प्रेरित 9
9
साउलौ जीवन परिवर्तन छान्च
(प्रेरित २२:६-१६; २६:१२-१८)
1टर साउल चहीँ अझै सम्म र प्रभुओ विश्वासीकुङ विरोधाङ लेया, होखुरीककी साट्च सुरै ढम्की याछै प्रधान पुजाहारी लेठाङ नुङा 2र होचे प्रधान पुजाहारीकी र दमस्कसुङ सभा ङुच इमकुङ अगुवाकोलाक होसे प्रभुओ लामाङ व्हाच पट्ट न लेन्जा मास्टोको सुकी डुप्ले होखुरीककी घोवार दण्ड याखी यरूशलेमाङ राक्की डीन्हीङ डेम पुर्जी रीक्की लैडीया।
3साउल दमस्कस नुङ्ङ न लेया अनी टाखी पाच बेलाङ मोसोमायाङ सर्घालकीङ काट ज्योति होच्यौ वरीपरी चम्कडीसा। 4होटै होसे झाङ कुरुव्हा र होचे इट डेच सोर सेया, “साउल, ए साउल, नीये ङाकी हीजै सटडीच?”
5साउलै डेया, “प्रभु, नाको सु आले?”
होसकै डेया, “सुकी नीये सटडीम न ले होसे येशू ङा न हो। 6अब सोवार सहराङ नुङ्ना, नीये ही जाट्की पर्च हो होला नाङ्की डेम याल्हे।”
7साउल खाटा नुङ्च भर्मीकै सोर चहीँ सेया टर सुकीर माडाङा होट छान्नाङ होखुरीक बीर्हीयार टोङ्ह ङुवा। 8होटै साउल सोवार मीमीक फोनाङ होचे हीर माडाङा र लाफाकै होसकी मीहुटाङ घोवार डोरीयार डमस्कसाङ राका। 9होला सोम याक सम्म होचे हीर डाङ्की माय्होका र हीर माज्या र मागा।
10दमस्कसाङ हननीया डेच काट जना विश्वासी लेया। होसकी प्रभुये दर्शनाङ डेया, “ए हननीया!” होचे डेया, “हजुर प्रभु?”
11प्रभुये होसकी डेया, “सोना र सीढा डेच गल्लीयाङ नुङ्ना र होला यहूदौ इमाङ साउल म्यार्मीन लेच काट जना टार्सस सहरुङ भर्मीयो बारेयाङ गीन्की, होचे प्रार्थना जाट्न ङुमने। 12होचे दर्शनाङ हननीया डेच काट जना भर्मी भीत्री राहार मेन मीमीक डान्ख्यौ डेम लाहा मीटाक होचे मीहुट डाच डाङ्ङने।”
13हननीये डेया, “प्रभु, होसे भर्मीये च यरूशलेमाङ लेच नाकुङ पवित्र भर्मीकोलाक साप्फी सटडीच कुरा ङै धेरै भर्मीको लकीङ सेमने। 14नाकुङ म्यार्मीन लाच पट्टकी घोच अधिकार मुख्य पुजाहारीको लकीङ होचे इला र डुप्मने।”
15टर हननीयाकी प्रभुये डेया, “नुङ्ना, हीजैडेनाङ अन्यजातिको, राजाको र इस्राएलीकुङ मीघ्याङ ङौ म्यार्मीन प्रचार जाट्की ङै होसकी न चुन्डीमने। 16र ङौ म्यार्मीनौ लागी होचे कुडीक कष्ट भोग्डीकी पर्ले, डेम ङा होसकी टान्हाक्ले।”
17हननीया नुङार होसे इम भीत्री पर्या र साउल मीटाक लहो मीहुट डार डेया, “साउल भाइ, जुन प्रभु येशू नाङ राम्हन लेच लामाङ नीये डाङ्ङन्या, होसकै नुओ मीमीक डाङ्ख्यौ र नाङ पवित्र आत्मै न्हेप्ख्यौ डेम ङाकी बीर्न्हकाच हो।”
18होस बेला न होचे मीमीकीङ पाप्रा ल्याक्च हीर झाल्नाङ लेखा सेया र होचे डाङ्की य्होका। अनी होचे सोवार बप्तिस्मा ला, 19होस न्हुइङ ज्यामा-गामा ज्या र होचे बल डुपा।
साउलै दमस्कसाङ प्रचार जाट्च
अनी साउल कालाप डीन सम्म दमस्कसाङ लेच विश्वासीको खाटा ङुवा। 20तुरुन्तै होचे सभा ङुच इमकोवाङ नुङार “येशू न परमेश्वरौ मीजा हो” डेम प्रचार जाट्की ठाला। 21साउलौ कुरा सेचको पट्ट न अचम्म मन्डीचै डेकी ठाला, “यरूशलेमाङ येशूओ म्यार्मीन लाच जटीकी साट्की पाच भर्मी ही इसे न होइन र? अनी इसे भर्मी न इला राहार येशूओ चेलाकोलाक घोवार मुख्य पुजाहारीको लेठाङ आल्छ होइन र?” 22साउलै जाट्च प्रचार झनै शक्तिशाली छान्चै नुङा र येशू मुक्ति याछ ख्रीष्ट हो डेच प्रमाण याहार दमस्कसाङ ङुच यहूदीकोलाक अकमक्क पार्न याहा।
