मर्कूस 12
12
खराब मोहीकुङ उदाहरण
(मत्ती २१:३३-४६; लुका २०:९-१९)
1येशूये यहूदी अगुवाकोलाक काट उदाहरण याछै डेया, “काट जना भर्मीये अङ्गुर बारी लैडीया। होच्यौ वरीपरी बार काम याहा र काट खाडल कोहार अङ्गुरौ रस चीप्की कोल खास्न याहा। अनी अङ्गुर बारी रुङ्की काट मचान र खास्न याहा। होटै होसे अङ्गुर बारी मोहीकोलाक जीम्मा याहार लाहा चहीँ परडेसाङ व्हा। 2होटै अङ्गुर म्हीनरखीङ होचे काट जना नोकरकी लहो भाग लाकी मोही लेठाङ बीर्न्हका। 3टर होखुरीकै होसे नोकरकी घोवार डुङा अनी हीर माय्हाम मोर्ल्हाङन बीर्न्हका। 4फेरी मालीकै होखुरीक लेठाङ अर्को नोकरकी बीर्न्हका टर होखुरीकै होच्यौ मीटालुवाङ हीर्कडीया र बेइजट जाटा। 5मालीकै फेरी अर्को नोकरकी बीर्न्हका टर होसकी होखुरीकै साटा। अरु वास्टै जनाकीर बीर्न्हका टर होखुरीकै कुडीककी डुङा र कुडीककी साटा। 6अन्टीमाङ होसे मालीकौ माया जाट्च काट मट्टै लेन्जा मीजा बाँकी लेया। ‘होखुरीकै ङौ मीजाकी च पक्कै आदर जाट्ले’ डेयार पट्ट डेनाङ न्हुइङ लहो मीजाकी होखुरीक लेठाङ बीर्न्हका।
7“टर होसे मोहीकै मेखुरीक-मेखुरीक सल्हा जाटार डेया, ‘इसे च हकडार हो। रान्ही, काल्हा इसकी साटीङ र इच्यो हकडारी कान न छान्ले।’ 8होटै होखुरीकै मालीकौ मीजाकी घोवार साटा अनी अङ्गुर बारीयो बाहीर लोम्ह याहा।”
9होटै येशूये होखुरीककी गीना, “अब होसे अङ्गुर बारीयो मालीकै ही जाट्ले औँला? होसे राल्हे र होसे मोहीकोलाक साट्ले र अङ्गुर बारी अरु मोहीकोलाक याल्हे। 10ही नाखुरीकै धर्मशास्त्राङ इसे बचन मापरेस्नने?
‘कुसे ल्हुङ्की इम खास्च कर्मीकै काम मालक्डीस्ले डेम लोहा होसे न ल्हुङ इमौ गारो सोट्च कोनुङ सुर ल्हुङ छाना।
11इसे च परमप्रभुये न जाट्च हो,
अनी इसे कानै ङोस्नाङ अचम्मौ ले।’#भजनसंग्रह ११८:२२-२३”
12होटै यहूदी अगुवाकै येशूकी घोकी पा, हीजैडेनाङ इसे उदाहरण होसकै होखुरीकुङ न विरुद्धाङ डेच हो डेयार होखुरीकै वार्हा। टर होखुरीक भर्मीकुङ भीडखाटा बीर्हीछ कारनै होसकोकी डासार नुङ्की क्योटा।
कर टेरीकी पर्च बारेयाङ गीन्च
(मत्ती २२:१५-२२; लुका २०:२०-२६)
13अनी येशूये ङाक्च कुराङ फसडीकी डेयार होखुरीकै फरीसीको र हेरोद राजाकी डुट्चको मध्युङ कुडीक जनाकोलाक होसको लेठाङ बीर्न्हका। 14होखुरीक राहार येशूकी डेया, “गुरुज्यु, नाकै साँचो कुरा ङाक्ले डेम कानकी ठाहा ले। भर्मीकै ही डेले डेयार नाकै वास्टा माजाट्ले हीजैडेनाङ नाकै सुओर मेङेर ङोसार काम माजाट्ले। टर परमेश्वरौ लाम साँचो खाटा पाहाक्ले। कानकी डेनी, कैसरकी कर टेरीकी सेम्ह ले की माले? 15कानै कर टेरीइङ की माटेरीइङ?”
