प्रेरित 7
7
स्तिफनसौ सन्देश
1होटै स्तिफनसकी प्रधान पुजाहारीये गीना, “ही इसे कुरा साँच्ची न हो?”
2स्तिफनसै डेया, “ए डाजे-भाइको र बोइको, सेनी। महीमौ परमेश्वरै कानुङ पुर्खा अब्राहामकी हारान डेच ठावाङ नुङ्की डेनाङ अघी मेसोपोटामीयुङ क्षेत्राङ ङुनाङ दर्शन याहा। 3अनी परमेश्वरै आसकोकी डेया, ‘नाको लहो ठाउँ र कुटुम्बकोलाक डास्नी र कुसे ठाउँ ङा नाकोकी टान्हाक्ले होला नुङ्नी।’#उत्पत्ति १२:१ 4होटै अब्राहाम कल्डीकुङ ठाँउलकीङ ख्योव्हार हारानाङ नुङार ङुवा। अनी अब्राहामौ बोइ सीरखीङ परमेश्वरै होसकी नाखुरीक चाहाँ ङुच इसे ठावाङ सारीम राका। 5परमेश्वरै अब्राहामकी इसे ठावाङ बोइ बाज्युकुङ जग्गा बारी हीर माय्हा, मीखुट्या टेक्डीच ठाँउसम्म र माय्हा। टर होच्यौ काट र सन्टान मालेनाङ र पनी परमेश्वरै ‘ङा इसे ठाउँ नाङ र नुओ राछ सन्टानकोलाक लहो सम्पत्तियो रुपाङ याल्हे’ डेयार प्रतिज्ञा जाटा। 6अनी परमेश्वरै आसकोकी इट र डेया, ‘नुओ सन्टानको फकुङ देशाङ नुङार ङुकी पर्ले र होसे देशुङ भर्मीकै होखुरीककी कमारा खासार बुली सय वर्षसम्म डुख याहार डाले। 7टर होखुरीक कुसे जातियो कमारा छानार ङुले होसे जातिकी ङा न दण्ड याल्हे। होटै न्हुइङ होखुरीक होसे देशलकीङ ख्योम्ह राहार इसे न ठावाङ होखुरीकै ङौ आराधना जाट्ले।’#उत्पत्ति १५:१३-१४; प्रस्थान ३:१२
8“अनी परमेश्वरै अब्राहाम खाटा करार छ्याकार आसकोकी डेया होसे करारौ चीन्ह चहीँ खतना जाट्की हो। जब इसहाक डीन्हा र अब्राहाम बोइ छाना अनी आठ याकाङ अब्राहामै इसहाकौ खतना जाटा। इसहाकै लहो मीजा याकुबौ र याकुबै लहो बार्ह जना मीजाकुङ खतना जाटा र बार्ह कुलौ पुर्खा छाना।
9“योसेफकी मेन डाजे भाइकै मीरीस जाट्न्या होटबाटै होखुरीकै होसकी मिश्रदेशाङ कमारा छान्कीयो लागी आर्लाम का। टर परमेश्वर होसेखाटा लेया। 10र परमेश्वरै होसकी पट्ट न कष्ट लकीङ भाका। अनी मिश्रदेशुङ फारो राजौ अगाडी बुद्धि याहा र होटबाटै फारो राजै होसकी आदर जाटा। होटै फारोये होसकी मिश्रदेशुङ र मेन दरबारुङ हाकीम खासा।
11“होटै न्हुइङ मिश्रदेश र कनानाङ बाड्को अनीकाल पर्या र सार्है डुख छाना, अनी कानुङ बोइ-बाज्युकै अन्न माडुपा। 12टर याकुबै मिश्रदेशाङ अन्न ले डेच कुरा सेयार लहो लेन्जा मीजाको, कानुङ पुर्खाकोलाक पहीला खेप होसे देशाङ बीर्न्हका। 13फेरी होखुरीक दोस्रो खेप अन्न लोकी नुङ्नाङ योसेफै लहो डाजे-भाइकोलाक लाहाकी चीन्डीयाका। होटै योसेफौ परीवारौ बारेयाङ फारोकी र थाहा छाना। 