मर्कूस 15
15
येशू पिलातसौ म्याहासाङ
(मत्ती २७:१-२,११-२६; लुका २३:१-५,१३-२५; युहन्ना १८:२८–१९:१६)
1गोराक छान्च बीट्टीकै मुख्य पुजाहारीको खाट-खाट न अगुवाको, धर्मगुरुको र पट्ट न महासभाङ ङुच भर्मीकै योजना खासा। होटै येशूकी छ्याकार आल्हा र रोमीकुङ बडाहाकीम पिलातसौ मीहुटाङ जीम्मा याहा। 2पिलातसै होसकोकी गीना, “ही नाको यहूदीकुङ राजा हो?” होसकै पिलातसकी डेया, “नाकै न होट डेमन ले।” 3मुख्य पुजाहारीकै येशूकी वास्टै कुराकुङ डोस लैडीया। 4पिलातसै येशूकी फेरी इट डेयार गीना, “ही नाको खाटा हीर जवाफ माले? ङोस्नी ट नाकोकी होखुरीकै कुडीक वास्टै डोस लैडीमने।” 5टर येशूये हीर जवाफ माय्हा। याङ्च डाङार पिलातस अचम्म मन्डीया।
6छुट्कारौ चाडौ बेलाङ भर्मीकै सुकी डेले होसे अनुसार काट कैडीकी पिलातसै डास्न याछ चलन लेया। 7होडीक बेला बारब्बा म्यार्मीन लेच काट जना भर्मी झ्यालखानाङ पर्नन्या। होचे अरुको खाटा खाटार आन्डोलनाङ भर्मी साट्नन्या। 8अनी भर्मीकुङ भीड पिलातस लेठाङ राहा र “अरु वर्षवाङ लेखा न इसे वर्ष र काट जना कैडीकी डास्न यान्ही” डेम बिन्ती जाटा। 9पिलातसै डेया, “ही ङा नाखुरीकुङ लागी यहूदीकुङ राजाकी डास्न यहीङ ट?” 10मुख्य पुजाहारीये मीरीस जाटार येशूकी लाहा लेठाङ राक्च डेयार पिलातसकी ठाहा लेया।
11टर मुख्य पुजाहारीकै भर्मीकोलाक सुरडीयार “येशूकी होइन, बारब्बा की न डास्न यान्ही” डेकी लैडीया। 12पिलातसै भर्मीकोलाक फेरी गीना, “नाखुरीकै यहूदीकुङ राजा डेच की चहीँ ङा ही जाटीङ ट?” 13होखुरीकै च्याक्चै डेया, “होसकी क्रूसाङ टङ्गडीम यान्ही!” 14पिलातसै गीना, “हीजै? इसकै ही अपराध जाट्ने र?” टर होखुरीकै झन च्याक्चै डेया, “होसकी क्रूसाङ टङ्गडीम यान्ही!” 15पिलातसै भीडकी खुसी पार्च मीमन जाट्च बाटै होचे बारब्बाकी होखुरीकुङ लागी डास्न याहा। येशूकी चहीँ कोर्रा ङापार क्रूसाङ टङ्गडीकी डेम रोमी सीपाहीकोलाक जीम्मा याहा।
सीपाहीकै येशूकी गील्ला जाट्च
(मत्ती २७:२७-३१; युहन्ना १९:२-३)
16होटै सीपाहीकै येशूकी बडा हाकीमौ दरबारौ आर्भाङ आल्हा र अरु पट्ट न सीपाहीकोलाक आर्घाम राका। 17अनी होखुरीकै येशूकी गील्ला जाट्चै बैजनी रङुङ बढीन बील्हाका र जुओ मुकुट खासार होसकुङ मीटालुवाङ काम याहा। #१५:१७ होडीक बेला, राजाकै होङ्च न बैजनी रङौ बढीन बील्छ जाट्न्या। 18अनी होखुरीकै होसकोकी “यहूदीकुङ राजौ जय छान्ख्यो” डेयार सलाम जाटा। 19अनी होखुरीकै आर्क्यामौ डाङ्गै येशूकी मीटालुवाङ हीर्कडीचै, मेठोक ठोक्चै अनी घुँडा टुसार होसकोकी झोरा। 20इटजाट्न खीस्डीम भ्यारखीङ होखुरीकै बैजनी रङुङ बढीन डोनार येशूओ मेखोल्हौ न बढीन बील्हाक्ङ याहा। होटै होखुरीकै होसकोकी क्रूसाङ टङ्गडीकी डेम सहर लकीङ बाहीर आल्हा।