टर येशूये होखुरीकुङ कपटी बीचार ठाहा छानार होखुरीककी डेया, “नाखुरीक हीजै ङाकी परिक्षा जाट्ले? काट रोमी सीक्का राकार ङाकी टान्हाक्नी।”
16होटै होखुरीकै काट रोमी सीक्का राकार याहा। अनी येशूये होखुरीककी डेया, “इसे फोटो र म्यार्मीन सुओ हो?” होखुरीकै होसकोकी डेया, “कैसरौ हो।”
17टब येशूये होखुरीककी डेया, “कैसरौ जटी कैसरकी यान्ही र परमेश्वरौ जटी परमेश्वरकी यान्ही।” होसकुङ याङ्च कुरा सेयार होखुरीक छक्क पर्या।
सीच लकीङ जीवाच बारेयाङ गीन्च
(मत्ती २२:२३-३३; लुका २०:२७-४०)
18होटै सीच लकीङ जीवार मासोले डेच कुडीक जना सदुकीको येशू लेठाङ राहार होसकोकी गीना, 19“गुरुज्यु, मोशै कानकी रीक्ङ याम्हने की सुओर डाजे मीजाको माछान्न न सीया डेनाङ भाये होसे सीच डाजेयौ मास्टो खाटा न ब्याहा जाट्की पर्ले र लहो डाज्यौ लागी मीजाको खास्की पर्ले।#व्यवस्था २५:५-६
20“काट परीवाराङ साट जना डाजेभाइको लेया। जेठै ब्याहा जाटा, टर होसे मीजाको माछान्न न सीया। 21होटै माइला भाये होसे सीच डाज्यौ मास्टोकी ब्याहा जाटा र होसे र मीजाको माछान्न न सीया। अनी साइल्हा भाये र होटन जाटा। 22साटै जना भाइकै होसे सीच डाज्यौ मास्टो खाटा न ब्याहा जाटा टर मीजाको माछान्न न सीया र पट्ट डेनाङ न्हुइङ होसे मास्टो र सीया। 23अब सीचको जीवाम सोनाङ होखुरीक मध्याङ होसे सुओ मास्टो छान्ले? हीजैडेनाङ होसे साटजनै न होसे मास्टोकी ब्याहा जाट्नन्या।”
24येशूये होखुरीककी डेया, “नाखुरीक बाड्को भुलाङ पर्नने हीजैडेनाङ नाखुरीकै न ट धर्मशास्त्र वार्न्हने न ट परमेश्वरौ शक्तिकी वार्न्हने। 25हीजैडेनाङ जब सीच लकीङ फेरी जीवाले होखुरीकै न ट ब्याहा जाट्ले, न ट होखुरीककी ब्याहा न जाट्न याल्हे टर होखुरीक स्वर्गआङ लेच स्वर्गदूतको ल्याक्च न छान्ले।
26“सीच भर्मीको जीवार सोच कुरौ बारेयाङ ही नाखुरीकै मोशौ कीताबाङ मापरेस्न ने? कुटजाट्न म्हे ढाम ङुच पोठ्रा लकीङ परमेश्वरै मोशाकी डेया, ‘ङा अब्राहामौ परमेश्वर, इसहाकौ परमेश्वर र याकुबौ परमेश्वर हो।’#प्रस्थान ३:६ #१२:२६ येशूओ बीचाराङ इडीक इखुरीक खायाकुङ सोम भर्मी लकीङ परमेश्वरौ आराढना छान्नन्या डेनाङ, चाहाँ होसे सोम जना जीउँडै न लेकी पर्च, हीजैडेनाङ होसको जीबीट परमेश्वर हो। 27होसको सीचकुङ परमेश्वर होइन टर जीवाचकुङ हो। नाखुरीक बाड्को भुलाङ पर्नने।”
पट्ट डेनाङ बाड्को आज्ञा
(मत्ती २२:३४-४०; लुका १०:२५-२८)
28धर्मगुरुको मध्याङ काट जना राहा, होचे येशू र सदुकीको लाहा लाहाङ बीबाड जाट्न ङुच सेया। अनी होचे येशूये भर्मीकोलाक ठीक जबाफ याछ डाङार होसकोकी गीना, “पट्ट आज्ञाकोवाङ मुख्य चहीँ कुसे हो?”
