीस्ख्यो।#१३:१५ छाना: होसे बेला इस्रायल डेसुङ इमकोवाङ फोकी छान्च ढुरी मालेच सम्म पर्च छाना लेया। भर्मीको म्हुङ बाट्की डेम होला ङुच जाट्न्नया। 16य्हाङ लेचको लहो बढीन लाकी ल्हेसार इमाङ मानुङ्ख्यौ। 17टर होडीक बेला गर्भवती र डुढ गाच बालख मीकुव्हाङ लेच मोइकुङ कुडीक बीजोक छान्ले औँला! 18होसे कुराको जुङ्छ बेलाङ माछान्ख्यौ डेयार प्रार्थना जाट्नी। 19हीजैडेनाङ होसे डीनाङ याङ्च महा सङ्कष्टको आइपर्न राल्हे की परमेश्वरै जाट्च सृष्टियो सुरुलकीङ चाहाँसम्म न ट छान्नने, न ट फेरी सेन्र छान्ले। 20परमेश्वरै होसे सङ्कष्टओ डीनको माघट्डीम याछ लेनाङ च सुर भर्मी जीवाकी माय्होक्च लेया। टर होसकै चुन्डीचकुङ लागी होसे डीनको घट्डीम याम्हने।
21“र होडीक बेला सुयेर नाखुरीककी ‘ङोस्नी, मुक्ति याछ ख्रीष्ट इला ले’ वा ‘होसको होला ले’, डेया डेनाङ नाखुरीकै होसे कुराकी विश्वास माजाट्की। 22हीजैडेनाङ झुटो ख्रीष्टको र झुटो अगमवक्ताको ख्योम्ह राल्हे। अनी परमेश्वरै चुन्डीच कोलाक ढाट्डीकी डेम य्होक्ठर होखुरीकै चीन्हको र अचम्मौ कामको जाट्ले। 23टर नाखुरीक चहीँ होसीयार छानार ङुनी। सेनी, ङै नाखुरीककी पट्ट न कुराको अघीलकीङ न डेम याम्हने।”
येशू फेरी राल्हे
(मत्ती २४:२९-३१; लुका २१:२५-२८)
24“टर होसे डीनाङ महासङ्कष्ट न्हुइङ नाखान छुम्ह छान्ले र ग्याहोटै ट्याङ्छ माय्हाले। 25टुगाको सर्घा लकीङ झाल्ले र सर्घाङ लेच शक्तिको होयोले। 26अनी होसबेला भर्मीकै भर्मीयो मीजाकी शक्ति र महीमा खाटा डेबुवाङ राम्हन लेच डाङ्ले। 27अनी होसकै स्वर्गदूतकोलाक बीर्न्हकाले र पृथ्वी र सर्घौ अन्तसम्म पट्ट ठाउँ लकीङ लहे चुन्डीच कोलाक भेला जाट्ले।”
अन्जीरौ म्यार्टुङ लकीङ शिक्षा
(मत्ती २४:३२-३५; लुका २१:२९-३३)
28येशूये डेया, “अन्जीरौ म्यार्टुङ लकीङ शिक्षा पान्ही। जब इच्यो हाँगाको लकीङ टुसा राहार म्हेर्ले टब खान्छ समय खेरेप राहा डेयार नाखुरीककी ठाहा छान्ले। 29इटजाट्न न नाखुरीकै र इसे कुराको छान्चै जाट्च डाङ्ले टब भर्मीयो मीजा खेरेप टार्हामने डेम वार्न्ही। 30साँच्ची न ङा नाखुरीककी डेले, इसे पट्ट न कुरा पुरा माछान्ठर इसे पुस्ता माबीटडीस्ले। 31सर्घा र पृथ्वी बीटडीसार नुङ्ले टर ङौ बचन सेन्र माबीटडीस्ले।
चङ्ख छान्की डेच शिक्षा
(मत्ती २४:३६-४४; लुका १२:३८,४०)
32“टर होसे डीन र बेला सेन राल्हे डेच बारेयाङ परमेश्वर बोइकी बाहेक सुकीर ठाहा माले। न ट मीजाकी न ट स्वर्गदूतकोलाक न ठाहा ले। 33होटबाटै होसीयार छानार ङुनी हीजैडेनाङ होसे डीन सेन राल्हे, नाखुरीककी ठाहा माछान्ले।
34“इसे च मालीकै लहो नोकरकोलाक इमुङ पट्ट न काम जाट्की डेयार जीम्मा याम्ह र पाल्याकी चङ्ख छानार ङोस्की डेम अर्हडीयार परडेस नुङ्च लेखान हो। 35होटबाटै नाखुरीक र चङ्ख छानार ङुनी हीजैडेनाङ इमौ मालीक कुसबेला राल्हे, नाखुरीककी ठाहा माछान्ले। होसे नाबीलाङ, की आढा राटाङ, की गोये राक्च बेलाङ, की गोराक नाखान फेर्च बेलाङ, कुडीक बेला राल्हे नाखुरीककी ठाहा माछान्ले। 36होसे मोसोमायाङ रान्हाङ होचे नाखुरीककी मीस्न ङुच माडुप्ख्यो। 37ही ङै नाखुरीककी डेमने होसे ङा पट्टकी डेले र चङ्ख छान्न ङुनी।”
Currently Selected:
मर्कूस 13: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