14होटै योसेफै लहो बोइ याकुब र पट्ट न परीवारको समेट लार मिश्राङ राखी डेयार आर्घामका र मिश्राङ राछको जम्मा पचहटर जना लेया। 15इटजाट्न याकुब मिश्राङ नुङा होटै होला न सीया र कानुङ बोइ-बाज्युको र होला न सीया। 16होटै न्हुइङ होखुरीकुङ लास लहो न देशुङ सकेम डेच सहराङ ल्हेट्न राका अनी अब्राहामै सकेमाङ हमोरौ लेन्जा मीजाको खाटा चाँडी याहार लोच चीहानाङ ठाका।
17“परमेश्वरौ लागी अब्राहामखाटा जाट्च प्रतिज्ञा पुरा जाट्च समय खेरेप राम्हन्या। होडीक बेला न मिश्रदेशाङ कानुङ भर्मीकुङ सङ्ख्या बट्डीसा। 18र काट जना राजै मिश्रदेशाङ राज्य जाट्की ठाला, होसकी चहीँ योसेफौ बारेयाङ हीर थाहा मालेया। 19होचे कानुङ जातिखाटा मास्च योजना खासा र अट्याचार जाटा। र कानुङ बोइ-बाज्युकी मेखुरीकुङ न बालखकोलाक बाहीर आल्हार डाकी लैडीमन्या, होटबाटै चाम-चाम डीन्छ पट्ट न बालखको सीमन्या।
20“होडीक न बेला मोशाकी डीन्हा। होसे बालख सेछ लेया। होच्यौ मोइ-बोये होसकी आर्च्युकार सोम महीना सम्म इमाङ न कोकार डा। 21होटै होखुरीकै होसकी आर्च्युकार डाकी माय्होका र होसकी बाहीर आल्हा, अनी फारो राजौ मास्टो मीजै मोशाकी आल्हार लहो मीजा खासार कोका। 22होटै मोशाकी मिश्रीकुङ पट्ट न शिक्षा याहा र होसे ङाक्की र काम जाट्की वार्छ छाना।
23“जब मोशा चालीस वर्ष टाहा, अनी होचे लहो जाति इस्राएली डाजे-भाइकोलाक डुप्च मीमन जाटा। 24कायाक काट मिश्रीये लहो जाति इस्राएली मीटाक अन्याय जाट्च मोशै डाङा होटबाटै आसकै होसकी जोगडीया, र होसे मिश्रीकी साटार बडला ला। 25परमेश्वरै मोशौ मीहुटीङ इस्राएलीकोलाक छुटकारा याल्हे डेच कुरा लहो जातिये बुझडीस्ले औँला डेम मोशै आर्मीट्न्या। टर होखुरीकै इसे कुरा माबुझडीसा। 26होटै पीउर्हाक लेखो नीस जना इस्राएलीको न झगडा जाट्चै जाट्च मोशै डाङा र होखुरीककी खाटाक्की पाचै डेया, ‘सेनी, नाखुरीक च लहो डाजेभाइ हो, हीजै इटजाट्न लाहा-लाहाङ पुन्छ?’ 27टर लहो छीमेकी मीटाक अन्याय जाट्चये मोशाकी इट डेयार ढुसा, ‘कान मीटाक हाकीम र न्याय जाट्च खासार नाङ्की सुये बीर्न्हका? 28ही टीस्यामीङ होसे मिश्रीकी साट्च लेखा न नाङ ङाकी र साट्की पाच?’#प्रस्थान २:१४ 29होटै याङ्च जबाफ सेरखीङ मोशा मिश्रदेशीङ भोग्डीसार मीड्यान डेच देशाङ नुङा र होला न ङुवा। र होला होच्यौ नीसजना लेन्जा मीजाको डीन्हा।