29येशूये जबाफ याहा, “पट्ट डेनाङ मुख्य चहीँ इसे न हो, ‘ए इस्राएल सेनी, परमप्रभु कानुङ परमेश्वर काट मट्टै परमप्रभु हो। 30नीये परमप्रभु लहो परमेश्वरकी नुओ पुरा रीडय, पुरा परान, पुरा मीमनै र नुओ पुरा शक्तिये माया जाट्की।’#व्यवस्था ६:४-५ 31र डोस्रो चहीँ इसे हो, ‘नीये लहो छीमेकीकी लाहाकी लेखा न माया जाट्की।’#लेवी १९:१८ इसे डेनाङ बाड्को अर्को आज्ञा माले।”
32होटै होसे धर्मगुरुये येशूकी डेया, “गुरुज्यु, नाकै ठीक डेया, परमेश्वर काट्न ले र होसको बाहेक अर्को सुर माले। 33र होसकोकी पुरा रीडये, पुरा मीमनै, पुरा शक्तिये माया जाट्की र छीमेकीकी लाहाकी लेखा न माया जाट्की, पट्ट खाल्या होमबली र बलिदानको डेनाङ बाड्को हो।”#होसे ६:६ 34होचे बुड्ढी ओल्होकार जबाफ याछ डाङार येशूये होसकी डेया, “नाङ परमेश्वरौ राज्यलकीङ लोस माले।” अनी होसनीक लकीङ होसकोकी गीन्च सुओर हीम्मट माछाना।
मुक्ति याछ ख्रीष्टौ बारेयाङ गीन्च
(मत्ती २२:४१-४६; २३:१-३६; लुका २०:४१-४७)
35परमेश्वरौ मन्दिराङ पाहाक्ङन लेनाङ येशूये डेया, “कुट जाट्न मुक्ति याछ ख्रीष्ट दाउदौ मीजा हो डेम धर्मगुरुको डेले? 36हीजैडेनाङ दाउद लहे न पवित्र आत्मा लकीङ डेमने,
‘परमप्रभुये ङौ प्रभुकी डेया,
नाको ङौ डोर मीहुट पट्टी ङुनी,
जब सम्म ङा नाकुङ शत्रुकोलाक नाकुङ पैटला म्हकी माडाले।’#भजनसंग्रह ११०:१#१२:३६डोर पट्टी: शक्ति र इज्जटौ ठाउँ।
37“र दाउद लाहा न खीरीस्टकी ‘प्रभु’ डेले, अनी कुट जाट्न मुक्ति याछ ख्रीष्ट होच्यौ मीजा छाना ट?” होटै होला लेच भर्मीकुङ भीडै येशूओ बचन मार्हाङ्छै सेया।
38होटै शिक्षा यान्हाङ येशूये डेया, “धर्मगुरुको खाटा होसीयार छान्नी। होखुरीक लोट्च बढीन बील्खी र बजाराङ व्हानाङ लाहाकी मान जाट्ख्यौ डेच मीमन जाट्ले, 39अनी सभाङुच इमाङ सेछ ठाउँ र भोजाङ आदर याख्यौ डेच मीमन जाट्ले। 40होखुरीकै बीढुवाकुङ इम स्याट्ले र अरुकै धर्मि डेख्यो डेम टान्हाक्कीयो लागी लोलोट्च प्रार्थना जाट्ले। होङ्चकै झन वास्टै दण्ड डुप्ले।”
बीढुवै याछ भेटी
(लुका २१:१-४)
41येशू परमेश्वरौ मन्दिराङ भेटी काच बाकस अगाडी ङुवा र भर्मीकै भेटी काच ङोसा। धनी भर्मीकै वास्टै-वास्टै पैसा का। 42र काट गरीब बीढुवा राहार टामौ मार्जा सीक्का का। 43अनी येशूये लोहो चेलाकोलाक लाहा लेठाङ आर्घार होखुरीककी डेया, “साँच्ची न ङा नाखुरीककी डेले, इसे गरीब बीढुवै अरु पट्ट डेनाङ वास्टै भेटी कामने। 44हीजैडेनाङ पट्टै लाहालहो प्रशस्त लेच धनीङ का टर इसे बीढुवै चहीँ लहो गरीबी लकीङ मेन पट्ट जीबीका क्योट्की पर्चन याहा।”
Currently Selected:
मर्कूस 12: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
