प्रेरित 8
8
1स्तिफनसकी साट्नाङ साउल र खाट्नन्या।
साउलै विश्वासीकोलाक डुख याछ
होसे डीनलकीङ न यरूशलेमाङ लेच मण्डलीयो विरोधाङ बाड्को सटावट सुरु छाना। प्रेरितको बाहेक अरु चेलाको पट्ट न भोग्डीसार यहूदिया र सामरीया इलाका पट्टी छरपस्ट छाना। 2अनी प्रभुओ भक्तजनकै स्तिफनसकी आल्हार ठाका र होच्यौ लागी बाड्को बीलाप जाटा।
3टर साउलै चहीँ मण्डलीकी नास जाट्की डेम इम-इमाङ पर्यार विश्वासी पट्ट न लेन्जा भर्मी र मास्टो भर्मीकोलाक आर्ढुस्चै आल्हार झ्यालखानाङ कामयाम्ह्न्या।
सामरीयाङ सेछ समाचार सेटाक्च
4होसे छरपस्ट छान्च विश्वासीकै पट्टलाक नुङार बचन प्रचार जाटा। 5अनी फीलीप चहीँ सामरीयो काट सहराङ नुङार मुक्ति याछ येशूओ बारेयाङ प्रचार जाटा। 6होटै फीलीपै डेच बचन सेया र होचे जाट्च अचम्मौ चीन्हको डाङा र भर्मीकुङ भीडै होच्यौ कुराङ ढ्यान याहार सेया। 7हीजैडेनाङ वास्टै भर्मीको लकीङ दुष्ट आत्माको बाड्को सोरै च्याक्चै ख्योव्हा अनी वास्टै जना पक्षाघात छानार छाचको र लुला-लङ्गडाकोलाक गेपाका। 8इटजाट्न होसे सहराङ सार्है न आनन्द छाना।
9सीमोन म्यर्मीनुङ काट जना भर्मी होसे सहराङ लेया। होचे अघीलकीङ न होसे सहराङ जाडु जाटार सामरीयुङ भर्मीकोलाक अचम्म पार्नन्या र लाहा खुब बाड्को ल्हेस्नन्या। 10होसे सहरुङ भर्मीकै होसकी मार्जा लकीङ बाड्सोको सम्म पट्टये न इट डेम मन्डीम्या, “इसे भर्मी खाटा परमेश्वरौ बाड्को शक्ति ले।” 11होखुरीकै होसे भर्मीकी मन्डीम्या हीजैडेनाङ धेरै वर्ष लकीङ होचे जाडु जाटार भर्मीकोलाक अचम्म पार्यार डामन्या। 12टर फीलीपै परमेश्वरौ राज्यौ बारेयाङ प्रचार जाटा र येशू न मुक्ति याछ राजा हो डेम सेछ समाचार सेटाका, टब वास्टै भर्मीकै फीलीपौ कुराङ विश्वास जाटा। अनी होसे विश्वास जाट्च लेन्जा भर्मी र मास्टो भर्मी पट्टये बप्तिस्मा ला। 13होटै सीमोनै र विश्वास जाटा र बप्तिस्मा ला। अनी होसे र फीलीप खाटा व्हाकी ठाला, फीलीपै जाट्च बा-बाड्सो अचम्मौ काम र चीन्हको डाङार होसे छक्क पर्या।
14होटै सामरीयुङ भर्मीकै परमेश्वरौ बचन ग्रहण जाटा डेच सेयार यरूशलेमाङ लेच प्रेरितकै पत्रुस र युहन्नाकी होखुरीक लेठाङ बीर्न्हका। 15अनी होखुरीक होला राहा र विश्वास जाट्चकै पवित्र आत्मा डुप्ख्यौ डेयार प्रार्थना जाटा। 16हीजैडेनाङ होखुरीक सु मीटाक र पवित्र आत्मा मार्हामन्या। होखुरीक प्रभु येशूओ म्यार्मीनाङ मट्टै बप्तिस्मा छानन्या। 17होटै न्हुइङ पत्रुस र युहन्नै होखुरीक मीटाक लहो मीहुट डा अनी होखुरीकै पवित्र आत्मा डुपा।
18प्रेरितकै मीहुट डानाङ पवित्र आत्मा डुप्च लेसा डेच डाङार सीमोनै होखुरीककी इट डेचै पैसा याखी पा, 19“ङाकी र इसे शक्ति यान्ही, होटबाटै ङै र भर्मी मीटाक मीहुट डानाङ होचे पवित्र आत्मा डुप्ख्यौ।” 20टर पत्रुसै डेया, “नुओ पैसा नाङखाटा न नस्ट छान्ख्यौ, हीजैडेनाङ परमेश्वरौ वरदान पैसै लोकी य्होक्ले डेच नीये बीचार जाटा। 21इसे कामाङ न ट नुओ भाग ले न ट अधिकार ले, हीजैडेनाङ परमेश्वरौ म्याहासाङ नुओ मीमन सेछ मालेसा। 22होटबाटै नुओ इसे दुष्ट बीचारौ लागी पश्चात्ताप जाटो र प्रभुखाटा प्रार्थना जाटो, कुटै र नुओ मीमनुङ मासेछ बीचारको क्षमा छान्ने की। 23हीजैडेनाङ ङै डाङ्ङने, नुओ मीमन डाहै न्हेप्मने र नाङ पापौ बन्धनाङ ले।” 24अनी सीमोनै पत्रुस र युहन्नाकी डेया, “नाखुरीकै न ङौ लागी प्रभुखाटा प्रार्थना जाट्न यान्ही, नाखुरीकै डेच कुसे कुरा र ङामीटाक आइ मापर्ख्यौ।”