30“चालीस वर्ष न्हुइङ सीनै पर्बटौ उजाड ठावाङ काट पोठ्राङ ढाचै जाट्च म्हेओ ज्वालाङ काट स्वर्गदूत मोशै मेन म्याहासाङ डाङा। 31जब मोशै इसे डाङा टब होसे छक्क पर्या, र होसे ङोस्की डेम खेरेप नुङ्नाङ परमप्रभुओ याङ्च सोर सेया, 32‘ङा नुओ बोइ-बाज्यु अब्राहाम, इसहाक र याकुबौ परमेश्वर हो।’#प्रस्थान ३:६ इसे कुरा सेरखीङ मोशा बीर्हीम ठेर-ठेर बुरुका होटै होचे होलाक ङोसकी आट जाट्की न माय्होका। 33टब परमप्रभुये मोशाकी डेया, ‘नुओ मीहीलुङ चप्पल डोनो, हीजैडेनाङ कुसे ठावाङ नाङ टोङ्हने, होसे पवित्र ठाउँ हो। 34मिश्रदेशाङ लेच ङौ भर्मीकुङ कष्ट ङै डाङ्ङ ने र होखुरीकुङ बीलौना र सेमने। होखुरीककी छुटकारा याखी डेम ङा म्हाका राछ हो। अब नुङ्ना, ङा नाङ्की मिश्रदेशाङ बीर्न्हकाले।’#प्रस्थान ३:५-१०
35“होसे न मोशाकी लहो जातिकै इट डेयार इन्कार जाट्न्या, ‘सुये नाङ्की हाकीम र न्याय जाट्च खासार इला बीर्न्हका?’ होसकी न परमेश्वरै म्हे ढाम ङुच पोठ्राङ डाङ्च स्वर्गदूतै इस्राएलीकोलाक उद्धार जाट्की हाकीम र अगुवा खासार बीर्न्हका। 36होसे न भर्मीये मिश्र देशलकीङ बाहीर राका र ग्याच समुन्द्राङ र उजाड ठावाङ चालीस वर्षभरी अचम्मौ काम र चीन्हको जाटा। 37होसे न मोशै इस्राएलीकोलाक डेमन्या, ‘परमेश्वरै ङाकी बीर्न्हकानाङ लेखा न नाखुरीकुङ डाजे-भाइको लकीङ काट जना अगमवक्ता नाखुरीक लेठाङ बीर्न्हकाले।’#व्यवस्था १८:१५ 38इस्राएलीको उजाड-ठाँवाङ जम्मा छान्नाङ मोशा होखुरीक खाटा न लेया। स्वर्गदूत सीनै पर्बटाङ आसको खाटा ङाका र आसकै न कानकी याखीयो लागी जीवीत बचन डुपा।
39“टर कानुङ बोइ-बाज्युकै मोशाकी मामन्डीया र होखुरीकै आसकोकी डासार मिश्रदेशाङ न ल्हेसार नुङ्की मीमन जाटा। 40होटै होखुरीकै मोशौ डाजे हारुनकी डेया, ‘कानुङ अगाडी-अगाडी कानकी लाम टान्हाक्च देवताको खास्न यान्ही, हीजैडेनाङ कानकी मिश्रदेशीङ छ्युकार राक्च होसे मोशाकी ही छाना कान हीर माव्हार्ले।’#प्रस्थान ३२:१
41“होडीक बेला होखुरीकै काट बाछौ मूर्ति खासा र होच्यौ अगाडी भोग याहा अनी लहो मीहुटै खास्च कामाङ होखुरीकै खुसी मन्डीया। 42होटबाटै परमेश्वरै होखुरीककी डासा, र होखुरीककी सर्घाङ लेच नाखान, ग्याहोट र टुगाकोलाक पुजा जाट्की डास्न याहा, होच्यौ बारेयाङ अगमवक्ताकुङ कीताबाङ इट डेम रीक्ङने,
‘ए इस्राएलुङ भर्मीको,
ही नाखुरीकै ङाकी न चालीस वर्षसम्म उजाड ठावाङ पसुकुङ भोग र भेटीको चढडीया होइन र?