23होटै वास्टै डीन छान्रखीङ यहूदीकै होसकी साट्च योजना जाटा। 24टर लाहाकी साट्की पाच होखुरीकुङ योजना साउलै थाहा डीन्हा। यहूदीको होसकी साट्की राटडीन दमस्कसुङ वार्लाक पार्लाक लेच पर्खालुङ गालामकोवाङ रुङ्ङमन्या। 25टर होसकी लहो विश्वासीकै नाबीक न डालोवाङ कार पर्खालौ झ्याल लकीङ डोरी कार झालाक्ङ याहा।
साउल यरूशलेम सहराङ
26साउल यरूशलेमाङ ल्हेस्रखीङ विश्वासीकोखाटा खाट्की पा। टर पट्ट न विश्वासीको होसे खाटा बीर्हीया हीजैडेनाङ होसे विश्वासी हो डेम होखुरीकै पट्डीकी माय्होका। 27टर बारनाबासै साउलकी प्रेरितको लेठाङ आल्हा। साउलै प्रभु येशूकी कुटजाट्न लामाङ डाङा, कुटजाट्न प्रभु होसेखाटा ङाका र कुजाट्न दमस्कसाङ साहासखाटा येशूओ म्यार्मीनाङ प्रचार जाटा डेच कुरा बारनाबासै प्रेरितकोलाक सेटाका। 28होटबाटै साउल होखुरीक खाटा ङुवा र यरूशलेमाङ खुल्ला रुपाङ व्हाचै साहासखाटा प्रभुओ म्यार्मीनाङ प्रचार जाट्की ठाला। 29साउलै ग्रीक ङाक्च यहूदीकोखाटा वाद-विवाद जाटा र होखुरीकै होसकी साट्की पा। 30टर इसे कुरा थाहा डीन्हार विश्वासीकै साउलकी कैसरीया सहराङ राका र टार्सस सहराङ बीर्न्हका।
31यहूदिया, गालील र सामरीयुङ पट्ट न मण्डलीकोवाङ शान्ति छानार मण्डलीको बलीयो छाना। होखुरीक प्रभुखाटा बीर्हीमन्या र होखुरीककी पवित्र आत्मै उत्साह याहा होटबाटै मण्डलीयाङ भर्मीको ठप्डीस्चै नुङा।
पत्रुस लुड्डा र योप्पा सहराङ
32पत्रुस वार्लाक पार्लाक पट्ट ठावाङ छेर्हाछै विश्वासीकोलाक डुपा। जब होसे लुड्डाङ लेच प्रभुओ पवित्र भर्मीको लेठाङ टाहा, 33होचे होला एनीयास डेच काट जना भर्मीकी डुपा। होसे आठ वर्षसम्म पक्षाघातौ रोगै छामो ओछ्यानाङ ठला पर्न ङुमन्या। 34पत्रुसै होसकी डेया, “ए एनीयास, येशू ख्रीष्टै नाङ्की चाहाँ न गेपाक्ले। सोना र नुओ ओछ्यान खाटाको।” होटै होसे तुरुन्तै सोकी क्योटा। 35होसे गेप्च डाङार लुड्डा र सारोनाङ ङुच पट्ट न भर्मीकै प्रभु मीटाक विश्वास जाटा।
36योप्पा सहराङ टबीटा म्यार्मीनुङ काट जना प्रभुवाङ विश्वास जाट्च मास्टो भर्मी लेया। ग्रीक भासाङ होसकी (डोरकास डेले र होच्यौ अर्थ चहीँ हरीनी हो।) होसे सधैँ सेछ कामाङ र गरीबकोलाक सहायटा जाट्कीयाङ लग्डीस्न ङुम्या। 37कायाक होसे बीमारी छानार सीया र भर्मीकै होच्यौ लासकी ठाक्की आल्खी डेम नहडीम याहार इमौ ढेम्च टलौ काट कोठाङ होसकी डा। 38लुड्डा योप्पा लकीङ खेरेप लेया। पत्रुस लुड्डाङ ले डेच कुरा विश्वासीकै थाहा डीन्हा। होटै होखुरीकै नीस जना भर्मीकी पत्रुस लेठाङ इट डेम बिन्ती जाट्की बीर्न्हका, “ढीलो माजाट्न कान लेठाङ राम्ह यान्ही!” 39टब पत्रुस सोवार होखुरीक खाटा नुङा र टाछ बीट्टीकै पत्रुसकी होखुरीकै ढेम्च टलौ कोठाङ आल्हा। बीढुवाको पट्ट न पत्रुस छीनी टोङ्हार राप्चै डोरकास होखुरीक खाटा लेनाङ होचे खास्न डाच बढीनको टान्हाका।
40टर पत्रुसै होखुरीक पट्टकी कोठालकीङ बाहीर बीर्न्हका र घुँडा टुसार प्रार्थना जाटा। होटै होचे लास पट्टी ल्हेसार डेया, “टबीटा, सोना!” होचे मीमीक फोवा र पत्रुसकी ङोसा र होसे सोवार ङुवा। 41पत्रुसै होसकी मीहुटाङ घोवार सोटा अनी प्रभुओ पवित्र भर्मीको र बीढुवाकोलाक आर्घाम सीचकी जीवाटाकार टान्हाका।
42इसे कुरा पट्ट न योप्पा सहर भरी फैलडीसा र वास्टै भर्मीकै प्रभुवाङ विश्वास जाटा। 43होस न्हुइङ पत्रुस वास्टै डीन सम्म छालौ काम जाट्च काट जना सीमोन डेच भर्मीखाटा योप्पाङ ङुवा।
Currently Selected:
प्रेरित 9: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
