प्रेरित 4
4
पत्रुस र युहन्ना महासभौ म्याहासाङ
1पत्रुस र युहन्ना भर्मीको खाटा ङाक्चै जाट्नाङ पुजाहारीको, परमेश्वरौ मन्दिरुङ सीपाहीकुङ कप्तान र सदुकीको होखुरीक लेठाङ राहा। 2होखुरीक पत्रुस र युहन्ना खाटा मीरीस ख्योम्हन्या, हीजैडेनाङ येशू जीवाम सोमने र अरु भर्मीको र जीवाम सोले डेम होखुरीकै शिक्षा याहा। 3होखुरीकै पत्रुस र युहन्नाकी घोवा। होटै पीउर्हाक गोराक सम्म ठुनार डा, हीजैडेनाङ होडीक बेला छुम्ह भ्यामन्या। 4टर बचन सेचको मढ्याङ वास्टै जनै विश्वास जाटा र विश्वास जाट्च लेन्जा भर्मीकुङ सङ्ख्या बाङा हजार टडीक लेया।
5होटै पीउर्हाक लेखो शासकको, धर्मगुरुको र अगुवाको यरूशलेमाङ भेला छाना। 6होला प्रधान पुजाहारी हन्नास अनी लहो खेरेपुङ साइनो पर्च कैयाफा, युहन्ना, अलेक्जेन्डर र प्रधान पुजाहारीयो पट्ट न परीवारको होला लेया। 7होटै होखुरीकै पत्रुस र युहन्नाकी मीघ्याङ टोङ्हाकार गीना, “कुसे शक्तिये अठबा सुओ म्यार्मीनाङ इसे काम नाखुरीकै जाट्च हो?”
8टब पवित्र आत्मै न्हेपार पत्रुसै होखुरीककी डेया, “भर्मीकुङ शासकको र अगुवाको, 9छीनी कानै इसे लङ्गडा भर्मीकी गेपाकार सेछ काम जाट्च बारेयाङ होसकी कुटजाट्न गेपाका डेयार गीन्ले डेनाङ, 10नाखुरीक पट्टकी र इस्राएलुङ पट्ट न भर्मीकोलाक थाहा छान्ख्यौ की नाखुरीकै क्रूसाङ टङ्गडीच टर परमेश्वरै सीच लकीङ जीवाटाक्च, होसे न नासरतुङ येशू खीरीस्टौ म्यार्मीनाङ इसे भर्मी गेपार नाखुरीकुङ म्याहासाङ टोङ्हने। 11होसकुङ बारेयाङ धर्मशास्त्राङ रीक्ङने,
‘कुसे ल्हुङ्की डकर्मीकै इन्कार जाटा,
होसे न ल्हुङ चाहाँ कोनुङ सुर ल्हुङ छान्नने।’
12“अरु सु लेठाङ र मुक्ति माले हीजैडेनाङ संसाराङ कुसेर म्यार्मीन माय्हामने होसे म्यार्मीनै चहीँ काल्हाकी जीवाक्की य्होक्ले।”
13जब होखुरीकै पत्रुस र युहन्नौ#भजनसंग्रह ११८:२२ साहास डाङार होखुरीक अचम्म मन्डीया हीजैडेनाङ होखुरीक मापरेस्च साढारन भर्मीको लेसा र इखुरीक येशू खाटा र ङुमन्या डेम होखुरीकै थाहा डीन्हा। 14टर होसे गेप्च भर्मीकी पत्रुस र युहन्ना खाटा टोङ्ह ङुच डाङा अनी होखुरीकै हीर डेकी माय्होका। 15होटबाटै पत्रुस र युहन्नाकी महासभालकीङ बाहीर बीर्न्हका अनी होखुरीकै इट डेयार मेखुरीक-मेखुरीक सल्ल्हा जाटा, 16“अब इसे भर्मीकोलाक कानै ही जाटीङ? हीजैडेनाङ साँच्ची न इखुरीक लकीङ काट अचम्मौ काम छान्न ने डेम यरूशलेमुङ पट्ट न भर्मीकोलाक थाहा छान्न भ्यामने र इसे कुराकी कानै होइन डेकी र माय्होक्ले। 17टर इसे कुरा भर्मीकुङ मीघ्याङ माफैलडीस्ख्यौ। होटबाटै इखुरीककी आदेश यहीङ फेरी इखुरीकै येशूओ म्यार्मीनौ बारेयाङ सेन्र सुकीर माडेख्यौ।”
