प्रेरित 5
5
हननीया र सफीरा
1इसे न समयाङ हननीया म्यार्मीनौ काट जना भर्मी र मेन मास्टो सफीरा लेया, होखुरीकै र लहो चेक्जा य्हा आर्ला, 2अनी होसे पैसा मेन मास्टो र मेल्हा सल्लाह जाटा र चेक्जा पैसा लाहा खाटा डा, अनी बाकी पैसा राकार पट्ट न पैसा इडीक न हो डेयार प्रेरितकोलाक याहा। 3पत्रुसै डेया, “ए हननीया, पवित्र आत्माकी ढाँट्डीच र य्हा आर्लाच पैसा चेक्जा लाहा खाटा डाच कुरा शैतानै कुटजाट्न नाकुङ मीमनाङ काम याहा? 4होसे य्हा नाकै माआर्लाठर ही नाकुङ लहो न मालेया र? होसे आर्लारखीङ र होसे पैसा नाकुङ न अधिकाराङ मालेया र? याङ्च काम जाट्च बीचार नाकुङ मीमनाङ कुट जाट्न राहा? नाकै भर्मीकोलाक मट्टै होइन टर परमेश्वरकी न ढाँट्डीमे!” 5इसे कुरा सेच बीट्टीकै हननीया झाङ कुरुव्हार सीया। अनी इसे कुरा सेचको पट्ट न सार्है बीर्हीया। 6अनी रेन्जा भर्मीको राहार होसकी काट्रोये बेर्हडीया र बाहीर आल्हार ठाका।
7होटै सोम घन्ट न्हुइङ हननीयो मास्टो र भीत्री राहा। होसकी मेन लेन्जा ही छाना डेच बारेयाङ हीर थाहा मालेया। 8होटबाटै पत्रुसै होसकी गीना, “ङाकी डेनी, नाखुरीकै य्हा होडीकाङ न आर्लाच हो?” होचे डेया, “होडीकाङ न हो।” 9टर पत्रुसै होसकी डेया, “नाखुरीक प्रभुओ आत्माकी ढाट्डीकी कुटजाट्न नीस जनौ न बीचार काट छाना? ङोस्नी, नाकुङ लेन्जाकी ठाकार राछ भर्मीको गालामटुङाङ मट्टै टार्हामने। होखुरीकै नाकोकी र होटजाट्न न बुवार ठाक्की आल्हे।” 10इसे कुरा सेच बीट्टीकै होसे र पत्रुसौ मीकु छीनी कुरुव्हार सीया। होटै होसे रेन्जा भर्मीको भीत्री राहा र होसकी सीम भ्याच डाङार बाहीर बुवार आल्हा र मेन लेन्जा छीनी न ठाका। 11होटै मण्डलीयुङ पट्ट भर्मीको र इसे घटनौ बारेयाङ सेच पट्ट न साप्फी बीर्हीया।
अचम्मौ कामको र चीन्हको
12प्रेरितको लकीङ अचम्मौ कामको र चीन्हको भर्मीकुङ मीघ्याङ वास्टै छान्की ठाला। अनी विश्वास जाट्च पट्ट न परमेश्वरौ मन्दिरौ सोलोमनौ दलानाङ घरी न घरी भेला छानन्या। 13अरु भर्मीको बीर्हीयार होखुरीक खाटा खाट्की राछ आट सुयेर जाट्की माय्होक्न्या टर भर्मीकै होखुरीककी आदर चहीँ साप्फी जाट्नन्या। 14अनी प्रभुकी विश्वास जाट्चै लेन्जा मास्टोकुङ भीड होखुरीकुङ समुहाङ ठप्डीस्की ठाला। 15अगाडी ही-ही घटना छाना होच्यौ कारनै भर्मीकै लामाङ छाचकोलाक राकार डामन्या। हीजैडेनाङ पत्रुस रान्हाङ होच्यौ छाया मट्टै लेनाङ र छाचको मीटाक पर्ख्यौ डेम ओछ्यानको खाटा न होखुरीककी मीसाक्ङ डामन्या। 16यरूशलेम वार्लाक पार्लाकुङ लाङ्घा लकीङ र वास्टै भर्मीकै छाचको र दुष्ट आत्मै डुख याछकोलाक लार राम्हन्या अनी होखुरीक पट्ट न गेप्मन्या।
प्रेरितकोलाक सतावट राछ
17होटै प्रधान पुजाहारी र होसे खाटा लेच अरु सदुकीको पट्ट न मीरीसै प्रेरितकुङ विरोधाङ सोवा। 18अनी होखुरीकै प्रेरितकोलाक घोवार झ्यालानाङ का। 19टर प्रभुओ काट स्वर्गदूतै नाबीक झ्यालखानौ गालामको फोम याहा र होखुरीककी बाहीर राकार डेया, 20“नुङ्नी र परमेश्वरौ मन्दिराङ खडा छानार इसे नयाँ जीवनौ पट्ट न खबर भर्मीकोलाक सेटाक्नी।” 21इसे कुरा सेरखीङ होखुरीक कागोराक न परमेश्वरौ मन्दिराङ नुङार भर्मीकोलाक शिक्षा याखी ठाला।