येशूकी क्रुसाङ टङ्गडीच
(मत्ती २७:३२-४४; लुका २३:२६-४३; युहन्ना १९:१७-२७)
21जब लामाङ नुङ्चै जाट्नाङ होखुरीकै कुरेनी डेसुङ सीमोन डेच भर्मी लाङ्घा लकीङ सहरलाक राछै जाट्च डुपा। होसे अलेक्जेन्डर र रुफसौ बोइ लेया। सीपाहीकै होसकी जबरजस्टी येशूओ क्रूस बुकी लैडीया।#१५:२१ साइरेनी: इसे सहर अफरीकौ उट्टर पट्टी लेया। 22अनी येशूकी होखुरीकै गलगठा डेच ठावाङ आल्हा। गलगठा डेच अर्थ चहीँ “खप्परे ठाउँ हो।” 23होला टाहार होखुरीकै येशूकी म्होरोक्च मुर्र डाख मड्याङ मोल्होकार याहा टर येशूये मागा।#१५:२३ होखुरीककै येशूकी इसे हान लेखा म्होर्छ उसा गाच ठोक बीक्च कम छान्ख्यो डेम गाकी याहा। टर होसकै इसकी मागा, हीजैडेनाङ अन्ट सम्म ही छान्नन ले डेम वार्खी होसकै मीमन जाटा। #भजनसंग्रह ६९:२२ 24होटै होखुरीकै येशूकी क्रूसाङ टङ्गडीया। होसकुङ बढीनको चहीँ सु-सुओ भाकाङ पर्ले डेयार होखुरीकै चीठ्ठा कार पुङा।
25अनी येशूकी क्रूसाङ टङ्गडीनाङ गोराकुङ नौ बजे छानन्या। 26होसकोकी दोष लैडीच दोष पत्राङ “यहूदीकुङ राजा” डेम रीक्ङन्या। 27होखुरीकै येशू खाटा नीस जना डाकु कोलाक र क्रूसाङ टङ्गडीया। काट की डोर पट्टी र काट्की डेबर्या पट्टी। 28[ढर्मसास्टराङ रीक्च बचन इटजाट्न पुरा छाना, “होसकोकी अपराधीको खाटा हीला।#यशैया ५३:१२”]#१५:२८ कुनै-कुनै सोरोट बाइबलमा यो पड छैन
29होसे लाम छान्चै नुङ्च भर्मीकै मीटालु होयोक्चै येशूकी गील्ला जाट्चै डेया, “ङोस्नी ट! होसे न होइन परमेश्वरौ मन्दिर भट्कडीयार सोम याकाङ न खास्की य्होक्ले डेच, 30लाहाकी जीवाकार क्रूसलकीङ झाल्न रान्हा!” 31होटजाट्न न मुख्य पुजाहारीको र धर्मगुरुकै र येशूकी गील्ला जाटा। होखुरीकै मेखुरीक-मेखुरीक डेकी ठाला, “इचे अरुकी च जीवाटाका टर लाहाकी चहीँ जीवाटाक्की माय्होका। 32ए इस्राएलीकुङ राजा मुक्ति याछ ख्रीष्ट अब क्रूस लकीङ झाल्न रान्हा, कान ङोसीङ होटै टी विश्वास जाट्ले” येशूखाटा न टङ्गडीस्चकै र होसकुङ निन्दा जाटा।
येशू सीच
(मत्ती २७:४५-५६; लुका २३:४४-४९; युहन्ना १९:२८-३०)