43नाखुरीकै मोलेख डेच डेबटौ पाल र रेफन डेबटौ टारा।
नाखुरीकै पुजा जाट्की खास्च होसे मूर्तिको बुवार आल्हा।
होटबाटै अब ङा नाखुरीककी दण्ड याखीयो लागी बेबीलोन डेनाङ लोस बीर्न्हकाले।’
44“उजाड-ठाँवाङ कानुङ बोइ-बाज्युकोखाटा गबाहीयो पाल लेया होला चहीँ होखुरीकै परमेश्वरौ आराधना जाट्नन्या। मोशै होसे पालकी परमेश्वरै टान्हाक्च नमुना अनुसाराङ न खास्नन्या। 45कानुङ बोइ-बाज्युकोलाक अन्यजातिकुङ देश जुकी परमेश्वरै सहायटा जाटा र होखुरीकै यहोसु खाटा होसे पाल राका। होटै दाउद राजौ पालोसम्म न होसे होखुरीक खाटा न ङुवा। 46परमेश्वर राजा दाउद खाटा मार्हाङ्न्या र याकुबौ परमेश्वरौ#७:४६ याकुबौ परमेश्वरौ यहूदिकै सेन खाल परमेश्वरकी याकुबौ परमेश्वर डेमन्या। याकुब चहीँ होखुरीकुङ पुर्खा लेया, न्हुइङ होसकी इस्राएल म्यार्मीन डा। लागी काट ङुच ठाउँ खास्की डेम बिन्ती जाटा। 47टर होसकुङ लागी मन्दिर चहीँ मीजा सोलोमनै मट्टै खासा।
48“टर परमेश्वर महान लेचबाटै भर्मीकुङ मीहुटै खास्च मन्दिरकोवाङ माङुले। अगमवक्तै इटजाट्न डेमने,
49‘परमप्रभु डेले, ङौ सिंहासन स्वर्ग हो र पृथ्वी चहीँ ङौ मीकु डाच ठाउँ हो,
र नाखुरीकै ङौ लागी कुङ्च मन्दिर खास्ले?
ङौ म्हुङबाट्च ठाउँ कुसे हो?
50ही इसे पट्ट न ठोक ङौ न मीहुटै खास्च होइन र?’#यशैया ६६:१-२
51“ए अट्टेरी भर्मीको, कठोर मीमन लेच र बहीरा मेन्केप लेचको, नाखुरीक सधैँ पवित्र आत्मौ विरोध जाट्ले। नाखुरीकुङ बोइ-बाज्युकै लेखा न नाखुरीकै जाट्ले। 52र अगमवक्ताको मढ्याङ कुसे चहीँकी नाखुरीकुङ बोइ-बाज्युकै मासटडीम्या र? होखुरीकै परमेश्वरौ पवित्र जन राम्हन ले डेम अघीलकीङ न घोसना जाट्च अगमवक्ताकोलाक समेट साटा। अनी नाखुरीकै राछ पवित्र जनकी ढोका याहार साटा। अब नाखुरीक चहीँ होसकुङ ज्यानमारा छान्ले। 53स्वर्गदूतकै याछ व्यवस्था च नाखुरीकै डुपा टर होसकी नाखुरीकै मामन्डीया।”
स्तिफनसकी ल्हुङै ङापार साट्च
54जब स्तिफनसौ इसे कुरा सेया अनी महासभाङ ङुच भर्मीको मीरीसै चुर छानार डार्हा जीका। 55टर होसे चहीँ पवित्र आत्मै न्हेपार स्वर्ग पट्टी एकोहोरो छानार ङोसा। अनी होचे परमेश्वरौ महीमा र येशूकी परमेश्वरौ डोर पट्टी टोङ्ह ङुच डाङा। 56अनी स्तिफनसै डेया, “ङोस्नी, ङै स्वर्ग फोस्च डाङ्ङ ने र भर्मीयो मीजाकी परमेश्वरौ डोरपट्टी टोङ्ह ङुच ङै डाङ्ङ ने।” 57टर होसे भर्मीको बाड्को सोरै च्याका र लाहा-लहो मेन्केप ठुना, र पट्ट न होसे मीटाक झम्टडीसा। 58होटै स्तिफनसकी होखुरीकै सहर बाहीर छ्युकार आल्हा। अनी साक्षीकै लाहा-लहो बढीन डोनार साउल डेच रेन्जा भर्मीयो मीकु छीनी डा। र होसकी साट्की डेम ल्हुङै ङाप्की ठाला। 59इटजाट्न होखुरीकै स्तिफनसकी ल्हुङ ङाप्चै हीर्कडीम न लेया, अनी होचे प्रार्थना जाटा, “ए प्रभु येशू, ङौ आत्माकी ग्रहण जाट्न यान्ही।” 60अनी होचे घुँडा टुसार बाड्को सोरै च्याकार डेया, “ए प्रभु, इसे पापौ दोष इखुरीककी मालक्डीसख्यौ।” इट डेयार होचे प्राण डासा।
Currently Selected:
प्रेरित 7: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