प्रधान पुजाहारी र होसे खाटा लेचको राहा र इस्राएलीकुङ पट्ट न अगुवाकोलाक महासभाङ आर्घा होटै प्रेरितकोलाक झ्यालखानीङ राक्की डेयार भर्मीकोलाक बीर्न्हका। 22टर सीपाहीकै होखुरीककी झ्यालखानाङ माडुपा र ल्हेस्न राहार इसे खबर याहा, 23“कानै झ्यालखानाङ सेम्हजा साँचा काच र पाल्याको गालामकोवाङ टोङ्ह ङुच न डाङा टर कानै गालाम फोवार भीत्री ङोस्नाङ सुकीर माडुपा।” 24होटै परमेश्वरौ मन्दिरुङ सीपाहीकुङ कप्तान र मुख्य पुजाहारीकै इसे खबर सेया अनी इसे पट्ट अब ही छान्ले औँला डेम होखुरीक प्रेरितकुङ बारेयाङ अलमलाङ पर्या। 25टर होडीक न बेला काट जना भर्मी राहार होखुरीककी डेया, “सेनी! नाखुरीकै कुसे भर्मीकोलाक झ्यालखानाङ डामन्या होखुरीक च मन्दिराङ खडा छानार भर्मीकोलाक शिक्षा याम्हन ले।” 26अनी इसे कुरा सेरखीङ कप्तान र सीपाहीको प्रेरितकोलाक लाकी नुङा र जबरजस्टी माजाट्न न राका हीजैडेनाङ भर्मीकै होखुरीककी ल्हुङै ङापार आसाटै डेम होखुरीक बीर्हीया।
27होटै प्रेरितकोलाक महासभौ म्याहासाङ होखुरीकै टोङ्हाका अनी प्रधान पुजाहारीये होखुरीककी गीना, 28“कानै नाखुरीककी इसे म्यार्मीनाङ हीर शिक्षा माय्हाखी डेम कडा आज्ञा याम्हन्या टर नाखुरीकै च लहो शिक्षाये पट्ट यरूशलेम न्हेपाक्ङ भ्या। अझै होसे येशूकी साट्च दोष कान मीटाक लैडीकी पाले।”
29पत्रुस र अरु प्रेरितकै डेया, “कानै भर्मीकुङ होइन टर परमेश्वरौ आज्ञा मन्डीकी न पर्ले। 30कानुङ बोइ-बाज्युकुङ परमेश्वरै येशूकी सीच लकीङ जीवाका, होसकोकी नाखुरीकै क्रूसाङ टङ्गडीयार साट्नन्या। 31परमेश्वरै इस्राएलीकोलाक पाप डासार परमेश्वर पट्टी ल्हेस्ख्यौ र होखुरीकै पाप लकीङ क्षमा डुप्ख्यौ डेम येशूकी मुक्ति याछ राजा खासार लहो डोर मीहुट पट्टी डा। 32इसे पट्ट न कुराकुङ कान र पवित्र आत्मा साक्षी ले। अनी होटजाट्न न परमेश्वरै लहो आज्ञा मन्डीच कोलाक पवित्र आत्मा याम्हने।”
33जब होखुरीकै इसे कुरा सेया अनी होखुरीक साप्फी मीरीस खेव्हा र प्रेरितकोलाक साट्की नीढो जाटा। 34टर धर्मगुरु र भर्मीकै आदर जाट्च गमलीएल म्यार्मीन लेच फरीसीये महासभाङ सोवार प्रेरितकोलाक काटछीन बाहीर नुङ्की लैडीया। 35होटै होचे महासभाङ लेच भर्मीकोलाक डेया, “ए इस्राएलीको, इसे भर्मीकोलाक नाखुरीकै ही जाट्की पामने, होसीयार छान्नी। 36हीर समय अघी काट जना ठुडास डेच भर्मी लाहाकी ङा बाड्को हो डेम राहा। बुलीसय टडीक भर्मीको होच्यौ न्हुङ-न्हुङ व्हा टर होसे भर्मीकी साटा र होसे पट्ट न भर्मीको छरपस्ट छानार ही न ही छाना। 37होटै इसे भर्मी न्हुइङ जनगननौ समयाङ गालीलुङ यहूदा डेच काट भर्मी राहा। होचे वास्टै भर्मीकोलाक लाहा पट्टी पार्या टर होसकीर साटा होटै होसे पट्टी नुङ्च भर्मीको पट्ट न छरपस्ट छाना। 38होटबाटै इसे मामीलाङ ङा नाखुरीककी डेले, इसे भर्मीको लकीङ लोस ङुनी र इखुरीककी डास्न यान्ही, हीजैडेनाङ इखुरीकुङ योजना र काम भर्मीकोलकीङ हो लेसा डेनाङ होसे मेल्हा न म्हाटार नुङ्ले। 39टर इसे परमेश्वर लकीङ न हो लेसा डेनाङ नाखुरीकै इसकी रोकडीकी माय्होक्ले। नभा च नाखुरीक परमेश्वरौ विरोधाङ सोच छान्ले।”
40होटै महासभाङ लेच भर्मीकै गमलीएलौ सल्हा मन्डीया। अनी होखुरीकै प्रेरितकोलाक भीत्री आर्घा र होखुरीककी डुङ्की सीपाहीकोलाक लैडीयार “अब येशूओ म्यार्मीनाङ नाखुरीकै हीर मापाहाक्की” डेम कडा आज्ञा याहार होखुरीककी डास्न याहा। 41प्रेरितको महासभालकीङ आनन्द मन्डीचै बाहीर ख्योहा, “परमेश्वरै कानकी येशूओ म्यार्मीनाङ डुख र अपमान सहडीकी य्होक्च खास्नने” डेयार होखुरीक आनन्द छाना। 42होटै होखुरीकै डीन-डीनै परमेश्वरौ मन्दिराङ र इम-इमाङ नुङार येशू मुक्ति याछ ख्रीष्ट हो डेयार पाहाक्की र सेछ समाचार सेटाक्की माडासा।
Currently Selected:
प्रेरित 5: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
