प्रेरित 3
3
काट जना लङ्गडा गेप्च
1कायाक पत्रुस र युहन्ना नाम्सीन सोम बजे प्रार्थना जाट्की डेम परमेश्वरौ मन्दिराङ नुङ्ङ न लेया। 2परमेश्वरौ मन्दिर भीत्री पर्चको खाटा भीख ङेखी डेम जन्मै लकीयुङ काट जना लङ्गडाकी भर्मीकै बुम राक्न्या र डीन-डीनै परमेश्वरौ मन्दिरौ सुन्दर म्यार्मीनुङ गालामाङ डाम याम्हन्या। 3अनी होचे पत्रुस र युहन्नाकी परमेश्वरौ मन्दिर भीत्री नुङ्चै जाट्च डाङार होखुरीक खाटा भीख ङेहा। 4युहन्ना र पत्रुसै होसे लङ्गडाकी सेम्ह ङोसार पत्रुसै डेया, “कान पट्टी ङोसो!” 5अनी होखुरीक लकीङ हीर डुप्च आशा जाटार होचे ढ्यान याहार होखुरीककी ङोसा। 6र पत्रुसै डेया, “ङा खाटा सुन-चाँडी माले टर ङाखाटा हीले, होसे न ङा नाङ्की याल्हे। नासरतुङ येशू ख्रीष्टौ म्यार्मीनाङ सोवार व्हाना!” 7अनी पत्रुसै होच्यौ डोर मीहुट घोवार होसकी सोटा र तुरुन्तै होडीक न बेला होसे भर्मीयो मीखुट्यौ गोली-गाठाकोवाङ टागट राहा। 8अनी होसे जुरुक्कै सोवार टोङ्हा र व्हाकी ठाला। होटै होसे व्हाचै फोर्जोछै परमेश्वरौ प्रशंसा जाट्चै होखुरीक खाटा परमेश्वरौ मन्दिर भीत्री पर्या। 9अनी पट्ट भर्मीकै होसकी व्हाचै जाट्च र परमेश्वरौ प्रशंसा जाट्च डाङा। 10होखुरीकै होसकी परमेश्वरौ मन्दिरौ सुन्दर म्यार्मीनुङ गालामटुङाङ ङुवार भीख ङेखी ङुम-ङुच इसे न हो डेयार चीन्डीया। अनी होच्यौ जीवनाङ याङ्च घटना छान्च डाङार होखुरीक साप्फी अचम्म मन्डीया।
मन्दिराङ पत्रुसौ उपदेश
11होसे गेप्च भर्मी पत्रुस र युहन्नौ मीहुट घोवार व्हाच डाङार पट्ट न भर्मीको अचम्म मन्डीचै सोलोमन डेच दलानाङ खेर्न राहा। 12अनी पत्रुसै होखुरीककी ङोसार डेया, “ए इस्राएलुङ भर्मीको, इसे कुराङ नाखुरीक हीजै अचम्म मन्डीचै ङोस्च? ही कानै लहो शक्ति र भक्टीये इसकी व्हाकी य्होक्च खास्च हो र? 13अब्राहाम, इसहाक र याकुबौ परमेश्वर, कानुङ पुर्खाकुङ परमेश्वरै लहो सेवक येशूकी महीमीत पार्या। नाखुरीकै चहीँ होसे न येशूकी घोवाका र पिलातसै होसकोकी डास्न याछ बीचार जाट्नाङ र नाखुरीक होसकुङ न म्याहासाङ मामन्डीया। 14टर नाखुरीकै पवित्र र धर्मी भर्मीयो सट्ठाङ काट भर्मी साट्चकी डास्न याखी डेम ङेहा। 15र जीवन याछकी चहीँ नाखुरीकै साटा। टर होसकोकी परमेश्वरै सीच लकीङ जीवाक्ङ ने र इसे कुरौ कान साक्षी ले। 16येशूकी विश्वास जाट्च बाटै इसे लङ्गडै बल डुपा। होसकुङ म्यार्मीन लकीङ होच्यौ मीमनाङ विश्वास राहा। इच्यौ विश्वासै जाट्न अब नाखुरीकै न डाङ्च र चीन्डीच इसे भर्मी गेप्च नाखुरीकै डाङ्ङन ले।
17“ए इस्राएली लाफाको, ङाकी थाहा ले, नाखुरीक र नाखुरीकुङ शासककै येशू सु हो डेम माचीन्डीम न साट्च हो। 18टर मुक्ति याछ ख्रीष्टै डुख भोग्डीकी पर्ले डेम परमेश्वरै अघीलकीङ न पट्ट अगमवक्ताकुङ मेङेरीङ डेच अगमवाणी होसकै इटजाट्न पुरा जाटा। 19होटबाटै पश्चात्ताप जाट्नी र पाप लकीङ ल्हेस्नी अनी नाखुरीकुङ पापको मेट्डीम याल्हे। नाखुरीकै परमप्रभु लकीङ शान्ति र आनन्द डुप्ले। 20र परमेश्वरै नाखुरीकुङ लागी अघीलकीङ न चुन्डीच मुक्ति याछ ख्रीष्ट येशूकी बीर्न्हकाम याल्हे। 21टर परमेश्वरै खायाक लकीङ लहो पवित्र अगमवक्ताकुङ मेङेरीङ ङाक्च पट्ट न कुराको नयाँ खास्च समय मार्हाठर येशू स्वर्गाङ न ङुकी पर्ले। 22मोशै डेमन्या,
‘परमप्रभु परमेश्वरै ङाकी खडा जाट्नाङ लेखा न
नाखुरीकुङ डाजे भाइकुङ मीघीङ काट अगमवक्ता नाखुरीकुङ लागी खडा जाट्ले।
अनी होसकै नाखुरीककी ही-ही डेले
होसे पट्ट न कुरा नाखुरीकै सेकी पर्ले।
23टर होसे अगमवक्तौ कुरा मासेच भर्मीको चहीँ
परमेश्वरौ जनको लकीङ भाक्ले र नास छान्ले।’#व्यवस्था १८:१५,१८-१९
24“अगमवक्ता समुएल लकीङ न्हुङ्लाकुङ पट्ट न अगमवक्ताकै र इसे डीनकोवाङ छान्न ङुच कुराकुङ बारेयाङ डेमन्या। 25परमेश्वरै अगमवक्ताको लकीङ याछ करार नाखुरीकुङ लागी हो, र परमेश्वरै नाखुरीकुङ पुर्खा अब्राहामखाटा जाट्च करार र नाखुरीकुङ लागी हो। परमेश्वरै अब्राहामकी डेया, ‘नाकुङ सन्टानको लकीङ ङा पृथ्वीयुङ पट्ट न जातिकोलाक आसीस याल्हे।’#उत्पत्ति २२:१८ 26नाखुरीक पट्ट कोलाक लहो दुष्ट कामको लकीङ ल्हेटाकार नाखुरीककी आसीस याखी डेम परमेश्वरै लहो सेवक येशूकी चुन्डीयार नाखुरीक इस्राएलुङ भर्मीको लेठाङ पहीला बीर्न्हकाच हो।”
Currently Selected:
प्रेरित 3: EMGP
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