33नाम्सीनुङ बार्ह बजे लकीङ सोम बजे सम्म पट्ट न देशकी छुम्छये हुपा। 34सोम बजे पट्टी येशू बाड्को सोरै च्याका, “इलोइ, इलोइ, लामा सबखठनी?” इच्यो अर्थ हो, “ए ङौ परमेश्वर, ए ङौ परमेश्वर ङाकी नाकै हीजै डास्न याहा?”#भजनसंग्रह २२:१#१५:३४ एलोइ साबाकोठोनी=इसे सब्डको चहीँ आरामीक हो। 35होला खेरेप लेचकै इसे सोर सेयार कोइ कोये डेया, “सेनी ट! इचे एलीयाकी आर्घामन ले।”#१५:३५ “एलीया” म्यार्मीन “एलोइ” लेखा न सेले, होच्यौ अर्ठ “ङौ परमेश्वर” हो। 36होटै न्हुइङ काट जनै चहीँ खेर्न नुङार काट स्पन्ज सीर्काङ छोपार काट लोट्च आर्क्यामाङ इट डेयार येशूकी गाकी याहा, “लु ङोसीङ ट! एलीया इसकी झालाक्की राल्हेकी।” 37अनी होडीक न बेला येशूये बाड्को सोर छ्युकार परान डासा।
38होडीक न बेला परमेश्वरौ मन्दिर भीत्री टङ्गडीच पर्दा ढेनाम लकीङ म्हाका सम्म नीस भाग छानार च्याहा।#१५:३८ इसे पर्डा पवित्र ठाउँ र महा पवित्र ठाँओ मीघ्याङ लेया। परमेश्वराङ बाड्को पुजाहारी मट्टै होइन, टर जोसुकै भर्मी राखी अट य्होकै डेम होसकै होसे पर्डाकी च्याट्न याहा। ङोस्नी #प्रस्थान २६:३१-३३ 39येशूये इटजाट्न परान डास्च डाङार क्रूसौ छेवाङ टोङ्ह ङुच रोमी कप्टानै डेया, “साच्चीँ न इसे भर्मी च परमेश्वरौ न मीजा लेसा!” 40कुडीक जना मास्टो भर्मीको चहीँ लोसीङ न टोङ्हार ङोस्न ङुमन्या। होखुरीक मध्याङ मरीयम मग्डलीनी, सलोमी, माजा याकुब र योसेफौ मोइ मरीयम लेया। 41येशू गालीलाङ लेनाङ होखुरीकै होसकोकी डुटार होसकुङ सेवा जाट्नन्या। होटबाटै येशू खाटा यरूशलेम सम्म राछ अरु वास्टै मास्टो भर्मीको र होला लेया।
येशूकी चीहानाङ डाच
(मत्ती २७:५७-६१; लुका २३:५०-५६; युहन्ना १९:३८-४२)
42-43होसनीक चहीँ तयारीयो डीन डेच म्हुङ बाट्च डीनौ अगाडीयुङ डीन लेया। अरीमाठीया सहरुङ योसेफै होसनीक न नाबीलाङ पिलातस खाटा माबीर्हीम येशूओ लास ङेहा। योसेफ चहीँ माहासभौ मन्डीकी पर्च काट जना सडस्य लेया। होचे परमेश्वरौ राज्यकी लेन्न ङुमन्या।
44येशू अघी न सीमभ्यामे डेम सेनाङ पिलातस छक्क पर्या। होचे रोमी कप्टानकी लाहा लेठाङ आर्घार येशू सीम भ्याच हो की होइन डेयार गीना। 45होसे कप्टानै साँच्ची न येशू सीम भ्याच हो डेयार सेटाक्च पछी पिलातसै योसेफकी येशूओ लास आल्खी याहा। 46योसेफै मजुङ सुटी बढीन लोम राका र येशूओ लासकी क्रूसीङ झालाका होटै होसे न बढीनै आर्फोका र ल्हुङ खोप्डीयार खास्न डाच चीहानाङ डा। होटै बाड्को ल्हुङ गुड्कडीयार चीहानौ मेङेर ठुन्न याहा। 47मरीयम मग्डलीनी र योसेफौ मोइ मरीयमै चहीँ येशूकी चीहानाङ डाच ङोस्न ङुमन्या।
Currently Selected:
मर्कूस 15: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