25पत्रुस र युहन्नै लहो गबाही याहा र प्रभुओ बचन सेटाक्ङ भ्याच न्हुइङ होखुरीक सामारीकुङ वास्टै लाङ्घाङ नुङार सेछ समचार प्रचार जाट्चै होखुरीक यरूशलेमाङ ल्हेसा।
फीलीप र इथियोपियुङ सरकारी भर्मी
26होटै न्हुइङ प्रभुओ काट स्वर्गदूतै फीलीपकी डेया, “सोना र दक्षिणपट्टी यरूशलेमलकीङ गाजापट्टी नुङ्च मरुभुमीयो लाम ले होटै नुङ्ना।” 27फीलीप सोवार नुङा अनी होडीक न बेला काट जना इथियोपियाली नपुङ्सककी डुपा, होसे इथियोपिया देशुङ माहारानी कन्डाकीयो पट्ट न ढन-सम्मटी ङोस्च बाड्को पडुङ अधिकारी लेया। होसे यरूशलेमाङ आराधना जाट्की राम्हन्या। 28होटै होसे ल्हेस्न न लेया र लहो रठाङ ङुवार यशैया अगमवक्तौ कीताब परेस्न ङुम्या।
29अनी पवित्र आत्मै फीलीपकी डेया, “उ होसे रठ खाट-खाट नुङ्ना।” 30होटै फीलीप खेरार रठौ खेरेप नुङा र होसे भर्मीये यशैया अगमवक्तौ कीताब परेस्च सेयार फीलीपै होसकी गीना, “नाकै परेस्चै जाट्च कुरा बुझडीस्ले?” 31अनी होसे भर्मीये डेया, “सुयेर डेम माय्हाम ङै कुटजाट्न बुझडीस्की य्होक्ले र?” होटै होचे फीलीपकी रठाङ काल्हार लाहा खाटा ङुकी डेम बिन्ती जाटा। 32अनी होचे परेस्चै जाट्च धर्मशास्त्रओ खन्ड इसे लेया,
“कुटजाट्न भेडाकी साट्की आल्न्हाङ लुरु-लुरु नुङ्ले,
अठबा भेडा उन चेचओ अघी माच्याक्ङ ङुले
होटजाट्न न होसकै र लहो मेङेर माखोलीया।
33होसकुङ बेइजट छान्नाङ होसकै न्याय माडुपा।
होसकुङ सन्टानकुङ बारेयाङ सुये डेकी य्होक्ले?
हीजैडेनाङ होसकुङ जीवन पृथ्वी लकीङ आल्हा।” #यशैया ५३:७-८
34अनी होसे नपुङ्सकै फीलीपकी गीना, “दया जाट्न ङाकी डेनी, इसे कुरा अगमवक्तै सुओ बारेयाङ डेच हो? आसकै लहो न बारेयाङ डेच हो की अरुकुङ बारेयाङ डेच हो?” 35टब फीलीपै ङाक्की सुरु जाटा धर्मशास्त्रओ होसे न खन्डलकीङ येशूओ सेछ समचार होसकी सेटाक्की ठाला।
36होटै होखुरीक लामाङ नुङ्नाङ-नुङ्नाङ न डी लेच ठावाङ टाहा। अनी होसे नपुङ्सकै फीलीपकी डेया, “ङोस्नी, इला डी लेसा, अब ङाकी बप्तिस्मा लाकी हीये रोक्डीकी य्होक्ले?” 37[फीलीपै होसकी डेया, “इडीक नाको रीदयलकीङ न विश्वास जाट्ले डेनाङ नाकै बप्तिस्मा लाकी य्होक्ले।” होचे जवाफ याहा, “येशू ख्रीष्ट न परमेश्वरौ मीजा हो डेम ङा विश्वास जाट्ले।”] #८:३७ कोइ-कोइ सोरोट बाइबलाङ इसे माले 38होचे रठ रोकडीकी लैडीया होटै होखुरीक नीसजना न झाला। डी लेच ठावाङ नुङार फीलीपै होसे नपुङ्सककी बप्तिस्मा याहा। 39जब होखुरीक डीलकीङ बाहीर खेव्हा टब तुरुन्तै प्रभुओ आत्मै फीलीपकी घोवार आल्हा र नपुङ्सकै होसकी फेरी माडाङा। होटै होसे मार्हाङ्छै लाम लग्डीसा।
40होटै फीलीपै लाहाकी अश्दोदाङ टार्हाछ डुपा र कैसरीया माटार्हाठर वास्टै सहरकोवाङ सेछ-समचार सेटाक्चै नुङा।
Currently Selected:
प्रेरित 8: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