18होटै पत्रुस र युहन्नाकी भीत्री आर्घार “अब लकीङ येशूओ म्यार्मीनाङ सुखाटार हीर माङाक्की र मापाहाक्की” डेयार होखुरीकै कडा चेटावनी याहा। 19टर पत्रुस र युहन्नै होखुरीककी जबाफ याहा, “नाखुरीकै डेच कुरा मन्डीकी की परमेश्वरै डेच कुरा मन्डीकी, परमेश्वरौ म्याहासाङ कुसे चहीँ ठीक ले? नाखुरीक न बीचार जाट्नी। 20हीजैडेनाङ कानै डाङ्च र सेच कुराको कान माङाक्ङ ङुकी माय्होक्ले।” 21महासभुङ भर्मीकै पत्रुस र युहन्नाकी सजाय याखी हीर उपाय माडुप्चबाटै होखुरीककी झन साप्फी ढम्की याहार डास्न याहा। हीजैडेनाङ ही घटना छानन्या होच्यौ लागी पट्ट न भर्मीकै परमेश्वरौ प्रशंसा जाट्न न लेया। 22हीजैडेनाङ होसे भर्मी अचम्मौ काम लकीङ गेप्मन्या होसे भर्मी लङ्गडा छानार ङुच चहीँ चालीस वर्ष डेनाङ वास्टै छान्नन्या।
विश्वासीकुङ प्रार्थना
23होटै डास्न याछ बीट्टीकै पत्रुस र युहन्ना लाफाको लेठाङ राहा। अनी मुख्य पुजाहारीकै र अगुवाकै डेच पट्ट न कुराको होखुरीककी सेटाका। 24अनी इसे कुरा सेयार होखुरीकै परमेश्वर पट्टी लहो सोर गाराङ्चै प्रार्थना जाटा, “ए सर्वशक्तिमान प्रभु, स्वर्ग, पृथ्वी, समुद्र र होला लेच पट्ट न ठोक नाकै न खासा। 25र नाकै पवित्र आत्मा लकीङ लहो सेवक कानुङ पुर्खा दाउदौ मेङेर लकीङ ङाका,
‘अन्यजातिको हीजै मीरीस ख्योहा?
र हीजै भर्मीकै व्यर्थौ योजना कल्पना जाटा?
26परमप्रभु र होसकुङ मुक्ति याछ ख्रीष्टौ विरोधाङ पृथ्वीयुङ राजाको सोवा,
अनी शासकको र काठोव्हाङ भेला छाना।’#भजनसंग्रह २:१-२
27“साँच्ची न इसे कुरा पुरा छाना हीजैडेनाङ हेरोद र पन्तियस पिलातस नीस जना, अन्यजाति र इस्राएलीको यरूशलेम सहराङ, नाकै अभिषेक जाट्च, नाकुङ पवित्र सेवक येशूओ विरोधाङ भेला छानन्या। 28होखुरीक पट्टये नाकुङ शक्ति र योजना अनुसार अघीलकीङ न निश्चित जाट्च अनुसार पट्ट न काम जाटा। 29ए प्रभु, अब होखुरीकुङ ढम्कीकी ङोस्नी र नाकुङ सेवककोलाक पुरा साहसखाटा नाकुङ बचन ङाक्की यान्ही। 30नाकुङ शक्तिये भर्मीकोलाक गेपाक्नी, र लहो पवित्र सेवक येशूओ म्यार्मीन लकीङ अचम्मौ कामको र चीन्हको छान्ख्यौ।”
31अनी होखुरीकै प्रार्थना जाट्न भ्यारखीङ होखुरीक भेला छान्च ठाउँ होयोवा। होटै होखुरीक पट्ट जना पवित्र आत्मै न्हेपा र होखुरीकै साहासखाटा परमेश्वरौ बचन ङाका।
विश्वासकुङ पट्ट सम्पत्ति साझ्या
32अनी विश्वास जाट्चकुङ समुह पट्ट न काट मीमनौ छानन्या। होखुरीक सुयेर लहो धन-सम्पत्तियो हीर ठोककी इसे ङौ हो माडेम्या टर होखुरीकुङ पट्ट न ठोक साझ्या लेया। 33होसे प्रेरितकै बाड्को शक्तियाङ प्रभु येशू सीच लकीङ जीवाम सोचओ बारेयाङ गबाही याम्हन्या र होखुरीक पट्टको मीटाक बाड्को अनुग्रह लेया। 34होखुरीक मढ्याङ सुकीर ही कुरौ र खाँचो मापर्न्या। कुडीक जना बारी र इमौ मीमुरुङ्को लेया, होखुरीकै होसे आर्लार होसे लकीङ राछ पैसा राक्ङन्या 35होटै प्रेरितकोलाक जीम्मा याम्हन्या। अनी सु-सुकी ही-ही कुरौ खाँचो पर्ने होसे अनुसार पट्ट कोलाक होखुरीकै पुङ्ङ याम्हन्या।
36साइप्रस देशुङ लेवी कुलुङ योसेफ डेच भर्मी लेया। होसकी प्रेरितकै बारनाबास डेयार म्यार्मीन डामन्या (होच्यो अर्थ चहीँ उत्साह याछ भर्मी हो)। 37होचे र लहो काट टुक्रा बारी आर्ला अनी होसे पैसा राकार प्रेरितकोलाक याहा।
Currently Selected:
प्रेरित 4: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
